Subjektet politike në Kosovë po presin vendimin final të Gjykatës Kushtetuese, e cila tashmë ka anuluar zgjedhjen e Isa Mustafës në postin e Kryeparlamentarit. Hapat e ardhshëm në varësi të sqarimit të plotë të Kushtetueses.

Në partinë e kryeministrit Hashim Thaçi presin, që vendimi i kompletuar të sqarojë në detaje se kryetari i Kuvendit i takon vetëm grupit më të madh parlamentar, çdo herë që votohet për të.

“Kjo meqë atë, në Kushtetutën e Kosovës nuk ka asnjë klauzolë që të thotë se mandatin për kreun e Kuvendit mund ta japë edhe ndonjë grup tjetër parlamentar, përveçse atij më të madh të dalë nga zgjedhjet, në këtë rast ato të 8 Qershorit. PDK mbetet si gjithmonë e hapur për çdo bashkëpunim me të gjitha subjektet politike, në të gjitha mënyrat, për të votuar si kryetarin e Kuvendit, edhe qeverinë e re”, u shpreh Ardian Arifaj, këshilltar i kreut të PDK për Top Channel.

Por, në bllokun paszgjedhor LDK-AAK-Nisma shpresojnë që vendimi final i gjykatës do t’u japë mundësinë edhe atyre të propozojnë kryeparlamentarin, në rast se PDK nuk mund ta zgjedhë atë.

“Vendimi i Gjykatës Kushtetuese nuk është se i jep të drejtën për kreun e Kuvendit vetëm një grupi të caktuar parlamentar. Ne besojmë se në vendimin e saj do të krijohet, apo ekziston një mundësi për krijimin e institucioneve të reja. Nëse ekziston kjo mundësi, atëherë koalicioni ka të drejtë që të kandidojë kryetarin e Kuvendit dhe besoj se kjo e drejtë do të shfaqet në dokumentin e Gjykatës Kushtetuese”, deklaroi Avni Arifi, këshilltar i kreut të AAK për Top Channel.

Pavarësisht qartësimit, që do të bëjë gjykata me vendimin e kompletuar, që pritet të publikohet javën e ardhshme, dy blloqet politike vazhdojnë të mbesin në qëndrimet e mëhershme, duke refuzuar bashkëpunimin.

Kështu, këshilltari i Ramush Haradinajt, Avni Arifi, tha se blloku, në rast se nuk i jepet e drejta të zgjedhë kryeparlamentarin, është unik për të shkuar në zgjedhje. Me të njëjtën gjuhë është përgjigjur edhe këshilltari i Hashim Thaçit, por Ardian Arifaj thotë se PDK do të bëjë përpjekje të ftojë për bashkëpunim subjektet e tjera për të formuar institucionet bashkarisht, për t’i shmangur zgjedhjet.

Pas vendimit të Gjykatës Kushtetuese të bërë publik të premten, ku njoftohet se zgjedhja e Isa Mustafës Kryetar i Kuvendit të Kosovës është bërë në kundërshtim me Kushtetutën dhe rregulloren e punës së Kuvendit, do të thirret edhe një seancë tjetër e Kuvendit.

Njohësi i punës së Kuvendit, Albert Krasniqi nga instituti “KIPRED”, ka thënë për lajmi.net se në bazë të praktikave parlamentare, seanca e cila ndërpritet për shkak të mungesës së kuorumit, vazhdon aty ku ka mbetur.

Krasniqi tregon se hapat e ardhshëm për thirrjen e seancës së ardhshme të Kuvendit të Kosovës varet nga vendimi i plotë i Gjykatës Kushtetuese.

“Në bazë të njoftimit të publikuar, Gjykata nuk ka njohur mocionin për procedurat të ngritur për shkarkim të kryesuese znj. Brovina, që i bie të jetë ajo personi i cili duhet të thërret seancën e ardhshme e cila është vetëm vazhdim i seancës së nisur me 17 korrik. Nga praktikat parlamentare, seanca e cila ndërpritet për shkak të mungesës së kuorumit, vazhdohet të nesërmen, që në këtë rast i bie që menjëherë pas publikimi të vendimit kryesuesja të thërret vazhdimin e seancës”, thotë Krasniqi.

“Ndërsa, nëse Gjykata lëshohet të shqyrtojë edhe rendin e ditës të përcaktuar nga kryesia e legjislaturës së kaluar së bashku me kryetarët e partive politike të përfaqësuara në Kuvend, si dhe ndarjen e ulëseve, atëherë seanca e ardhshme duhet të thirret nga kryesia e legjislaturës së kaluar”, tha Krasniqi.

Sipas tij, Presidentja ka kryer detyrën e saj kur ka thirrur seancën e 17 korrikut dhe nuk kërkohet nga ajo të thërras seancë të re, por të vazhdohet seanca e nisur, pasi Gjykata Kushtetuese nuk ka kontestuar mënyrën e thirrjes së seancës konstituive, por ka shpallur si të pavlefshëm vazhdimin e seancës pas mbylljes që kishte bërë kryesuesja në mungesë të kuorumit.

Krasniqi tha se gjatë javës së ardhshme Gjykata duhet ta publikoj vendimin që t’i hap rrugë formimit të institucioneve, që sipas tij, mund të formohen në fund të shtatorit.

