Gjykata e Apelit ka caktuar kolegjin e gjyqtarëve që do të merren me shqyrtimin e ankesave të mbrojtjes së kryetarit të Prizrenit Ramadan Mujës dhe ish drejtorëve të tij.

“Seanca nuk është caktuar ende”, ka thënë për Koha Ditore zëdhënësi i Gjykatës së Apelit, Arbër Jashari.

Kryetari i Prizrenit, Ramadan Muja, së bashku me pesë zyrtarë tjerë komunalë, më 13 mars, u gjetën fajtorë dhe u dënuan nga Gjykata Themelore e Prizrenit, për veprat penale të keqpërdorimit të detyrës dhe autoritetit zyrtar.

Muja, për katër pikat e aktakuzës, u dënua me burgim prej dy vjetësh, me kusht që ai të mos kryejë vepra tjera penale gjatë 3 vjetëve. Ai po ashtu mori edhe dënimin plotësues, ndalimin e ushtrimit të funksioneve publike në kohëzgjatje prej 30 muajsh.

Minir Krasniqi, ish-drejtor i Administratës Publike u dënua me 1 vjet e 6 muaj burgim me kusht që për dy vjet të mos bëjë vepër tjetër penale. Edhe Krasniqi nuk ka të drejtë të ushtrojë funksione publike për 18 muaj.

Kadri Ukimeri, ish-drejtor i Gjeodezisë dhe Sadik Paçarizi, ish-drejtor i Urbanizmit u dënuan me 8 muaj burgim me kusht që për 2 vjet të mos bëjnë vepër tjetër penale.

Avni Ademaj, ish-drejtor i Gjeodezisë dhe Kadastrit u dënua me 5 muaj burgim me kusht që për 1 vit të mos shkaktojë vepra tjera penale.

Historik i shkurtër i rastit Muja

Procedura ndaj Mujës dhe të tjerëve, ishte nisur më 25 mars të vitit 2013, për të përfunduar në marsin e vitit 2014.

Muja dhe të tjerët akuzoheshin se kishin bërë keqpërdorime me prona komunale dhe të menaxhuara nga Agjencia Kosovare e Privatizimit.

Gjykimin e udhëhoqi kryetari i trupit gjykues nga radhët e EULEX-it, Vladimir Mikula.

Mozbatimi i veprimit të Gjykatës Supreme

Në vitin 2006, Gjykata Supreme kishte shpallur Komunën e Prizrenit si pronare legjitime të parcelave të tokës me numër 8617 dhe 8619 që kanë sipërfaqe prej 0.20.65 dhe 0.06.22 hektarësh. Të dyja kanë vlerë rreth 50 mijë euro.

Për tri vjet rresht, nga 1 korriku 2008 deri më 29 nëntor 2011, Muja së bashku me Kadri Ukimerin, në cilësinë e Drejtorit të Gjeodezisë, nuk kanë ekzekutuar këtë aktgjykim, thuhet në pikën e parë të aktakuzës.

Edhe pse avokati publik i Komunës së Prizrenit kishte njoftuar Kryetarin e Komunës, përmes një memorandumi që vendimi i Supremes duhej ekzekutuar, Muja kishte urdhëruar Kadri Ukimerin të bënte të kundërtën.

Sipas aktakuzës, Muja “ka urdhëruar Ukimerin që të mos bënte ndryshimet e duhura në shënimet kadastrale që do ta bënin Komunën e Prizrenit pronare të ligjshme të parcelave tokësore”.

Meqenëse toka nuk ishte kthyer në pronësi të komunës, nga veprimet e kryetarit të komunës dhe drejtorit të gjeodezisë kanë përfituar Minir Krasniqin (i pandehur tjetër në këtë rast), M.Q dhe J.A.

Dhënia e tokës “Gulistanit”

Pika e dytë e aktakuzës përfshin periudhën nga 24 nëntori 2010 dhe 11 shkurt 2011, gjatë së cilës kohë Muja së bashku më Minir Krasniqin, drejtor i Administratës dhe Avni Ademajn, ushtrues detyre i Drejtorit për Gjeodezi, kanë vepruar në bashkëkryerje që t’i sjellin dobi pasurore Qendrës Edukative Arsimore “Gulistan”.

