Një raport i publikuar nga Qendra për Inovacion të Qeverisjes Ndërkombëtare (CIGI) thotë se BE duhet të vazhdojë “dykuptimësinë konstruktive”, në procesin e normalizimit të marrëdhënieve Kosovë-Serbi. Raporti rekomandon që Serbia të mos e njoh Kosovën deri sa të jetë afër anëtarësimit të saj në BE.

Në përpjekjet që po vazhdojnë për të normalizuar marrëdhëniet në mes të Kosovës dhe Serbisë, Bashkimi Europian duhet që të vazhdojë politikën e saj të “dykuptimësisë konstruktive”, thuhet në një raport të publikuar nga CIGI.

Në kapitullin e këtij raporti të titulluar “Një balanc i mirë: BE’ja dhe Procesi i Normalizimit të Marrëdhënieve mes Kosovës dhe Serbisë”, autorët Dehan Guina dhe Branka Marija thonë se një balanc i mirë, që merr në konsideratë interesat në mesin e dy palëve, është “çelësi i implementimit të suksesshëm të Marrëveshjes së Brukselit, dhe të normalizimit të marrëdhënieve”. Për më tepër, autorët thonë se tani është një “mundësi kohore e mirë nga BE’ja që ajo të hedh bazat për integrim më të gjerë në rajon, si dhe të trajtojë çështjet e krimit të organizuar dhe korrupsionit që prekin Ballkanin Perëndimor”.

Duke pranuar se marrëveshje e Brukselit do të duhet të pranohet nga popullsia lokale në Kosovë si dhe nga qeveria e Serbisë, dy autorët kanë dhënë disa rekomandime.

Guzina dhe Marija rekomandojnë që “Serbia të mos e njoh Kosovën në një periudhë afatshkurtër, në mënyrë që ky shtet të krijojë një besim në procesin e normalizimit. Çështja e njohjes nga Serbia duhet të adresohet në periudhën afat-gjatë, kur Serbia të jetë shumë afër që t’i bashkohet BE’së”.

Ata rekomandojnë që Serbia të forcojë legjitimitetin e institucioneve kosovare në veri të Kosovës dhe t’i mbështes ata.

EULEX duhet të qëndrojë në Kosovë në mënyrë që të mbikëqyrë procesin e normalizimit, thuhet në këtë publikim për çështjen e normalizimit të marrëdhënieve në mes Kosovës dhe Serbisë.

Përderisa mandatit të Përfaqësueses së Lartë të BE’së për Politikë të Jashtme, Catherine Ashton, po i afrohet fundi, kompetenca dhe mbështetja e BE’së duhet të vazhdojë me një ndërmjetës njësoj kompetent dhe legjitim, thuhet në raport.

Organizata Joqeveritare “EC Ma Ndryshe” është duke e përcjellë me shqetësim procesin e zvarritjes së emërimit të drejtorëve të komunës së Prizrenit. Edhe pse kanë kaluar pothuajse dy muaj nga certifikimi i rezultateve përfundimtare të zgjedhjeve lokale të vitit 2013 nga KQZ-ja për kuvende dhe kryetarë të komunave, Ekzekutivi i Komunës së Prizrenit nuk është konsoliduar ende.

Monitoruesja Elmedina Baxhaku tha se kryetari i Komunës së Prizrenit, Ramadan Muja, deri më tani nuk ka ofruar arsye kredibile për këtë vonesë, e cila po ndikon në dinamikën e përgjithshme të qeverisjes lokale dhe realizimit të punëve nga ekzekutivi.

“Kësaj situate i ka paraprirë edhe periudha e fushatës zgjedhore dhe dy raundeve të zgjedhjeve për kryetar komune, që është karakterizuar me dinamikë shumë të ulët të ekzekutimit të punëve nga qeveria lokale”, tha Baxhaku.

“EC Ma Ndryshe” konsideron se kjo zvarritje shkon në dëm të interesit të përgjithshëm publik dhe përmban një porosi të keqe për qytetarët.
“Vakuumi aktual institucional pamundëson ekzekutimin efektiv të punëve të qeverisë lokale, duke iu mohuar qytetarëve të komunës së Prizrenit marrjen e shërbimeve cilësore dhe në kohën e duhur. Qytetarët e Prizrenit me votën e tyre e kanë autorizuar kryetarin e komunës që të qeverisë me punët e komunës dhe të ofrojë shërbime publike”.

