Shtetet anëtare të BE’së në Kosovë dhe Shefi i Zyrës së BE’së në Prishtinë kanë kërkuar nga partitë politike vazhdimin e dialogut me Serbinë.
Në një deklaratë të përbashkët thuhet se vazhdimi i dialogut me Serbinë në nivel teknik dhe politik duhet të vazhdojë dhe të arrihen rezultate.

Lexojeni të plotë deklaratën

Deklaratë e përbashkëtnga Përfaqësuesi Special i BE-së dhe Shefi i Zyrës së BE-së në Kosovë dhe shefat e misioneve të shteteve anëtare të BE-së në Kosovë

Bashkimi Evropian ka vëzhguar zgjedhjet parlamentare në Kosovë dhe ka qenë i kënaqur me mënyrën fer dhe transparente në të cilën u mbajtën ato.

Ne poashtu jemi duke e përcjellë procesin demokratik të konstituimit të Kuvendit si hap i parë që të pasohet me formimin e një qeverie legjitime. Ne vazhdojmë që me vendosmëri t’i përmbahemi parimit qëtë mos ndërhyjmë në këto procese, që janë çështje e brendshme e Kosovës dhe që duhet të adresohen e të zgjidhen nga përfaqësuesit e zgjedhur të Kosovës.

Ne tashmë kemi shprehur dhe përsërisim shpresat tona se së shpejti do të formohet një qeveri ashtuqë që të adresojë sfidat e shumta me të cilat përballet Kosova si qeverisja ekonomike, rritja e standardit të jetesës, përmirësimi i sundimit të ligjit, ndjekja e agjendës evropiane dhe vazhdimi i normalizimit të marrëdhënieve me Serbinë.

Në këtë kontekst, ne e përsërisim rëndësinë e madhe të vazhdimit të dialogut të ndërmjetësuar nga BE-ja, në nivel politik e teknik, në mënyrë konstruktive dhe të orientuar në rezultate, duke çuar në normalizim të qëndrueshëm të marrëdhënieve me Serbinë. Ky përkushtim, siç është theksuar qartë në Marrëveshjen për Stabilizim Asociim të inicializuar së fundmi, ka ndikim të drejtëpërdrejtë në rrugën evropiane të Kosovë dhe kësisoj është nëinteresin vital të Kosovës.

Ne presim që qeveria e ardhshme e Kosovës të vazhdojë të implementojë marrëveshjet si dhe të përkushtohet dhe angazhohet për ta çuar normalizimin përpara.

Në ambientet e Kuvendit të Kosovës, liderët e Bllokut LDK-AAK-Nisma dhe ai i Lëvizjes Vetëvendosje, sapo kanë firmosur marrëveshjen për bashkëqeverisje, me të cilën ky koalicion siguron numrat e nevojshëm edhe pa minoritetet në Kuvendin e Kosovës.

Marrëveshja është nënshkruar nga Isa Mustafa, Albin Kurti, Ramush Haradinaj dhe Fatmir Limaj.

Më vonë pritet të sqarohet edhe çështja e bisedimeve me Serbinë, nëse ky proces ka mbetur vetëm në dorë të Vetëvendosjes për çka kanë shprehur shqetësimin e tyre disa nga ambasadorët e akredituar në Prishtinë.

Nënkryetari i Partisë Demokratike të Kosovës, Adem Grabovci, thotë se marrëveshja mes Bllokut LDK-AAK-Nisma dhe Vetëvendosje është kryekëput për interesa personale e grupore dhe aspak parimore.

Grabovci thotë për Politiko.net se me veprimet e tyre Blloku LDK-AAK-Nisma dhe Vetëvendosje po mohojnë shtetësinë e Kosovës, duke mos njohur vendimet e institucioneve të pavarura të shtetit.

“Për asnjë parim nuk bëhet fjalë në atë marrëveshja. Çdo gjë mund të bëhet fjalë por për parime jo. Këtu absolutisht nuk ka parime por vetëm interesa shumë të ngushta dhe inate”.

“Ne nuk do të udhëheqim asnjëherë mbi politikën e inatit por mbi politikën e arsyes në interes të shtetit”.
“Përcaktimi i PDK’së ka qenë shumë i qartë prej kohësh: kërkojmë kushtetutshmëri, ligjshmëri dhe institucionalizim. Angazhimet tona do të jenë për institucione funksionale dhe jam shumë i sigurt se këtë do t’ua ofrojmë qytetarëve të Kosovës”.

“Çdo tentativë që bie ndesh me Kushtetutën e Republikës së Kosovë, së pari me vullnetin e qytetarëve të Kosovës që është sovrani i këtij vendi, Kushtetutën, ligjet dhe institucionet e Kosovës për mua personalisht si deputetë dhe përfaqësues i qytetarëve është i papranueshëm dhe shumë i dëmshëm”.