Të tretë në mënyrë të paligjshme kanë marrë në posedim parcelën e tokës me numër 800/2 me sipërfaqe prej rreth 50 mijë metra katrorë në vendin e quajtur “Boka Boka” me vlerë prej 100 mijë e 600 eurosh.

Toka ishte e regjistruar në emër të Organizatës Punuese të Pylltarisë “Sharri” dhe administrohej nga AKP-ja, andaj komuna nuk mund ta posedonte.

Në mënyrë që të administronin me të, nën organizimin e Mujës, Krasniqit dhe Ademajt, toka kishte kaluar nga AKP-ja në pronësinë e komunës së Prizrenit brenda një dite.

Tokën e AKP-së Muja e mori në posedim më 24 nëntor 2010, kur kishte lëshuar vendimin 01/730. Të njëjtin ditë, Minir Krasniqi kishte kërkuar nga Avni Ademaj që të bënte ndryshimet e nevojshme në kadastër të cilat ishin bërë nga ky i fundit po atë ditë.

Kështu, tre muaj pasi kishte marrë paligjshëm tokën e AKP-së, më 11 shkurt 2011 Komuna ka nënshkruar kontratë më Qendrën Edukative Arsimore

“Gulistan” me të cilën në mënyrë të paligjshme i jepej kësaj të fundit toka e AKP-së në shfrytëzim për 40 vjet pa kompensim.

Tokë edhe për fabrikën “Kamila”

Pika e tretë e aktakuzës tregon që Muja kishte vazhduar të merrte veprime të paligjshme kur bëhej fjalë për shfrytëzim pronash.

Në periudhën kohore nga 15 dhjetori 2010 deri më 14 prill 2011, Ramadan Muja dhe Sadik Paçarizi, drejtor i Drejtorisë për Urbanizëm, kanë tejkaluar kufijtë e autorizimive të tyre, kur i dhanë tokën publike fabrikës së çokollatës “Kamila”.

Me vendim të Mujës fabrikës i është ndarë toka prej 20 mijë metrash katrorë, në vlerë prej 40 mijë eurosh, në formën e shfrytëzimit pa pagesë, pa i ndjekur procedurat përkatëse ligjore.

Pika e fundit e aktakuzës, ka të bëjë me ndërprerjen e përfaqësimit të ekspertëve të gjeodezisë në lëndët e gjykatës.

Sipas aktakuzës së prokurorisë, kryetari Muja me nxjerrjen e një konkluzioni më 2 gusht 2012, të cilën për nënshkrim ia kishte ofruar drejtori i Administratës Minir Krasniqi, kishte ndaluar përfaqësimin e ekspertëve të gjeodezisë në gjykatë.

Ndërsa drejtori i Gjeodezisë dhe Kadastrit, Abdullah Tejeci, në bazë të këtij konkluzioni i kishte urdhëruar ekspertët që të mos përfaqësojnë në gjykatë, kështu që ishte bërë bllokimi i lëndëve gjyqësore për gjashtë muaj rresht./PrizrenPress.com/

Numri i madh i rasteve të dhunës në familje, përsëritja e tyre dhe ngecjet në trajtimin efikas nga ana e organeve të drejtësisë, kanë bërë që Këshilli Gjyqësor i Kosovës dhe ai Prokurorial të marrë vendim për specializimin e disa punonjësve të tyre vetëm për këtë fushë, shkruan sot Koha Ditore.

Ndonëse aktivistët që merren me këto raste konsiderojnë se ka kohë qyshkur është ulur besimi i qytetarëve në raport me sistemin e drejtësisë në Kosovë pikërisht në rastet e dhunës në familje, përfaqësuesit e këtij sistemi shprehen të vendosur se tashmë do ta kenë prioritet këtë sferë.

Sylë Hoxha, kryetar i Këshillit Prokurorial të Kosovës (KPK), ka thënë se pas një analize dhe vlerësimi të performancës së punës në prokurori është ardhur në përfundim se kohëve të fundit rastet e dhunës në familje janë shtuar dhe po përsëriten në vazhdimësi.

Si rezultat i kësaj dhe rekomandimeve të jashtme, thotë të kenë marrë vendim së bashku me Këshillin Gjyqësor të Kosovës (KGJK), që t’i trajnojnë nga secila Prokurori Themelore dhe Gjykatë Themelore nga një prokuror e gjyqtar që të merren ekskluzivisht vetëm me rastet e dhunës në familje.

