Kreu i PDK-së, Hashim Thaçi, është shprehur i bindur në qëndrimin e partisë së tij, pas takimit që ka pasur pasdite me Presidenten e vendit, Atifete Jahjaga.

“Kishim takimin e radhës me Presidenten dhe diskutuam për mundësitë e krijimit të institucioneve të reja, institucione këto që duhet dalin nga zgjedhjet e 8 qershorit dhe duke respektuar vendimin e Gjykatës Kushtetuese”, ka thënë kryeministri në detyrë Hashim Thaçi.

Ai ka thënë më tej sa qëndrimi i Partisë Demokratike të Kosovës është i qartë dhe i prerë: respektimi i plotë i vullnetit të qytetarëve të Kosovës, pra PDK si fituese, të respektohet Kushtetuta dhe ligjet.

“Mesazhi im për liderët tjerë është që të reflektojnë dhe të gjejnë zgjidhje për të ndërtuar institucione funksionale dhe stabile”, ka thënë ai.

Thaçi nuk ka qenë në gjendje të parashikojë se deri kur mund të zgjasin këso lloj takimesh me Presidenten, por është shprehur i bindur se zyra e saj është adresa e duhur ku duhet mbledhur liderët, raporton gazetari i Kohës Ditore.

“Varet nga vullneti i Presidentes, ne do ta respektojmë agjendën e saj. Ne besojmë se Presidentja është adresa e qëndrueshme për arritjen e një marrëveshje mes spektrit politik, si institucion i unitetit qytetar dhe politik”, ka thënë Thaçi.

Isa Mustafa, ka reaguar ndaj një interviste të analistit Armand Shkullaku, i cili tha se më i rëndësishëm është formimi i Qeverisë se sa një vend punë për Kryetarin e LDK’së.

Me këtë rast, Mustafa ka thënë se nuk po kërkon punë pasi është profesor, anëtar i Akademisë së Shkencave dhe deputet në Parlamentin e Kosovës.

Lexojeni të plotë reagimin

Tani në portalin e Gazetës Express lexova një intervistë të z. Armand Shkullaku: “Më i rëndësishëm formimi i Qeverisë se një vend pune për Isa Mustafën”. Shprehu keqardhje për absurditetin e tillë të të menduarit, të një njeriu që një kohë të gjatë punoi në Prishtinë dhe do të duhej ti njeh rrethanat tona. Duhet ta përkujtoj zotin Shkullaku dhe unë jam profesor i rregullt i Universitetit të Prishtinës, se jam anëtar i rregullt i Akademisë së Shkencave dhe Arteve të Kosovës dhe jam deputet i Kuvendit të Republikës së Kosovës. Prandaj ai mund të merret me punë tjera në Shqipëri, sepse nuk është korrekte që nga atje të mendoj të me gjej punë në Kosovë.

Në Gjykatën Themelore të Prizrenit, të martën u mbajt seanca e dytë fillestare ndaj katër të akuzuarve- zyrtarë komunalë e asamblistë në këtë qytet.

Haziz Hodaj, Nijazi Kryeziu, Ibrahim Krasniqi e Visar Islamaj akuzohen se jashtëligjshëm kanë hequr nga lista për anëtar të komisioneve komunale të dëmtuarin Ridvan Hoxha.

Për këtë rast Prokuroria e Qarkut në Prizren, më datë 10 tetor 2012 ka marrë vendim me të cilin e ka hedhur poshtë kallëzimin penal të bërë nga i dëmtuari Ridvan Hoxha, ish-këshilltar komunal nga radhët e LDK-së.

Ndërsa ky i fundit e ka shfrytëzuar të drejtën e tij private që me anë të padisë subsidiare të ngrejë akuzë kundër katër të pandehurve të lartëcekur.

Në seancën e dytë fillestare kërkesë për hedhje të aktakuzës kishte bërë vetëm i akuzuari Haziz Hodaj, i cili ishte kryetar i grupit të këshilltarëve komunalë të LDK-së, njëkohësisht bashkëpartiak me paditësin Hoxha.

Ndërsa të pandehurit tjerë akuzat e paditësit Hoxha i kundërshtuan gojarisht.

Nijazi Kryeziu që në atë kohë ishte kryesues i Kuvendit Komunal të Prizrenit, aktualisht drejtor i Urbanizmit, tha se në këtë rast argumenti më i fuqishëm është vetë hedhja e kësaj aktakuze nga prokuroria.

