Asnjëri prej të arrestuarve për terrorizëm nuk dyshohet për planifikim sulmesh në Kosovë, por vetëm për pjesëmarrje në grup terrorist në Siri e Irak, mëson Koha Ditore.

Lajmi se të dyshuarit planifikonin sulm në njërën prej ngjarjeve më të mëdha kulturore në vend “DokuFest” është i pavërtetë, kanë thënë për gazetën zyrtarët policorë.

Madje as në kërkesën e prokurorit për paraburgim dhe në urdhërarrestet që ka siguruar Koha Ditore nuk ka dyshim për planifikim sulmesh në Kosovë.

Mediat kanë raportuar se njëri prej të arrestuarve dyshohet se kishte në plan të kryente një sulm në “DokuFest”, teksa thirreshin në burime anonime. I njëjti person, thoshte ky burim, ka pasur për qëllim të dërgojë mesazh se Prizreni është qytet mysliman si kundërpërgjigje e donacioneve amerikane për festivalin.

40 të dyshuarve për terrorizëm u është vazhduar masa e ndalimit edhe për 48 orë të tjera, raporton RTK.

Në seancën e parë dëgjimore, 5 nga të arrestuarit kanë pranuar se kanë qenë për vizitë në Siri, por kanë mohuar pjesëmarrjen në luftime apo në organizime terroriste.

Të gjithë të arrestuarit e tjerë e kanë mohuar së kanë qenë pjesë e grupeve terroriste ISIS dhe Al-Nusra. Ndërsa pala mbrojtëse është shprehur e bindur në pafajësinë e klientëve të tyre, duke e cilësuar arrestimin spektakël dhe në dëm të vendit.

Vendimi për masa të tjera ndaj të arrestuarve pritet të merret të enjten. 40 të arrestuarit, përveç pjesëmarrjes në luftën e Sirisë dhe Irakut, dyshohen edhe për rekrutimin e të rinjve kosovarë për pjesëmarrje në luftërat në Lindjen e Mesme.

Edhe një person tjetër nën dyshimin për terrorizëm është arrestuar sot në qytetin e Prizrenit.

I arrestuari është N. Abdyli, i cili dyshohet se ka qenë pjesë e rrjetit të grupit të të arrestuarve që dyshohen për pjesëmarrje dhe bashkëpunim me organizatat terroriste ISIS dhe Al-Nusra, raporton rtk.

Personi në fjalë ka pasur fletëarrest nga Prokuroria Speciale në Prishtinë. Mësohet se policia do të vazhdojë edhe më tej me operacionin për arrestimet e të kërkuarve të tjerë të dyshuar për pjesëmarrje në luftërat në Lindje të Mesme.

Kryetari i Sindikatës së BIK-ut, Idriz Bilalli në një intervistë për RTK-në ka komentuar zhvillimet e fundit në vend, arrestimet e 40 të dyshuarve për luftërat në Siri dhe Irak.

Ai ka fajësuar krerët e Bashkësisë Islame të Kosovës, për të cilët thotë se, duhet të japin dorëheqje nga funksionet e tyre.

“Ata individ që janë në krye të BIK- të dhe të cilët e kanë neglizhuar situatën, duhet sigurisht të tërhiqen dhe të paktën të japi dorëheqjen morale”, ka thënë ai, duke shtuar se duhet të lëshohet rruga për ri-organizmi të BIK-ut. Mund ta konfirmojë në cilësinë e Sindikatës së BIK-ut shqetësimin tonë për dukurit e tilla.

“E kemi shfaqur me kohë, para 3-4, viteve. Por që mbështetjen tonë se kemi gjetur as nga BIK as nga krerët e institucioneve”, tha ndër të tjera Bilalli.

Gjykata e Prishtinës u rrethua të mërkurën me masa të rrepta sigurie gjatë shoqërimit të 40 të arrestuarve si të dyshuar për terrorizëm dhe si pjesëmarrës në luftërat në Irak e Siri.
Gjykata vendosi 48 orë arresti për të arrestuarit, ndërsa vendimi për ta pritet që të merret sot ose nesër për shkak të numrit të lartë të tyre. Avokatët e të dyshuarve thonë se të pandehurit janë deklaruar të pafajshëm, e ndërsa 4-5 prej tyre kanë pranuar që kanë marrë pjesë në ushtrinë çlirimtare të Sirisë, ushtri kjo e cila sipas tyre nuk konsiderohet si ushtri terroriste.

Avokatët e të akuzuarve janë shprehur optimistë se klientët e tyre do të shpallen të pafajshëm pasi Prokuroria nuk ka prova për akuzat e ngritura.

Por, nga ajo që Top Channel ka parë në kërkesën e prokurorit special Blerim Isufaj, pothuajse të gjithë të dyshuarit akuzohen për vepra të ngjashme penale, si organizimi dhe pjesëmarrja në grupe terroriste, nxitje të urrejtjes, përçarjes, rekrutim për terrorizëm etj. Mbi këto dyshime, prokurori Isufaj ka kërkuar masën e paraburgimit për të gjithë të arrestuarit e një dite më parë.

Po ashtu, Top Channel ka mësuar nga burime brenda policisë se aksionet për arrestimin e personave që dyshohet se janë infiltruar nëpër organizata terroriste do të vazhdojnë edhe në ditët e ardhshme.

Mësohet se në listën e kërkimit të Policisë janë edhe mbi 150 kosovarë dhe në këtë numër në polici thonë se ka edhe femra.

Njëri prej të arrestuarve dyshohet se kishte në plan të kryente një sulm në Doku Fest, ngjarja më e madhe kulturore në Kosovë, tha për Top Channel një burim zyrtar në kushte anonimati. /Top Channel/