Zyra e Presidentes: Presidentja do të veprojë vetëm në përputhje me kushtetutën dhe ligjet e Kosovës duke respektuar parimin e ndarjes së pushteteve dhe autonominë e institucioneve.

Zyra e Presidentes, Atifete Jahjaga, në një deklaratë dërguar Zërit të Amerikës thekson se “vendimi i Gjykatës kushtetuese obligon të gjitha palët që ta respektojnë atë në përpjekje për të garantuar një proces të drejtë dhe të besueshëm për të siguruar funksionimin e shtetit të së drejtës”.

“Në përputhje me të drejtat dhe detyrimet e saj kushtetuese, si faktor uniteti dhe garantuese e funksionimit demokratik të institucioneve si dhe në zbatim të vendimeve të Gjykatës kushtetuese, presidentja do të veprojë vetëm në përputhje me kushtetutën dhe ligjet e Kosovës duke respektuar parimin e ndarjes së pushteteve dhe autonominë e institucioneve”.

“Zyra e presidentes thekson se në interes të vendit dhe të përmbushjes së detyrimeve ndaj qytetarëve dhe proceseve demokratike, konstituimi i shpejtë i Parlamentit të Kosovës dhe institucioneve tjera është i rëndësisë së veçantë”, thuhet në deklaratë, duke lënë të nënkuptohet së ajo nuk do të përfshihet në këtë periudhë në procesin që i takon Parlamentit si organi më i lartë ligjvënës.

Njohës të situatave thonë se presidentja druan që përfshirja në këtë periudhë do të mund të interpretohej jo vetëm si ndërhyrje ne autonominë e Parlamentit, por edhe si favorizim i njërës apo palës tjetër.

Situata aktuale e bënë të domosdoshme pothuajse një marrëveshje politike, një punë e vështirë po të kihen parasysh qëndrimet e kampeve politike, të cilat do të mund të ndryshonin ndoshta nga ndonjë trysni diplomatike.

Fisnik Korenica nga Grupi për Studime Juridike dhe Politike, ka theksuar se vendimi i sotshëm i Kushtetueses nxjerrë një situatë të re shumë herë më bllokuese se ngërçi politik i deritashëm.

Korenica ka theksuar se sipas vendimit të Kushtetueses, Kuvendi nuk konsiderohet i konstituuar për aq kohë sa nuk zgjidhet kryetari i tij dhe “për aq kohë sa në seancën konstitutive Partia Demokratike e Kosovës (PDK) e ka të drejtën ekskluzive që ta propozojë emrin për kreun e Kuvendit”.

“Vendimi i sotshëm e ka bërë të qartë faktin që edhe nëse kjo legjislaturë, pas shumë tentimeve, nuk është në gjendje ta zgjidh kreun e saj, vendi prapë se prapë nuk do të shkoj në zgjedhje të reja”, ka thënë ai për Telegrafin.

Korenica ka theksuar se nëse telenova për kreun e Kuvendit përmbyllet me zgjidhjen e një anëtari të PDK-së në krye të këtij institucioni, atëherë hapet procedura për formimin e Qeverisë.

Ai ka thënë se nëse kalohet ngërçi i zgjidhjes së kryetarit të Kuvendit, atëherë Lidhjes Demokratike e Kosovës , Aleancës për Ardhmërinë e Kosovës dhe Nismës për Kosovën (LAN-it) i hapet mundësia që në procedurën e dytë të mandatimit të kryeministrit, ta formojë Qeverinë.

“Nëse ka vullnet tek partnerët e LAN-it që ta votojnë propozimin e PDK-së për kryetar të Kuvendit, atëherë do të hapej mundësia për ta formuar qeverinë. Nëse do të ndodh një gjë e tillë, vendi ynë do të përballej me paradoksin më të madh në tërë sistemet parlamentare në botë, që kreu i Kuvendit dhe Qqeveria të barten nga dy blloqe të kundërta politike. Një opsion tjetër që do të mund të pasohet nga ana e opozitës do të ishte – nëse gëzon dy të tretat e votave – shkarkimi në një seancë konstitutive i kreut të Kuvendit dhe rizgjedhja e kryetarit tjetër në një seancë pune në të cilin rast madhësia e grupit parlamentar do të vlerësohej në bazë të numrit të deputetëve dhe jo sipas pozicionit zgjedhor të partive politike”, ka thënë Korenica.

