Më 19 korrik të vitit 1998, si pasojë e një sulmi të forcave serbe, në Rahovec pati shumë të vrarë e të plagosur. Në Tehqen e Sheh Myhedinit në Rahovec janë masakruar shumë gra, fëmijë dhe pleq që kishin kërkuar strehim në këtë institucion fetar.

Te vendi i quajtur “Tuba” u gjetën të masakruar dy profesorë si dhe gjashtë trupa të karbonizuar, identiteti i të cilëve nuk u mësua, ndërsa gjithsej u regjistruan 150 persona të vrarë.

Dëshmitarët që kishin arritur t’i shpëtojnë këtij krimi tregojnë se ushtria, policia dhe paramilitarët serb kanë ekzekutuar civilë shqiptarë arbitrarisht.

Gjatë kësaj ofensive u morën peng u zhdukën e u kidnapuan shumë shqiptarë, për fatin e të cilëve nuk dihet asgjë. Organet e pushtetit serb në Prizren, më 22 korrik, në varrezat e këtij qyteti hapën dy gropa të mëdha dhe varrosën shumë shqiptarë të vrarë gjatë ofensivës në Rahovec.

Nënkryetari i PDK-së, Memli Krasniqi, ka shprehur optimizëm se Gjykata Kushtetuese do të vendosë në favor të lëndës së kësaj partie për vlerësimin e shkeljes së Kushtetutës në seancën konstituive të Kuvendit, në të cilën Isa Mustafa është zgjedhur kryeparlamentar.

Në një intervistë për “Epokën e re”, Krasniqi ka thënë se kanë ofruar argumente të mjaftueshme të cilat do ta bindin Kushtetuesen se gjatë kësaj seance janë shkelur Kushtetuta dhe Rregullorja e Kuvendit.

“Padyshim se në materialin që dorëzuam kemi përshkruar të gjitha faktet, të mbështetura në argumentet tona, përfshirë edhe dokumentet përcjellëse. Normalisht se është në kompetencë të Gjykatës Kushtetuese të dërgojë edhe më tutje dokumentacione apo materiale shtesë nga institucionet e tjera”, ka thënë Krasniqi.

Në këtë kontekst, Krasniqi e ka akuzuar koalicionin LDK-AAK-Nisma, i cili sipas tij ka tentuar ta uzurpojë Kuvendin e Kosovës.

Ai ka shprehur optimizëm se Gjykata Kushtetuese do të vendosë në favor të kësaj parashtrese.

“Unë besoj se, mbi të gjitha, është e qartë se të enjten me të vërtetë kishte tentim për ta uzurpuar institucionin e Kuvendit. Dhe jam i sigurt se një gjë e tillë do të pengohet edhe nëpërmjet aktgjykimit që ne besojmë se do të merret nga Gjykata Kushtetuese. Do të jetë në linjë me vlerësimin që i kemi dhënë ne si grup i deputetëve”, është shprehur Krasniqi, duke shtuar se në seancën konstituive është vendosur se kush është grupi më i madh parlamentar.

“Në seancën konstituive, në pjesën e parë të zhvillimit të punimeve me 117 vota për, pa asnjë kundërshtim dhe asnjë abstenim, është miratuar raporti i Komisionit të përkohshëm për verifikimin e mandateve dhe imuniteteve të deputetëve, sipas të cilit, grupi i parë parlamentar është grupi i cili udhëhiqet nga PDK-ja, pastaj vijnë grupet e tjera ashtu siç KQZ-ja i ka certifikuar rezultatet e zgjedhjeve”, ka deklaruar Krasniqi.

Ai ka thënë se mosurimi i shteteve mike lidhur me zgjedhjen e Isa Mustafës si kryeparlamentar është dëshmia më e mirë se ka pasur shkelje të çdo norme juridike.

“Mendoj se kjo është një dëshmi shtesë se ka një kontestim të përgjithshëm dhe universal për procesin e pashembullt me të cilin është tentuar ta imponojë zgjedhjen e Isa Mustafës si kryetar i Kuvendit”, është shprehur Krasniqi.

