Deputetja e LDK-së, Vjosa Osmani, nuk ka dashur të paragjykojë të mërkurën sa i takon vendimit përfundimtar të Kushtetueses.

“Nuk dua të paragjykoj, sepse vërtet është vështirë që të dihet, mirëpo ajo që ne besojmë është se argumentet tona janë jashtëzakonisht të fuqishme”, ka thënë ajo, për Kohën Ditore.

Ndërkaq juristët thonë se rezultati përfundimtar do të njohë faktin që kryetari i Kuvendit nuk i përket pakicës parlamentare, por shumicës.

Juristi nga Grupi për Studime Juridike dhe Politike, Dren Doli, ka thënë se vendimi i Gjykatës, pavarësisht nëse anulohet ose jo vendimi i Kuvendit për zgjedhjen e Isa Mustafës në krye të tij, nuk do të hyj në zgjidhjen e të ashtuquajturave pyetje politike, meqë Gjykata ka ndërtuar një precedent që refuzon të merret me një kategori të tillë të çështjeve ankimuese.

“Ne anën tjetër, mendoj që Gjykata do të njohë faktin që Grupi parlamentar përbën një formacion që formohet në Kuvend sipas bindjes së lirë të deputeteve, dhe kurrsesi në bazë të rezultatit zgjedhor të partive politike”, ka thënë ai. “Në cilindo skenar, në versionin e thjeshtësuar, mendoj që rezultati final do të jetë i tillë që të njohë faktin që kryetari i Kuvendit nuk mund t’i takojë një pakice parlamentare, por vetëm një shumice parlamentare që gëzon së paku 61 vota deputetësh”.

PDK-ja dhe koalicioni LAN më herët kanë deponuar qëndrimet e tyre në Kushtetuese sa i përket seancës konstituive të Kuvendit.

Drejtori i Zyrës për Çështje të Veteranëve të Luftës në Qeverinë e Kosovës, Faik Fazliu, ka bërë me dije se nga 32 mijë e 32 aplikacione të verifikuara deri më tani, 11 184 prej tyre u është njohur e drejta e veteranit të luftës së UÇK-së.

Shef i sekretarisë së Komisionit qeveritar për njohjen dhe verifikimin e statusit të dëshmorit, invalidit, veteranit, pjesëtarit apo të internuarit të luftës së UÇK-së, Faik Fazliu, ka thënë të mërkurën për “Epokën e re” se çdo gjë është duke shkuar sipas dinamikës së paraparë sa i përket procesit të verifikimit të aplikacioneve.

“Komisioni për verifikim, ashtu siç edhe ishte planifikuar, ka filluar edhe në terren verifikimin e aplikacioneve si dhe vërtetimin e tyre nga ana e eprorëve të të gjitha njësive vartëse të ish-Zonave Operative të UÇK-së. Me këtë rast komisioni falënderon të gjithë eprorët për bashkëpunimin dhe gatishmërinë e tyre për të përfunduar këtë proces shumë të rëndësishëm”, është shprehur Fazliu.

Ai ka treguar se deri më tani janë verifikuar 32 mijë e 32 aplikacione. “Prej tyre 11 184 u është njohur e drejta e veteranit të luftës së UÇK-së, 1 280 statusi i invalidit, 932 statusi i dëshmorit, 12 300 statusi i pjesëtarit dhe pjesëmarrësit, ndërsa 255 aplikacione janë duke u shqyrtuar, kurse 6 mijë e 81 aplikacione janë refuzuar për t’iu njohur ndonjëra nga këto kategori”, ka deklaruar Fazliu,shkruan Epoka e Re.

Ai ka thënë se në disa zona ka përfunduar procesi i verifikimit, kurse në disa të tjera është në proces e sipër. “Zonës së Drenicës dhe Nerodimes u janë dhënë listat e aplikantëve dhe shpejt do ta fillojnë edhe fazën përfundimtare të nënshkrimit të aplikacioneve. Kurse zonat e tjera disa i kanë përfunduar e disa janë në përfundim e sipër”, është shprehur Fazliu. Ai ka kërkuar mbështetjen e të gjithëve, që edhe faza finale e këtij procesi të përmbyllet suksesshëm, në mënyrë që të gjithëve t’u njihet kontributi i dhënë për lirinë e Kosovës.

“Komisioni për Verifikim, duke i falënderuar të gjithë për bashkëpunim, njëherësh duke e parë që faza finale e verifikimit ka mundësi të realizohet me sukses, kërkon mbështetjen e të gjithë atyre që janë të interesuar që ky proces të përfundojë sa më mirë dhe duke njohur kontributin e të gjithëve që kanë dhënë për lirinë e vendit tonë”, ka deklaruar Fazliu.