Profesori dhe analisti Lumir Abdixhiku, thotë se Blloku LDK-AAK-Nisma e ka humbur kryeparlamentarin, por jo edhe kryeministrin.

“Vendimet e Kushtetueses duhet të respektohen në plotni; edhe atëherë kur provojnë mendim ndryshe. Në të kundërtën asnjë element i shtetit nuk bartë më kuptim”, në profilin e tij në Facebook.

“Blloku opozitar përndryshe, ka humbur pozitën e kryeparlamentarit; kjo më nuk ka dyshim. Megjithatë, të njëjtëve u është dhënë e drejta – nga i njëjti institucion, pra Kushtetuesja – të nominojnë Kryeministrin në raundin e dytë. Nëse pozicionet partiake mbesin siç janë sot, pra lëvizje deputetësh nuk prodhohen më, atëherë sipas dy interpretimeve të deritanishme të Kushtetueses del të kemi kryetarin e Parlamentit në dorë të PDK-së; Qeverinë në dorë të LDK-AAK-NISMA-minoritete; opozitën vetëm me VV, e Presidenten shah në veti – gjithsesi vetëm për veti”.

“Një hallakamë e tillë institucionale sinqerisht është pa hajr. Një përzierje e tillë ku gjithkush udhëheqë me pak por askush në të vërtetë s’ka zë, do të prodhojë vetëm stagnim. E për stagnim e mishmash kemi më së paku nevojë. Them të shkojmë në zgjedhje të reja; ashtu kështu po humbet kohë e po improvizohet shumë. Në fund të fundit s’ka çfarë del ma keq; s’mund të përzihet asgjë më shumë se kaq”. /PrizrenPress.com/

Zenun Pajaziti, deputet i PDK-së thotë se me vendimin e Gjykatës Kushtetuese i është hapur rruga krijimit të institucioneve. Ai tha se pas këtij vendimi, partitë politike në vend duhet të reflektojnë.

Pajaziti tha se posti i Kryetarit të Kuvendit i takon PDK-së dhe se partitë e bllokut LDK-AAK-NISMA, nuk mund të mbajnë Kuvendin në bllokadë. Ai tha se, LAN mund të mos pajtohet për kandidatët për kryeparlamentar, por se nuk mund të vazhdojnë bllokadën pafundësisht. Kjo sipas tij, do ta qonte vendin në zgjedhjet e reja.

“Nuk mund ta mbajnë Kuvendin në bllokadë, do ta qojnë vendin në zgjedhje nëse ata pafundësisht, do të hyjnë në një rreth vicioz, nëse pafundësisht nuk votojnë kandidatin në Kuvend. Nuk mund të konstituohet Kuvendi dhe rrjedhimisht nuk mund të bëhen ndryshime as në grupet parlamentare nëse s’konstituohet Kuvendi. Ata nuk mund me çdo kusht ta mbrojnë një vendim”, tha Pajaziti për RTV21.

Isa Mustafa nuk mundi të qëndrojë si kryetar i Kuvendit të Kosovës më gjatë se Behxhet Pacolli në postin e Presidentit.

Të dy mbajtën nga 37 ditë postet në të cilat u zgjodhën, për t’u rrëzuar gjithashtu të dy nga vendimet e Gjykatës Kushtetuese.

Pacolli ishte President për 37 ditë, nga 22 shkurti deri me 30 mars 2011. Kurse Isa Mustafa qëndroi si kryetar Kuvendi nga 17 korriku deri me 22 gusht 2014.

Por nëse Mustafës i llogaritet pezullimi i postit me vendim të Gjykatës Kushtetuese, atëherë rezulton se ai si kryetar i Kuvendit ishte vetëm për 7 ditë.

Ismet Krasniqi, sekretar i Kuvendit të Kosovës, nëpërmjet postës elektornike tha për RTK-në se ky institucion është i gatshëm për seancën e radhës.

Ai tha se Mustafa dhe grupet e reja parlamentare janë vendosur në faqen e internetit, para procedimit te kërkesës në Gjykatën Kushtetuese.
Krasniqi tha se për ndryshim eventual të faqes, do behet pas Aktgjykimit për veprime të mëtejme.

Isa Mustafa është zgjedhur kryetar i Kuvendit me 17 korrik. Atë ditë ai pranoi detyrën nga Jakup Krasniqi. Me 23 korrik Gjykata me vendim ia pezulloi Mustafës të gjitha aktivitetet në cilësinë e kryetarit të Kuvendit. Me 22 gusht gjykata publikoi njoftimin paraprak për vendimin sipas të cilit Mustafa nuk është zgjedhur në post në përputhje me Kushtetutën.

