Në zgjedhjet parlamentare në Suedi që zhvillohen të dielën, më 14 shtator, konkurrojnë edhe 6 kandidatë shqiptarë nga parti të ndryshme politike.

Në Suedi janë të hapura qendrat e votimit për zgjedhjen e 349 deputetëve të përbërjes së rë të Parlamentit të Suedisë. Këtë herë edhe komuniteti shqiptar mund të votojë për përfaqësuesit e tyre në Parlamentin suedez.

Janë 6 kandidatë shqiptarë, të cilët garojnë në këto zgjedhje parlamentare.

Bëhet fjalë për Adnan Dibranin, Arba Kokallarin, Adrian Kaba, Naim Murseli, Aurora Pirraku Eriksson dhe Shkurte Xhemajli.

Adnan Dibrani nga Varbergu i Suedisë, një i ri me prejardhje nga Mitrovica, në vitin 2010 për herë të parë është zgjedhur deputet në Parlamentin e Suedisë, duke u bërë suedezo-shqiptari i parë që hyn në këtë parlament.

Sot ai është kandidat për partinë më të madhe në vend, Partinë Socialdemokrate. Synon mandatin e dytë për Parlamentin suedez në regjionin e Hallandit.

E drejta e shqiptarëve të Suedisë për të votuar përcaktohet nga të dhënat në regjistrin e popullatës së organeve tatimore (Skatteverket) 30 ditë para ditës së zgjedhjeve.

Shqiptarët në Suedi kanë të drejtë të votojnë në zgjedhjet parlamentare nëse kanë nënshtetësi suedeze dhe janë apo kanë qenë të evidentuar në regjistrin e popullsisë në Suedi.

Opozita, e udhëhequr nga Stefan Lofven i Partisë Social Demokrate, prej kohësh ka qenë e favorizuar prej sondazheve, por hapësira është ngushtuar javën e fundit, pasi disa prej votuesve duket se kanë vendosur të mbështesin sërish qeverinë e qendrës së djathtë të udhëhequr nga kryeministri Fredrik Rainfeld.

Në fokus te debateve parazgjedhore kanë qenë sistemi arsimor, sidomos ai i nivelit të ulët. Çështje të tjera të ndjeshme janë edhe financat dhe politika e jashtme.

Në zgjedhjet e së dielës votohet edhe për delegatët e 20 parlamenteve rajonale dhe të 290 kuvendeve komunale./albinfo.ch/

Trupat qeveritare ukrainase deklarojnë se kanë zmbrapsur një sulm të rebelëve pro-rusë në aeroportin e Donetskut.

Mëngjesin e së shtunës të shtëna armësh u dëgjuan nga zona në fjalë, që kontrollohet nga trupat qeveritare, pavarësisht fitoreve të rebelëve në pjesën tjetër të qytetit.

Korrespondentët e mediave ndërkombëtare raportojnë se dhuna përbën një sfidë serioze për armëpushimin e brishtë për të cilin u ra dakord më 5 shtator.

Po këtë të shtunë, ministri i Jashtëm rus Sergei Lavrov i cilësoi si të pabaza lajmet se Rusia ka ndërmend të krijojë një zonë lufte në lindje të Ukrainës. “Rusia donte që Ukraina të bëhej një vend i begatë, neutral dhe miqësor”, deklaroi Lavrov, transmeton Alsat-M.

Ai akuzoi Shtetet e Bashkuara se po e përdorin krizën në Ukrainë për të ndërprerë lidhjet ekonomike mes Rusisë dhe BE-së, duke e detyruar këtë të fundit të blejë gazin amerikan me një cmim shumë më të lartë.

Gjatë ditës së sotme autoritetet e doganës ruse njoftuan se një autokolonë ruse ndihmash kishte kaluar kufirin për në lindje të Ukrainës.

Ndërsa një zëdhënës i OSBE-së tha për BBC se 220 kamionë rusë kishin kaluar kufirin gjatë natës dhe mëngjesit, shumica e të cilëve nuk u kontrolluan as nga ukrainasit e as nga vëzhguesit e huaj.

Kievi dhe Perëndimi druhen se në këta kamionë mund të ndodhen pajisje ushtarake për të ndihmuar rebelët, por Rusia vazhdon me qëndrimin e saj se përmbajnë vetëm ndihma humanitare si gjeneratorë, ushqime dhe ujë të pijshëm.

Presidenti i Shteteve të Bashkuara, Barack Obama, e ka dënuar ekzekutimin e punëtorit humanitar britanik, David Haines, nga ana e militantëve të Shtetit islamik, duke e cilësuar si “vrasje barbare”.

“Shtetet e Bashkuara sonte qëndrojnë krah për krahu me mikun dhe aleatin tonë të afërt në pikëllim dhe përkushtim”, thuhet në deklaratën e zotit Obama.

Mëtutje ai ka shtuar se “ne do të punojmë së bashku me Mbretërinë e Bashkuar dhe koalicionin e gjërë të vendeve nga rajoni dhe në gjithë botën, që kryerësit e këtij akti të tmerrshëm të sillen para drejtësisë, dhe për ta degraduar dhe shkatërruar këtë kërcënim ndaj njerëzve të vendeve tona, të rajonit dhe botës”.

“Më qëlluan 30 herë me breshëri plumbash, më kapi vetëm një plumb rikoshet”. E pabesueshme, por është e vërtetë historia e 45- vjeçarit Dritan Jazenxhi, i cili mëngjesin e së enjtes i ka shpëtuar atentatit të tretë të bërë ndaj tij.

Në një intervistë për “Gazeta Shqiptare”, babai i 3 fëmijëve rrëfen se si arriti t’u shpëtojë plumbave, që sipas tij janë qëlluar nga një i afërm i tij. (tregon identitetin e plotë të atentatorit) 45- vjeçari sqaron se me atentatorin prej afro katër vitesh kanë konflikt pronësie për 4 dyqane, që Jazenxhi pohon se janë të tijat.

Z.Jazenxhi, çfarë ndodhi mëngjesin e së enjtes?
Kisha dalë si çdo ditë te dyqanet e mia dhe aty pashë që jashtë po qëndronin dy makina. Kur dola te dera, në një distancë prej 2 metrash qëndronin një “Audi 80”, me ngjyrë të kuqe dhe një makinë tjetër, nga të cilat u qëllua në drejtimin tim plot 30 herë. Në njërën nga makinat ishte… (tregon identitetin e atentatorit), arrita ta njoh dhe ta shikoj se ai qëlloi ndaj meje.
Si u shpëtuat 30 plumbave?

Fati dhe Zoti deshën që unë të marr vetëm një plumb rikoshet dhe të shpëtoj. Falenderoj vetëm Zotin që jam gjallë. Por, edhe falë shkathtësisë sime që sapo dëgjova të shtënat e para, falë saltove që kam bërë shpëtova, pasi aty kisha edhe derën, dhe shkallët e bodrumit dhe munda që të futesha aty. Ai ka qenë vetëm 2 metra larg meje dhe unë arrita të shpëtoj, sepse atij i dridheshin duart kur qëllonte, arma i ikte në drejtime të ndryshme nga frika.