Përzgjedhja e kryeprokurorit të Shtetit do të bëhet më së largu deri në fillim të qershorit. Ekspertë juridikë thonë se kryeprokurori i ri duhet të jetë me integritet të lartë, ndërsa do të përballet me sfida të shumta, ndër më kryesoret me luftimin e krimit të organizuar dhe korrupsionit.

Zgjedhjet që kanë përshkuar Republikën e Kosovës, në vitin 2014 kanë përfshirë edhe organin më të lartë të akuzës. Në garën për Kryeprokuror të Shtetit, e cila po shkon drejtë fundit, kanë mbetur 8 kandidatë, prej të cilëve 3 do të futen në listën e ngushtë, e cila do të votohet nga anëtarët e Këshillit Prokurorial të Kosovës për të zgjedhur Kryeprokurorin e ri të Shtetit. Përzgjedhja e Kryeprokurorit mund të përfundojë gjatë këtij muaji, ose më së largu në javën e parë të muajit qershor, raporton RTK.

Problemet e mëdha në sistemin prokurorial, lufta kundër krimit të organizuar dhe korrupsionit do të jenë sfidat më të mëdha të Kryeprokurorit të ri të Shtetit. Në këtë fazë, kandidatët, të cilët po e vazhdojnë garën për Kryeprokuror të Shtetit janë: Sylë Hoxha, Kryeprokuror i Prokurorisë Themelore të Prizrenit, Agron Galani, Kryeprokuror i Prokurorisë Themelore të Pejës, Jusuf Mejzini, prokuror në Zyrën e Kryeprokurorit të Shtetit, Aleksandër Lumezi, Kryeprokuror i Apelit në Prishtinë, Shyqri Syla, Kryeprokuror i Prokurorisë Themelore të Mitrovicës, Jetish Maloku, Kryeprokuror i Prokurorisë Themelore të Gjilanit, Ali Rexha, prokuror në Prokurorinë Speciale si dhe Laura Pula, prokurore në Zyrën e Kryeprokurorit të Shtetit.

Emisioni “Betimi për Drejtësi” ka intervistuar kandidatët për Kryeprokuror të Shtetit për sfidat dhe vizionin e tyre për sistemin prokurorial në vend.

Në emisionin “Betimi për Drejtësi” avokati Dastid Pallaska thotë se Kryeprokurori i ri i Shtetit, duhet të jetë hero ishtetëndërtimit të Kosovës.

Pallaska thekson se kriteret bazë për përzgjedhjen e Kryeprokurorit duhet të bazohen në integritetin e tij.

“Kandidati që duhet të zgjidhet Kryeprokuror duhet të zgjidhet sikurse në vendet demokratike”, thotë Pallaska.

Institucionalizimi i rolit të Prokurorit të Shtetit do të jetë ndër sfidat e para të Kryeprokurorit.

Lidhja Demokratike e Kosovës do t’i fus në listën e saj pesë kandidatë për deputetë nga Prizreni. Përpos kryetarit të Degës së LDK-së, Eqrem Kryeziut, në garë për deputetë nga rajoni i Prizrenit do të jenë edhe ish- kandidati i LDK-së për kryetar të Prizrenit, Hanefi Muharremi, deputeti aktual, Xhavit Ukaj, Mubera Mustafa si dhe asamblisti komunal, Haziz Hodaj.

Këtë e ka bërë të ditur për Gazetën Blic, Xhavit Ukaj.  Sipas tij, Dega e LDK-së në Prizren është përcaktuar për këta 5 kandidatë.

Ndryshe, partitë politike kanë afat që deri më 16 maj t’i dorëzojnë listat me emrat e kandidatëve që do t’i nënshtrohen më 8 qershor garës për deputetë.

Legjislatura që e lamë pas, ka qenë e fundit që pakicave ua ka ofruar privilegjin e vendeve të rezervuara, pavarësisht votave të cilat ata kanë arritur t’i fitojnë nga elektorati.

Profesori i së Drejtës Kushtetuese, Arsim Bajrami,në një prononcim për Telegrafin ka sqaruar se Kushtetuta e Kosovës, tash e tutje, nuk e njeh kategorinë “vende të rezervuara për pakicat”, por vetëm “vende të garantuara”.

Sipas tij, dallimi në mes këtyre dy kategorive kushtetuese është se “vendet e rezervuara” u kanë siguruar pakicave 20 ulëse në Kuvendin e Kosovës dhe mundësinë që numri i ulëseve të rritet nëse partitë e pakicave kanë siguruara përqindjen e nevojshme të votave për të qenë pjesë e Parlamentit.

