Me një akademi përkujtimore dhe duke bërë homazhe në vendin e rënies, sot është shënuar 24 vjetori i ngjarjes tragjike, ku kanë humbur jetën Ali Kryeziu dhe Hysni Mazreku, si dhe janë lënduar rëndë e lehtë, 11 qytetar të Malishevës, si dhe janë malltretuar rëndë katër qytetar të tjerë. Për opinion e gjerë, kjo ngjarje e 30 janarit 1990, njihet si “masakra e Malishevës”, ngjarje e cila shënon kundërshtimin edhe institucional të Komunës së Malishevës, ndaj regjimit serbo-sllav të asaj kohe.

“Përveç vrasjes së dy të rinjve të pafajshëm, kjo ngjarje, shënon edhe rastin e parë të ngritjes së zërit nga ana e institucioneve komunale të Malishevës, kundër padrejtësive që i bëheshin popullit shqiptar në Kosovë, duke bërë jehonë të madhe ky reagim institucional”, tha mes tjerash, në fjalën e rastit, kryetari i Komunës së Malishevës,Ragip Begaj.

Ndërsa ish kryetari i Komunës së Malishevës në vitin 1990, z.Daut Krasniqi, duke evokuar kujtimet e asaj ngjarje, në mënyrë kronologjike, kujtoi angazhimin e institucionit të komunës, në raport me ngjarjen dhe situatën e krijuar, duke bërë që edhe “Kuvendi i Kosovës, të ndryshoj qasjen e shqyrtimit dhe vendosjes, për ti paraprirë ngjarjeve të mëdha të asaj kohe”.
Ndërsa në emër të Kuvendit të Komunës së Malishevës, një fjalë rasti e mbajti edhe kryesuesi i KK të Malishevës, Enver Hoti, i cili e cilësoi si një ngjarje me rëndësi të jashtëzakonshme.

“Protestat e atyre viteve, ishin lajmëtar i lirisë, e cila do të vjen me gjak. Jemi krenar dhe me krenari ne i kujtojmë dëshmorët e kombit, të rënë për lirinë e Kosovës”.

Në emër të familjeve të dy rënëve, të pranishmit i përshëndeti dhe i falënderoi, mulla Xhevat Kreyziu./PrizrenPress.com/

Nehat Gashi është zgjedhur kryetar i Parlamentit të Studentëve në Universitetin “Ukshin Hoti” në Prizren. Rezultatet e zgjedhjeve tashmë janë shpallur edhe zyrtarisht nga UPZ.
“Falënderoj të gjithë miqtë, aktivistet dhe simpatizantët e organizatës USSH për besimin që ma dhanë”, tha Gashi. “USSH do të udhëheq për 2 vitet e ardhshme”.

Ai premton se do të angazhohet që të mbrojë interesin e përgjithshëm të studentëve të UPZ-së.

Kryesia e Parlamentit Studentor të Universitetit të Prizrenit
(organi vendimmarrës):
Nehat GASHI, Kryetar i Parlamentit të Studentëve
Bujar SUSURI, Nënkryetar për çështje organizative dhe akademike
Venhar QAFLESHI, Nënkryetare për marrëdhënie ndërkombëtare
Leutrim QENGAJ, Sekretar i përgjithshëm
Albijona PULAJ, Koordinatore për Këshillat e Studentëve
Arta GASHI, Zëdhënëse për informim

Këshilli Studentor:
Fakultetin e Edukimit- Kryetare, Lauresha XH Morina.
Fakultetin Juridik- Kryetar, Enes Gashi
Fakultetin Ekonomik- Kryetar, Ahmet Meti S. Pulaj
Fakultetin e Shkencave Kompjuterike- Kryetar Adrian Skeraj

Kuvendi i Kosovës sot mbanë seancën e radhës ku komisioni d hoc do ta prezantojë raportin e punës për Reformën Zgjedhore.

Në seancë do të shqyrtohet Projektligji për ratifikimin e Marrëveshjes për Statusin e anëtarëve të Forcave të Armatosura të Republikës së Shqipërisë dhe Forcës së Sigurisë së Republikës së Kosovës gjatë qëndrimit të tyre të përkohshëm në territorin e shteteve respektive.

Po ashtu, do të shqyrtohet Projektligji për Ratifikimin e Marrëveshjes për hua dhe financim ndërmjet KFË Frankfurt Am Main, Republikës së Kosovës dhe Operatorit të sistemit, Transmisionit dhe Tregut KOSST për përmirësimin e rrjetit të transmisionit, shqyrtimi i parë i Projektligjit për shërbimin gjeologjik të Kosovës.

Seanca do të vazhdojë me shqyrtimin e Projektligjit për masat antidamping dhe masat kundërbalancuese, Projektligjit për mbrojtjen nga zhurma, Projektligjit për Zonën e rrezikuar mjedisore të Obiliqit dhe rreth tij, Projektligjit për ndryshimin dhe plotësimin e Ligjit për pajisje me armë dhe pajisje përkatëse të sigurisë për institucionet e autorizuara shtetërore për siguri, si dhe Projektligjit për armë.

