Kryesuesi i Kuvendit Komunal në Prizren, Kujtim Gashi ka thirrë për të mërkurën mbledhjen e jashtëzakonshme të Kuvendit, me pikën e vetme të rendit të ditës: shqyrtim propozimin për shpalljen qytetar nderi të ministrit të Punëve të Jashtme të Emirateve të Bashkuara Arabe ABDULLAH bin.
ZAjED-bin.Sultan Al-Najan. Mbledhja do të mbahet më 12 mars 2014 të mërkurën, në sallën për mbledhjet e Kuvendit të komunës së Prizrenit, përkatësisht në ndërtesën e re të Kuvendit, duke filluar në orën 11.00.
Kanë lundruar në të njëjtin det, e tashmë, imazhet e tyre janë në të njëjtën sallë. Pothuaj 100 vite traditë të detarisë shqiptare janë përmbledhur në një ekspozitë që çelet sot në Muzeun Historik Kombëtar në ora 11:00. Fotografi dhe makete të anijeve më përfaqësuese, prezantohen para publikut duke përfshirë historikun e zhvillimit të detarisë shqiptare (duke filluar nga lashtësia, sepse në fakt këtu ka edhe anije liburne). Luan Shabani, nga shoqata e “Naval”, tha dje për “GSH” se në muze janë imazhe të flotës shqiptare nga 1912-ta e deri sot, nga anijet tregtare tek ato ushtarake, që kanë qenë forca goditëse gjatë 50 viteve të komunizmit.
“Qëllimi i ekspozitës nuk është vetëm të prezantojë arritjet në fushën e detarisë, por edhe t’i bëjmë të njohura, sepse pak dihen. Ndaj ne kemi bërë edhe makete se si kanë qenë anijet, si kanë evoluar nga 1912-ta e deri tani”, – tha Shabani.
Ndryshe nga sa mendohet, flota jonë në vite ka qenë e zhvilluar.
Shabani sqaron se gjatë 50 viteve komunizëm ka pasur rreth 25 anije tregtare, me kapacitet të përgjithshëm rreth 100 mijë tonë.
“Anijet që kanë punuar para 1990-ës kanë histori, sepse kanë shërbyer për zhvillimin e ekonomisë së vendit për 30-50 vjet. Ndërkohë që sot nuk ndodh ashtu. Flota atëherë kishte dinjitet, ndërsa nga 1992-shi deri sot, ajo është tkurrur. Nëse më 1990-ën kishte 60 deri në 100 anije në inventar, tani ka rreth 6-7 anije me kapacitet 40-50 mijë tonë”, – tregon Shabani, që ka mbaruar Akademinë e Marinës.
Anijet
Së pari ndalon tek anija patrulluese “Tirana”, e prodhuar më 1916-ën. Në vitet 1930 ka shërbyer në Flotën Ushtarake të Mbretërisë së Zogut, e me të njëjtin model kanë qenë edhe anijet “Vlora”, “Durrësi” dhe “Saranda”, të gjitha patrulluese. Më vonë, më 1926-ën, Shabani thotë se u blenë edhe anijet “Skënderbeu” e “Shqipnija”. Kur e pyet a ruhet ndonjë prej tyre, ai mohon me kokë dhe shpjegon: “Ne arritëm që përmes internetit të siguronim vizatimet, pranë kompanive që i kanë prodhuar e shteteve ku janë prodhuar, dhe bëmë maketin”.
Qëllimi i shoqatave organizatore të ekspozitës, është që t’i dëgjojnë autoritetet: Ministria e Kulturës, e Mbrojtjes, e Transportit, që të shohin se kemi tradita në këtë fushë e megjithatë jemi i vetmi vend shtet në rajon që nuk kemi një muzeum detarie që t’i pasqyrojmë ato.
Çfarë u bë me këto anijet e Zogut? Kësaj pyetjeje, Shabani i përgjigjet me keqardhje se, pas pushtimit italian, u sekuestruan dhe më vonë vetëm njëra prej tyre arriti të jetonte deri nga vitet 1945. “Dolën jashtë përdorimit, por nuk u ruajtën”, – na thotë ai. Ka edhe anije me vela, ndërtuar më 1922. Një tjetër anije që prezantohet në ekspozitë është ajo e vëllezërve Veliaj, detarë, e prodhuar në Itali. “Pas 1944-ës e sekuestruan dhe punoi deri pas Çlirimit. As kjo nuk është ruajtur. Maketet i kam bërë vetëm nga fotot, takimet me kapitenët e punonjësit e tjerë të tyre”, – sqaron Luani.
