Gjashtë pjesëtarë të Policisë së Kosovës në Prizren janë suspenduar nga detyra për 48 orë, pasi të njëjtit kishin qenë në ndërrim në kohën kur një i dehur ishte futur në stacion të policisë me automatik dhe kishte shtënë me të në mënyrë të pakontrolluar.

Vendimin për suspendim të policisë e ka marrë drejtori Rajonal i Policisë në Prizren, Nexhmi Krasniqi.

Policët fillimisht janë suspenduar për 48 orë, por varësisht prej hetimeve të njëjtëve mund t’u zgjatet kjo masë në afat të pacaktuar. Me rastin tani do të merret Inspektorati Policor i cili do të japë rekomandimet e tij dhe nëse ka elemente të veprës penale mund të ngritet edhe kallëzim penal ndaj tyre.

“Rasti ende nuk ka arritur në IPK, por sigurisht se do të vijë dhe varësisht prej hetimeve do të merren edhe masat konform ligjit”, ka thënë një zyrtar në IPK.

Por nuk janë vetëm këta zyrtarë policor subjekt i hetimeve. /Tribuna/

Vizitat e udhëheqësve shtetërorë të Kosovës në Beograd, nga serbët e Kosovës po shihen si diçka që tregon se edhe një shtet shqiptar po formohet në Ballkan.

Ata e akuzojnë Beogradin për tradhti. Ditë më parë në Beograd ishin dy ministra të Qeverisë së Republikës së Kosovës, e ftesë për të qëndruar në një takim atje, ka edhe Presidentja Atifete Jahjaga.

Për udhëheqësin e serbëve të veriut të Kosovës, Marko Jaksiq, kjo vizitë do të thotë edhe një tradhti e radhës që autoritetet serbe në Beograd, po bëjnë ndaj Kosovës.

“Pas nënshkrimit të Traktatit të Brukselit, që do të thotë shkëputje e Kosovës nga Beogradi, tashmë është duke u lëvizur në drejtimin e krijimit të një shteti tjetër shqiptar në Ballkan”, ka thënë Jaksiq, përcjell televizioni publik.

Ai beson se vizita e Presidentit rus, Vladimir Putin në Serbi shërben vetëm sa për t’i larë njollat këtij pushteti i cili po aplikon një politikë përmes të cilës po heq dorë nga territoret e Serbisë.

Presidentja Atifete Jahjaga, do ta ketë të vështirë që t’i ulë bashkë në një tryezë liderët e të gjitha partive parlamentare. Janë të paktën dy parti që paralajmërojnë se do ta refuzojnë thirrjen mundshme nga presidentja, që bashkërisht ta gjejnë zgjidhjen për të dalë nga kriza e tanishme institucionale.

Erzen Vraniqi nga Lëvizja Vetëvendosje në një prononcim dhënë Tribunës, ka thënë se ky subjekt nuk pranon të ulet në një tavolinë me liderin e Partisë Demokratike të Kosovës, Hashim Thaçi, pasi që problemin e vërtet ky subjekt e sheh te qeverisja e deritashm që ka bërë PDK-ja.

“Ne si subjekt nuk do të pranojmë të takohemi me PDK-në dhe Hashim Thaçin, sepse konsiderojmë se ata dhe qeverisja e tyre e deritashme janë vet problemi i Kosovës e jo zgjidhja. Për ne zgjidhja është në Kuvendin e Kosovës me aplikimin e parimit të shumicës parlamentare në konstituimin e institucioneve”, ka thënë Vraniqi.

Ndërsa për Donika Kadaj-Bujupi nga radhët e Aleancës për Ardhmërinë e Kosovës , zgjidhja tashmë është ofruar nga blloku LVAN, të cilët janë edhe shumica parlamentare. Ajo për Tribunën ka thënë se janë duke pritur që PDK të lëshojë rrugë, në mënyrë që vendi të dalë nga kjo bllokadë institucionale gati pesëmujore.

Drejtori i Drejtorisë së Arsimit, Nexhat Çoçaj dhe ish-drejtori i Ekonomisë e Financave në Prizren, Mehmet Bytyc, sot do të ulen në bankën e të akuzuarit në Gjykatën Themelore në Prizren.
Çoçaj akuzohet për keqpërdorim të detyrës zyrtare, kurse Bytyc për ngacmim seksual me një vajzë të mitur.

Zëdhënësja e Gjykatës Themelore në Prizren, Afërdita Kicaj ka konfirmuar për “PrizrenPress”, mbajtjen e gjykimeve të të dy drejtorëve të Qeverisë së Ramadan Mujës. “Me 27 tetor mbahen gjykimet për të cilat po pyet”, konfirmoj Kicaj.