Për shtetin e Kosovës tani është jashtëzakonisht e rëndësishme të tregojë pjekuri politike dhe të krijojë e zhvillojë vetë institucione funksionale, ka thënë ambasadorja e Gjermanisë, Angelika Viets.
Në një intervistë dhënë “Kohës Ditore”, me rastin e Ditës së Bashkimit të Gjermanisë, ajo ka sugjeruar që nën moderimin e presidentes të bisedojnë të gjitha partitë për gjetjen e zgjidhjes, e cila do t’i hapte rrugë krijimit të institucioneve.

Duke folur për zhvillimin ekonomik, Viets ka theksuar nevojën e forcimit të sektorit privat, sepse aktualisht administrata publike është punëdhënësi më i madh në vend.

Kurse sa u përket marrëdhënieve të Kosovës me Serbinë, diplomatja gjermane ka thënë se Serbia është e obliguar t’i normalizojë në tërësi marrëdhëniet e saj me Kosovën.

Ambasadorja Viets ka folur edhe për raportet e mira mes Kosovës e Gjermanisë, perspektivën evropiane të Kosovës, si dhe reformat që duhet t’i bëjë Qeveria e ardhshme.

Enver Hasani, kryetar i Gjykatës Kushtetuese, ua ka shuar shpresat shumicës së deputetëve që prej ditësh e kanë deklaruar mundësinë e ndërrimit të kryesueses së Kuvendit, deputetes Flora Brovina, që e shohin pengesë kryesore në rrugën për t’i dhënë zgjidhje bllokadës së krijimit të institucioneve. Kryesuesja nuk mund të shkarkohet, ka thënë Hasani.

Kryetari i Gjykatës Kushtetuese të Kosovës, Enver Hasani, ka thënë se kryesuesja e Kuvendit deri në zgjedhjen e drejtuesve të saj, Flora Brovina, nuk mund të shkarkohet, shkruan sot Koha Ditore.

“Nuk është e thënë të jesh avokat që ta kuptosh logjikën se nuk mund ta shkarkoni me votë dikë që është ngarkuar me automatizëm”, ka thënë Hasani. “Dhe ju e dini se çdoherë kur konstituohet Kuvendi, anëtari më i vjetër e kryeson seancën dhe se ai ose ajo nuk mund të jetë subjekt i mbivotimit për ta shkarkuar”. (

Anëtari i Kryesisë së Nismës për Kosovën, Bilall Sherifi e ka quajtur të pa drejtë vendimin e Flora Brovinës për shtyrjen e seancës konstituive. Sherifi tha se të ndodhur përball kësaj situate, vendosën që të mblidhen të gjithë deputetët në Kuvend, aty ku thotë se është vendi i deputetëve.

Sherifi tha, se prezenca e deputetëve të Bllokut dhe VV’së në sallën e Kuvendit ditën e sotme, nuk ishte vazhdimi seancës konstituive. Sherifi tha se Administrata e Kuvendit ishte njoftuar për mbledhjen e deputetëve në sallën e Kuvendit.

Sipas Sherifit, Kosova është në prag të një suspendimi të parlamentarizmit nga PDK, parti kjo e cila, thotë Sherfi po e uzurpon kuvendin nëpërmjet Flora Brovinës.

“Çështja ka ardhur deri aty sa kemi uzurpim të së drejtës për të thirr seancën dhe thirret në këtë rast kur të dëshirojnë pa pyetur arkën tjetër”, tha Sherifi në “Interaktiv” të KTV’së.

“Jemi në prag të suspendimit të parlamentarizmit”, theksoi ai.

Tha se Blloku nuk e ka ndërmend të shpërndahet dhe se kjo i është thënë edhe Presidentes Atifete Jahjaga, në takimet e liderëve.

Sherifi thotë se nuk pranojnë të takohen me PDK’në sepse nuk kanë ndërmend që të ndryshojnë vendimet e tyre. Anëtari i Kryesisë së NISMA’s theksoi se zgjidhja është në Kuvend dhe zgjidhjen e ka Blloku dhe VV.

Ish deputeti i Partisë Demokratike të Kosovës, Nait Hasani është akuzuar nga Sabit Zejnullahu, babai i dëshmorit Hakif Zejnullahu, i cili thotë se e di se kush qëndron prapa vrasjes së djalit të tij dhe Zahir Pajazitit e Edmond Hoxhës.