Anija e “Kinës”
Një prej anijeve me historinë më të veçantë është ajo që mban emrin “Vlora”. Sipas Shabanit, transoqeanikja ka punuar 40 vjet. “I ka bërë një shërbim të madh vendit tonë, sepse ka sjellë gjithë industrinë dhe materialet, nga Kina në Shqipëri. Po ashtu ka sjellë armatime, tanke, aeroplanë etj. Është vlerësuar si anije elegante dhe kujtoj se ajo është prodhuar në Itali, ndërsa në Shqipëri ka ardhur më 1961-shin”, – sqaron Shabani, organizator i ekspozitës. Kur kalojmë në zonën e anijeve ushtarake, ai sqaron se bëhet fjalë për anije ruse e kineze, që kanë qenë në gjendje pune nga viti 1951 deri në vitin 2000.
“Kanë qenë në gatishmëri. Gjuajtësit ushtarakë janë mbajtur deri në vitin 2008. Ka edhe katërsilures, që përdoreshin për të sulmuar anijet e rënda si edhe dragaminat, anije që kanë shërbyer për çminimin e detit”, – shpjegon Shabani. Në fund, edhe pse jo për nga rëndësia, janë edhe nëndetëset, ngritur mbi modelin e katër nëndetëseve ruse që gjendeshin në Pashaliman. Sot, prej tyre ka vetëm një, që do të jetë pjesë e muzeut nënujor, tri të tjerat janë shitur për skrap.
Ekspozita është organizuar nga shoqata “Adrion” dhe “Naval”, me mbështetjen e Autoritetit Portual Durrës, në sallën e ekspozitave të Muzeut Historik Kombëtar.
Nijazi Kryeziu, ish kryesues i Kuvendit Komunal në Prizren, aktualisht drejtor i Urbanizmit, si dhe Shkodran Kryeziu, kryetar i Rinisë Demokratike, dega në Prizren, dyshoheshin se në ditën e zgjedhjeve më 3 nëntor kishin kryer veprën penale të blerjes së votës.Shkak për inicimin e këtyre hetimeve nga policia, u bë një video-incizim dhe dy foto, të cilat i kishte bërë një qytetar, që pretendonte se në afërsi të shkollës fillore “Fadil Hisari” janë dhënë një shumë e madhe e të hollave për blerjen e votave të qytetarëve, në momentin kur Shkodran Kryeziu, i është afruar makinës në të cilën ishte Nijazi Kryeziu.
Mirëpo pas hetimeve të policisë, të cilat ishin bërë me urdhër të Prokurorisë Themelore në Prizren dhe pas ekspertizës së fotove dhe incizimeve, doli se në këtë rast nuk kishte fakte dhe prova që Nijazi dhe Shkodran Kryeziu, të kenë kryer veprën penale për të cilën dyshoheshin.
Sylë Hoxha, kryeprokuror i Prokurorisë Themelore në Prizren, i tha Gazetës Jeta në Kosovë, se ditën e zgjedhjeve prokuroria kishte përcjellë me kujdes çdo pakënaqësi dhe çdo dyshim që i ishte paraqitur.
Sipas tij, në çdo rast kur është dyshuar për keqpërdorim dhe blerje të votës, apo kur është dyshuar se po shkelej e drejta e votuesit, janë ndërmarrë të gjitha veprimet.
Kryeprokurorit Hoxha i kujtohet edhe rasti i Nijazi dhe Shkodran Kryeziut.
“Ka qenë një incizim prej së largu në një automjet, policët kanë marrë në pyetje edhe dëshmitarë të tjerë të cilët ne i kemi autorizuar dhe nuk është argumentuar, nuk kemi nxjerrë prova se atë ditë ka shpërndarë të holla Nijazi Kryeziu”, tha Sylë Hoxha.
Ai thotë se nga ofruesi i fotove dhe videoincizimit është përmendur një shumë e të hollave rreth 20 mijë euro.
“Por nuk është vërtetuar, kështu që ne nuk kemi pasur prova t’i hapim hetimet, po kjo ka qenë një procedurë që themi ne parapenale”, tha kryeprokurori i Prizrenit.
Nga ana tjetër Nijazi Kryeziu, aktualisht në pozitën e drejtorit të Urbanizmit, nuk ishte në dijeni se janë pushuar hetimet ndaj tij.
