Kryetari i LDK-së në Dragash, Fatmir Mehmeti nuk habitet për mosformimin e qeverisë së re nga kryetari i PDK-së dhe Komunës, Salim Jenuzu. Sipas tij, Jenuzi është në kërkim të gjetjes së një “zyre” alternative.
“Pas procesit zgjedhor në komunën e Dragashit, Salim Jonuzi tashmë pothuaj vazhdimisht po kalon kohën në zyrat alternative sepse po i trokasin në derë ata që hëngrën rrenat e tij”

“ Po ia lypin hisen partitë e koalicionit “turli” e ai s`ka çfarë t`u japë”, shkruan Mehmeti në ‘Facebook’.

Kryetari Salim Jenuz nuk ka arritur të formojë ende qeverinë e re në Dragash. Edhe pse kanë kaluar më shumë se tre muaj,që kur kanë përfunduar zgjedhjet lokale, Jenuzi nuk ka mundur të zgjedh drejtorët e rinj të Ekzekutivit. Ai ende është duke punuar me drejtorët e mandatit të kaluar.

Burimet e PrizrenPress-it bëjnë të ditur se Jenuzi nuk është duke u marrë fare me formimin e qeverisë së re.

“Kryetari Jenuzi ka harruar krejt për të formuar qeverinë e re”, tregon me kusht anonimiteti një anëtar i PDK-së në Dragash.

Salim Jenuzi dhe PDK-ja në Dragash në zgjedhjet e fundit lokale, fituan edhe një mandat për të qeverisur komunën e Sharrit. Fitoren Jonuzi e siguroi për të tretën herë në balotazhin e 1 dhjetorit, përballë kandidatit të LDK-së,Fatmir Mehmeti.

“Ky farë Salimi si duket ka filluar të mendojë për ikjen nga përsheshi partiak dhe marrja nën ombrellë të një partie me më shumë deputetë pas partisë së tij”.

“Ai çon selame për një apetit të tij që do t`i rehatonte kryet (ashtu po i a ka ënda). Ai harron se ne si LDK kemi shpaluar programin për ta shpëtuar popullatën nga rrjepësit e lëkurës, por popullata shkoi pas viktimizuesit”.

“Ne tash jemi opozitë. Salimi duhej të kishte menduar ” t`i baj vendin para se ta vidhte sendin”.

“ Tash Zoti ia bëftë mirë aventurës së tij dhe apetiteve të tija ditëshkurtra”.
“Koha do të tregojë kush ishim ne dhe kush është ai. Ne nuk e legjitimojmë abuzuesin e pushtetit , le ta dinë të gjithë dhe i mbetemi besnik elektoratit tonë që me votën e dhënë e kërkoi ndryshimin”/PrizrenPress.com/

Njohësi i çështjeve të sigurisë, Florian Qehaja dhe ai politik, Shkëlzen Maliqi, kanë ftuar Qeverinë dhe Kuvendin të mos e zvarritin procesin e transformimit të FSK-së në Forca të Armatosura të Kosovës (FAK).

Ata kanë deklaruar se ndryshimi i Kushtetutës duhet të bëhet në këtë legjislaturë dhe se nuk ka arsye të shtyhet më vonë.

Sipas tyre, përbërja e ardhshme e Kuvendit mund të zvarrisë edhe më shumë këtë proces.

“Duhet të shfrytëzohet garnitura e tanishme e deputetëve, sepse në zgjedhjet e ardhshme supozojmë se pjesa më e madhe e deputetëve nga pakica serbe do të jetë nga “Lista Srpska” dhe do të jetë e vështirë të binden këta deputetë të votojnë pro ndryshimit të Kushtetutës”, ka thënë Florian Qehaja për Epokën e re.

Azem Vllasi thotë se nuk duhet të ketë raund të ri bisedimesh mes Kryeministrave Thaçi-Dacic, para zgjedhjeve parlamentare, që pritet të mbahen në Kosovë dhe Serbi.

Ai beson se shumica e çështjeve që lidhen me Marrëveshjen e 19 Prillit, tashmë janë përmbyllur dhe se dialogu duhet të kalojë në nivel ekspertëve, të cilët do të përqendrohen në implementimin e marrëveshjeve të arritura.

