Pesë muaj pas dënimit me 2 vjet burgim me kusht, të shqiptuar nga Gjykata Themelore (GJTH) në Prizren, kryetari i komunës, Ramadan Muja, vazhdon punën normalisht, në pritje të vendimit të një gjykate më të lartë, asaj të Apelit, derisa shoqëria civile kritikon se kjo ka ndikuar në vështirësimin e funksionimit normal të Komunës, sidomos në realizim projektesh.

Muja është dënuar për shpërdorim të pozitës nga një trup gjyqësor i EULEX-it. Kur vendimi të bëhet i plotfuqishëm, Muja do ta ketë të ndaluar ushtrimin e funksioneve publike në kohëzgjatje prej 30 muajsh. Bashkë me Mujën fajtorë janë shpallur edhe pesë ish-drejtorë të tij, të mandatit të kaluar, por ata janë dënuar më pak sesa shefi i tyre. Pala mbrojtëse e të akuzuarve ka parashtruar ankesë.

Avokati mbrojtës i Mujës, Ruzhdi Berisha, tha se është në pritje të vendimit të Gjykatës së Apelit rreth ankesës së parashtruar ndaj vendimit të GJTH-së. “Nuk ka ndonjë datë se kur duhet ta bëjë këtë. Jemi optimistë se ankesa jonë do të aprovohet”, tha për “Zërin”.

Elmedina Baxhaku, nga OJQ “Ec Ma Ndryshe”, që monitoron punën e Komunës, vlerëson se ajo po funksionon me ngecje në vendimmarrje dhe ekzekutim projektesh, të premtuara gjatë fushatës elektorale. “Për këtë dëshmon më së miri fakti rreth marrjes së vendimeve të shumta në takimet e ekzekutivit, vetëm sa për të treguar së punët po ecin mbarë e në realitet jemi dëshmitarë të asaj se për gjithë këtë periudhë kohore, nuk ka pasur lëvizje pozitive”, ka thënë ajo.

Sipas saj, marrja e vendimeve gjatë muajit me rreth 80 sosh, tregon më së miri seriozitetin e institucionit, që këto të mbeten vetëm fjalë në letër.

“Ekzekutivit i kemi prezantuar rreth 40 rekomandime, por disponimi i tyre për përmirësim ka qenë shumë i mangët, pothuajse pa interesim. Kjo për vetë faktin se janë ngulfatur me të papritura dhe angazhim me telashe personale, që po e lënë udhëheqjen pezull vetëm sa për të mbetur në letër”, ka thënë Baxhaku.

Naim Cahani nga KDI-ja, thotë se sigurisht që kjo situatë ka reflektuar edhe në punën dhe mosefikasitetin e organeve vetëqeverisëse lokale. “Këtë e tregon edhe rregullimi i sheshit të “Lidhjes së Prizrenit”, që ka filluar së ndërtuari qysh me fillimin e vitit dhe trendi i punimeve duket shumë i ngadaltë”, ka thënë ai.

Cahanaj mendon mosefikasitet po tregohet edhe në hartimin e politikave publike, rreth hartimit të buxhetit komunal, ku tanimë në mes të gushtit nuk është paraparë një iniciativë për të organizuar dëgjimet publike për projektbuxhetin e vitit 2015.

Deklarimet e shoqërisë civile i ka demantuar Hasan Hasani, që prej dy mandatesh është drejtor i Shërbimeve Publike.

“Komuna po funksionon për merak. Tjetër janë deklarimet e OJQ-ve. Kryetari po bën punën e tij në pritje të përgjigjes nga Gjykata, ndërsa kemi realizuar projektet e parapara. Varësisht nga mundësitë buxhetore dhe zotimet, Komuna realizon atë çfarë ka paraparë. Ndërsa, për këtë dëshmitarët më të mirë janë vetë qytetarët, të cilët falë kësaj qeverisjeje kanë një standard shumë më të mirë jetësor”, ka tha thënë ai për “Zërin”.

Nga vendimi i GJA-së varet edhe e ardhmja e Komunës, nëse Prizreni do të shkojë apo jo në zgjedhje të jashtëzakonshme.

Zgjedhjet tjera të parakohshme do ta zgjasnin edhe për një kohë vakumin institucional. Por, nëse blloku paszgjedhor në njërën anë dhe PDK-ja në anën tjetër nuk do të arrijnë ta krijojnë një qeveri të qëndrueshme, me të paktën me 60 deputetë shqiptarë plus minoritetet, atëherë zgjedhjet e reja shihen si opsion.

Në parim, analistët nuk i shohin zgjedhjet si zgjidhje të favorshme, por mbrojnë qëndrimin se vendit i duhet sa më shpejt t’i ketë të konsoliduara institucionet-legjislativin dhe ekzekutivin, shkruan Tribuna.

Kosova, sipas tyre, nuk ka kohë për të humbur. Të paktën këtë mendim e ndajnë Avni Mazreku dhe Halil Matoshi.

Mazreku ka deklaruar se zgjedhjet tjera të parakohshme nuk janë zgjidhje dhe se ato do të duhej të ishin opsion vetëm nëse asnjëri prej blloqeve nuk do të arrinte ta formonte qeverinë.