“Unë nga ju po dëgjoj që kanë pushuar hetimet, nuk po çuditem aspak, sepse kam qenë i pafajshëm, kjo thjesht ka qenë manipulim i mekanizmave paramilitarë të partive opozitare, të cilat kanë angazhuar njerëz për spekulime në zgjedhje”, tha Kryeziu.
Nërsa kryetari i RDK-së në Prizren, Shkodran Kryeziu, tha se kishte qenë i habitur kur emri i tij, kishte dalë në mediat e shkruara dhe ato elektronike, për dyshimin e shitblerjes së votave.
“Unë personalisht jam ndjerë shumë i shqetësuar me publikimin e lajmit të tillë, pasi që asnjë herë në jetën time politike nuk do ta bëja një gjë të tillë. Lajmet e tilla pos që kanë ndikuar në prekjen dhe lëndimin e imazhit tim si kryetar i RDK-së, po ashtu ka ndikuar rëndë edhe në lëndimin emocional të familjes time, por mbi të gjitha është prekur edhe imazhi i Partisë Demokratike të Kosovës”, tha Shkodran Kryeziu.
Gazeta Jeta në Kosovë kontaktoi edhe me qytetarin që ka iniciuar këtë rast, i cili përveç që ofroi xhirimin dhe foton që e kishte dorëzuar në prokurori, nuk deshi të komentojë më tutje dhe parapëlqeu të mbetet anonim./Gazeta Jeta në Kosovë/
Ministria e Mjedisit dhe Planifikimit Hapësinor ka ngritë Kallëzim Penal kundër Eqrem Kryeziut ish-kryetarit të Prizrenit, Hyssein Kazaz ish-drejtor i Drejtorisë për Urbanizëm dhe Planifikim Hapësinor KK Prizren, Ylber Gashit Inxhier dhe hartues i Lejes Ndërtimore, si dhe përfaqësuesit të Kompanisë N.T.SHstudio projektuese ”DIARKO” – Iftiman Lutfiu nga Prizreni. Kjo për shkak të parregullsive në Prevallë.
“Në periudhën kohore 2006-2008 pas hartimit të Planit të Përkohshëm Rregullues Urban të zonës së Prevallës në Parkun Nacional “Sharri” nga Asambleja Komunale e KK të Prizrenit janë lëshuar një numër i konsiderueshëm i lejeve ndërtimore në kundërshtim me PRrU si dhe dispozitat ligjore të cilat rregullojnë fushën e Planifikimit Hapësinor. Personat e lartpërmendur kanë ushtruar ndikim dhe presion te vartësit e tyre, duke i urdhëruar që gjatë kësaj periudhe kohore të lëshojnë leje ndërtimore për ndërtimin e objekteve ne fshatin turistik Prevallë në kundërshtim me Legjislacionin ekzistues”, thuhet në njoftimin e tyre.
Në Asamblenë Komunale të Prizrenit është miratuar Plani i Përkohshëm Rregullues Urban për zonën e Prevallës me ç’rast janë specifikuar kodet për ndërtim të shtëpive, ndërkaq në një plan tjetër i cili nuk ka qenë i miratuar nga Asambleja Komunale e Prizrenit dhe pa pëlqim nga MMPH.
Për tipet e shtëpive janë dhënë kode të tjera, të cilat janë në kundërshtim me Planin paraprak të aprovuar nga Asambleja Komunale, ndërsa praktikisht në terren në zonën e Fshatit Turistik të Prevalles çuditërisht janë dhe e kode krejtësisht të tjera.
Lejet e ndërtimit janë dhënë sipas tipeve të fundit për ndërtimin e vikend shtëpizave gjë që janë në kundërshtim me PRrU dhe pëlqimin e MMPH.
Kjo laramani e tre llojeve te kodeve për tipet e vikend shtëpizave është bërë me qëllim nga personat e sipërpërmendur për t’i fshehur gjurmët e shkeljeve ligjore me ç’rast është bërë shkatërrimi dhe degradimi i mjedisit në këtë zonë të mbrojtur me vlera natyrore dhe kombëtare.
“Të gjitha këto veprime kundërligjore janë bërë nën urdhrat dhe dijeninë e ish kryetarit të Prizrenit Eqrem Kryeziu dhe vartësve të tij të cilët kanë punuar në Komunën e Prizrenit apo dhe kanë qenë të angazhuar nga Komuna në cilësi projektimi të vikend shtëpizave”, thuhet në njoftim.
