Për Fatmir Limajn, kthimi në PDK, nuk është as temë diskutimi. Kështu bëjnë të ditur burime të KosovaPress-it. Njerëz të tij të afërt bëjnë me dije se kjo as që diskutohet, por se çfarë është vendimi i tij do të merret vesh shumë shpejtë.

Sipas këtyre burimeve, Limaj s’e konsideron as si temë kthimin në PDK dhe vështirë që ka diçka që do ja ndërron mendimin.

Ky reagim vije ndaj një shkrimi të publikuar sot në media, sipas të cilit, Fatmir Limaj është duke shqyrtuar mundësinë e kthimit në PDK./Kosovapress/

Koalicioni AAK-LDD në Prizren është në pritje të finalizimit të marrëveshjes zyrtare me PDK-në dhe formimin e qeverisjes së re “Muja III”.

Kryetari i AAK-së në Prizren, Fatmir Kastrati thotë se koalicioni AAK-LDD është duke pritur nga PDK-ja që sa më shpejt të finalizojë marrëveshjen e arritur në zgjedhjet e balotazhit. Sipas marrëveshjes së arritur koalicioni AAK-LDD në Prizren, në qeverinë e re të kryetarit Ramadan Muja do të ketë postin e nënkryetarit dhe katër drejtori.

“Koalicioni AAK-LDD është në pritje të bisedave konkrete me drejtuesit e PDK-së për arritjen e marrëveshjes me shkrim për bashkëqeverisje”, tha Kastrati për TV Prizrenin.

Kastrati ka mohuar edhe një herë emrat e publikuar në media për drejtorë të Ekzekutivit.

“Emrat e përmendur nëpër mjete të informimit për drejtorë të mundshëm të Qeverisë “Muja III” kanë qenë spekulime të mediave ,dhe se si koalicion ende nuk jemi përcaktuar se kush do të jetë në krye të katër drejtorive”.
“Nuk duhet të zvarritet shumë konstatimi i qeverisë së re, sepse para nesh ka shumë punë”

Kastrati thotë se drejtorët e qeverisë së re “Muja III” nga koalicioni AAK-LDD,do të zgjedhën në Prizren.

“Drejtorët do të përzgjidhen nga Dega e AAK-së dhe LDD-së në Prizren”.
Zyrtarët e PDK-së në Prizren, ndërkaq nuk kanë pranuar të flasin për (mos)formimin e qeverisë së re të Prizrenit.

Sipas disa burimeve të TV Prizrenit, vonesa për formimin e qeverisjes së re “Muja III”, është duke ndodhur për shkak problemeve të brendshme të PDK-së. /PrizrenPress.com/

Kryetari i Bashkimit Demokratik në Prizren, Zafir Berisha, parashikon trazira në Kosovë, si ato të vitit 2004.

Sipas tij, këto trazira do të ndodhin pas forcimit të strukturave paramilitare në institucionet e Kosovës.

“Parashoh një situatë me trazira në Kosovë, pas ‘arritjeve’ që Serbia ka bërë në negociatat në Bruksel nga të cilat mundësin e destabilizimit të Kosovës e ka në dorë”.

“Pas forcimit të strukturave paramilitare nëpër institucione të Kosovës ajo gjithmonë do të kërkojë që të arrijë deri të një revoltë e arsyeshme të qytetarëve të Kosovës që do të jetë e përafërt me atë të vitit 2004, ku do të pësojnë njerëz të pafajshëm të vullnetit të mirë”.

“Kjo situatë mund të stimulohet nga negociatorët e sotëm të cilët nesër do të jenë në pozita tjera dhe do ta kenë gojën plot patriotizëm dhe ku nga gjendja e krijuar do të qohet peshë diplomacia ndërkombëtare dhe Kosova do të jetë sërish në agjendën e tyre, por tash me një realitet të ri, ku rezultati veç mund të paramendohet”. /PrizrenPress.com/

Gjendja e rëndë sociale ka rënduar jetën e familjes të Skender Gashit nga fshati Zojz i Prizrenit.

Ai bashkë me tetë anëtarë të familjes në mungesë të një shtëpie, që një muaj jeton në një rimorkio të veturës të improvizuar si shtëpi.

Gashi thotë se për kushtet e jetesës së tij, ka informuar edhe institucionet lokale.

“Deri më tash nuk jemi ndihmuar nga askush”

Ai tregon se përgjigja e vetme e institucioneve ka qenë mungesa e pronës.
Kryefamiljari Gashi tregon se përveç mungesës së një shtëpia nuk është as i punësuar. “I gëzoj vetëm me 60 euro në muaj”.

Ai rrëfen për kushtet e vështira nëpër të cilat në këtë mot të ftohtë është duke i mbijetuar familja e tij.

“Familjes time i mungon gjithçka elementare për të pasur një jetë të mirë”
Për shkak të ftohtit,fëmijët e vegjël të familjes së Gashit janë edhe të sëmurë.
“Ndërsa për kushte higjienike as që mund të bëhet fjalë”, shprehet me lot në sy bashkëshortja e Skenderit,Hedija.

Kjo familje e cila nuk ndihmohet nga askush dhe është lënë në mëshirë të fatit,ka nevojë për ndihmë.

Për shkak të kushteve të rënda,fëmijët e Skender Gashit, nuk janë duke e vijuar mësimin në shkollë.