“Gjatë javës së ardhshme do të duhet të nxirrej vendimi i plotë i Gjykatës Kushtetuese, dhe menjëherë të pasohej me konstituimin e Kuvendit. Pastaj edhe 25 ditë të tjera deri në zgjedhjen e Qeverisë së re, nëse PDK dështon ta bëjë këtë në herën e parë. Marrë parasysh këtë institucionet e reja pritet të fillojnë punën kah fundi i muajit shtator. Meqenëse konstituimi i Kuvendit nënkupton edhe zgjedhjen e kryetarit dhe të kryesisë, kyçe do të jetë vendimi i Gjykatës nëse njeh të drejtën e formimit të grupeve parlamentare para zgjedhjes së kryetarit të Kuvendit apo të njeh mundësinë që nëse i nominuari i parë për kryetarë të kuvendit nuk arrin të zgjidhet, t’i njihet e drejta grupit tjetër parlamentarë ta bëjë këtë”, tha Krasniqi.

Vendimi i Gjykatës Kushtetuese për të shpallur të pavlefshëm seancën konstitutive të 17 korrikut, e ka futur edhe më shumë vendin në shinat e zgjedhjeve të parakohshme.

Të tretat brenda një viti, të cilat për vendin do të kishin edhe një dëm të ndjeshëm ekonomik përveç atij politik. Më 3 nëntor 2013 u mbajtën zgjedhjet lokale, ndërsa më 8 qershor 2014 zgjedhjet parlamentare.

Nëse subjektet politike nuk arrijnë ta zgjidhin ngërçin politik pas vendimit të fundit të Kushtetueses, atëherë vendi muajt e ardhshëm do të detyrohet të shkojë në zgjedhje të jashtëzakonshme parlamentare./zeri/

Gani Gecit, që është i dyshuari për vrasjen e Ruzhdi Shaqirit i është vendosur masa e paraburgimit për një muaj nga ana a e policisë së EULEX-it. Këtë e ka bërë të ditur vëllai i Ganiut, Fadil Geci për gazetën Tribuna. ”Ganiu në bazë të procedurave ligjore do të qëndrojë një muaj paraburgim”. Ndërkaq sipas tij, Ganiu tashmë gjendet në burgun e Lipjanit dhe aty do të qëndrojë për një muaj rresht. Mirëpo Fadili nuk ka dashur të flasë për vendndodhjen e deritashme të Ganiut.

“Ai do të tregojë vet se ku ka qëndruar gjithë këtë kohë”, është shprehur Fadil Geci. Sipas tij familja Geci nuk ka asnjë informatë se ku ka qëndruar deri tash familjari i tyre dhe nuk di nga cili shtet Ganiu ka ardhur në Kosovë për t’iu dorëzuar policisë së EULEX-it. Sipas tij Ganiu do të tregojë vet se ku ka qëndruar gjatë këtyre ditëve.

“Nuk kam asnjë informatë për këtë. Nuk kam komunikuar hiq me të. Krejt këto gjëra do t’i thotë vetë Ganiu, kur t’i jepet mundësia të flasë”, ka thënë Fadil Geci. Ndërkaq Fadili vendimin e vëllaut të tij, Ganiut, për t’iu dorëzuar policisë së EULEX-it e cilëson si më të duhurin. Ai tha se tashmë familja Geci e ka humbur besimin tek institucionet kosovare./tribuna/

Vendimi i Gjykatës Kushtetuese që e njeh Partinë Demokratike të Kosovës si grupin më të madh parlamentar, duke i dhënë edhe të drejtën e propozimit të kryetarit të Kuvendit, ka shtyrë drejtuesit e kësaj partie që t’i ndezë motorët. Partia e Hashim Thaçit është duke i menduar tri opsione për dalje nga ngërçi politik në të cilin është futur vendi, vetëm një ditë pas mbajtjes së zgjedhjeve parlamentare të 8 qershorit.

Kriza kishte nisur kur blloku opozitar LDK-AAK-Nisma nënshkruar një marrëveshje për krijimin e qeverisë së opozitës, duke u betuar që në asnjë rrethanë të mos lejojnë krijimin e qeverisë “Thaçi 3”.

Burime të gazetës Tribuna brenda PDK-së, bëjnë të ditur se krerët e kësaj partie janë duke e shqyrtuar seriozisht situatën e krijuar pas vendimit të Gjykatës Kushtetuese, vendim i cili i jep të drejtën kësaj partie për ta propozuar emrin e kryeparlementarit. Sipas këtij burimi, PDK është duke i menduar tri opsione për zgjidhjen e ngërçit politik…/tribuna/

Që shqiptarët vazhdojnë të mbesin proamerikanët më të mëdhenj në Ballkan e edhe më gjerë, këtë nuk e vë askush në dyshim, por duket se edhe dilema se a do të vazhdojë superfuqia botërore të mbështet Kosovën në rrugën e asaj drejt integrimeve euro-atlantike tashmë nuk ekziston.

Njohësit e çështjeve të sigurisë dhe të marrëdhënieve ndërkombëtare vlerësojnë që përkundër zhvillimeve të fundit në vend pas arrestimit të 43 të dyshuarave për terrorizëm dhe pjesëmarrje në luftën në Siri, nuk pritet që Kosova të humbasë mbështetjen dhe përkrahjen amerikane, për faktin që kauza e tyre nuk ka gjetur mbështetje nga qytetarët e Kosovës.

Për Naim Malokun raportet e mira Kosovë-Amerikë tashmë kanë hyrë në një marrëdhënie tradicionale, burimet e së cilës datojnë qysh në Pavarësinë e Shqipërisë më 1912 e tutje./tribuna/