Edhe në ditën e Kurban Bajramit, partitë politike shfrytëzojnë për të bërë “fushatë” në mënyrën më të ulët, duke u treguar sesa “dorë shlir” janë me të varfrit.
Partia e drejtësisë ka postuar foto duke dërguar edhe komunikatë për media me njoftimin se paskan dërguar disa ndihma tek nevojtarët.
Janë procedurat e stërzgjatura ato që po i bëjnë gratë e prekura me kancer të gjirit të ndihen të rrezikuara për jetë nëse presin për të marrë shërbimet brenda institucioneve publike rreth trajtimit të sëmundjes, ndonëse nuk kanë dyshime në profesionalizmin e stafit që punon nëpër këto institucione.
Nafije Latifi, njëra nga gratë që vetë ka luftuar prej vitesh kundër kancerit të gjirit, thotë se në mungesë të politikave efikase shëndetësore nga ana e Ministrisë së Shëndetësisë, nëpër institucionet publike stërzgjaten të gjitha procedurat që ndërlidhen me sëmundjen e kancerit të gjirit, që nga ajo për diagnostifikimin e saj, e deri tek trajtimi me radio e kimioterapi, shkruan Koha Ditore
“Stafit këtu nuk i mungon profesionalizmi për t’ua ofruar këto shërbime pacientëve, por mungojnë kushtet”, thotë Latifi.
E kështu si Latifi thonë edhe paciente të tjera, e madje edhe vetë mjekët e QKUK-së.
Së paku tri javë duhet të presë një paciente për marrjen e analizave të biopsisë për të parë nëse ka apo jo qeliza kancerogjene në Klinikën e Biokimisë Mjekësore, në Qendrën Klinike Universitare (QKUK), thotë për gazetën një mjek i këtij institucioni, i cili ka kërkuar që të mos i përmendet emri në gazetë. Të njëjtën analizë pacienti e merr brenda tri ditësh në institucionet private shëndetësore, thotë ky mjek
Kosovës i mungon puna ekipore në luftën kundër kancerit, i mungon puna konzoliare. Këtu është fillimi dhe fundi i problemit pse lufta kundër kësaj sëmundjeje nuk po shkon deri në fund.
Ani pse Kosova ka pajisje, ka ekspertë, por secili punon kokë në vete, thotë në një intervistë për “Kohën Ditore”, eksperti për sëmundjen e kancerit të gjirit, Elvis Ahmeti.
Ai flet edhe mbi efektet që mund të kenë për pacientet mungesa e barnave, ndërprerja e detyrueshme e kemio apo e radioterapisë, për shkak se pacientet nuk ka mundësi t’i bëjnë ato, flet për mamografët modernë që i ka Kosova, e për të cilët shpeshherë mungojnë filmat, prandaj pacientet presin në radhë deri në dy muaj për një kontroll mamografie.
Ai tregon se si bota moderne ka zbuluar se identifikimi i hershëm i kancerit dhe trajtimi adekuat i tij, janë çelësi i suksesit, dhe të dyja këto gjëra janë sfida në Kosovë.
Sa mund të jemi të kënaqur me shërbimet shëndetësore për sa i përket luftës kundër kancerit të gjirit, nisur që nga mungesa e regjistrit për evidentimin e rasteve që preken nga kjo sëmundje?
Ahmeti: Jo vetëm Kosova, por asnjë vend në rajon nuk ka pasur regjistër të kancerit. Me punën në Bordin për luftimin e kancerit, i formuar në vitin 2011, ne e kemi përpiluar formularin për regjistrimin e të të prekurve me kancer. Që atëherë ai funksionon, jo sa duhet, por ka disa të dhëna. Kjo ka ndihmuar që ne, së paku t’i kemi disa të dhëna tepër të nevojshme rreth shtrirjes së kësaj sëmundjeje, siç është ajo kur kemi parë se vitin e kaluar, nga të gjitha llojet e rasteve të reja me kancer, prin kanceri i gjirit me 224 raste të reja në vit. Kjo është sfidë, sepse kërkon luftimin e tij.
Blloku ka dorëzuar kërkesën për mbajtjen e seancës konstituive më 9 tetor ndërsa administrata e Kuvendit u ka shpërndarë shkresën deputetëve dhe presidencës. PDK nuk do të shkojë në seancë, nëse ajo nuk thirret nga kryesuesja Brovina.
Partitë e Bllokut kanë dorëzuar në Sekretarinë e Kuvendit kërkesën për mbajtjen e seancës konstituive më 9 tetor. Por, deputetët e PDK-së kanë deklaruar se nuk do të shkojnë në këtë seancë, nëse ajo nuk thirret nga kryesuesja Flora Brovina.
Nënkryetari i PDK-së, Hajredin Kuçi, ka theksuar se do të shkojnë në seancë vetëm nëse ajo thirret nga kryesuesja Brovina.
Kurse kryetari i Partisë Demokratike Turke të Kosovës, që është edhe pjesë e Grupit 6+, Mahir Jagxhillar, ka thënë se ky grup do të shkojë në seancën e ftuar nga blloku nëse kjo procedohet si e rregullt.
Deputetja e LDK-së, Vjosa Osmani, ka thënë se thirrja e seancës është ligjore dhe sipas saj sekretaria e Kuvendit nuk aprovon e as nuk refuzon kërkesa të tilla. Administrata e Kuvendit ka njoftuar se ua ka shpërndarë shkresën deputetëve për seancën e 9 tetorit.
Administrata ka sqaruar se shkresa e nënshkruar nga 62 deputetë i është adresuar edhe kryesueses së seancës konstituive, Flora Brovina, kurse me përmbajtjen e saj është njoftuar presidentja e Republikës së Kosovës, Atifete Jahjaga.
Nënkryetari i PDK-së, Xhavit Haliti, tha se Flora Brovina është e vetmja ajo që mund ta thërrasë vazhdimin e seancës. Sipas tij brenda seancës janë vetëm dy variante, që të votohet ose të mos votohet kandidati i PDK-së, ndërsa varianti tjetër është marrëveshja.
Haliti tha se blloku është ngutur me këtë veprim, pasi, sipas tij është dashur të pritet edhe për 4-5 ditë, për ndonjë marrëveshje.