”Kërkoj nga institucionet që të më ndihmojnë në ndërtimin e një shtëpie”./PrizrenPress.com/

“Të gjitha vuajtjet e veta Kosova, si dhe mbarë shqiptaria, i lotoi me flamurin kombëtar. Andaj, ky flamuri i ri i Kosovës, asnjëherë nuk do mund të qëndrojë dhe nuk duhet të qëndrojë më lart se ai kombëtar”, thekson publicisti i njohur shqiptar Kim Mehmeti.

Publicisti i shquar Kim Mehmeti thekson se pavarësisht rëndësisë qe ka flamuri shtetëror i Kosovës, flamuri kombëtar mbetet i pazëvendësueshëm. Flamuri kombëtar shqiptar është larë me gjak, brez pas brezi, i cili simbolizon rrugën tonë të lirisë e të mbijetesës, andaj edhe gëzon shenjtërinë e vet.

“Të gjitha vuajtjet e veta Kosova, si dhe mbarë shqiptaria, i lotoi me flamurin kombëtar. Edhe datat festive kjo shqiptari i kremtoi me atë flamur. Flamujt nuk janë vetëm një copë pëlhure, por ato janë rrëfim i ngritje-rënieve të një populli. Andaj, ky flamuri i ri i Kosovës, asnjëherë nuk do mund të qëndrojë dhe nuk duhet të qëndrojë më lart se ai kombëtar,”, thekson publicisti Mehmeti në rrjetin e vet social Facebook.

Më 12 janar është afati i fundit kur do të duhej të inaugurohen kuvendet komunale në veri të Kosovës. Zëvendëskryeministrja Edita Tahiri ka thënë se kryetarët e zgjedhur në veri e kanë të qartë se ky proces duhet të bëhet sipas ligjeve të Kosovës.

“Dymbëdhjetë janari është data e fundit për inaugurimin e organeve të reja komunale për komunat të cilat tashmë i kanë shtyrë inaugurimet. Qeveria e Republikës së Kosovës i ka dhënë të gjitha udhëzimet për t’i respektuar ligjet e Kosovës në procesin e konstituimit të komunave, por edhe në funksionimin e tyre.

Po ashtu, ua kemi bërë të qartë se edhe marrëveshja e Brukselit e nënvizon qartë, se procesi i zgjedhjeve dhe i funksionimit të komunave bëhet sipas ligjeve të Republikës së Kosovës. Andaj të gjithë kryetarët e komunave dhe të tjerët që janë zgjedhur e kanë për obligim t’i respektojnë ligjet e Republikës së Kosovës”, ka thënë Tahiri në intervistën për “Epokën e re”.

Ajo ka deklaruar se nëse nuk bëhet inaugurimi dhe konstituimi i kuvendeve komunale në veri deri më 12 janar, institucionet e Kosovës do të veprojnë konform Kushtetutës.

“Nëse ata nuk i respektojnë ligjet e Kosovës nuk do të pranohen si struktura legale komunale”, ka thënë Tahiri.

Zëvendëskryeministrja Edita Tahiri ka kërkuar nga kryetarët e rinj ta marrin seriozisht mesazhin e Bashkimit Evropian karshi inaugurimit të kuvendeve komunale në veri.

Tahiri u është përgjigjur edhe akuzave të opozitës se dialogu në Bruksel ka degraduar. Ajo ka thënë se dialogu në mes të Kosovës dhe Serbisë është duke dhënë rezultate.

Në mbledhjen e parë të përbashkët mes qeverive të Shqipërisë e Kosovës, që do të mbahet në 11 janar në Prizren, pritet të nënshkruhen dy marrëveshje të rëndësishme.

Bëhet fjalë për një marrëveshje për lehtësimin e tregëtisë dhe një marrëveshje në sektorin e transportit.

Ministri i Punëve të Jashtme të Shqipërisë, Ditmir Bushati, për mediat shqiptare deklaroi se, “në mbledhjen e 11 janarit do të nënshkruhet deklarata e partneritetit strategjik mes dy kryeministrave, ndërkohë që do të diskutohet për çështjet e integrimit ekonomik dhe për një qasje sa më të dakorduar për sa i përket situatës në Preshevë”.

Ndërsa Kryeministri Edi Rama ka vlerësuar se mbledhja e parë e përbashkët e qeverive të Shqipërisë e Kosovës, që do të mbahet në 11 janar në Prizren, do të çelë një faqe krejt të re bashkëpunimi mes dy qeverive që kanë sfidën e njëjtë të demokratizimit, modernizimit dhe integrimit të dy shteteve shqiptare në Bashkimin Evropian.

Rama e bëri këtë vlerësim nëpërmjet një postimi në faqen e tij në Facebook, ku shkruan se, “me vetëdijen e lartë për potencialet e zhvillimit dhe nevojat për zhvillim të popullit shqiptar në të dy anët e kufirit, dy qeveritë do të ndërtojnë një qasje të përbashkët strategjike për të hapur perspektiva të reja ekonomike, sociale e kulturore për qytetarët tanë”.

Sipas tij “kjo mbledhje do të zhvillohet edhe në shenjën e solidaritetit me bashkësinë shqiptare të Preshevës, të cilës të dyja qeveritë do t’i akordojnë një fond të posaçëm ndihme për ngritjen e maternitetit të ri”/Tribuna/