“Përndryshe me këtë çështje unë nuk jam marrë, sepse kam besu se ju do ta kryeni punën… pa marrë parasysh qysh procedoni”, tha Kryeziu.

Ndërsa i akuzuari tjetër Haziz Hodaj, e quajti banale akuzën e bërë nga bashkëpartiaku i tij Ridvan Hoxha.

“Nuk e kuptoj komoditetin e gjykatave të merren me një çashtje ku unë absolutisht nuk jam i inkriminum, sepse tek e fundit unë si nënkryetar i degës së LDK-së, kam kërku që kryesia ta aprovojë këtë listë të propozuar nga grupi parlamentar”, tha Hodaj.

Edhe dy të akuzuarit tjerë Ibrahim Krasniqi e Visar Islamaj, zyrtarë ligjorë në Komunën e Prizrenit, e kundërshtuan aktakuzën me arsyetimin se kjo nuk ka të bëjë fare me Zyrën Ligjore të Komunës.

Pas kundërshtimit të akuzës, gjykata i dha 7 ditë kohë paditësit që të përgjigjet në kundërshtimet e të pandehurve.

Ridvan Hoxha që është i njohur edhe si inicues i rastit kundër kryetarit Muja, tha se në këtë rast prokuroria ka dështuar.

“Njëherë më kanë dhënë përgjigje kinse unë kam akuzue dy zyrtarë të lartë të LDK-së, z.Isa Mustafa dhe z.Eqrem Kryeziu. Është ky rast i njohur nga prokurori Genc Nixha, pastaj pasi kam reagu publikisht edhe te Prokuroria e EULEX-it edhe njëherë e kanë kthye në rishqyrtim te i njëjti prokuror, pastaj e kanë anulue”, tha Hoxha.

Sipas aktakuzës, Haziz Hodaj, akuzohet se në pozitën e kryetarit të grupit të këshilltarëve komunalë të LDK-së, ka ndryshuar pa vendim dhe në kundërshtim me ligjin, listën e këshilltarëve të zgjedhur si anëtarë të komiteteve dhe komisioneve komunale, ku nga lista heq të dëmtuarin Ridvan Hoxha dhe në vendin e tij e fut dikë tjetër.

Ndërsa Nijazi Kryeziu, e prezanton si të vërtetë listën e këshilltarëve të LDK-së, ndonëse e kishte ditur se lista është e falsifikuar, ngase ka qenë e nënshkruar nga personi i paautorizuar dhe nuk përmbante shenjat e LDK-së në Prizren.

Në aktakuzë thuhet se për falsifikimin e këtij dokumenti më datën 22 mars 2012kryesuesi ishte njoftuar zyrtarisht edhe nga kryetari i Degës së LDK-së në Prizren, Eqrem Kryeziu.

Të akuzuarit Ibrahim Krasniqi dhe Visar Islamaj, akuzohen se në cilësi të zyrtarëve ligjorë komunalë, e prezantojnë si të vërtetë listën në fjalë, edhe pse e kanë ditur se kjo listë ishte e falsifikuar.

Seanca e radhës do të caktohet pas përgjigjes së kundërshtimeve të të pandehurve nga paditësi subsidiar./Kallxo.com/

Kryetari i Gjykatës Kushtetuese, Enver Hasani, duke i komentuar paralajmërimin e koalicionit LDK-AAK-NISMA dhe “Vetëvendosje” (VLAN), se do ta dërgojnë në Kushtetuese interpretimin e pikës 127 të aktvendimit të kësaj Gjykate, ka thënë se nëse dikush e sjellë këtë kërkesë, atëherë sipas tij, do të vlerësohet lejueshmëria dhe merita e kërkesës.

Hasani në një prononcim për RTV 21, ka theksuar se “nuk mund të jap mendim tani, sepse kjo është një çështje hipotetike, duke shtuar se nëse “dikush në këtë fazë sjellë këtë kërkesë në Kushtetuese (interpretimin e pikës 127), atëherë janë dy faza: e para, lejueshmëria dhe e dyta, a ka merita ajo kërkesë”.

“Por ne do të veprojmë në baza standarde”, ka shtuar ai.

Hasani është përgjigjur edhe deklaratave, se Gjykata Kushtetuese është e ndikuar politikisht, duke theksuar se “ ky është një percepcion i një pjese të politikës.