Ai duke mos dashur më shumë të komentoj për Indeksonline, tha se është i njohur me këto akuza. Madje, ai tha se për këtë çështje, është sqaruar me babain e dëshmorit, Hakif Zejnullahut, Sabitin.

Ai më shumë nuk ka dashur të komentoj, duke thënë se nuk është i interesuar të flas për këtë./Indeksonline/

Sabit Zejnullahu, babai i dëshmorit Hakif Zejnullahu, thotë se e di se kush qëndron prapa vrasjes së djalit të tij dhe Zahir Pajazitit e Edmond Hoxhës, raporton KTV.

Ai bën me gisht drejt Nait Hasanit dhe Bislim Zogajt, të dy zyrtarë të lartë të Partisë Demokratike të Kosovës dhe ish pjesëtarë të UÇK-së.

Zejnullahu tash 76 vjeçar, thotë se për fjalët që thotë, mban përgjegjësi dhe rrëfen versionin e tij për ngjarjen. Pas disa aksioneve kundër forcave serbe, që kishin ndërmarrë Hakif Zejnullahu e Zahir Pajaziti me bashkëpunëtorë, aparati i atëhershëm serb, ishte vërsulur t’i gjej ata.

E babai i Hakifit, thotë se Nait Hasani dhe Bislim Zogaj, pasi që u arrestuan, ua dhanë forcave serbe të dhënat, nga të cilat pas pak ditëve vriten Hakif Zejnullahu, Zahir Pajaziti e Edmond Hoxha.

KTV-ja ka kontaktuar me Nait Hasanin, mirëpo, ai nuk ka pranuar të flasë publikisht, derisa përmes telefonit, ka treguar se është i njohur me këto akuza dhe se për këtë është sqaruar me babain e Hakifit. E ndërkohë, Bislim Zogaj, thotë se nuk beson që këto deklarata po i bënë babai i Hakif Zejnullahut.

Kur ka dalë nga takimi me Presidenten Atifete Jahjaga, kreu i Nismës për Kosovën, Fatmir Limaj ka thënë se ata dhe e para e vendit po punojnë për gjetjen e një zgjidhje për të dalë nga ngërçi politik e institucional.

“Tash jeni dëshmitar të takimeve të shpeshta me Presidenten e vendit. Ne po punojmë fuqishëm për një zgjidhje e cila është në përputhje me Kushtetutën dhe me vullnetin e shumicës”, ka thënë Limaj, transmeton Koha.net.

Ai nuk ka pranuar të flasë vetëm në emër të Nismës, por ka folur se si bllok janë të interesuar që të gjejnë zgjidhje, kur është pyetur nëse partia që ai i prin është e gatshme që të ulet për të biseduar me PDK-në.

“Me secilin akter që plotëson ato dy kushte, që të respektohet Kushtetuta dhe vullneti i qytetarit ne do të provojmë që të gjejmë zgjidhje, si Bllok”, ka thënë Limaj. “Kanë shkuar dy muaj duke testuar nëse Blloku po ndahet ose jo. Besoj e kanë kuptuar se një gjë e tillë nuk do të ndodh”.

Limaj ka paralajmëruar se kjo situatë do të zgjidhet për një kohë shumë të shkurtë dhe do të bëhet formimi i institucioneve konform ligjeve në fuqi.

“Në ditët në vijim, pas festës, besoj se do të kemi progres në gjetjen e zgjidhjes”, ka thënë Limaj.

Presidentja Atifete Jahjaga ka përfunduar edhe takimin me liderin e Lëvizjes Vetëvendosje, Albin Kurti, me të cilin ka diskutuar rreth krizës institucionale që është krijuar në vend.

Kurti pas takimit tha se nuk ka asgjë të re nga takimi i sotëm i tij me presidenten, ndërsa ka përjashtuar çdo mundësi të takimit me liderin e PDK-së, Hashim Thaçin.

Sipas tij, takimin mund ta bëjnë vetëm në Kuvendin e Kosovës, aty ku duhet të flasin të gjithë 120 deputetët.

Kurti e ka quajtur më shumë cinik se sa gjykatës kryetarin e Gjykatës Kushtetuese Enver Hasani, duke komentuar deklaratat e fundit të kreut të Gjykatës.