Ndërkaq deklarimi i nënkryetarit të PDK-së, Enver Hoxhaj, për një koalicion PDK-LDK–AAK po shihet vetëm si dëshirë dhe manipulim nga drejtuesit e këtyre partive. Anëtari i Kryesisë së Lidhjes Demokratike të Kosovës, Arben Gashi, ka thënë për RTK-në se ai as që është në dijeni nëse PDK ka dalë me një propozim të tillë.
Por edhe nëse ky propozim ofrohet, Gashi ka thënë se LDK tashmë e ka një qëndrim zyrtar dhe se ai është koalicioni me Aleancën për Ardhmërinë e Kosovës, Nismën për Kosovën dhe Lëvizjen Vetëvendosje.
Edhe Ahmet Isufi nga AAK-ja ka thënë se nuk ka asnjë lëvizje drejt bashkimit të LDK-së, AAK-së dhe PDK-së. Ai ka deklaruar se bashkimi i këtyre partive nuk do të ndodhë.
Nënkryetari i Vetëvendosjes, Shpend Ahmeti, thotë se presidentja Jahjaga nuk duhet dhe nuk i takon që të propozojë emra konkretë për kryeministër, në takimet që po i bënë me liderët e partive politike në vend. Ahmeti ka shtuar se ngërçi politik është duke shkaktuar mjaft probleme për komunat, sidomos në Komunën e Prishtinës, të cilën ai e udhëheq./RTK/
Imami i Xhamisë së Madhe në Prishtinë, Shefqet Krasniqi, Kurban Bajramin e kaloi në burg.
Nga shtëpia e Imamit që po akuzohet për prishjen e rendit kushtetues e cenimit të sigurisë shtetërore, një familjar po fajëson politikanët që Shefqet Krasniqi nuk gjendet në shtëpi për këtë festë.
“Shkaku është krejt politika. Parlamenti nuk mundet me i zgjedh punët e veta dhe ju kanë gju hoxhallarëve”, flet për Klan Kosova, i emocionuar e me lot në sy, Izet Krasniqi – vëllai i Shefqet Krasniqit.
Në familjen e Krasniqit po besojnë se arrestimi i Shefqet Krasniqit ishte i padrejtë dhe kësisoj po shpresojnë se ai me shokët duhet të lirohet sa më parë.
865 haxhinjtë nga Kosova të cilët e kanë kryer haxhin për këtë vit janë shëndosh e mirë në Meke. Kështu ka njoftuar Sekretari i Kryesisë së Bashkësisë Islame të Kosovës Resul Rexhepi.
“Njoftoj besimtarët se në bazë të komunikimit edhe dje po edhe sot që kemi pas me përgjegjësit tonë në Meke mund të them se të gjithë haxhilerët tanë janë mirë dhe shëndosh dhe pas qëndrimit të djeshëm në rrafshlartën e Arafatit sot të gjithë shëndosh e mirë janë kthyer në Meke”, tha Rexhepi në RTV21.
George Bush i vjetër e shihte gjendjen në Kosovë në vitin 1992, si “një tenxhere me presion, para shpërthimit”, derisa në Bosnjë lufta veç kishte nisur. Në një takim që kishte me kryeministrin e atëhershëm grek, Konstantin Mitsotakis, në Dhomën Ovale ata po bisedonin se si mund të parandalohet eskalimi i situatës.
Kryeministri grek ishte ai që i thoshte të parit të SHBA-së, se në Kosovë, duhet bërë një përpjekje shumë e rëndësishme, për të parandaluar shpërthimin e situatës. Ai propozonte mos ndryshimin e kufijve, një autonomi duke anashkaluar të drejtën për vetëvendosje.
“Ju keni plotësisht të drejtë. Ju mund të jeni me ndikues për të ndihmuar që kjo të ndodhë”, i thotë me këtë rast Presidenti Bush.
Greqia paralajmëronte Presidentin e SHBA-ve edhe për problemin e emrit të Maqedonisë. Bush i premtonte atij se do të merrej me këtë çështje, e kryeministri grek e lut edhe që SHBA të ndihmojë Greqinë për të parandaluar pranimin e këtij vendi (Maqedonisë v.j.) në OKB, sepse, siç thotë ai, në qoftë se ata do të pranohen, ky diskutim është i pavlerë.
Temë e nxehtë aty është edhe Bosnja, dhe mënyra se si ata dhe serbët e urrenin njëri tjetrin. Transkriptin e plotë e sjell gazeta Tema.
President Bush: Dua të ju uroj mirëseardhjen mikun tim të vjetër Konstantin Mitsotakis në Shtëpinë e Bardhë dhe dua të shprehi admirimin dhe respektin tim. Unë kam kënaqësinë të punojmë së bashku. Më vjen keq që ne nuk ishim në gjendje të përparojmë më tej në Qipro. Unë e di se sa shumë vështir ishte. Por të jeni të sigurt, askush nga ne nuk do të heqë dorë.
Kryeministri Mitsotakis: Së pari, unë dua të ju falënderoj ju zoti President, për të gjithë çka që ju keni bëri për Greqinë dhe marrëdhëniet greko-amerikane. Edhe vërtetë e vlerësoj kontaktet tona personale dhe të miqësisë. Ju arritët që të sillni marrëdhëniet midis dy vendeve tona në një nivel që ne kishim dëshiruar- kjo është shumë e rëndësishme.
Presidenti Bush: Dua të dëgjoj pikëpamje tuaja në lidhje me gjendjen në Jugosllavi.
Kryeministri Mitsotakis: Siç i tregova edhe Sekretarin Eagleburger, situata është kritike. Vendi im, dhe unë personalisht, jam i të gatshëm për të ndihmuar për të gjetur një zgjidhje për këtë situatë të vështirë. Ne duam për të vendosur marrëdhëniet tona tradicionalisht të mira me Serbinë në shërbim të të mirave të përbashkëta. Ne jemi të gatshëm për të marrë ndonjë veprim që ju do të donit – për të ndikuar të serbët për ti hapur rrugë zgjidhjeve paqësore, etj
Presidenti Bush: Ne ju inkurajojmë juve që të përdorni ndikimin tuaj. Ne jemi përpjekur. Ne jemi shumë të shqetësuar në lidhje me situatën. Kjo është me të vërtetë e tmerrshme, sidomos për fëmijët. Shumë njerëz janë duke me inkurajuar mua për të përdorur të gjitha llojet e forcës ushtarake. Por vendimi im nuk do të pritet mirë nga qytetarët amerikan në qoftë se unë do të të dërgoj ushtar amerikan në një situatë që është e paqartë dhe ku ne nuk mund të fitojmë. Gjendja humanitare është shqetësimi ynë më i madh. Këto janë rivalitetet historike. Greqi a nuk mund ta zgjidh këtë problem; dhe as Shtetet e Bashkuara nuk mund ti zgjidhin ato.