“Ndërsa, kategoria e ‘vendeve të garantuara’ nënkupton që nëse serbët i fitojnë shtatëvende nga vota e drejtpërdrejtë, ata i marrin edhe tri vende, duke plotësuar kështu normën prej 10 ulëseve. Thënë më thjesht, nëse eventualisht komuniteti serb siguron përmes votës së drejtpërdrejtë më shumë se 10 ulëse në legjislativin e vendit, Kushtetuta në këtë rast nuk garanton shtimin e asnjë vendi më shumë për ta”, thotë ai.

Ndryshe, tema e vendeve të rezervuara ishte aktualizuar gjatë kohës që po diskutohej kalimi i ligjit për shndërrimin e Forcave të Sigurisë së Kosovës në Forca të Armatosura të Kosovës. Pakicat e kishin kushtëzuar kalimin e ligjit për FAK-un me vazhdimin edhe për një mandat të vendeve të rezervuara.

105 euro është dënuar një kalimtar që po truponte rrugën në Rahovec dhe që nuk përfilli urdhrat e personit zyrtarë.
Ai gjatë mesditës, një patrullë policore ia kishte tërhequr vërejtjen një kalimtari i cili po e truponte rrugën në kundërshtim me rregullat e trafikut, mirëpo i njëjti nuk ishte treguar tolerant dhe kishte vazhduar të mos i përfill urdhrat e personit zyrtar. Më pas këmbësori është shoqëruar për në ambientet e policisë dhe prej aty me procedurë të përshpejtuar është dërguar në gjykatë. Pasi gjykatësi e ka marrë në pyetje kundërvajtësin, të njëjtit ia ka shqiptuar një gjobë prej 105 euro e cila duhet të paguhet në afatin prej 15 ditësh, transmeton Express.

Drejtoria Rajonale e Policisë në Prizren i fton qytetarët që për shkak të sigurisë së tyre, t’i respektojnë rregullat e përgjithshme të komunikacionit dhe rruga të kalohet aty ku është e shënuar me shenjë për kalimin e këmbësorëve.

Ndërkaq, Policia e Prizrenit dhe Trafikut Rajonal, gjatë ditës së djeshme kanë shqiptuar 29 gjoba për këmbësorë.

Kryetari i Prizrenit, Ramadan Mujës, nuk e ka marrë  aktgjykimin nga Gjykata Themelore në Prizren. Avokati i Mujës, Ruzhdi Berisha konfirmoi  se nuk i është dorëzuar as sot aktgjykimi i klientit të tij.

“Jo nuk e kam marrë sot aktgjykimin e Mujës”, konfirmoi Berisha për “PrizrenPress”.

EULEX-i javën e kaluar ka konfirmuar se aktgjykimi i shkruar për kryetarin Ramadan Muja dhe pesë bashkëpunëtorëve të tij do të publikohet deri sot.

“Afati i fundit ligjor për publikimin e vendimit është 13 maji, pas zgjatjes së tij nga i autorizuari, udhëheqësi i gjykatës. Vendimi do t’u shpërndahet së pari palëve, para se të publikohet”, thuhet në përgjigjen e EULEX-it.

Avokati Ruzhdi Berisha, tha ndërkaq se nuk ka qenë i informuar se sot do të marrë në formë të shkruar aktgjykimin e Ramadan Mujës.

“Unë s’kam qenë i informuar se sot do të dorëzohet aktgjykimi, nuk e di ju mediat ka e keni marrë këtë informacion”, tha Berisha.

Kryetari i Komunës së Prizrenit, Ramadan Muja, në muajin mars të këtij viti është shpall fajtor dhe është dënuar me dy vjet burgim me kusht nga një trup gjyqësor i EULEX-it në Gjykatën Themelore të Prizrenit.

Bashkë me Mujën fajtor janë shpallur edhe pesë ish-drejtorë të tij, të mandatit të kaluar, por ata janë dënuar më pak se sa shefi i tyre.

Pala mbrojtëse e të akuzuarve ka paralajmëruar ankesë, ndërsa nëse vendimi i shkallës së parë konfirmohet nga Gjykata e Apelit, atëherë në Prizren duhet të zhvillohen zgjedhjet e jashtëzakonshme për kryetar të komunës./PrizrenPress.com/