Kështu që të apostrofuarit kanë kryer vepër penale nga neni 422 – keqpërdorimi i pozitës dhe autoritetit zyrtar; veprën penale nga neni 431 -ushtrimi i ndikimit dhe veprën penale nga neni 347 qe ka të bëjë me ndotjen dhe degradimin ose shkatërrimin e mjedisit të parapara në Kodin Penal të Republikës së Kosovës.
Në Jeshkovë të Prizrenit është shënuar të martën 15 vjetori i betejës së UÇK-së. Në këtë përvjetor kanë marrë pjesë familjarë të dëshmorëve, veteranët, invalidët e luftës së UÇK-së, si dhe kryetari i Komunës së Prizrenit,Ramadan Muja.Me 11 mars të vitit 1999 në fshatin Jeshkovë është zhvilluar një betejë e ashpër e luftës në mes luftëtarëve të UÇK-së dhe forcave serbe.
Në këtë betejë kanë rënë dëshmorë 21 pjesëtarë të UÇK-së.Kryetari i Prizrenit, Ramadan Muja,ndërkaq ka vlerësuar lartë Betejën e Jeshkovës. Ai tha se Ushtria Çlirimtare e Kosovës, ishte arritja më e madhe e popullit tonë për liri.
“Vajzat dhe djemtë më të mirë, guximshëm të Kosovës dhe mbarë trojeve etnike, nuk hezituan fare, por, tërë qenien e tyre e vunë në shërbim të UÇK-së, në shërbim të atdheut, me të vetmin qëllim, lirinë dhe shpalljen e Pavarësisë së Republikës së Kosovës”, tha Muja.
Ai tha se Republika e Kosovës po vazhdon rrugëtimin e saj drejt integrimeve në Evropë dhe NATO. “Sovrani më i sigurt në këtë drejtim, vazhdon të mbetet gjaku i dëshmorëve të kombit”.
Muja tha se Komuna e Prizrenit, tërësisht është e angazhuar, që t’iu shërbejë qytetarëve.
“Politikat institucionale në Prizren do të jenë në lartësinë e përgjegjësisë vepruese, ashtu siç ishte edhe lufta e Ushtrisë Çlirimtare të Kosovës dhe NATO-s, që sollën lirinë dhe demokracinë në këtë vend, produkte këto të cilat lirshëm po i shfrytëzojnë të gjithë qytetarët e komunës sonë”.Për nder të shënimit të Betejës së Jeshkovës, të martën janë bërë shumë homazhe edhe në varrezat e dëshmorëve në Landovicë./PrizrenPress.com/
Katër persona janë arrestuar në Malishevë të dyshuar për vjedhje të portofolave të qytetarëve. Zëdhënësi i PK-së, Hazir Berisha tha se arrestimi i tyre është bërë pas një hetimi disa mujor të Policisë së Kosovës në Malishevë.“Pas një hetimi disa mujorë, grupi hetimor i Stacionit Policor në Malishevë më në fund ka arritur të arrestojë katër hajdut të xhepave të qytetarëve”, tha Berisha.
Të arrestuar janë, Januz Asllani nga Ferizaj, Skender Berisha, Fadil Arifi dhe Florin Gashi nga Prishtina. “Të dyshuarit janë kapur në flagrancë nga zyrtarët policorë”
Zëdhënësi Berisha tregoi se dy zyrtarë të policisë kanë pasur për detyrë për më tepër se dy javë rresht të “kujdestarojnë” nëpër korridore të Shtëpisë së Shëndetit në Malishevë, në pritje të vjedhësve që tanimë ishin identifikuar nga kamerat e sigurisë.
“Të njëjtit kohë pas kohe kishin kryer vjedhje të portofolave të qytetarëve që prisnin në radhë për dokumente mjekësore”.
“Rreth orës 08:40 minuta, grupi hetimor që po vëzhgonte nga kati i dytë kishte vërejtur grupin kriminal, i cili ishte nisur për në aksion dhe për pak minuta, të njëjtit kishin arritur të vjedhin portofolin e një qytetari, i cili priste në rënd për plotësimin e dokumenteve”.
“Ndërkohë grupi hetimor kishte kërkuar ndihmë nga kolegët në uniformë, të cilët kanë qenë fare pranë vendit të ngjarjes”.
“Pas tentimit të policisë për t’i ndalur të dyshuarit, që të katërtit kanë ikur me shpejtësi në drejtim të veturës së tyre të llojit “Opell vectra”, me targa 01, e cila kishte qenë e parkuar në oborrin e Qendrës për Punë Sociale, e më pas, vrullshëm janë nisur në drejtim të Lagjes Mirditë e fshatit Burim për të vazhduar në drejtim të fshatit Gurbardh, ku ua ka prerë rrugën një patrullë tjetër”.