Kryeministri Mitsotakis: Lufta në Bosnjë nuk do të përfundojë aq shpejt.
Presidenti Bush: Të gjithë e urrejnë njëri-tjetrin aq shumë. Kjo është mjaft e keqe për politikën amerikane.
Kryeministri Mitsotakis: Në Kosovë, duhet bërë një përpjekje shumë e rëndësishme për të parandaluar shpërthimin e situatës.
Presidenti Bush: Është si një tenxhere me presion, para shpërthimit.
Kryeministri Mitsotakis: Gjëja më e rëndësishme në gjithë këtë është që të kemi kufij të pandryshueshëm. Kufijtë e jashtëm dhe të brendshëm. Zgjidhja në Kosovë mund të jetë një shtet duke favorizuar një autonomi duke anashkaluar të drejtën për vetëvendosje. Ne mendojmë se shqiptarët kanë filluar të kuptojnë këtë. Serbët dhe shqiptarët duhet gjetur një mënyrë për të arritur një mirëkuptim.
Presidenti Bush: Ju keni plotësisht të drejtë. Ju mund të jeni me ndikues për të ndihmuar që kjo të ndodhë.
Kryeministri Mitsotakis: Një çështje tjetër shumë e ndjeshme për popullin grek është edhe Maqedonia. Ne do të diskutojmë për këtë në Edinburg.
Presidenti Bush: A jeni optimist? Ne kemi shumë shpresë.
Kryeministri Mitsotakis: Unë nuk mund të bëjë asnjë parashikim. Ajo që unë u përpoqa të shpjegojë këtë edhe Sekretarit Eagleburger dhe Gjeneralit Scowcroft është se qasja jonë është pozitive. Ne duam që kjo republikë të ekzistoj dhe ne kemi ndërmarrë disa nisma në këtë kuptim. Për ne, ka garancitë kufitare. Shqipëria, Bullgaria, Serbia dhe të gjitha e bënë këtë deklaratë. Ajo që ne nuk mund të pranojmë është emri i tyre zyrtar për të përfshirë termin Maqedoni.
Unë do të jem shumë i sinqertë. Nëse diçka e tillë do të ndodhë, do të ketë destabilizim të vërtetë. Por, kjo çështje mund të zgjidhet tani si një pikënisje për një qasje pozitive. Deri tani me Jugosllavinë ne kemi pasur shumë dështime, pse mos të provojmë një here që të arrijmë një sukses? Përfshirja e Maqedonisë në emër të tyre zyrtar është i dëshiruar nga më pak se 50% e popullit. Një sondazh i kohëve të fundit ka rezultuar në jo më shumë se 17% të popullsisë që duan këtë emër.
Presidenti Bush: Atëherë pse administrata maqedonase është duke u mbetur peng i emrit?
Kryeministri Mitsotakis: Ka diçka që fshihet pas saj, prej periudhës së komunizmit. Nuk është e lehtë për administratën aktuale që të çlirohet nga kjo trashëgimi nga periudha komuniste. Demokracia në këto hapësira do të jetë një makijazh kozmetikë. Komunistët e vjetër nga linja Titos ende mbajnë pushtetin. Por Gligorov është një njeri serioz. Një marrëveshje mund të arrihet me të. Kjo është arsyeja pse zgjidhja që ne kemi sugjeruar është një formulë e mirë.
Presidenti Bush: Unë do të bëjë një deklaratë, dhe unë do të doja që ju të më tregoni çfarë është e gabuar me të. Por së pari, unë dua të them se unë vlerësoj marrëdhëniet tona. Çdo amerikan e di se marrëdhëniet tona janë shumë, shumë të mira.
Por, deklarata ime është kjo: Kjo Republikë ka kaluar arritshmërinë e demokracisë së saj dhe statusit në përputhje me parimet e Helsinkit. Ajo ka vazhduar dhe zhvilluar veten në një mënyrë pothuajse shembullore. Kështu që mua me duhet ti them dy gjëra: Ata kanë zbatuar Marrëveshjet e Helsinkit dhe performanca e tyre ka qenë shembullor. A jeni dakord me ato pika, ose ju grekët i shikoni gjërat me ndryshe?
Kryeministri Mitsotakis: Unë nuk do të pajtohesha se ata janë një demokraci shembullore. Por kjo është një republikë që ne mund ta tolerojmë.
Presidenti Bush: Jo, unë nuk jam duke thënë për një demokraci shembullore, por se e kanë ndjekur atë në një mënyrë shembullore.
Kryeministri Mitsotakis: Unë pajtohem. Po. Kjo është pikërisht arsyeja pse ne kemi probleme me këtë republikë dhe ne duam që ajo të ekzistojë. Por ne nuk mund të pranojë emrin. Pas Lisbonës – të cilat na arsyetohet – reagimi i Gligorov ka qenë për të provokuar Greqinë. Kjo republikë u krijua nga Tito dhe Stalini pas Luftës së Dytë Botërore në marrëveshje me Shtetet e Bashkuara; gjenerata ime e di këtë. Por njerëzit në pushtet në Shkup janë të njëjta – kur ata e përdorin këtë emër, ne bëhemi shumë të dyshimtë. Ne duam që ata të ndalojnë përdorimin e këtij termi dhe duke lënë të kuptohet se ata kanë kërkesa ndaj nesh. Edhe në kushtetutën e tyre ata kanë dispozitë për shtetasit jashtë vendit, duke përfshirë edhe në Greqi. Kjo është arsyeja pse ne kemi bërë kërkesë të vetme që ata zgjedhin një emër tjetër. Ne nuk mund të pranojmë këtë – asnjë qeveri greke nuk mundet ta pranojë. Përndryshe ne do te përballemi me destabilizim.
Presidenti Bush: Doja të jem i sigurt, nuk ka asnjë problem tjetër përpos emrit?
Kryeministri Mitsotakis: Një tjetër problem ne kërkojmë nga SHBA për të na ndihmuar që të parandalojë pranimin e këtij vendi në OKB, sepse në qoftë se ata do të pranohen, ky diskutim është i pavlerë.
Presidenti Bush: Por në qoftë se ju nuk keni probleme me emrin, ajo mund të shkojë përpara.