Nënkryetari i PDK’së thotë se e drejta është në anën e kësaj partie, e cila, sipas tij, me angazhimin e saj po u shërben interesave të qytetarëve të Kosovës.

“PDK po mbron diçka të shenjtë, po mbron votën e qytetarëve, po mbron pozitën e tyre, Kushtetutën e Kosovës dhe në mënyrë absolute nuk e besoj se dikush prej qytetarëve është për të shkelur mbi kushtetutën e Kosovës”.
“Nuk e besoj që një qytetar i Kosovës është që ne t’i mohojmë institucionet, të mohojmë shtetin tonë, Mohimi i shtetit tonë ndodh atëherë kur nuk respektohen vendimet e institucioneve tona por tentohet që vendimet të interpretohen për dëshirën e individëve të caktuar dhe për interesa individuale. Kjo është e papranueshme për qytetarët e Kosovës”.
“Mohimi i vendimit të Gjykatës Kushtetuese është mohim i shtetit”, thotë Adem Grabovci për Politiko.net

Një person është arrestuar nga policia në Prizren. Arrestimi i tij është bërë në rrugën “Fahridin Hoti” me urdhër të Gjykatës Themelore në Prizren.

“Në bazë të urdhëresës së Gjykatës Themelore në Prizren është arrestuar i dyshuari dhe i njëjti është dërguar në vuajtje të dënimit në burgun e Dubravës”./PrizrenPresss.com/

Deputeti i Parlamentit të Kosovës nga radhët e LDK-së dr. Hatim Baxhaku, ka shpallur kandidaturën për postin e kryetarit të Degës së LDK-së në Prizren. Ai thotë se kandidaturën e tij po e kërkojnë simpatizantët dhe anëtarët e LDK-së.

“Këtë vendim e kam marrë pas një analize të gjatë dhe të thellë të situatës në të cilën ndodhet Dega e LDK-së në Prizren, dhe kërkesës nga shumë miq, shokë, votues të mi, simpatizues dhe anëtarë të LDK-së dhe qytetarëve të shumtë të Prizrenit”,tregon Baxhaku.

“Është bindja e thellë e të gjithë atyre që kërkojnë kandidaturën time dhe që më inkurajojnë për këtë veprim, por edhe e imja, se në këtë moment vendimtar LDK-së i duhen njerëz të devotshëm partiak, të sinqertë, të dinjitetshëm, profesionistë, të përkushtuar, të guximshëm dhe të gatshëm, besnikë dhe të dëshmuar për t’u ballafaquar me sfidat dhe problemet e shumta me të cilat po përballet Dega e LDK-së në Prizren dhe rrjedhimisht edhe qytetarët e Prizrenit”.

“Një LDK e fortë në Prizren në një të ardhme shumë të afërt në zgjedhjet lokale do t’i sillte një fitore të sigurt LDK-së dhe do t’i jepte fund qeverisjes arrogante, korruptive, të papërgjegjshme, me elemente kriminale dhe të pa dinjitetshme për qytetarët e Prizrenit. Qytetit të Prizrenit duhet patjetër t’i kthehen atributet që ai i mban ndër shekuj si qytet i historisë, kulturës, artit, arsimit, tolerancës, zejtarisë, por edhe i rebelimit, luftës dhe heroizmave në situata vendimtare për kombin”/PrizrenPress.com/

Partia Demokratike e Kosovës dje ka zyrtarizuar kandidimin e Arsim Bajramit për kryetar të Kuvendit të Kosovës, në vazhdimin e seancës konstituive të 12 shtatorit.

Mirëpo edhe në rast se Bajrami nuk arrin të sigurojë vota të mjaftueshme për t’u zgjedhur kryekuvendar, PDK nuk ka në plan të dorëzohet. Ata tashmë kanë përzgjedhur edhe emrat e tjerë të mundshëm për tu kandiduar për kryetar Kuvendi.

Burime të GazetaPlus, brenda PDK-së, tregojnë se në rast se Arsim Bajrami nuk arrin të marrë vota të mjaftueshme apo nuk arrihet ti krijohet kuorum në seancën e 12 Shtatorit, PDK si partia e parë e dalë në zgjedhjet e 8 Qershorit dhe grupi parlamentar më i madh do të paraqesë kandidatura tjera para parlamentit.

Ky burim ka treguar se duke u bazuar në vendimin e Gjykatës Kushtetuese, që i jep të drejtën ekskluzive PDK-së për të kandiduar dhe zgjedhur kryeparlamentarin, PDK ka edhe emra të tjerë të cilët do ti paraqesë për votim para parlamentit, dy prej tyre janë figura dhe anëtarë të kryesisë në PDK, Adem Grabovci dhe Xhavit Haliti, dhe po ashtu PDK mund ta rikandidojë Agim Aliun, ish kryetarin e Ferizajt.