Ai ka thënë se presin përgjigjen nga Gjykata Kushtetuese, në mënyrë që PDK-ja t’i drejtoj dy institucionet si parti fituese e zgjedhjeve të 8 qershorit.

“PDK-ja do ta propozojë kandidatin e vet, i cili do të zgjidhet kryetar i Kuvendit dhe atëherë do ta formojë edhe Qeverinë e re”, është shprehur Krasniqi.

I pyetur nëse vendi mund të shkoj në zgjedhje të reja, për shkak të këtij ngërçi politik, Krasniqi ka thënë se zgjedhjet e parakohshme tani për tani nuk janë zgjidhje e mirë.

“Unë nuk mund ta paragjykoj një situatë të tillë, edhe pse diçka e tillë parashihet me Kushtetutë dhe me ligje. Besoj se zgjedhjet e parakohshme nuk janë një zgjidhje e mirë tash për tash. Ka edhe shumë hapa të cilët do ta mundësojnë të zgjidhjet ky ngërç politik në të cilën tani gjendemi të gjithë”, ka thënë Krasniqi.

Kandidatja për kryeprokurore të Shtetit, Laura Pula, nuk ka marrë të premten vota të mjaftueshme as për ushtruese të detyrës së kryeprokurorit të Shtetit.

Katër nga shtatë anëtarët e Këshillit Prokurorial kanë votuar kundër propozimit dhe insistimit të kryeprokurorit në largim, Ismet Kabashi.

Nga 5 gushti 2014 shteti do të mbetet pa kryeprokuror, për shkak të pensionimit të Ismet Kabashit, dhe anulimit nga Gjykata Kushtetuese të zgjedhjes së pasuesit të tij, Aleksandër Lumezi. Procesi është kthyer në pikën zero. Për të mos e lënë shtetin pa kryeprokuror, Këshilli Prokurorial ka provuar ta emërojë një ushtrues detyre, ani se ligjet dhe Kushtetuta nuk parashohin emërimin e ushtruesit të detyrës së kryeprokurorit./koha ditore/

Deputetët e Partisë Demokratike të Kosovës, të cilët u janë drejtuar sot Gjykatës Kushtetuese, në njërën prej kërkesave e kanë futur edhe vendosjen e masës së parakohshme për pezullimin e procesit konstituiv të Kuvendit, deri në pritje të vendimit përfundimtarë të Gjykatës Kushtetuese.

Nëse Gjykata vendos që të marrë këtë masë, atëherë Isa Mustafa i cili ka marrë votat për të qenë kryeparlamentar, nuk mund të marrë asnjë veprim deri në vendimin e fundit të Gjykatës Kushtetuese.

Një gjë e tillë është e drejtë dhe kushtetuese, sipas njohësit të Kushtetueses Mazllum Baraliu. Ky i fundit ka thënë për KosovaPress, se kjo gjë mund të ndodhë vetëm pasi Gjykata, të bëjë vlerësimin e parashtresës, të shoh se cilat janë provat dhe a ka të bëjë me shkelje të kushtetueses.

Baraliu nuk ka dashur të flasë rreth asaj se a është zgjedhur me të drejtë kryeparlamentari, pasi sipas tij ka shumë të panjohura.

“Palët kontestojnë njëra tjetrën. Njëra konsideron se ka qenë në rregull, ndërsa tabori tjetër konsideron se nuk ka qenë, dhe prandaj edhe shqetësimet e veta i ka shpreh në Gjykatë. Deri sa gjykata të vendos, nuk dua të paragjykoj, pasi që ajo është kompetente për ta vendosur çështjen”, ka thënë Baraliu për KosovaPress.

Mirëpo, sipas tij, Gjykata mund të vendos që të ja marrë këtë të drejtë Isa Mustafës, pasi që vendimi i saj i mëhershëm nuk njeh koalicion paszgjedhor.