Berisha tha se edhe pas ndaljes, të dyshuarit nuk kanë pranuar të legjitimohen dhe as arrestimin, i cili është kryer, por me lëndime nga të dyja palët.
“Gjatë bastisjes së automjetit policia ka gjetur dy bishta të sëpatës një dru i përgatitur për tu përdor për sulm ose mbrojtje, një gyp metalik i njëjtë me drurin, një brisk goxha i madh dhe disa kapela të ndryshme”.
“Pas intervistës njëri nga të dyshuarit i kishte treguar policisë se ku e kishte hedhur kuletën që e kishte vjedhur pak më parë i dyshuari”.
Sipas tij, kuleta dhe provat tjera materiale do t’i kalojnë prokurorisë për procedurë të më tejme gjyqësore. Gjykata e Malishevës, të dyshuarve ua ka vazhduar masën e arrestit për 30 ditë./PrizrenPress.com/
Në fund të muajit Mars, Hëna Këlcyra do të përmbyll një nga dëshirat e saj për të rikthyer në Shqipëri eshtrat e babait të saj Ali Këlcyra dhe eshtrat e Eqerem Bej Libohovës, i cili ka jetuar pranë familjes këlcyra deri në minutën e fundit të jtës. Eqerem Bej Vlora është i varrosur në Vjenë, kurse Ali Këlcyra në Itali.
Eshtrat e Eqerem Bej Vlorës do të varrosen në Kaninë në një ceremoni familjare nën kujdesin e Ministrisë së Kulturës, ndërsa eshtrat e Ali Këlcyrës do të vendosen pranë varrezës simbolike të Familjes Këlcyra në Këlcyrë, ku Hëna ka ndërtuar një memorial për pjestarët e familjes së saj që nuk gjenden më.
Në një intervistë të saj për gazetarin Roland Qafku, Hëna tregon momentet e fundit të Eqerem Bej Vlorës në Vjenë dhe si vdiq duke shkruar kujtimet për Shqipërinë.
Ju lutem më tregoni momentet e fundit kur vdiq Eqerem bej Vlora?
Ne banonim bashkë në Vjenë pas vdekjes së babait tim. Kishim kaluar vetëm gjashtë muaj në Austri. Në darkë thirra urgjencën, pasi Eqerem Beu ndjehej keq dhe shkuam në spital, ku insistova të mos e lija vetëm. U futëm së bashku në spital. Mjekët kërkonin t’i bënin diagnostikim, ai fliste me mua në gjuhën shqipe, ndërsa me mjekun gjermanisht. Mjeku më pyeti nëse Eqerem Beu kur fliste shqip, bënte ndonjë gabim. Por jo, ai fliste normal si gjithnjë. Mjeku më tha se ishte hera e parë që i ndodhte që një pacient në atë gjendje shëndetësore që ishte ai, të fliste njëherësh dy gjuhë në mënyrë perfekte. Pas një ore pata përshtypjen se shpëtoi. Vajta në dhomë dhe pyeta doktorin. “Mjerisht jo, maksimumi mund të mbijetojë deri në orën pesë”, – më tha ai.
Por cila ishte diagnoza?
Dobësi në zemër. Këtë e kishin konstatuar edhe më parë. Eqremi ishte 83 vjeç. Njëherë Eqerem Beu kur do të bënte një ndërhyrje, i thanë që zemra i rrezikonte nëse bëhej kjo ndërhyrje. Asokohe ai mundi të shpëtonte. Herën e dytë, jo. Një ditë pati një problem në zemër, dhe kjo u konstatua nga mjekët më të mëdhenj në Vjenë, me përkrahjen e Shaqir Kolonjës, i cili ka qenë një mjek shqiptar në Austri.
Çfarë ndodhi në momentin kur mjeku tha se nuk do mbijetojë? Shkuat në shtëpi, apo qëndruat me të ?
Qëndruam aty. Edhe pse i dhanë vetëm pesë orë jetë, gjendja e Eqerem Beut ishte normale. Kështu që biseduam. Më dha udhëzime që shpenzimet e varrimit të paguheshin nga lekët që ai kishte. Më kërkoi që, nëse nuk mjaftojnë, t’i shtoja unë, por mos t’u kërkoja motrave që kishte në Itali apo të tjerëve. Por nëse tepronin lekë nga ato që kishte, më tha t’ia dërgoja motrës së vogël që kishte në Shqipëri.