Drejtori i Arsimit Nexhat Çoçaj, bashkë me Nezir Osmanin dhe Gëzim Gërgin, akuzohen se nga data 28 shtator 2009, e deri më datë 03 nëntor 2009 në Prizren, në cilësinë e personave zyrtar, i shfrytëzojnë detyrat zyrtare duke i tejkaluar kompetencat e tyre, me qëllim të fitimit të dobisë pasurore për personin tjetër dhe shkelin me dijeni ligjin e prokurimit dhe kushtet e parapara me kontratën e lidhur mes komunës së Prizrenit dhe NTSH “Rikon” për furnizimin e shkollave të Komunës së Prizrenit me aparate fotokopjuese.

I pandehuri Nezir Osmani, zyrtar për financa në Drejtorinë e Arsimit, sipas aktakuzës “pa autorizim pranon furnizimet me aparate fotokopjuese, nuk e njofton fare zyrtarin e autorizuar, nuk i përfill proceduarat e pranimit, menjëherë i shpërndan këto aparate nëpër shkolla pa bërë verifikimin paraprak të tyre”.

Po ashtu, sipas aktakuzës Gëzim Gërgi menaxher i IT-së në DKA, së bashku me Nezir Osmanin, nënshkruan procesverbalin pa bërë verifikimin e mallit të pranuar, ashtu si parashihet në kontratë, duke pranuar aparate fotokopjuese me format letre A4 dhe A5, e jo të formatit A3, A4 dhe A5.

Aktakuza tregon se Nexhat Çoçaj në cilësi të koordinatorit të Drejtorisë së Arsimit, duke ditur për parregullsitë e procedurës lidhur me këtë furnizim, më 3 nëntor 2009 e nënshkruan raportin e pranimit, edhe pse raportin e pranimit është dashur ta nënshkruaj drejtori i projektit Florim Metaj, me ç’rast nga zyra e thesarit paguhen 18 mijë euro në xhirollogarinë e NTSH “Rikon”.

Me këtë sipas aktakuzës së prokurorisë, buxhetit të Komunës së Prizrenit, i shkaktohet dëm prej 3 mijë e 600 euro.Po ashtu në këtë aktakuzë, është i përfshirë edhe biznesmeni nga Prishtina Sami Makolli, për të cilin thuhet se ka shkelur rëndë ligjin- dispozitat e kontratës së lidhur mes komunës së Prizrenit dhe NTSH “Rikon”, firmë të cilën ai e udhëheq.

Për këto veprime Makolli, akuzohet për vepër penale të keqpërdorimit të autorizimeve ekonomike.

Ndërkaq, ish-drejtori i Ekonomisë dhe Financave të Prizrenit, Mehmet Bytyc,dyshohet për ngacmim seksual të të miturës. Ai madje dyshohet se nuk kishte kursyer as kohën e punës dhe parat , që t’i kënaq epshet seksuale me të miturën.

Gjykata e Prizrenit ka konfirmuar se Bytyc,dyshohet se ka ngacmuar seksualisht të miturën në vendin e tij të punës. Ai po ashtu të miturës i ka ofruar para prej 10 deri 20 euro.

“I pandehuri dyshohet se ka kryer veprën penale në dëm të vlerave të shoqërisë e cila mbron nderin dhe integritetin seksual, pasi që i njëjti në periudhën kohore, prej muajit janar të vitit 2013, e deri më datën 12.06.2014, në Prizren, në zyrën e tij i njëjti duke shfrytëzuar pozitën e ndjeshme të viktimës përkatësisht të dëmtuarës M. duke mbajtur kontakte me të pandehurën A.B. shfrytëzon të dëmtuarën, të miturën M. e cila ishte në kërcënimin dhe përcjellje të pandehurës A. Të njëjtën e prek me qëllim seksual, dhe për shërbime të viktimës së trafikuar i jep para në shumën prej 10-20 euro”, thotë zëdhënësja e Gjykatës në Prizren, Afërdita Kicaj. Për këtë dyshim, Bytyc ishte nën hetim të policisë, që një kohë të gjatë.

Kryetari i Prizrenit Ramadan Muja, pat shkarkuar Mehmet Bytyc nga posti i drejtorit të Ekonomisë dhe Financave. Pak ditë pas këtij vendimi, Muja kishte shprehur rezervat e tij për të zëvendësuar Bytyc. Edhe pse janë bërë dy muaj nga koha e arrestimit të Bytycit, kryetari Muja nuk ka bërë zëvendësimin e tij. Drejtoria për Ekonomi dhe Financa në Prizren, ende ka mbetur pa drejtor. /PrizrenPress.com/

Deputetja e AAK-së, Donika Kadaj-Bujupi, ka vlerësuar se përderisa koalicioni LDK-AAK-Nisma, së bashku me Vetëvendosje!-n, ka shumicën parlamentare, nuk është e nevojshme që vendi të futet në aventura zgjedhore. Ajo ka thënë për “Epokën e re” se dy të tretat e deputetëve të Kuvendit janë kundër zgjedhjeve të reja.