“Disa gjëra sipas mendimit tim, janë thënë në mendimin e mëhershëm të Gjykatës, ku thotë se nuk ka koalicioni paszgjedhore dhe në fakt prioritet i ka dhënë për rastin e mandatimit të kryetarit, partisë e cila ka fituar numrin më të madh të votave elektorale, e jo asaj e cila ka më të madh numrin e ulëseve në Kuvend. Pra, disa gjëra janë të ditura në vendimin e parë të Gjykatës, dhe mendoj se në këtë vazhdë mund të veprojë gjykata përsëri, por që mund të merr edhe një vendim tjetër. Është çështje e saj se si duhet të veprojë”, ka thënë Baraliu.

Pra, sipas Baraliut, nëse gjykata sërish nxjerrë vendim të njëjtë dhe të thotë se ka shkelje, atëherë çështja kthehet në pikën zero, në fillim.

Deputetët e PDK-së e kanë bërë të premten çështje kushtetuese aktin e zgjedhjes së Isa Mustafës për kryetar të Kuvendit. Përgjigje nuk pritet të marrin para një muaji.

Për pasojë, posti do t’i kontestohet Mustafës deri atëherë. Shkaku i kësaj situate, presidentja Atifete Jahjaga nuk ka krijuar ndonjë raport institucional me të. As përfaqësitë diplomatike nuk i kanë shprehur publikisht ndonjë urim.

Përgjigjja se a do të mbetet në pozitë apo do të rrëzohet Mustafa nuk do të merret shpejt. Një burim që njeh procedurën e vendimmarrjes në Kushtetuese ka thënë se në versionin më optimist, Gjykata mund të përgjigjet tek në pjesën e dytë të gushtit../koha ditore/

Deputeti i PDK-së Rrustem Mustafa- Remi, në emisionin “Argument Plus” në RTV21, ka thënë se në rast se Gjykata Kushtetuese e vlerëson si të rregullt seancën konstituive të Kuvendit dhe e legjitimon, Isa Mustafën si kryetar të Kuvendit, PDK do ta pranoj një vendim të tillë dhe do ta njohin Mustafën si kryeparlamnetar.

Ndërkaq, tha se do të donin që sërish të përsëritet seanca për të vazhduar aty ku kanë mbetur në pikën e tretë.

Ndërsa, i pyetur se si do të ndihet që Partia Demokratike të Kosovës të dal në opozitë, Remi tha se nuk do i vinte keq që pas dy mandateve të provojë opozitën.

Në qytetin e Prizrenit sot është mbajtur një protestë në përkrahje të Palestinës.

Qytetarët thanë se nuk pajtohen me sulmet izraelite ndaj popullatës civile në Gaza.

Prizreni u është bashkuar shumë qyteteve në botë të cilat po mbajnë protesta të ngjashme.

Ndërkohë për më shumë se një javë nga sulmet izraelite me raketa kanë humbur jetën mbi 260 palestinezë, kryesisht civilë.

Emri i Agim Aliut i propozuar nga PDK-ja për kryetar të Kuvendit bëri të qartë faktin se i njëjti skenar do të përsëritet edhe kur është fjala për kryeministrin.

Kështu mendon analisti Halil Matoshi i cili është i bindur se nuk do të jetë Hashim Thaçi kandidat për kryeministër.

“Unë mendoj se ka me qenë i njëjti skenar, sikur edhe në seansën konstituive të djeshme. Unë mendoj se prapë Thaçi nuk do të kandidohet për kryeministër për arsye të thjeshtë sepse është duke e ditë se ai nuk i ka numrat për mandatar, ai nuk është mësu me e duru humbjen, prandaj unë besoj që ai në një mënyrë ose tjetër do të gjejnë një eskivim nga kjo situatë dhe nuk do të del fare para Kuvendit që të kërkoj votën e Kuvendit”, tha Matoshi për KTV.