Ju qëndruat me të në dhomën e spitalit?
Po, unë qëndrova në dhomën e tij. Ishte një dhomë e klasit të dytë. Xhaxha Eqeremi vijonte të kërkonte ndjesë që më la pa gjumë dhe për shqetësimin. Edhe pse i thosha që nuk jam e shqetësuar më tha: ‘E shoh, sepse lëviz nëpër dhomë’. Kur erdhi ora pesë e mëngjesit, më pyeti sa është ora. Ai më pyeti vazhdimisht atë natë për orën. Kur i thashë që ishte ora pesë, atëherë e kuptova që Eqerem Beu e kishte dëgjuar mjekun kur tha se; maksimumi do të mbijetonte deri në orën pesë. Por në të vërtetë, ai ka hyrë në koma rreth orës tetë të mëngjesit të po asaj ditë. Gjithsej qëndroi në spital 12 orë. Pas orës pesë erdhën dy mikesha të miat austriake. E lashë 10 minuta me to dhe telefonova të motrat, mamanë time në Romë, edhe familjen se si ishte situata shëndetësore e tij. Në atë kohë mamaja ime kishte gjashtë muaj që rrinte në Romë, pas vdekjes së babait.
Ju sa vjeçe ishit?
Unë isha 27 vjeçe kur vdiq xhaxha Eqremi.
E pyete se ku donin ta varrosnin?
Më tha që vendos ti. Sigurisht, vendosa që të varrosej aty. U ktheva në dhomë dhe prita sa t’i dilte shpirti.
Vuajti shumë momentet e fundit ?
Jo, vetëm se donte të ngrihej nga krevati. Madje ata kërkuan që ta lidhnin. Por u thashë që lëreni, do të ngrihet, le të ngrihet. Më pas e morën.
Cilat ishin fjalët e fundit që tha ?
Ju thashë që ai më falenderonte dhe kërkonte falje që më kishte shqetësuar.
Ju tha diçka për familjen e tij?
Të vetmet fjalë që më tha ishin që, lekët që do të mbeteshin nga ato që kishte në librezë, pas shpenzimeve që unë do të bëja për varrimin, t’ia dërgoja së motrës në Shqipëri, për vajzën.
A la amanet Eqerem bej Vlora?
Jo, nuk la.
Cili ishte pengu i tij ?
Jo, nuk di. Unë kam qenë me të dy herë në spital. Më ka bërë më shumë përshtypje herën e parë; unë kisha dy-tre muaj që punoja në Gjermani dhe ai më shkruan një letër, ku më thoshte se donte të operohej se ishte në rrezik jete dhe më kërkonte që të bëja hapat e duhur për t’i gjetur një spital. Atëherë u çudita: “Pse do të vish në Gjermani dhe nuk shkon në Itali, ku ke dy motra dhe mamanë time?”. Dhe ai më tha se, “nëse vdes, dua të vdes në duart e tua. Por sidomos, dua të mos varrosem në tokën italiane”. Nuk donte të varrosej në Itali.
Po pse jo në tokën italiane?
Kjo mbetet një pikëpyetje.
A kërkoi që eshtrat e tij të preheshin në Shqipëri?
Jo, as ai e as babai im, Ali Këlcyra. Nuk ishte një temë që hapej, se e dinim si ishte situata në Shqipëri.
Si u bë varrimi i Eqerem bej Vlorës?
Ata e futën në një frigorifer se duhej gjetur një varrezë. Lindi një problem, sepse xhaxha Eqeremi disa ditë para se të vdiste kishte qenë në kinema për të parë një film të Frojdit. Edhe filmi niste sesi Fjordi, një student në Vjenë, i cili ishte nga feja e vjetër (hebre), viziton spitalin e madh të Vjenës, ku janë këto komunitetet e ndryshme fetare. Duke parë filmin, më tha: “Sa varrezë e shëmtuar është kjo… Nuk do të doja kurrë të varrosesha në këtë vend”.
Pas vdekjes së tij, i shoqëruar nga një mik i imi, i cili punonte në Ambasadën amerikane, shkuam në këto zyrat për të bërë hapat, sepse Eqerem Beu nuk kishte rezidencë në Austri. Ai ishte mysafir në shtëpinë time, ka banuar me mua dhe me prindërit tetë vjet në Itali. Prandaj ishte problematike gjetja e një varri. M’u desh një ditë për ta gjetur.
Nga dita që vdiq, sa kohë kaluan deri sa u varros ?