Kryeministri Mitsotakis: Unë kërkoj nga ju në qoftë se ju mund të ndihmoni që kjo të shtyhet.
Presidenti Bush: Ne do të shohim së çfarë mund të bëjmë.
Kryeministri Mitsotakis: Është shumë e rëndësishme. Do të ishte një tragjedi. Unë nuk mund ta përballojë atë. Nëse nuk e teproj, unë do të përpiqem të bëjë kompromis. Por nëse kjo ndodh kjo do të ishte një tragjedi për Greqinë dhe për mua.
Presidenti Bush: A ka ndonjë ndarje të opinionit për këtë në vend në Greqi?
Kryeministri Mitsotakis: Jo. Kjo është e vetmja çështje ku Papandreu dhe ish-Ministri i Jashtëm
Samaras dhe unë jemi dakord.
Presidenti Bush: Ne do të përpiqemi dhe të shpresojmë, ndoshta ne mund të ndihmojë që kjo të shtyhet.
Kryeministri Mitsotakis: Është shumë e rëndësishme për ne që kjo të shtyhet gjatë periudhës së përkohshme. Unë me të vërtetë llogarisë në ju zoti President.
Presidenti Bush: Më thuaj, sa gjatë do të jetë ekspozita e objekteve të antikitetit?
Kryeministri Mitsotakis: Deri në mars.
Presidenti Bush: Shpresoj që do të vij për të parë atë.
Kryeministri Mitsotakis: Më lejoni t’ju them përsëri, ju lutem ejani në Greqi!
Kosova nuk është zemra e Serbisë, të cilën ajo nganjëherë dëshiron ta ndajë, por e vërteta e Serbisë të cilën ajo gjithmonë dëshiron ta ndrydhë. Konflikti nuk është rezultat i asaj që nuk jemi njoftuar dhe tash na duhen takimet dhe dialogu, sikur që mendojnë disa në Bruksel, por pasojë e interesave të kundërta.
Kështu është shprehur ndër të tjera lideri i Lëvizjes Vetëvendosje, Albin Kurti, në një intervistë për javoren serbe NIN, transmeton Koha.net.
Në vijim po e botojmë të plotë intervistën e Kurtit dhënë kësaj javoreje serbe:
Albin Kurti nuk e njeh marrëveshjen e Brukselit, kurse qeveria pa të është kushti i vetëm i serbëve për ta përkrahur. Mirëpo, fakti se kryeministri i tashëm nuk ka partnerë për ta formuar Qeverinë, ka lansuar Vetëvendosjen, të plasuar si tretën të në zgjedhje, në hapësirën e kapacitetit të madh shantazhues dhe Kurtin e ka bërë si negociatorin “më të shtrenjtë” në Kosovën e paszgjedhjeve. Në mes të krizës 4 mujore institucione (hera e tretë e përpjekjes për konstituimin e Kuvendit është caktuar në ditën kur ky ekzempar i NIN-it do të del në shitje) Kurti, Lëvizja e të cilit nga koalicioni kundër Thaçit ka kërkuar dhe e ka fituar të drejtën për të udhëhequr me dialogun e Brukselit për NIN-in flet se si e sheh Bashkësinë e Komunave Serbe, ardhmërinë e Kosovës dhe marrëdhënien e Qeverisë së ardhshme me Beogradin. Kurti – majtist të cilin mediat serbe dikur e shpërblyen me çmimin për tolerancë, ndërkaq kundërshtar radikal i bashkëpunimit me Serbinë, ironikisht është nga politikanët e rrallë shqiptarë që kërkon që intervistën ta bëjë në serbisht. E para, pas shumë vitesh mungesë në mediat serbe.
“Koalicioni në mes të LDK-AAK dhe Nisma, me të cilin ne kemi arritur marrëveshje e ka edhe vullnetin edhe zgjidhjen për tejkalimin e krizës insitucionale. Krejt çka duhet të bëjmë është që në mbledhjen e ardhshme të Kuvendit të bëjmë debat dhe të votojmë. Në mandatin e kaluar, për të gjitha iniciativat tona PDK thoshte që s’i kemi numrat dhe se demokracia është çështje numrash. Edhe pse nuk pajtohem me këtë kuptim të demokracisë, ne tani i kemi numrat, mirëpo është e qartë që kjo nuk i pëlqen PDK-së, e cila mundohet me të gjitha mjetet të bllokojë zgjedhjen e Kryetarit të ri të Kuvendit”, shpjegon Kurti se si koalicioni i tij planifikon ta tejkalojë krizën.
Çka e bën për ju Ramush Haradinajn partner të pranueshëm, e Hashim Thaçin të papranueshëm për bisedime për formimin e qeverisë?
Qëkur kanë mbaruar zgjedhjet, qëndrimet dhe vendimet nuk i kemi marrë duke i krahasuar Haradinajn me Thaçin. Unë e ndaj me Haradinajn më shumë brengosjen e madhe që Thaçi është akoma kryeministër, sepse brengën që Haradinaj akoma nuk është bërë kryeministër. Nominimi i Haradinajt është zgjedhje e koalicionit LDK-AAK-Nisma, dhe unë e respektoj këtë. Mirëpo, kjo nuk është çështje e personalitetit politik. Thaçi është personalitet, por jo politik. Ai thotë: amerikanët e duan privatizimin – ua jep atë; evropianët e duan dialogun me Serbinë – ua jep edhe atyre atë.
A janë zgjedhjet e reja opsion për ju?
Jemi gjithmonë të gatshëm për zgjedhje të reja, mirëpo tani jemi të interesuar për formimin e qeverisë së re, të kthehemi kah zhvillimi ekonomik, drejtësia sociale, lufta kundër korrupsionit, dhe ta çojmë PDK-në në opozitë, ku edhe e ka vendin pas dy mandateve, në të cilët Republika Parlamentare e Kosovës është shndërruar në shtet me fare pak republikë në të dhe shumë pushtet mbi të.
Cilat kanë qenë kërkesat e juaja për nënshkrimin e marrëveshjes së koalicionit?
Gjithmonë kemi menduar që së pari duhet të ndërrohet kursi i shtetit, e kjo nënkupton para së gjithash në përfundimin e privatizimit neoliberal në ekonomi dhe përfundimin e dialogut joparimor me Serbinë në politikë. Nga njëra anë, humbnim pronën tonë publike, pasuritë natyrore dhe buxhetin e shtetit, ndërsa, nga ana tjetër, integritetin territorial dhe institucional.