“Ne nuk mund t’i komentojmë ato. Gjykata Kushtetuese nuk i ka parasysh pasojat politike të aktvendimeve të saj. Ne jemi të bindur për atë që e kemi arsyetuar. Është demokraci dhe njerëzit mund t’i shprehin mendimet, por duhet ta kenë parasysh ta ruajnë dinjitetin dhe të mos kërcënojnë, fyejnë ofendojnë, sepse Gjykata nuk e ka ofenduar askënd”, tha Hasani.

Ndërsa, i pyetur se a mundet që presidentja Jahjaga të shpallë zgjedhjet e jashtëzakonshme, Hasani tha se nuk mund të japë mendim për këtë.

“ Atë pyetje mund t’ia drejtoni Jahjagës, por nëse kemi ndonjë rast do të vendosim. Është çështje Kushtetuese dhe ne nuk mund të flasim për çështje që janë potencialisht problematike për të ardhmen”, ka deklaruar kryetari i Gjykatës Kushtetuese, Enver Hasani.

Lidhja Demokratike e Kosovës(LDK) në Prizren , ka reaguar sot për anarkin e krijuar në ditën e tregut në këtë qytet.

“Fatkeqësia është se në këtë ditë i tërë qyteti i ngjanë një anarkie totale ku secili për qefin e vet bllokon rrugë për të shitë gjësende nga më të ndryshme dhe më interesante”,vlerëson LDK në Prizren, përmes një komunikate për media.

“Kjo bllokadë është më e theksuar në hyrje të qytetit nga ana e Suharekës . Konkretisht në fshati Lubizhdë, aty ku kemi edhe “tregun” e automjeteve dhe plaçkave të tjera të vjetra”.

“Për shkak mos veprimit nga Ispektorati komunal si vartës të të denuarit Ramadan Muja, kemi edhe bllokada të rrugëve dhe krijimin e kolonave të gjata deri dhjetra kilometra. Këto pamje palaço për Prizrenin vazhdojnë tutje në lagjen “Bazhdarhane”, përballë qendrës sportive ku na vjen “tregu” tjetër ilegal dhe i cili krijon tollovin dhe bllokadën e radhës, aty tregëtia vazhdon të zhvillohet në trotuare pa kushte elementare higjeniko sanitare”.

“Hiq më të mira nuk janë pamjet as në lagjën Ortakoll, Terzimahallë, Jenimahallë, lagjën Bajram Curri e të ngjajshme…!”.

“Marr për bazë gjendjen e anarkisë në Komunën e Prizrenit e cila qeveriset nga një person i dënuar nga drejtësia ne edhe nuk presim që gjendja në një komunë me qeverisje të tillë të jetë më e mirë “.

“Lidhja Demokratike e Kosovës, këtë gjendje dhe gjendjet tjera kaotike në mungesë të veprimit institucional në Komunën e Prizrenit i marrim me shumë shqetësim. Për këtë shkak, në këtë gjendje anarkiste që jemi, në emër të qytetarëve tanëkërkojmë ndërhyrjen e institucioneve qëndrore”.

Për këtë arsyeje, për interesin primar të qytetarëve tanë kërkojmë ndërhyrjen urgjente nga Agjencia e Veterinës dhe Ushqimit, kur bëhet fjalë për kushtet e tregtimit të ushqimeve me bazë bimore dhe shtazore dhe angazhimin e Policisë së Kosovës për garantimin e lirisë së lëvizjes në hyrje daljet dhe në vet qytetin e Prizrenit”.

“Përkundër paralizimit të veprimeve institucionale , qytarët e Prizrenit meritojnë të jetojnë me dinjitet”/PrizrenPress.com/

Gjykata Themelore e ka liruar sot Imamin e Xhamisë së Madhe të Prishtinës, Shefqet Krasniqin nga paraburgimi, duke i caktuar masën e arrestit shtëpiak për 30 ditë.

Gjykata Themelore i kishte caktuar më herët masën e paraburgimit Shefqet Krasniqit nën dyshimet për veprat penale kundër rendit kushtetues dhe të sigurisë të Republikës së Kosovës.

Paraburgimi 30 ditësh i Shefqet Krasniqit qe kthyer dje në rivendosje nga ana e Kolegjit të Gjykatës së Apelit, për herë të dytë brenda një muaji pasi që herën e parë, Gjykata Themelore në Prishtinë refuzoi ankesën e avokatëve mbrojtës.

Imami Shefqet Krasniqi, bashkë me disa imamë të tjerë ishin arrestuar më 17 shtator.