Shqyrtimi tjetër që është paraparë për sot ështe edhe Projektligjit për Inspektoratin e Doganës dhe Administratës Tatimore të Kosovës, si dhe propozimi i Grupit Parlamentar të Lëvizjes Vetëvendosje për zëvendësimin e anëtarit në komisionin parlamentar.

Kryetari i Komunës së Prizrenit Ramadan Muja në fundin e vitit 2013,premtoi se shumë shpejt do të formojë qeverinë e re.

Edhe përkundër këtij premtimi, Muja nuk ka arritë të formojë këtë qeveri as gjatë muajit janar 2014.Ai ende punon me qeverinë e vjetër.

Zyrtarë të Institutit Demokratik të Kosovës pohojnë se ligji nuk e specifikon ndonjë afat kohor kur kryetarët e komunave janë të obliguar që të emërojnë drejtorët, por vonesat konsiderohen si të paarsyeshme dhe të dëmshme.

Derisa në ditët e para të janarit në opinion përflitej për emra drejtorësh të rinj, zgjedhja e drejtorëve të ri në Prizren tashmë është një temë për të cilën as nuk flitet.

Në ditët e para të janarit, zëra brenda partive të koalicionit në anonimitet nxorën në publik emra të drejtorëve të mundshëm të koalicionit, por pas demantimit të këtij informacioni nuk ka as informata zyrtare dhe as jozyrtare as nga koalicioni AAK – LDD, tabor në të cilin gjatë gjithë muajit janar është përsëritur refreni, ‘presim ftesën nga kryetari Muja’ për ta finalizuar marrëveshjen e koalicionit.

Nga partia fituese, nuk ka asnjë informacion as për kohën e përafërt se kur do të mund të konstituohet ekzekutivi dhe as për emrat.

Gjatë fundjavës së kaluar u paralajmërua ardhja e liderit të PDK-së Hashim Thaçit në Prizren, për ta ndarë “kulaçin” e qeverisjes lokale, por as kjo ngjarje nuk ndodhi për shkak angazhimeve të Thaçit.

Në degën e PDK-së nuk flasin për këtë temë me arsyetimin se “nuk ka asgjë të re”, dhe me shpjegimin se “kurdo që të ketë ndonjë zhvillim të ri në këtë drejtim opinioni do të informohet”. Në ndërkohë drejtorët e qeverisjes së vjetër, vazhdojnë punën./TV Opinion/

Arrestimi i politikanit serb dhe kandidatit për kryetar të veriut të Mitrovicës, Oliver Ivanoviq, me dyshimin për krime ndaj shqiptarëve gjatë dhe pas luftës në Kosovë, ka ngjallur reagime të ashpra në mesin e popullatës në atë pjesë të qytetit.

Ata vlerësojnë arrestimin e tij si spektakël të EULEX-it për të frikësuar popullatën serbe në Kosovë. Akuzat i quajnë të sajuara, ndërsa, konfirmojnë se ky veprim do të ndikojë në atmosferën e përgjithshme politike si dhe në zgjedhjet që do të mbahen më 23 shkurt në veri.

Dragojllo Spasiq, pensionist nga veriu i Mitrovicës, tha për Kosovapress, se kjo është poshtërsia më e madhe që ka mundur të ndodhë. Sipas tij, akuzat me të cilat ngarkohet Ivanoviq, janë krejtësisht të sajuara. Ai bëri të ditur se nuk do të dal në zgjedhjet e shkurtit, derisa shprehu mllefin e tij ndaj shtetit të Serbisë për indiferencën e saj ndaj rastit të arrestimit të Oliver Ivanoviqit dhe situatave tjera të ngjajshme në veri.

“Ku është Serbia tani, nuk është askund dhe as kurrë nuk ka qenë”, ka thënë Spasiq.

Violeta Rakiq, theksoi se e gjithë kjo që po ndodhë me serbët është një skenar i përgatitur mirë nga Prishtina zyrtare në koordinim me ndërkombëtarët.

“Ky është vetëm skenari, ndërsa, shfaqja për serbët tek po përgatitet pas zgjedhjeve”, tha Rakiq.

Ajo konsideron se arrestimi i Ivanoviqit do të ndikojë në situatën politike në veri, duke përshkruar gjendjen e përgjithshme aktuale në atë pjesë si të pasigurt, me përplot mashtrime dhe mosbesim.

Sllavisha Simiq, aktakuzën ndaj Ivanoviqit, e konsideron si të montuar dhe të orientuar nga të gjithë serbët pa dallim, të cilët jetojnë në veri. Sipas tij, ky montim është i orientuar ndaj të gjithë atyre që patriotizmin, dashurinë për atdheun dhe qytetin e tyre e kanë dëshmuar në forma të ndryshme gjatë 15 vjetëve të fundit.

Ai tha se ndërkombëtarët që ndajnë drejtësinë, ‘prej se kjo pjesë e Serbisë është okupuar, po i dërgojnë mesazhe popullit serb për të satën herë se janë fajtorë’.