Isa Mustafa ka shpjeguar se negociatori me Beogradin duhet të jetë kryeministri i ardhshëm. Jeni marrë vesh që ato t’i udhëheqë një person nga Vetëvendosje. Çfarë roli saktësisht prisni?
Natyrisht që Kryeministri do ta udhëheq Qeverinë dhe Qeveria është përgjegjëse për dialog apo biseda, mirëpo ato do t’i udhëheq dikush nga Lëvizja jonë Vetëvendosje, saktësisht siç shkruan në marrëveshjen tonë. Dialogun nuk e kemi ndarë në teknik dhe politik. Çfarëdo dialogu do ta udhëheqim ne, mirëpo do të jemi aty bashkë me përfaqësuesit e koalicionit, e, në të njëjtën kohë, do t’ia mundësojmë edhe opozitës të na bashkohet.
A do t’i udhëhiqni personalisht bisedimet apo do ta kandidoni dikë tjetër?
Dialogun do ta udhëheq njëri nga aktivistët e shquar të Lëvizjes sonë, e kush do të jetë, vendos Kryesia dhe Këshilli i Përgjithshëm i organizatës sonë.
Keni thënë se do të bisedoni me BE-në, KE-në dhe serbët e Kosovës, por jo edhe me Beogradin?
Ne duhet të bisedojmë me Bashkësinë Evropiane për integrimet evropiane të shtetit tonë. Në kohën e okupimit nga Serbia, Kosova ka qenë sikur i burgosuri politik, ndërsa Serbia si komandant dhe drejtor i burgut. Pas çlirimit në vitin 1999, dolëm nga burgu, mirëpo nuk filloi liria por u futëm në spital. Tash e 15 vjet protektorati ndërkombëtar na konsideron si pacientë, kurse diplomatë të ndryshëm ndërrohen sikur mjekët të cilët na japin optimizëm për terapi. Mjekët nuk na mundojnë fizikisht, mirëpo nuk kemi të drejtë të vendosim për vetveten. Unë jam i vetëdijshëm që jashtë spitalit prapë nuk ka liri dhe barazi, mirëpo duhet të dalim nga spitali dhe të futemi… në shkollë. Atë marrëdhënie duhet ta ndryshojmë në student-profesor. Dhe ta dimë sa do të zgjasin studimet deri në diplomim dhe çka krejt duhet të mësojmë.
Çka me Beogradin dhe serbët e Kosovës?
Në vend të dialogut diplomatik të mbyllur në zyrën e Ashtonit në Bruksel, pas të cilit dy kryeministrat duhet ta shesin marrëveshjen e arritur popujve të tyre për t’u treguar si prijës historikë, duhet të fillojmë dialogun e hapur, demokratik e shoqëror me serbët në Kosovë, ku njeriu dhe qytetari janë në qendër të vëmendjes. Ai i kaluari ishte dialog për pajtim, i cili eventualisht do të kurorëzohej me shpërblime ndërkombëtare për paqe, për politikanët nga Ballkani ekzotik dhe luftënxitës, deri sa neve na duhet dialog për zhvillim – në atë rast do të shkonim te punëtori e fshatari për të biseduar dhe për t’u organizuar për prodhim sa më të mirë industrial dhe bujqësor. Çka na duhet pajtimi në mes të shqiptarëve dhe serbëve të thjeshtë në Kosovë?! Konflikti i gjatë i cili ka filluar në shekullin e 19-të dhe vazhdon edhe në shekullin 21 nuk është konflikt në mes shqiptarëve dhe serbëve, por konflikt në mes popullit shqiptar dhe shtetit të Serbisë. Dhe, ky konflikt nuk është rezultat i asaj që nuk jemi njoftuar dhe tash na duhen takimet, mbledhjet dhe dialogu, sikur mendojnë disa në Bruksel, por pasojë e interesave të kundërta. Pajtimi gjithsesi nuk është vetëm fjalë apo marrëveshje, por vepër: kur Serbia ta njeh pavarësinë e Kosovës dhe është e gatshme të ballafaqohet me të kaluarën e saj kriminale në Kosovë, tek atëherë do të bëhet pajtimi. Kosova nuk është zemra e Serbisë të cilën ajo nganjëherë dëshiron ta ndajë, por e vërteta e Serbisë të cilën ajo gjithmonë dëshiron ta ndrydhë.
Pse dëshironi t’i udhëhiqni negociatat të cilat nuk keni dashur t’i pranoni?
Ne i kemi kundërshtuar bisedat pa kushte me Serbinë mbi çështjet e brendshme të Kosovës. Thaçi ka biseduar dhe është marrë vesh me Daçiqin sikur Kosova t’i kishte borxh Serbisë e jo e kundërta. Pjesa më e rëndësishme e bisedimeve është dialogu për dialogun, sepse aty vendoset karakteri dhe formati, parimet dhe kushtet, temat dhe renditja. Për këto çështje duhet së pari të bisedojmë me Brukselin.
Për shkak të bisedimeve me Beogradin, apo ndoshta edhe me Unionin Evropian, a do të mund të zvogëlohej trupi juaj i zgjedhësve?
Jo. Ne nuk i ndërtojmë qëndrimet tona dhe nuk veprojmë varësisht prej asaj çka mund të parashohim që do të ndodhë në zgjedhjet e ardhshme. Kjo është punë për kundërshtarët tanë, të cilët paguajnë për matjen e opinionin publik.
Çka do të ndërronit në bisedime me Beogradin?
Në mandatin e ardhshëm të Kuvendit do të hetojmë çfarë krejt ka ndodhur gjatë dialogut trevjeçar në Bruksel dhe çka krejt janë pajtuar atje Thaçi dhe Daçiq dhe ekipet e tyre – në Kosovë procesi s’ka qenë transparent. Gjatë gjithë rrjedhës së këtyre bisedimeve kërkesat e Beogradit ka qenë e pamundur të ngriten në nivel parimesh. Ajo çka Beogradi ka kërkuar për serbët e Kosovës nuk kanë menduar që duhet t’ua japin shqiptarëve në Preshevë, Medvegjë e Bujanoc, boshnjakëve në Sanxhak, apo hungarezëve në Vojvodinë.
Cilat të drejta të veçanta duhet t’i ketë pakica serbe në Kosovë?
