Naser Malisheva nga komuniteti RAE është zgjedhur nënkryetar i Komitetit për Komunitete në Komunën e Malishevës.

Ky komitet ka shtatë anëtarë, ku katër prej tyre janë Kuvendi i Komunës dhe tre të tjera nga komuniteti RAE dhe shoqëria civile.

Zyrtarja për Komunitete dhe Kthim, Edona Krasniqi, në mbledhjen e fundit ka raportuar për punën njëvjeçare të zyrës së saj.

Anëtarët e këtij komiteti, ndërkaq kanë marrë vendim për organizimin e dy debateve për rolin e komiteti për komunitete, në raport me institucionet, si dhe për organizimin e një debati për çështjen e largimit të mbeturinave, i cili parashihet të mbahet më 24 maj, në kuadër të aksionit “Ta pastrojmë Kosovën”./PrizrenPress.com/

Nisma për Kosovën në Prizren, ka themeluar nëndegën në lagjen “Bajram Curri” në këtë qytet. Anëtarët e kësaj nëndege kanë përuruar edhe zyrën e punës.

Kryetare e nëndegës është emëruar Kaltrina Daka. Ajo ka premtuar se do të angazhohet maksimalisht që të prezantojë tek cdo qytetar i lagjes programin e Nismës.

Koordinatori i Nismës në Prizren, Sejdullah Hoxha, falënderoi aktivistët për themelimin e nëndegës në lagjen “Bajram Curri”.

“I falënderoj aktivistët e lagjes Bajram Curri, që kanë shprehur vullnetin dhe dëshirën për t’iu bashkangjitur Nismës”,tha Hoxha.

Ai tha se Nisma për Kosovë qëllim kryesor dhe të vetëm ka ndryshimin e situatës aktuale në vend.

“Nisma do të ndryshojë situatën e keqe që është krijuar në Prizren dhe Kosovë”, tha Hoxha.
Ai është shprehur i sigurt se Nisma në zgjedhjet e 8 qershorit do të dalë fitues në Prizren dhe Kosovë. /PrizrenPress.com/

Presidentja e Republikës së Kosovës, Atifete Jahjaga priti sot ambasadorët dhe përfaqësuesit e Shteteve të Bashkuara të Amerikës, Gjermanisë, Francës, Italisë dhe Britanisë së Madhe të akredituar në Kosovë për të diskutuar për procesin e zgjedhjeve të parakohshme parlamentare në Kosovë.

Presidentja Jahjaga i njoftoi ambasadorët për vendimin e saj për përcaktimin e datës së zgjedhjeve të parakohshme parlamentare më 8 qershor, pas konsultimeve gjithëpërfshirëse me partitë dhe subjektet politike të Kosovës, për të gjetur një datë brenda suazave të përcaktuara ligjore dhe që lejon hapësirën e nevojshme për përgatitjen e zgjedhjeve në vend.

Kryetari i Aleancës për Kosovë të Re, Behgjet Pacolli ka apeluar të gjithë që të rrinë të qetë, pasi që sipas tij, AKR-ja do ta kalojë pragun. Paolli gjatë një konferencë për media ka thënë se partia e tij është e pastër dhe se anëtaret e saj nuk janë të hetuar si të disa partive të tjera.

“Unë ju kum thënë, mos e keni dert, këqyrni punët e tuaja dhe leni AKR-në të udhëtojë lirshëm pasi që ne e dimë ma mirë për fatin tonë. E dini vet se para zgjedhjeve lokale krejt kanë fol që AKR-ja do të zhduket por që ne i fituam dy komuna me rëndësi të madhe”, ka thënë Pacolli.

Këto deklarata, Pacolli i ka dhënë gjatë aderimit zyrtar të ish-kryeministrit, Bajram Kosumi në AKR.

Në kuadër të përgatitjeve të Zgjedhjeve të Parakohshme Parlamentare 2014 dhe të bashkërendimit të aktiviteteve me institucionet tjera, kryetarja e Komisionit Qendror të Zgjedhjeve, Valdete Daka dhe Kryeshefi Ekzekutiv i SKQZ-së, Enis Halimi, pritën në takim Drejtorin e Përgjithshëm të Policisë së Kosovës, Shpend Maxhuni, i cili shoqërohej nga Drejtori i Departamentit të Operacioneve në kuadër të Policisë së Kosovës, Rashit Qalaj

Fillimisht kryetarja Daka në emër të KQZ-së shprehu falënderime për angazhimin e Policisë së Kosovës në kryerjen me sukses të detyrave në aspektin e sigurisë gjatë procesit zgjedhor edhe në të kaluarën. Në këtë aspekt, Daka shprehu gatishmërinë e Komisionit Qendror të Zgjedhjeve për të bashkëpunuar në vazhdimësi.

Në anën tjetër, Drejtori i Përgjithshëm i Policisë së Kosovës, Shpend Maxhuni tha me këtë rast se Policia e Kosovës ka filluar me përgatitjet e nevojshme në kuadër të përgjegjësive institucionale dhe ligjore që ka dhe do të bashkërendojë aktivitetet me KQZ-në dhe institucionet tjera në funksion të realizimit të suksesshëm të procesit zgjedhor.

Komisioni Qendror i Zgjedhjeve dhe Policia e Kosovës janë në fazën e fundit të hartimit të Planit Operacional të Sigurisë për Zgjedhjet e Parakohshme. /PrizrenPress.com/

Ish kandidati për kryetar të Komunës së Prishtinës nga radhët e AAK-së, Besnik Tahiri, ka mohuar zërat se ai do ta braktisë partinë e Ramush Haradinajt, duke kaluar në një parti tjetër.

Në një bisedë për Indeksonline, Tahiri ka treguar se AAK-në nuk do ta ndërrojë për asnjë rast, duke bërë të ditur se do të jetë kandidat për deputetë në Kuvendin e Kosovës.

“Unë jam kadidat për deputetë në listën e Aleancës për Ardhmërinë e Kosovës, dhe në asnjë formë dhe për asnjë rast nuk do ta ndërrojë partinë. Është një dezinformim i ultë. Garoj me AAK-bë për një drejtim të ri për vendin”, tha Tahiri për Indeksonline.

Tahiri, konsideron se AAK ka programin më të mirin dhe se janë mëse të përgatitur për zgjedhjet.

“AAK asnjëherë nuk ka qenë me e përgatitur se sa këto zgjedhje, garon me kryetarin e vet, ka programin më të mirin, dhe ka predispozita të mira. AAK do të jetë partia më e mirë në Kosovë”, theksoi ai.