Kryetari i Lidhjes Demokratike të Kosovës, Isa Mustafa, ka komentuar në lidhje me reagimin e gjyqtarit amerikan të Gjykatës Kushtetuese në lidhje me vendimin e plotë të kësaj gjykate për sa i përket seancës konstituive të Kuvendit të Kosovës.

Gjyqtari i Gjykatës Kushtetuese, Robert Carolan, ka thënë se vendimi i Kuvendit për të zgjedhur Isa Mustafën kryetar të Kuvendit, ishte në përputhje me Kushtetutën. Sipas tij, meqë Agim Aliu i PDK-së nuk mori votat e shumicës së deputetëve, atëherë shumica zgjodhi në përputhje me Kushtetutën Isa Mustafën, kryetar të Kuvendit.

Në komentin e tij në Facebook, Mustafa e ka falënderuar gjyqtarin Carolan.

“Falënderoj gjyqtarin amerikan, Robert Carolan për korrektësinë dhe objektivitetin e tij karshi vendimi të sotëm politik të Gjykatës Kushtetuese”, ka thënë Mustafa.

(E plotësuar) Lideri i AAK-së, Ramush Haradinaj ka thënë se është i habitur me vendimin e Gjykatës Kushtetuese. Ai ka thënë se vendimi i GJKK-së i është dukur sikur të ishte shkruar në zyrat e PDK-së.

Derisa koalicioni LAN ka thënë se vendimin e ka lexuar kështu:

“Kjo e drejtë që i është dhënë PDK-së përmbyllet me epilogun e kandidimit. Sepse e dijëm se kandidatura e PDK-së është e dështim. Po ashtu nuk do të këtë asnjë negociatë me PDK-së”

Ai ka treguar se neni 127 është në favor të tyre, dhe sipas tij në seancën e ardhshme pritet të konsumohet kjo e drejt që i është atribuuar PDK-së. “Në mënyrë që të procedojmë më zgjedhjen e Isa Mustafës kryetar të Kuvendit”.

“Neni 127 thotë që deputetët duhet të ofrojnë zgjidhje, dhe do t’ia ofrojnë atë. I kemi numrat dhe nuk ka nevojë të shkohet në zgjedhje”, ka thënë Haradinaj.

Pafundësia e PDK-së mbyllet me nenin 126 me epilogun e kandidaturës.

Ai ka treguar se për rrjedhën e seancës konstituive do të negociojnë me të gjithë partnerët, duke përfshirë edhe Vetëvendosjen.

“Koalicioni është unik, dhe nuk do të lëkundët pa asnjë arsyeje”, ka treguar Haradinaj.

Blloku nis takimin

Takimi mes LDK-së, AAK-së dhe NISMES ka nisur. Në këtë takim janë duke marr pjesë të tre liderët e këtyre partive, Isa Mustafa, Ramush Hardinaj dhe Fatmir Limaj, të mbështetur nga ekipet e tyre.
Ky takim sipas gazetarit të Expressit pritet të zgjas rreth një orë. Takimi është duke u zhvilluar në ndertesën e Aleancës për Ardhmërinë e Kosovës.

Ky takim i bllokut, vjen menjëherë pas publikimit të vendimit përfundimtar të Gjykatës Kushtetuese të Kosovës.

Kryesuesi i Kuvendit të Komunës së Prizrenit, Kujtim Gashi, ka pritur sot Zyrtarin e Lartë për Demokratizim të OSCE-së, George Katcharava.

Gashi dhe Katcharava në këtë takim biseduan për koordinimin dhe bashkëpunimin mes Kuvendit të Komunës së Prizrenit, dhe OSCE-së, veçanërisht në bashkërendimin e aktiviteteve dhe ndihmës nga OSBE-ja për draftimin e buxhetit për vitin 2015 si dhe kornizën e paraparë për vitet 2016/17.

Në takim u diskutua edhe për komitetet obligative dhe ato konsultative të Kuvendit të Komunës, si dhe funksionimin sa më të mirë të tyre.

OSBE-ja, vlerësoi punën e mirë të KK-së në pjesën e parë të këtij viti, si dhe u zotua se do ta mbështesë Komunën e Prizrenit në punën e saj. /PrizrenPress.com.