Dega e AAK-së në Prizren, në bazë të informatave nga vëzhguesit dhe anëtarët e saj vërteton se ka parregullsi në listat e votuesve.

Sipas kësaj partie, disa anëtarë të AAK-së në Prizren, nuk mund të gjejnë emrin e tyre në listat e votuesve nga KQZ.

“Njëri nga ta është edhe anëtari i kryesisë qendrore të AAK-së, Haxhi Ferati i cili nuk figuron askund në listat e votuesve të KQZ-së”, njofton AAK.

KQZ ka njoftuar se deri në ora 11:00 kanë votuar 9.46 % e të votuesve në gjithë territorin e Kosovës.

Valdete Daka gjatë një konference për media tha se deri më tash nuk ka pasur ndonjë parregullsi që do të mund ta dëmtonte procesin zgjedhor.

Kryetari i Këshillit Kombëtar të “Nismas”, Jakup Krasniqi, nuk i shkoj edhe ashtu siç kishte pritur votimi.

Ai në shkollën fillore “Faik Konica” në Prishtinë, nuk gjeti emrin e tij në njërën nga klasat ku edhe ishte shënuar shkronja e mbiemrit të tij, që fillon me “K”.

Ai në këtë rast reagoi duke thënë “Këta kështu e pështjellin”, duke aluduar në Komisionin Qendror Zgjedhor, shkruan Zëri.

Krasniqi shkoi edhe më tej duke thënë se këta ta humbin edhe të drejtën për të votuar. Më pas ai u drejtuar nga disa komisioner të KQZ-së, për në një klasë tjetër ku edhe votoj.

Ai ishte i shoqëruar nga bashkëshortja e tij dhe vajza.

Fondacioni Kosovar për Shoqëri të Hapur KFOS, deri më tani ka pranuar mbi 5 mijë mesazhe telefonike nga qytetarët në fushatën “Voto dhe Vëzhgo”.

Luan Shllaku nga KFOS-i bëri të ditur se në mbi 90 % të mesazheve, është raportuar për një proces të rregullt zgjedhor.

Kreu i Lëvizjes Vetëvendosje, Albin Kurti, edhe kësaj radhe ka votuar në ambientet e Fakultetit Juridik.

Kurti pasi që kreu këtë obligim qytetar ka thënë se procesi zgjedhor në Kosovë, është i vlefshëm për demokracinë e shumë i rëndësishëm për shtet ndërtimin.

“Sot qytetarët vendosin, ata e përcaktojnë fatin e politikave të shtetit dhe të politikanëve në institucione. Tash, demokracia nuk është e mbyllur në salla e në dhoma të ndërtesave të institucioneve, por ajo është e hapur anekënd Kosovës për të gjithë dhe secilin, pa dallime. Sot, qytetarët masivisht po bëhen pjesëmarrës dhe vendimmarrës të ardhmërisë së shoqërisë sonë”, tha Kurti. /PrizrenPress.com/

Veprimtari i njohur, Adem Demaçi, nuk do të dalë fare për të votuar në zgjedhjet parlamentare që po mbahen sot në Kosovë.
Demaçi i tha Kosovapressit, se asnjëherë nuk e kryen obligimin qytetar të daljes në votime.

“Kam thënë që të gjitha partitë janë të mirë, po ja që unë nuk e votoj asnjërën. Asnjëherë nuk votoj. Andaj as sot nuk mund të më shihni në vendvotim”, ka thënë Demaçi.

Kryetari i Nisma për Kosovën, Fatmir Limaj ka votuar në qendrën e votimit 1903e në Shkollën Fillore ‘Faik Konica’ në Prishtinë.

Ai ka apeluar te të gjithë qytetaret që të dalin e ta shfrytëzojnë të drejtën e tyre për të votuar.

Ndërsa, ka kërkuar prej komisionarëve që ta mbrojnë votën e lirë.

Kryeprokurori i Prizrenit, Sylë Hoxhaj, ka vlerësuar se deri më tash procesi zgjedhor në rajonin e Prizrenit ka ecuar pa pengesa dhe në mënyrë të rregullt.

Ai tha se deri më tash nuk ëshë shënuar asnjë incident që do të ndikonte në mbarvajtjen e zgjedhjkeve.

“Procesi zgjedhor në rajonin e Prizrenit deri më tash ka ecuar në mënyrë të rregullt. Nuk është shënuar asnjë incident “, tha Hoxhaj për “PrizrenPress”.

Hoxhaj tha se qendra e votimit është hapur më vonesë vetëm në fshatrat Novakë.

“Këtu kemi pasur vonesë për shkak mungesës së çelësave të objektit. Kemi ardhur në përfundim se vonesa e çelësave të objektit nuk ka ndodhur me qëllim të caktuar”, tha Hoxhaj.

Ai tha se Prokuroria dhe Policia është duke vëzguar nga afër procesin e votimit. /PrizrenPress.com/

Obligimin e saj e ka kryer edhe presidentja e Kosovës, Atifete Jahjaga. Ajo pasi që hodhi votën e saj tha për gazetarët se nëse sot në mënyrë të qetë dhe të rregullt atëherë ditë të mira do ta presin vendin tonë.

“E kreva obligimin tim qytetarë dhe ju bëjë thirrje të gjithë qytetarëve të Kosovës në çdo cep të shtetit tonë që të marrin pjesë në zgjedhje dhe të shfrytëzojnë obligimin e tyre kushtetues dhe ligjor se vetëm kështu do t’i ndihmojmë vendit dhe do të përcaktojnë të ardhmen e shtetit të tyre.

Këto zgjedhje përcaktojnë shkallën demokratike të vendit tonë. Nëse dita e sotme është e mirë atëherë ditë të mira do ta presin dhe ditën tonë”, ka thënë presidentja Jahjaga.

Edhe pse është heshtje zgjedhore që nga dita e shtune në mëngjes PDK ka vazhduar ta thyej heshtjen zgjedhore qoftë përmes rrjeteve sociale apo reklamimit.

Një reklamim shumë më të madhe është duke e bërë PDK duke reklamuar “Misionin e Ri” në çdo hapje të faqeve të internetit përmes Google. Çdo hapje e çdo video në Youtube nga Kosova pasohet më një reklamë nga PDK.