Duam integrim të të gjithëve në një shoqëri përparimtare. Integrimi i vërtetë dhe i qëndrueshëm është shoqëror e jo institucional. Për integrimin institucional mund të thuhet se është i nevojshëm mirëpo assesi i mjaftueshëm. Ai është integrim i përfaqësuesve të serbëve, por jo edhe i serbëve. Integrimi institucional është integrim i elitës. Nëpërmjet këtij integrimi diku mbahet e diku prodhohet elita, mirëpo nuk integrohet bashkësia. Ne iu përkasim kombeve të ndryshme por jemi në shoqërinë e njëjtë. Në vend të integrimit institucional nëpërmjet privilegjeve, ne angazhohemi për integrim shoqëror nëpërmjet barazisë. Mirëpo, kur them integrim shoqëror nuk mendoj në seminare, konferenca dhe në trajnimet e OJQ-ve në periudhën e pasluftës, por në barazinë si vlerë dhe si synim, për shtetin e së drejtës dhe zhvillimin ekonomik të bazuar në prodhim. Integrimi është çështje e barazisë, e jo çështje e tolerancës. Në fabrika dhe universitete ndërtohet shoqëria, sepse aty krijohet solidariteti në mes punëtorëve dhe bashkëpunimi në mesin e studiuesve.
Me cilin mund të merreni vesh më parë, me Nenad Rashiqin apo me Listën Serbe?
Nuk bëhet fjalë këtu për ndonjë marrëveshje të gatshme por për bashkëpunim të mundshëm. Nenad Rashiq punon brenda Republikës së Kosovës të cilën ai e pranon dhe e respekton, gjë që nuk mund të thuhet për Listën Serbe. Lista Serbe është krijuar në Beograd dhe me të edhe më tej dirigjohet nga Beogradi, derisa edhe emri i saj aludon në Republikën Serbe në Bosnje.
Cili rol i EULEX-it do të ishte i pranueshëm për ju?
Nuk kemi diskutuar për EULEX-in në bisedimet e deritashme. EULEX-i i ka harxhuar gati 2 miliardë euro gjatë gjashtë vjetëve e gjysmë. Sundimi i së drejtës nga pikëpamja e tyre nuk nënkupton së pari drejtësi për popullin dhe të drejtat e qytetarëve, por stabilitetin e përgjithshëm politik. Deri më tash, në rastin më të mirë, ndonjë peshk i mesëm i korrupsionit ka përfunduar në burg, mirëpo asnjë peshkaqen i korrupsionit. Peshkaqenët kanë drekuar dhe darkuar së bashku me burokratët kryesorë ndërkombëtarë dhe ambasadorët me qëllim të ruajtjes së paqes, stabilitetit dhe sigurisë. Mbase nuk është e rastësishme që Eliot Ness nuk ka qenë francez por amerikan.
Çka prisni që do të ndodh me gjykatën për krime të UÇK-së?
Nuk e di çka na duhet edhe një gjykatë ndërkombëtare. As vetë bashkësia ndërkombëtare nuk e di saktësisht. Sepse nuk dihet as baza e as rregullat, nuk dihet as përbërja dhe as misioni i kësaj gjykate më të re, dhe, në të njëjtën kohë, nuk dihet se kush do ta financojë gjithë këtë. EULEX-i është misioni më i madh në historinë e BE-së. Tani kur ata do të duhej të mbanin përgjegjësinë për josuksesin në luftën kundër korrupsionit dhe krimit të organizuar, kanë ardhur me idenë që iu duhet edhe një mision, edhe një gjykatë, gjithnjë speciale. Ka pasur raste të hakmarrjes politike apo personale kundër serbëve, ka pasur raste të krimeve kundër serbëve të cilët për motiv e kanë pasur marrjen e pasurisë, dhe të gjitha këto raste do të duhej të gjykoheshin dhe të dënoheshin. Mirëpo, këto nuk i ka bërë UÇK-ja si organizatë ushtarake. Këto i kanë bërë individët dhe ne vetë duhet të sjellim drejtësinë dhe ta dënojmë çdo rast individualisht. Gjykata ndërkombëtare prapë nuk do ta bëjë këtë. Ata brengosen për stabilitetin politik dhe përsëri do ta përdorin gjykatën për disiplinim politik të politikanëve të rëndësishëm.
Si i majtë, si e shihni mundësinë e hyrjes së Kosovës në NATO?
Populli shqiptar i është falënderues shumë NATO-s për çlirimin e Kosovës nga Serbia. Pa intervenimin e NATO-s, okupimi dhe represioni i Serbisë me siguri do të zgjatej. Edhe shumë vite do të kalojnë para anëtarësimit të Kosovës në NATO. Mirëpo, ky qëllim mund të ndihmojë që Kosova ta ketë ushtrinë e vet.
Çka do të thotë për karrierën tuaj politike, e cila është në ngritje, koha e kaluar në burg gjatë kohës së Milosheviqit?
Nuk ka qenë ai regjim vetëm i Slobodan Milosheviqit, por edhe i Ivica Daçiqit dhe Aleksandër Vuçiqit. Të gjithë këta kanë qenë në pushtet atëherë. Paramendoni, Koshtunica ka qenë opozita e tyre! Unë kam qenë gjithsej 2 vjet e 7 muaj në burg. Një vit e 5 muaj gjatë Milosheviqit, dhe një vit e 2 muaj pas ndryshimeve demokratike dhe gjatë pushtetit të Koshtunicës. Aktivitetin politik nuk e shoh dhe nuk e ndjej si karrierë. Koha e kaluar në burg nuk ka ndikuar në bindjet e mia politike. Në burg e humb hapësirën dhe e fiton kohën. Lexon më shumë, por edhe thellohesh më shumë, nuk do të ndërrosh. Përkundrazi. Burgu është vend i zhytjes, jo i notimit.
Kush do të jetë kryetari i ardhshëm i Kosovës?
Nuk e di. Këtë më askush nuk e di. Bile as ambasadat e SHBA-ve dhe vendeve kryesore të BE-së.
A e shihni të ardhmen e Kosovës në BE? Ndoshta atëherë kur edhe Serbia të bëhet anëtare e saj?