“Mbi të gjitha, kryetari i komunës është i obliguar edhe me ligjin e aplikueshëm në vend që këtë autorizim ta përkthejë në qeverisje efektive dhe demokratike në shërbim të qytetarëve të komunës”

“Arsyetimi se bëhet fjalë për vazhdimësi në qeverisje nuk është justifikim i qëndrueshëm, pasi që qytetarët i kanë besuar mandat të ri kryetarit të komunës dhe ai duhet të legjitimoj ekzekutivin e mandatit të ri”.

“Vonesat e pakuptimta në këtë drejtim janë dëshmi e papërgjegjësisë institucionale, ligjore dhe politike të kryetarit të komunës. Praktikisht, nga shtatori i vitit të kaluar, qeveria lokale e Prizrenit ka qenë pothuaj tërësisht jofunksionale. Prandaj, ne i bëjmë thirrje kryetarit të komunës së Prizrenit që në pajtim me obligimet ligjore, të mos presë as edhe një sekondë më tepër për emërimin e drejtorëve komunalë, për t’u siguruar që qytetarëve u ofrohen shërbimet dhe qeverisja funksionon në mënyrë të rregullt”./PrizrenPress.com/

Nuk është arritur marrëveshje në mes të përfaqësuesve të Parlamentit Studentor (PS) dhe përfaqësuesve të Këshillit organizativ të protestave të studentëve që kanë filluar ditë më parë.
Ata kanë dalë nga takimi që kanë zhvilluar të premten, me të njëjta qëndrime me të cilat kishin hyrë në takim.

Qëndrimet e tyre dallojnë në një pikë. Parlamenti Studentor do që të presë vendimet e Komisionit që të martën është themeluar nga Senati i UP-së, e i cili do të merret me shqyrtimin e revistave në të cilat ka publikuar stafi akademik i UP-së, kurse protestuesit duan dorëheqjen e menjëhershme të rektorit Ibrahim Gashi.

Ata kanë paralajmëruar vazhdim të protestave. /Koha Ditore/

Ligjvënësit dhe ekspertët e sigurisë kërkojnë që Kuvendi i Kosovës sa më shpejt ta nxjerrë ligjin për lustrim, që të dihet më pas se kush kanë qenë bashkëpunëtorë të UDB-së, e kush ka qenë i maltretuar nga spiunimi i tyre.

Kosova është njëra ndër shtetet e rajonit që nuk ka ligj për lustrim (pastërtinë e figurës), derisa për çdo ditë në opinion flitet për një numër relativisht të madh të politikanëve, profesorëve, gazetarëve e teologëve, që i kanë shërbyer e vazhdojnë t’i shërbejnë shteteve të “të tjerëve”.

Ligjvënësit dhe ekspertët e sigurisë kërkojnë që Kuvendi i Kosovës sa më shpejt ta miratojë ligjin për lustrim, që të dihet më pas, se kush kanë qenë bashkëpunëtorë i UDB-së, e kush ka qenë i maltretuar nga spiunimi i tyre, shkruan gazeta “Zëri”.

Edhe pse pastrimi i figurave konsiderohet shumë i vështirë sepse dosjet e UDB-së janë në Beograd, ekspertë të shërbimeve sekrete, partive opozitare, Komisionit parlamentar për mbikëqyrjen e AKI-së, kërkojnë që procedurat për hartimin dhe miratimin e këtij ligji të fillojnë sa më shpejt.

Nxjerrja e këtij ligji konsiderohet imediat pas deklaratave që ka dhënë Mehmet Loci, agjent në kohën e ish-Jugosllavisë, i cili thotë se njerëz që vazhdojnë t’i shërbejnë shërbimit sekret serb (BIA), profesorë që respektohen, kanë tituj shkencorë, janë pjesë e institucioneve të Kosovës.

Madje është thënë se Serbia aktualisht në Kosovë ka rreth 700 bashkëpunëtorë shqiptarë, derisa analistë të tjerë kanë thënë se edhe në kuadër të ish-UÇK-së kanë qenë mbi 100 spiunë që kanë punuar për BIA-n.