Ai vdiq më 30 mars, dhe më 4 prill u bë varrimi.
Në varrezën që ai nuk donte…?
Varrimi u bë në një nga varrezat më të bukura të Vjenës, në “Neustift Am Walde”. Erdhi dhe i vëllai, kunati i tij dhe mamaja. Nga Italia erdhi edhe zoti Boçari, një shqiptar nga Vlora, të cilin e kapën gjermanët.
Si u bë ceremonia ?
Me rite myslimane. Aty ishim unë me mamanë, i vëllai i tij, vëllai i mamasë, z. Boçari dhe një kosovar nga Belgjika, që përfaqësonte Kosovën. Ishte familja ime austriake dhe z. Shaqir Kolonja.
Domethënë, nuk bëheshit më shumë se 10 persona që morën pjesë në varrim?
Po. As 10 vetë nuk ishim në ceremoninë e varrimit.
Komisioni Parlamentar për mbikëqyrjen e FSK-së, kërkon që të mos negociohet me Serbinë procesi i krijimit të Forcave të Armatosura të Kosovës. Anëtari i këtij komisioni Rexhep Selimi tha se Qeveria e vendit duhet t’i përmbahet dokumentit të miratuar nga Këshilli Kombëtar i Sigurisë. Komisioni diskutoi sot për procesin e Rishikimit të Sektorit Strategjik të Sigurisë dhe rekomandimet e dala nga ky proces.
Komisioni për Mbikëqyrje të FSK-së debatoi rreth procesit të Rishikimit Strategjik të Sektorit të Sigurisë në vend. Me këtë rast anëtarët e Komisionit u pajtuan që Qeveria e vendit të mos diskutojë krijimin e FAK-ut me Serbinë gjatë bisedimeve në Bruksel. Deputeti Rexhep Selimi u shpreh se qeveria nuk duhet të diskutojë me Serbinë për zhvillime të brendshme.
Ndërkaq deputeti Anton Quni nga LDK-ja tha se përderisa në Bruksel nuk diskutohet për ushtrinë e Serbisë atëherë nuk duhet të diskutohet as për Forcat e Armatosura të Kosovës. Ai u shpreh se në analizën e procesit të Rishikimit të Sektorit Strategjik të Sigurisë FAK është multietnike dhe në përputhshmëri me standardet e NATO-s.
Mirëpo, deputeti serb Goran Marinkoviq duke folur për dokumentin i cili parasheh krijimin e FAK, tha se kjo çështje duhet të bisedohet edhe me Serbinë dhe të gjithë faktorët tjerë ndërkombëtarë sepse sipas tij vetëm me punë të përbashkët mund të arrihen qëllimet e caktuara.
“Duhet të bisedojmë me të gjithë. Duhet të japim kontributin e plotë e sidomos pas nënshkrimit të marrëveshjes së Brukselit dhe mendoj se me një punë të përbashkët mund të arrijmë qëllimet e caktuara. Në të ardhmen do të kemi edhe zhvillime të tjera globale dhe marrëdhëniet e mira me fqinjët duhet të jenë në nivel të lartë”, tha ai.
Por, në anën tjetër deputeti i PDK-së Fatmir Xhelili u shpreh se Qeveria është duke punuar për integrimin e qytetarëve të komunitetit serbë në jetën institucionale të vendit. Prandaj sipas tij edhe vendimi për krijimin e FAK nuk ka rrjedhur nga bisedimet me Serbinë.
Beogradi ka kundërshtuar vendimin e Qeverisë së Kosovës për themelimin e FAK-ut.(rtk)
Instituti Demokratik i Kosovës (KDI) ka publikuar raportin mujor të monitorimit të kuvendeve të komunave në regjion të Prizrenit, ku janë pasqyruar të gjeturat në mos respektim të procedurave dhe shkeljeve ligjore. Gjatë kësaj periudhe, të gjitha kuvendet e komunave kanë realizuar aktivitete duke mbajtur seanca të rregullta dhe marrë vendime në drejtim të konsolidimit të mëtejmë të këtyre institucioneve pas zgjedhjeve lokale 2013. Kuvendi i Komunës së Prizrenit, Suharekës, Malishevës, Dragashit dhe Mamushës gjatë kësaj periudhe kanë mbajtur nga një seancë të rregullt derisa Kuvendi i Komunës së Rahovecit ka mbajtur dy seanca njëra prej të cilave ka qenë e thirrur si e rregullt dhe njëra si e jashtëzakonshme.