“Përderisa kemi shumicën parlamentare, nuk kemi nevojë edhe një herë të futemi në aventurat zgjedhore. Janë mbi 83 deputetë të cilët janë pro zgjidhjes dhe kundër zgjedhjeve. Ne jemi të bindur dhe të angazhuar të përfundojë procesi i formimit të institucioneve në mënyrë që të ndryshohet mënyra e qeverisjes. Qëndrimet eventuale pro zgjedhjeve, përsëri do të jemi ne ata të cilët do të përcaktohemi sepse jemi shumicë parlamentare”, është shprehur Kadaj-Bujupi.

Ajo ka thënë se partitë e bllokut e kanë zgjidhjen për formimin e institucioneve.

“Ne e kemi ofruar zgjidhjen. Zgjidhja është ofruar me veprimet e shumicës parlamentare. Kjo është mundësia e vetme për formimin e institucioneve të reja. Ata të cilët janë duke e zaptuar shtetin duhet të japin përgjigje se deri kur do të vazhdojë kështu dhe kur është momenti që të jenë të gatshëm të hapin rrugë”, ka thënë Kadaj-Bujupi, duke kukuar nga PDK-ja të lëshojë rrugë në mënyrë që Kosova të bëhet me institucione të reja.

“Mendoj se në periudhën e fundit, pra prej momentit kur PDK-ja e ka kuptuar se nuk e ka shumicën, për shkak të interesave të vendit, është dashur të hapë rrugë dhe të lejohet një shumicë parlamentare t’i formojë institucionet ashtu siç parashihet me ligj, procedura dhe praktika më të mira demokratike”, ka theksuar Kadaj-Bujupi.

Lufta deklarative në mes të zyrtarëve të Lidhjes Demokratike të Kosovës dhe Lëvizjes Vetëvendosje, e ka luhatur në thelb koalicionin pas zgjedhor LVAN. Kështu vlerësojnë njohës të çështjeve politike në vend.

Sipas tyre, këto akuza janë një sinjal për jetën e shkurtër që mund ta ketë LVAN-i edhe sikur të arrij të vijë në pushtet.

E gjitha kishte filluar nga një deklaratë e liderit të Lëvizjes Vetëvendosjes, Albin Kurti, i cili në një debat me qytetarë në Prishtinë, i kishte quajtur zyrtarët e LAN-it, hajna të Ligës së Dytë.

Kjo deklaratë nuk i kishte pëlqyer aspak anëtarit të kryesisë së LDK-së, Lutfi Haziri. Ky i fundit në kundërpërgjigje, liderin e Vetëvendosjes e ka quajtur “hajn të pulave”.

E replika në distancë në mes të Kurtit e Hazirit ka vazhduar deri në momentin kur Haziri kishte paralajmëruar prishjen e koalicionit me Vetëvendosjen gjatë ditës së premte. Por dëshira e Hazirit që ta përjashtojnë Vetëvendosjen nga marrëveshja e Bllokut nuk mori mbështetjen e drejtuesve të LDK-së.

Pas kësaj ishte vet Haziri që mohoi prishjen e koalicionit.

“Jo ne nuk do ta prishim koalicionin me Vetëvendosjen. Ne mezi e ndreqëm atë”, ka thënë ai. /Tribuna/

Kreu i delegacionit të Parlamentit Evropian për Kosovën dhe Bosnje e Hecergovinën kroati Tonino Picula, ka thënë se Kosova duhet t’i japë sa më shpejtë fund bllokadës politike, pasi kjo do të ndikojë në ecjen tutje të vnedit.

Ai duke folur në një intervistë për Dnevnik të Bosnjës ka thënë se me situatën në Kosovë është i pakënaqur edhe faktori ndërkombëtarë. Sipas tij, kjo është thënë edhe në raportin e fundit të Komisionerit për Zgjerim Stefan Fule, i cili ka theksuar se institucionet në Kosovë janë të paralizuara.

Ndërsa duke folur për Marrëveshjen e Brukselit mes Kosovës dhe Serbisë, ai e ka krahasuar atë me marrëveshjen e vitit 1995 për Sllavoninë Lindore në Kroaci.

“Ajo marrëveshje në atë kohë ishte shumë sfiduese, por kontribuoi për të mirë për të gjithë qytetarët e Kroacisë, madje edhe në normalizimin e marrëdhënieve në mes të Beogradit dhe Zagrebit. Unë do të doja që një ditë të jemi dëshmitar që edhe Marrëveshja e Brukselit ta ketë të njejtin efekt”, ka thënë Picula.