“Jo, definitivisht jo, zgjedhjet e reja nuk janë zgjidhje. Zgjedhjet do të duhej të ishin opsion vetëm nëse asnjëri prej blloqeve nuk do të arrinte ta formonte qeverinë. Kurse situata në Kosovë është e qartë pas konstituimit të Kuvendit se nuk kemi problem më shumicën e nevojshme për ta krijuar qeverinë. Prandaj them se zgjedhjet nuk janë zgjidhje dhe as opsion për vendin”, ka thënë Mazreku.

“Kulla e Jetimit”, në Prevallë, ka qenë pikëtakim i një grupi imamësh të Kosovës, përfaqësues të disa organizatave “humanitare”, ligjërues nga Arabia, imamë nga Maqedonia edhe nga Shqipëria.

Aty pos takimeve janë mbajtur ligjërata dhe trajnime për propaganduesit e thirrjeve për të shkruar në Siri edhe aktivitete kohë pas kohe me fëmijë jetim, shkruan Zëri.

Java e fundit e muajit gusht pritet t’i mbledhë në seancën e rregullt tremujore në Këshillin e Sigurimit të Kombeve të Bashkuara, Prishtinën dhe Beogradin me vendet anëtare, për të shqyrtuar raportin e Sekretarit të Përgjithshëm Ban Ki Moon për zhvillimet dhe progresin në Kosovë. Ndonëse ende nuk është konfirmuar, 25 gushti përmendet si datë e mundshme për mbajtjen e kësaj seance.

Varësisht nga niveli, Kosova mund të përfaqësohet qoftë nga presidentja Atifete Jahjaga apo ministri në largim, Enver Hoxhaj. Përfaqësimi pritet të jetë i njëjtë si për Kosovën ashtu edhe për Serbinë dhe se kjo çështje nuk është definuar ende. Zëdhënësi i presidentes, Arbër Vllahiu, ka thënë se kurdo që të mbahet seanca e Këshillit të Sigurimit, Kosova do të përfaqësohet në nivelin e barabartë me atë të Serbisë.

“Nuk përjashtohet mundësia që Kosovën ta përfaqësojë presidentja Jahjaga sikur edhe në muajin maj. Të gjitha modalitetet janë duke u harmonizuar ndërmjet institucioneve të Kosovës dhe atyre ndërkombëtare”, ka deklaruar Vllahiu../tribuna/

Ministria e Punëve të Jashtme ende s’ka hartuar një listë me numrin e saktë të shteteve që e kanë njohur Republikën e Kosovës. Sipas faqes zyrtare të MPJ-së, 96 është numri i shteteve që deri më tani ia kanë njohur subjektivitetin Kosovës.

Aty figurojnë shtete për të cilat nuk ka nota verbale, derisa janë injoruar vendet që kanë konfirmuar njohjet, shkruan Koha Ditore.

Zyrtarë të Ministrisë së Jashtme kanë thënë se me njohjen e fundit nga Ishujt Solomon- ishull në Oqeani, numri i shteteve që e kanë njohur Kosovën ka shkuar në 108. Paqartësitë rreth njohjeve ata i kanë arsyetuar me ridizajnimin e faqes, për të cilën ishte thënë se do të përditësohet qysh në shkurt të këtij viti.

“Kur të bëhet dizajni dhe plani i faqes së re do të vendosen edhe njohjet e sakta. Aktualisht faqja është në mirëmbajtje minimale. Por janë 108 njohje dhe lista e njohjeve është në Ministrinë e Jashtme”, ka thënë zëvendësministri i Punëve të Jashtme, Petrit Selimi.

Lideri i AAK’së Ramush Haradinaj, është shprehur i bindur se në pjesën e dytë të shtatorit do ta drejtojë Kosovën si kryeministër për katër vitet e ardhshme.

Ai, në një intervistë për Epokën e re,  ka bërë të qartë se koalicioni LDK-AAK-Nisma i ka numrat për ta formuar Qeverinë dhe ka përjashtuar çfarëdo bashkëqeverisje me PDK’në.

Haradinaj ka thënë se do të ishte mirë për PDK’në dhe Thacin që këtë herë ta japin kontribtin duke qenë pjesë e opozitës.

Haradinaj ka deklaruar se do ta udhëheqë dialogun me Serbinë, por është shprehur i gatshëm t’i japë përgjegjësi në këtë proces edhe Lëvizjes Vetëvendosje.

Ai ka thënë se koalicioni ende nuk i ka ndarë postet ministrore por sipas tij, hisen e qeverisjes e kanë ndarë në bazë të kuotës.

E indinjuar me mungesën e përparimit në zbardhjen e vrasjes së Elvis Pistës, familja e tij i ka shkruar një letër kryeministrit të Kosovës, Hashim Thaçi, nga i cili kërkon të ushtrojë ndikimin e tij “politik dhe institucional” ndaj organeve të hetuesisë dhe të drejtësisë, që hetimet rreth vrasjes së Pistës të përmbyllen dhe përgjegjësit për këtë krim të dalin para drejtësisë.

Në letër – një kopje të së cilës “Koha Ditore” e ka siguruar nga familjarët e Pistës, dhe e cila u është drejtuar përfaqësuesve të institucioneve të Kosovës, prej të cilëve në mënyrë eksplicite përmendet vetëm kryeministri Thaçi – shprehet besim tek institucionet e Kosovës dhe kryeministri Thaçi, por paralajmërohet se “ky besim mund të zbehet në rast se vazhdon të mos ketë rezultate konkrete nga hetimet. Ky besim mund të shndërrohet në zhgënjim, e zhgënjimi është i madh edhe në mesin e qytetarëve të Kosovës, e qytetarëve të Rahovecit”.