Në një bisedë për lajmi.net, Vllasi pohon se bisedimet në nivel Kryeministrash duhet të përmbyllen, pasi frikësohet se ai mund të rrëshqasë në një proces të pafund.

“Zgjedhjet e caktuara në Serbi dhe ato të paralajmëruara në Kosovë do ta shtyjnë anash çështjen e dialogut, ashtu që më nuk do të ketë as atë peshë, as atë dinamikë, që e ka pasur deri më tani”.

“Do të ketë edhe një takim në nivel të dy Kryeministrave, vetëm nëse Ashton i thërret që të dy në Bruksel”.

“Për temat esenciale, të cilat ishin pjesë e bisedimeve mes dy Kryeministrave, duhet të kenë përfunduar”.

“Si për çështjen e gjykatave, si për çështjet tjera, 90 %, kanë mbetur tema të bisedimeve në nivel të ekspertëve, eventualisht nga pala jonë në nivel të Zëvendëskryeministrës, që t’i vazhdojë dhe të përqendrohet në implementimin e marrëveshjeve të deritanishme”.

“Procesi i dialogut në nivel të Kryeministrave duhet të mbyllet, sepse nëse vazhdohet ajo do të rrëshqasë në një proces të pafund, ku do të hapen apetitet e Serbisë për t’u përzier në çështjet e brendshme të Kosovës”.

“Sipas mendimit tim, nuk do të ketë takim para zgjedhjeve dhe nuk duhet të ketë”.

Kryeministri në ikje Ivica Dacic ka deklaruar të shtunën për mediat serbe se nuk do të ketë raund të ri bisedimesh para zgjedhjeve parlamentare në Serbi.

“Takimi i radhës në Bruksel do të jetë pas zgjedhjeve, por nuk mund të them ndonjë date”, ka thënë ai.

Por, dinamika e Dialogut në Bruksel pritet të bie dukshëm. Krejt kjo për shkak të procesit zgjedhor. Serbia do t’i zhvillojë zgjedhjet e jashtëzakonshme më 16 mars, ndërsa Kosova sipas të gjitha gjasave pritet t’i mbajë ato në qershor.

E gjithë kjo pritet të reflektojë në zvarritjen e marrëveshjeve për pikat që kanë mbetur të hapura. Çështja e Gjykatave në Veri, statuti i Asociacionit të Komunave Serbe, dhe shpërbërja e formacionit “Mbrojtja Civile”, janë temat për të cilat palët nuk janë dakorduar ende , megjithëse për të parën thuhet se ka një marrëveshje në parim.

Zgjedhjet e përgjithshme serbe të dielën e ardhshme, përkatësisht më 16 mars, do të organizohen edhe në territorin e Kosovës. Kështu ka deklaruar zëvendëskryeministri i Serbisë, Aleksandër Vuçiq, duke shtuar se për organizimin e tyre do të kujdeset OSBE-ja.

Në anën tjetër, zyrtarët e Komisionit Qendror të Zgjedhjeve në Kosovë, kanë deklaruar se nuk do të involvohen në procesin e organizimit të zgjedhjeve të Serbisë.

“Në këto zgjedhje është e involvuar vetëm OSBE-ja. KQZ-ja s’ka qenë dhe nuk do të jetë kurrë e involvuar në to”, ka thënë për “Zërin”, Valdete Daka, kryetare e KQZ-së.

Numri i personave, të cilët me vullnetin e tyre i kanë dhënë fund jetës gjatë vitit të kaluar, në rajonin e Prizrenit është ulur për gjashtë sosh. Shifrat flasin se dukuria e pazakontë për popullatën e këtushme, që mori hov në vitet e para të pasluftës, duket se po shkon drejt rënies, shkruan Zëri.

Mbështetur në shënimet zyrtare të policisë në Prizren, del se në vitin 2013 janë regjistruar 10 raste të vetëvrasjes, apo gjashtë më pak se sa në vitin 2012, kur në këtë formë jetën e përfunduan 16 persona, të grup-moshave e të gjinive të ndryshme.