Ja rezultatet e verifikimit të 32 mijë e 32 aplikacioneve:

– 11 184 u miratohet aplikacioni për veteranë të luftës
– 1 280 ushtarë të UÇK-së, me pasoja të luftës – invalidë të luftës së UÇK-së
– 932 ushtarë të UÇK-së të rënë në luftë – dëshmorë
– 12 300 pjesëtarë dhe pjesëmarrës
– 255 aplikacione për t’u rishqyrtuar në njësi të ndryshme
– 6 081 aplikacione janë refuzuar për t’iu njohur ndonjëra nga këto kategori

Komunarët e Rahovecit kanë shitur 14 vetura në shumë prej 6 mijë eurosh. Kjo ka ngjallur pakënaqësi tek opozita.

Derisa të parët lavdërohen se këto vetura i kanë shitur me një çmim të mirë, opozitarët veprimin e qeverisë lokale e kanë cilësuar shitje të lirë të tyre.

Për drejtorin e Administratës, Sali Sallteku, ato s’kanë qenë vetura por hedhurina. Sipas tij, kanë qenë jashtë çdo përdorimi dhe i kanë hedhur në ankand publik. ”Shumica kanë qenë për hedhje. Asnjë nuk ka qenë për t’u riparuar.

Më shtrenjtë do të na kushtonte po t’i riparonim ato sesa t’i blinim të rejat”, thënë Sallteku. Lidhur me to ai ka thënë se nuk ka dhënë askush më shumë se 6 mijë euro. Madje jemi detyruar që dy herë të shpallnim ankand publik. Sallteku ka treguar se prej 7 ofertuesve,vetëm një person ka ofruar çmimin e parathënë.

E menaxheri i Zyrës së prokurimit, Jetullah Kabashi, ka bërë me dije se janë shitur 14 vetura të papërdorura prej vitit 1970 deri më 2002, përfshirë 5 “Lada-Niva”,1 “Ford”,kombi transportues, “Landrover”,etj, /Koha Ditore /

PDK dhe Blloku Opozitar LDK-AAK-Nisma, bashkë me Vetëvendosjen dhe partitë tjera parlamentare, do të ballafaqojnë sot në Gjykatën Kushtetuese argumentet e tyre lidhur me seancën konstituive të 17 korrikut, në të cilën Isa Mustafa u zgjodh Kryeparlamentar, ndërsa PDK e kontestoi menjëherë atë.

Seanca dëgjimore është thirrur nga Kushtetuesja, bazuar në kërkesën e PDK’së lidhur me kushtetutshmërinë e zgjedhjes së Kryeparlamentarit.
PDK do të përfaqësohet nga Arsim Bajrami, LDK-AAK-Nisma nga Vjosa Osmani, ndërsa Vetëvendosje nga Albulena Haxhiu dhe Armend Shkoza.
Njohës të çështje juridike kanë pohuar se pas kësaj seance dëgjimore, Gjykata Kushtetuese nuk do të duhej të vonohej më shumë se 2-3 ditë për ta bërë publik vendimin e saj lidhur me këtë çështje.

Vendimi i Kushtetueses pritet ta zhbllokojë ngërçin politik në të cilin ka hyrë vendi, që prej mbajtjes së zgjedhjeve të përgjithshme më 8 qershor.

Informacionet e publikuara në media për dekonspirimin dhe vrasjen e një bashkëpunëtori të Agjencisë Kosovare të Inteligjencës në luftën e Sirisë, mbesin ende të pa konfirmuara nga institucionet kosovare. Të mërkurën askush nga mekanizmat shtetërorë nuk ka reaguar përkitazi me raportimet për një rast të tillë.

Gazeta Tribuna ka bërë përpjekje që të kontaktojë me kreun e Agjencisë Kosovare të Inteligjencës (AKI), Bashkim Smakaj, po kontakti më të ka qenë i pamundur. Ndërsa ministri në largim i Punëve të Brendshme, Bajram Rexhepi, ka thënë se nuk ka informacione sa i përket dekonspirimit dhe vrasjes së bashkëpunëtorit të Agjencisë Kosovare të Inteligjencës.

“Nuk jemi në dijeni dhe kjo nuk është punë e jona. Agjencia Kosovare e Inteligjencës është agjenci e pavarur. Nuk është kompetencë e imja. AKI-ja i përgjigjet Kuvendit dhe jo Ministrisë së Punëve të Brendshme”, ka thënë Rexhepi../tribuna/