Vendet e Ballkanit perëndimor nuk janë në gjendje ta dinë se kur, kush mund të bëhet anëtar i BE-së. Në fakt, ajo që dihet, është numri i viteve deri kur sigurisht nuk do të bëhesh anëtar i BE-së. Për shembull, Shqipëria dhe Serbia nuk do të bëhen anëtarë së paku në 5 vitet e ardhshme, Kosova në 10 vitet e ardhshme, e të tjera. Unë shpresoj që ndërkohë BE-ja më në fund do të fillojë të bëhet më shumë organizatë shoqërore me të majtën panevropiane sesa kështjellë burokratike në rrugën e quajtur masat e shkurtimeve. Shihni, realiteti ynë nuk ka arritur tek pritjet e BE-së për neve, por gjithashtu edhe BE-ja ende nuk ka arritur tek ëndrra jonë për të.
Pas marrjes së aktivistëve të VETËVENDOSJE!-s a është e vërtetë që edhe ju, siç shkruan në media, keni marrë thirrje për t’u paraqitur në polici? Nëse po përse?
Kohëve të fundit aktivistët tanë kanë marrë thirrje të ndryshme nga ana e policisë dhe gjykatës. Mua më kanë ftuar në Gjykatë në Prishtinë për një protestë të vitit 2006! Kurdoherë që pushteti është në krizë ai vepron me dhunë, që të mund të vazhdojë me dominim. Dhuna është pafuqi. Qeveria e Thaçit nuk ka më mundësi të shesë ndërmarrjet publike nëpërmjet privatizimit neoliberal e as të t’i bëjë koncesione shtesë Serbisë nëpërmjet negociatave joparimore dhe asimetrike.
Aktivistët tanë janë mbajtur në paraburgim dhe pastaj kanë mbajtur burg, mirëpo gati asnjë proces gjyqësor kundër nesh nuk është kryer asnjëherë deri në fund. Në këtë mënyrë aktivistët tanë tanë mbahen zyrtarisht tërë kohën nën hetime. Pushteti iu frikësohet atyre që s’i frikësohen pushtetit. Nga ana tjetër, ata mendojnë se bashkimin e partive në koalicion kundër PDK-së e mban dhe e bën të mundur para së gjithash Lëvizja jonë. Dhe, mbi të gjitha, kur i godasin aktivistët e VETËVENDOSJE!-s, asnjë burokrat ndërkombëtar nuk ka ndonjë vërejtje, pa marrë parasysh brutalitetin e regjimit.
Si e shihni sot shpërblimin që në vitet e ’90 e keni fituar nga “Nasha Borba”? Në Serbi nuk iu konsiderojnë më tolerant.
Ndonjëherë mendoj që në skenën e sotme politike në Serbi nuk ka ndodhur asgjë e re që nga Nikola Pashiqi. Gati të gjithë janë pasardhës të Pashiqit. Trashëgimia e Dimitrije Tucoviqit është përzënë nga institucionet në margjina të shoqërisë. Toleranca si nocion ka lindur nga luftërat fetare pas skizmës së krishterizmit dhe në fund të shekullit XX është përdorur si zëvendësim për barazinë dhe për lirinë. Domethënë, ata të cilët nuk i trajton si të barabartë dhe nuk ua pranon lirinë, si zëvendësim, ata i toleron.
Pse më i pranueshëm është dialogu me BE-në sesa me Serbinë, nëse nuk e pranoni BE-në në Kosovë, ashtu siç nuk i pranoni ingerencat e Beogradit?
Ne dëshirojmë dialog me BE-në për ta ndërruar karakterin e angazhimit të tyre në Kosovë, që në vend të policëve dhe gjyqtarëve të huaj të cilët kanë pushtet ekzekutiv të pakufizuar dhe imunitet nga ligji nga BE-ja të marrim profesorë për arsim më të mirë dhe ekspertë për prodhim më të madh.
Unë nuk i përkas atyre politikanëve naiv që thonë “hajde ta lëmë të kaluarën prapa nesh, dhe të shikojmë bashkë kah ardhmëria”. E kaluara nuk është prapa nesh, por është në ne. Nuk mund ta vëmë shenjën e barazisë në mes të Bashkimit Evropian dhe Beogradit në Kosovë. Vetëm në luftën e fundit, rreth 10.000 civilë shqiptarë janë vrarë, mbi 3.000 njerëz janë zhdukur, disa mijëra gra janë dhunuar, 120.000 shtëpi janë rrënuar ose djegur, 860.000 veta janë deportuar jashtë Kosovës, dhe më shumë se një milion njerëz janë dëbuar nga shtëpitë e tyre.
Si e paramendoni bashkësinë e komunave serbe?
Dialogu në mes të Thaçit dhe Daçiqit nga ana e Qeverisë së Kosovës argumentohej si nevojë për integrimin e serbëve të Kosovës. Në të vërtetë, kurdo që kishim biseda dhe negociata në mes të Kosovës dhe Serbisë serbët e Kosovës u përdorën: nga Prishtina zyrtare kinse për integrimin e tyre, derisa nga Beogradi zyrtar kinse për mbrojtjen e tyre. Qeveria e Kosovës fliste për integrime të serbëve për të qenë sa më e pranuar nga faktorët ndërkombëtarë dhe për t’ua zbutur zemrën atyre që ia kanë dosjet e saj të korrupsionit dhe të krimit të organizuar; kurse Qeveria e Serbisë fliste për mbrojtjen e serbëve në Kosovë, për ta rritur hegjemoninë e vet, për të cilën serbët lokalë janë mjet për territore dhe pasuri natyrore, e jo e kundërta. Në këtë mënyrë, oportunizmi i Prishtinës bëhet komplementar me hipokrizinë e Beogradit. Bashkësia e komunave serbe është fryt i prirjes së Beogradit që në Kosovë të formojë një Republikë Serbe. Të gjithëve na kujtohet se si Milosheviqi e pranoi Bosnjën jashtë Serbisë vetëm atëherë kur në Konferencën e Dejtonit Izetbegoviqi e pranoi Serbinë brenda Bosnjës. Tani Vuçiqi dhe Daçiqi duan që para se kushdo ta njohë Kosovën e pavarur jashtë Serbisë, ta sigurojnë Serbinë brenda Kosovës. Kësisoj, projekti i Serbisë së madhe nga shekulli i kaluar përtërihet me shumësinë e Serbive të vogla përreth. Ka shumë probleme në ato tri pika të marrëveshjes që kanë të bëjnë me atë bashkësi: që nga elementet jodemokratike dhe kundërkushtetuese e deri te direktivat raciste, siç është ajo që komandanti i policisë në veri të jetë serb! Serb është përkatësi nacionale e jo profesion.
