Bordi Ekzekutiv i Shoqatës së Artistëve të Teatrit të Kosovës (SHATK) vlerëson se shpallja e Konkursit për zgjedhjen e Udhëheqësit Artistik të Teatrit Kombëtar të Kosovës nga Ministria e Kulturës, Rinisë dhe Sportit (MKRS) dhe, më pas, shtyrja e tij edhe për një javë për shkak të mungesës së kandidatëve të mjaftueshëm brenda afatit kohor të përcaktuar ligjërisht, është reflektim i gjendjes së mjerë, të pashpresë e kaotike në të cilën, që prej disa vitesh, është katandisur ky institucion artistik e kulturor qendror.
Në vijim është kumtesa e plotë e SHATK përkitazi me Konkursin për zgjedhjen e Udhëheqësit Artistik të Teatrit Kombëtar të Kosovës.
Në vazhdën e veprimit e të përpjekjeve të tij për monitorimin, vlerësimin dhe ndryshimin cilësor të gjendjes ekzistuese në skenën teatrore vendore, Bordi Ekzekutiv i Shoqatës së Artistëve të Teatrit të Kosovës (SHATK) vlerëson se shpallja e Konkursit për zgjedhjen e Udhëheqësit Artistik të Teatrit Kombëtar të Kosovës nga Ministria e Kulturës, Rinisë dhe Sportit (MKRS) dhe, më pas, shtyrja e tij edhe për një javë për shkak të mungesës së kandidatëve të mjaftueshëm brenda afatit kohor të përcaktuar ligjërisht, është reflektim i gjendjes së mjerë, të pashpresë e kaotike në të cilën, që prej disa vitesh, është katandisur ky institucion artistik e kulturor qendror, gjë që, për rrjedhojë, ka shkaktuar jo vetëm mosbesimin e artistëve në transparencën, paanshmërinë dhe mbarëvajtjen e këtij procesi, por, krejt natyrshëm, edhe iritimin dhe refuzimin e tyre të ligjshëm për identifikim me konkurset dhe praktikat e deritashme pështjelluese, të njëanshme e manipulative.
Bordi Ekzekutiv i Shoqatës së Artistëve të Teatrit të Kosovës (SHATK), gjithashtu, vlerëson se ecuria e këtillë e këtij procesi është shprehje e krizës së thellë artistike, morale, profesionale dhe institucionale të Teatrit Kombëtar të Kosovës, imazhi dhe reputacioni i të cilit, për shkak të politikave të mbrapshta të Ministrisë së Kulturës, Rinisë dhe Sportit (MKRS), të karakterizuara me politizim, me konkurse manipulative, me instalim të frymës klanore e destruktive, si dhe me trajtim të padinjitetshëm të institucioneve kulturore, tashmë është rrënuar pothuaj krejtësisht.
Bordi Ekzekutiv i Shoqatës së Artistëve të Teatrit të Kosovës (SHATK) konsideron se përpjekja për realizimin me çdo kusht dhe përmbylljen e këtij Konkursi përkundër numrit të pamjaftueshëm të kandidatëve gjatë afatit të parë kohor dhe, pas shtyrjes së tij, me konkurimin e disa kandidatëve jocilësorë, në të vërtetë, ngjashëm me farsën e Konkursit të aranzhuar e të manipuluar për zgjedhjen e Drejtorit të Përgjithshëm, është përpjekje e sërishme e Ministrisë së Kulturës, Rinisë dhe Sportit (MKRS) për politizimin, manipulimin dhe survejimin e këtij procesi e, përmes tij, për kompletimin e tërësishëm dhe përmbylljen e misionit për degradimin dhe rrënimin e përgjithshëm artistik e profesional të Teatrit Kombëtar të Kosovës.
Bordi Ekzekutiv i Shoqatës së Artistëve të Teatrit të Kosovës (SHATK) vlerëson se komuniteti artistik teatror kosovar posedon me kapacitete të mjaftueshme artistike e profesionale për përfaqësimin e tij institucional dhe, në këtë kontekst, përbërjen e tanishme të kandidatëve për Udhëheqës Artistik të Teatrit Kombëtar të Kosovës, në mesin e të cilëve ka edhe anëtarë të stafit politik të njërës nga Ministritë e Qeverisë së Republikës së Kosovës, e konsideron të paligjshme dhe, në pjesën e tij më të madhe, të pamjaftueshme, joadekuate, jocilësore dhe jopërfaqësuese.
Në funksion të tejkalimit të kësaj gjendjeje me pasoja të rënda për të sotmen dhe të ardhmen e teatrit kosovar, Bordi Ekzekutiv i Shoqatës së Artistëve të Teatrit të Kosovës (SHATK) fton Ministrinë e Kulturës, Rinisë dhe Sportit (MKRS), që, në mungesë të konkurencës së dinjitetshme e kredibile, si dhe duke respektuar standardet artistike e profesionale dhe praktikat e teatrove kombëtare regjionale e europiane në përcaktimin dhe përzgjedhjen e Drejtorit Artistik, të anulojë Konkursin për zgjedhjen e Udhëheqësit Artistik të Teatrit Kombëtar të Kosovës dhe, pas ekzaminimit profesional të gjendjes ekzistuese, të krijojë kushte dhe atmosferë të favorshme, tërheqëse e relaksuese për shpalljen e një Konkursi të ri me numër të mjaftueshëm kandidatësh dhe me kandidatë seriozë, kredibilë, të përgjegjshëm dhe me integritet e dinjitet artistik e profesional në fushën e teatrit.
Shoqata e Artistëve të Teatrit të Kosovës (SHATK), si e vetmja shoqatë përfaqësuese me karakter profesional, është e gatshme që, përmes ideve, potencialit, kapaciteteve dhe resurseve të saj njerëzore profesionale, të veprojë dhe të ndihmojë në mënyrë të drejtpërdrejtë në shtendosjen e atmosferës dhe në krijimin e kushteve për një garë të dinjitetshme në kuadër të një Konkursi me kandidatë kredibilë, si dhe me kritere e standarde kredibile për zgjedhjen e Udhëheqësit Artistik të Teatrit Kombëtar të Kosovës, i cili, falë pozitës përfaqësuese, përkatësisht rëndësisë dhe përgjegjësive të kësaj pozite, duhet të posedojë me aftësi, kapacitete, afinitete dhe integritet të mjaftueshëm profesional për ta merituar privilegjin e të qenit ideator, kreator dhe disenjator i fizionomisë e identitetit artistik të një teatri.
Njësitë e specializuara të Policisë së Kosovës bashkë me kolegët e tyre nga Shqipëria po tregojnë suksese në luftën kundër krimit dhe kontrabandës.