Bazuar në nenin 43.2 të Statuti të Komunës së Rahovecit i cili thotë se “numri i anëtarëve të Komitetit për Komunitete duhet të jetë prej 7 anëtarëve”. Me këtë rast Kuvendi i Komunës së Rahovecit ka bërë shkelje të nenit përkatës të statutit të komunës duke rritë numrin e anëtarëve të këtij komiteti në 11 dhe si i tillë ky numër është në kundërshtim me ketë nen të statutit. Edhe miratimi i emrave për Komitetin për Politik dhe Financa ka rezultuar të ketë shkelje ligjore ngase një anëtarë i Kuvendit të Komunës së Rahovecit ende pa dhanë betimin si anëtarë i këtij institucioni është votuar të jetë anëtarë i Komitetit për Politikë dhe Financa.
Kuvendi i Komunës së Rahovecit edhe në seancën e jashtëzakonshme ka vazhduar me shkelej ligjore. Thirrja e seancës me pikë të vetme të rendit të ditës dhe shtimi i dy pikave të reja në rend dite është shkelje ligjore të nenit 44.3 të LVL-së i cili decidivisht thotë se “pikat e caktuara në rendin e ditës për mbledhjet e jashtëzakonshme, nuk mund të ndryshohen gjatë mbledhjes”. Instituti Demokratik i Kosovës (KDI) konsideron që në seancën e datës 26.02.2014 ka pasur shkelje nga ana e Kuvendit të Komunës së Rahovecit – tha Haxhi Seferqaj, zyrtar i KDI-së.
Ndërkaq, Naim Cahanaj shtoi më tej se “bazuar në nenin 61 të LVL-së i cili thotë se “Komunat ku të paktën 10% e qytetarëve i përkasin komuniteteve jo shumicë do të kenë një nënkryetar për komunitete. Emërimi dhe shkarkimi i Nënkryetarit për Komuniteteve propozohet nga Kryetari i Komunës dhe duhet të miratohet nga shumica e anëtarëve të Kuvendit të Komunës që janë të pranishëm dhe votojnë si dhe shumica e anëtarëve të Kuvendit të Komunës që janë të pranishëm dhe votojnë të cilët i përkasin komuniteteve jo shumicë”. Kuvendi i Komunës së Dragashit ka dështuar në zgjedhjen e nënkryetarit të komunës nga komunitetit edhe përkundër tentativës që me shkelje procedurale të emërohet nënkryetari për shkak të propozimit të dy emrave për nënkryetarë dhe votimit me vota të fshehta nga subjektet politike minoritare të përfaqësuara në këtë institucion.
Në komunat e regjionit të Prizrenit obligim ligjorë në zgjedhjen e nënkryetarit për komunitete kanë komuna e Prizrenit dhe e Dragashit. Referuar nenit 6.2 të Udhëzimit Administrativ të MAPL-së Nr. 2014/01 për procedurën e emërimit të nënkryetarëve në komuna i cili thotë se “nënkryetari i komunës për Komunitete emërohet nga radhët e komunitetit jo shumicë i cili për nga numri përbën komunitetin jo shumicë më të madh në komunë. Instituti Demokratik i Kosovës (KDI) i rekomandon Kryetarit të Komunës së Dragashit dhe Prizrenit që të respektojnë këtë dispozitë ligjore me rastin e propozimit për emërimin e nënkryetarit për Komunitete – përfundoi Cahani./PrizrenPress.com/
Me rastin e 33-vjetorit të demonstratave gjithëpopullore të vitit 1981, kryeministri i Kosovës, Hashim Thaçi, ka thënë se studentët në atë kohë nisën protestat e para, që u kurorëzuan me demonstrata masive, me kërkesën e tyre themelore për Republikën e Kosovës.
“Sot e 33 vite më parë studentët e Kosovës filluan protestat e para, që u kurorëzuan me demonstrata masive të vitit 1981, me kërkesë themelore për Republikën e Kosovës. Koha vërtetoi drejtësinë e atyre ngjarjeve që frymëzuan gjenerata të tëra në kërkim të avancimit të drejtave politike të shqiptarëve nën Jugosllavi. Prandaj, sot shpreh respektin më të lartë për të gjithë ata qytetarë, profesorë dhe intelektualë që u vunë në anën e kërkesave të drejtave të studentëve, që më në fund, u realizuan me krijimin e realiteti të ri të Kosovës, me çlirimin dhe pavarësinë e Kosovës”, ka shkruar Thaçi në profilin e tij në Facebook.