Partia Demokratike e Kosovës nëpërmjet Nënkryetarit të saj Enver Hoxhajt ka dalë me një propozim për koalicion me Lidhjen Demokratike të Kosovës, por edhe kjo është hedhur poshtë nga blloku. Zyrtarët të LDK-së dhe AAK-së Arben Gashi dhe Ahmet Isufi me të cilët ka kontaktuar Gazeta Express kanë thënë se deklarata të tilla janë vetëm të dëshira të Hoxhajt dhe PDK-së.
Deklaratat e nënkryetarit të PDK-së, Enver Hoxhajt për një koalicion PDK -LDK –AAK,po shihen vetëm si dëshira dhe manipulime nga drejtuesit e këtyre partive.
Deputeti i LDK-së, Arben Gashi ka thënë se partia e tij e ka koalicionin me AAK-në, Nismën dhe Vetëvendosjen dhe sipas tij nuk ka nevojë të këtë koalicione tjera. Ai ka thënë se deklaratat e nënkryetarit të PDK-së, Enver Hoxhajt janë vetëm dëshira që nuk mund të realizohen. Gashi ka thënë se nuk ka asnjë sinjal apo iniciativë që të ndryshoj diçka.
“Këto janë deklarata sa për të thënë diçka. Nuk ka asnjë ndryshim në qëndrimet tona të më hershme. Koalicioni ynë është i qëndrueshme dhe s’ka asnjë dyshim në këtë. Po ashtu nuk ka asnjë sinjale për të ndryshuar ky koalicion. Në kemi thënë disa herë që nuk duam të jemi në koalicion më PDK-në dhe kjo vazhdon të jetë ashtu”, ka thënë Gashi.
Edhe Ahmet Isufi nga AAK-ja ka thënë se nuk ka asnjë lëvizje drejt bashkimit të LDK-së, AAK-së dhe PDK-së. Ai thotë se bashkimi i këtyre partive nuk do të ndodhë, dhe sipas tij deklaratat e zyrtarëve te PDK-së janë vetme manipuluese dhe dezinformuese.
“Ato janë deklarata manipuluese. Nuk ka asnjë të vërtetë në këtë çështje. Ne jemi dhe do të vazhdojmë të qëndrojmë pjesë e koalicionit të më hershme. Pra pjesë e koalicionit LDK-AAK-NISM dhe VV. Ndryshime në këtë drejtim nuk ka. Përkundrazi tani jemi vetëm më të bashkuar dhe më unikë se kurrë. Ne jemi duke punuar në kalimin e këtij ngërçi dhe në formimin e institucioneve. Nuk do të heqim dorë nga zgjedhja e kryeparlamentarit dhe Kryeministrit”, ka thënë Isufi.
Ai thotë se të gjithë deklaratë e drejtuesve të PDK-së janë vetëm dezinformim i opinionit dhe dëshira të tyre. Të cilat sipas Isufit nuk do të realizohen asnjëherë.
Hoxhaj e ka bërë këtë deklaratë derisa ka qenë mysafir në emisionin “Jamais Vu” përballë gazetarit Mustafa Nano.
“Receta ime do të ishte që në situatën që jemi duhet të kemi një marrëveshje me një bazë sa më të gjerë. PDK së bashku me Lidhjen Demokratike dhe Aleancën të shohin mundësinë të nxjerrin vendin nga ngërçi politik ku ka hyrë. Së dyti të kemi një qeveri që duhet të adresojë reformat më kritike për çështjet më të rëndësishme në vend” ka thënë ai.
Njohës të rrethanave politike në vend, konsiderojnë se blloku duhet të ketë qasje më serioze sa i përket veprimeve që ndërmarrin.
Edhe pse veprimin e fundit të Bllokut VLAN për kërkesë të seancës urgjente me mbledhjen e nënshkrimeve, e shohin nga këndvështrime të ndryshme.
Vazhdimi i seancës konstituive konsiderohet më se i nevojshëm për krijimin e institucioneve, edhe pse kërkesa e bllokut për seancë urgjente, shihet në forma të ndryshme nga analistë politik, raporton RTK. Ymer Mushkolaj, njohës politik, thotë se blloku është në konfuzion dhe duhet të jenë më serioz për të mos lënë hapësirë për çfarëdo qasje ndryshe nga PDK:
“Blloku është dashur që seancën ta kërkojë menjëherë, ditën e premte, për shkak se nëse ata pretendojnë mund ta zgjedhin kryetarin e Kuvendit sipas një skenari të cilin e kanë paralajmëruar por të cilin nuk e kanë bërë publik, atëherë duket absurde që gjithçka të shtyhet për javën e ardhshme ndërkohë që mund të mos merret asnjë veprim për ta ndërruar situatën e tanishme”.
Mirëpo Albert Krasniqi nga Instituti KIPRED thotë se blloku ka respektuar procedurat e zakonshme parlamentare:
“S’mendojë që ka ndonjë hapësirë që duhet konsideruar se nuk është serioze .. edhe data që është caktuar nuk është çështje urgjente, mendoj se blloku vetëm se I ka respektuar ato praktikat edhe në të kaluarën dhe rregulloren e punës së Kuvendit”.
Megjithëkëtë Krasniqi vlerëson se blloku do të duhej që t’i a jepte edhe një mundësi kryesues Brovina për ta thirrur vazhdimin e seancës:
“Në mënyrë që me përforcuar argumenti ne tyre dhe me pas bazë të fuqishme juridike që kryesuesja po e refuzon ta kryej punën e saj, në mënyrë që blloku pastaj të vazhdoj me planin e tyre, që me 9 tetor të thërras vazhdimin e konstituimit të kuvendit…”
Në anën tjetër Mushkolaj thotë se edhe përkundër deklaratave që blloku e ka skenarin për zgjidhjen e situatës, po shihet se ata kanë frikë ta ndërmarrin një hap të tillë për shkak të raportit që mund ta kenë me gjykatën kushtetuese:
“Ata thjeshtë po presin se cilët do të jenë hapat e PDK-së respektivisht të kryesuese Brovina në mënyrë që mund të veprojnë më pas, pra ne po shohim një qasje jo aktive, por reaktive të bllokut, e do të duhej të ishte ndryshe, mu për shkak në praktikë ata e përbëjnë një shumicë parlamentare, por duket se nuk e kanë shumë të qartë agjendën dhe qëllimet e tyre se në çfarë forme dëshirojnë ta arrijnë atë”.
Ndryshe blloku po kërkon që seanca konstituive të vazhdojë të enjtën e ardhshme me 9 tetor.