Aktori shqiptar Nik Xhelilaj është vlerësuar me trofeun e aktorit më të mirë dhe çmimin special të jurisë në Festivalin Ndërkombëtar të Filmit, që u mbajt në Houston të Shteteve të Bashkuara të Amerikës.

Trofeu i aktorit më të mirë dhe çmimi special i jurisë së festivalit kanë shkuar për protagonizmin e tij në “Seven lucky gods”.

Filmi i realizuar nga regjisori Jamil Dehlavi, ka në qendër jetën e një emigranti shqiptar në Londër përballë rrezikshmërisë së bandave kriminale. Kështu, juria e “World Fest-Houston International Film Festival” vlerësoi interpretimin e aktorit shqiptar me trofeun e aktorit më të mirë protagonist, ndër disa dhjetëra filmat pjesëmarrës në këtë festival ndërkombëtar.

Hysni Klinakun e ka irrituar pjesëmarrja e këngëtarit Zdravko Colic në Festivalin “Kënga ime”, që është duke u mbajtur në Shqipëri, gjë që e ka shtyrë edhe të tërhiqet nga kjo garë, ku do të duhej të ishte prezent në muajin maj. Ai, në një intervistë për KultPlus ka treguar më rrënjësisht për arsyet e vendimit. Sipas Klinakut është e padrejtë që në një festival të muzikës shqipe, aty ku i këndohet atdheut dhe vlerave të ftohet një këngëtar serb.
KultPlus: Ju u tërhoqët nga gara e festivalit “Kënga ime”, në Shqipëri, për faktin se në të performoi, këngëtari , Zdravko Colic, gjë për të cilën keni deklaruar se keni 1000 arsye pse jeni tërheqë, çfarë mund të thoni më shumë për këtë tërheqje?

Hysni Klinaku: Javën e fundit e pash pjesëmarrësin serb, këngëtarin Zdravko Colic, dhe atë natë vërtetë u irritova shumë, por atë natë thashë mos të marr ndonjë vendim të pamatur. Fillova interesimin tim për këtë këngëtar që fshihet pas nacionaliteti boshnjak dhe unë e vërtetova se nuk është i tillë, është këngëtar serb. Dhe kjo më bëri të tërhiqem. Festivali “Kënga ime”, është festival i traditës , festival i këngës shqiptare dhe mu në një festival të kulturës shqiptare është ftuar një këngëtar serb. E në anën tjetër është ftuar edhe përkundër faktit se plagët e kosovarëve janë të rënda nga lufta e fundit në Kosovë, serbet na kanë larguar nga shkollat, na kanë helmuar nxënësit, akoma kemi persona të zhdukur. Tërheqja ime nga festivali nuk ka të bëj me bojkotin e festivalit e as me bojkotin e këngëtareve të tjerë, është një ndjenjë e imja që nuk mund të jem në një skenë të tillë.

KultPlus: E keni ofruar tërheqjen tuaj edhe tek organizatori apo vetëm nëpërmjet rrjetit social facebook?

Hysni Klinaku: Rrjedha e festivalit si shkon i bie që të jem pas katër javëve në atë skenë, dhe nuk ka qenë e ngutshme të ja bëj me dije edhe organizatorit. Në maj do të duhej që të performoja përsëri. Por këto ditë do të kontaktoj edhe me ta, edhe pse e vërteta është se nuk kemi asnjë kontratë. Unë jam nisur me idenë se do të prezantojmë këngën e vlerave të mirëfillta shqiptare, por doli e kundërta.

KultPlus: Ka pas tentativë që të ju bindin organizatorët që ti riktheheni festivalit?

Hysni Klinaku: Jo, deri më tashti jo.

KultPlus: Keni një mbështetje të madhe nga publiku i Kosovës për këtë veprim, po e keni menduar si do të reflektojë tek audienca e Shqipërisë, sepse, siç u pa atë natë, Colic është pritur shumë mirë nga audienca e atjeshme?

Hysni Klinaku: Për besë nuk është se nuk kam menduar, dhe i kam peshuar të gjitha, me sinqeritetin tim më të madh nuk pata fuqi që ta shoh përsëri vetën në atë skenë. Shumë arsye mu paraqitën dhe erdha në atë pikë që nuk më interesoi më se kush çka mendon, por çka mendoj unë.

KultPlus: Çfarë të ka shtyrë më shumë për këtë vendim, se Colic nuk është i nivelit të duhur artistik apo se i takon nacionalitetit serb?

Hysni Klinaku: Është shumë herët që kënga shqipe të madhërojë një këngëtar serb, kur e dimë se serbët kanë bërë çmos në përdhosjen e kulturës shqiptare. Por nuk është e vetmja arsye që më irritoi. Kur hyra edhe te biografia e këngëtarit edhe te faqja zyrtare e tij pashë se ai nuk ka një biografi të mirë, jo vetëm profesionale por edhe të qëndrimeve të tij ndaj luftës në Bosnjë dhe Kosovë. Këngëtari ka të realizuar edhe një videoklip kundër bombardimeve të NATO-s, që janë bërë me rastin e luftës në Kosovë. Me sinqeritetin më të madh e them nuk ka edhe vlera profesionale, pasi që ka shumë këngëtarë më të mirë se ai, si në Kosovë, si në Shqipëri. Plus asaj, ai performoi edhe në një incizim të dobët play back, as në performnacë nuk ishte real, gjithçka ka qenë irrituese.

KultPlus: Po kjo nuk është hera e parë që në festivale të tilla të Shqipërisë ftohen këngëtarë serb, sikurse që dëgjohet muzika e këngëtarëve serb edhe nëpër lokale të ndryshme, pse dallojnë kosovarët dhe audienca e Shqipërisë sa i përket kësaj çështje?

Hysni Klinaku: Muzika dhe dëshirat janë çështje individuale, por festivali ka një format tjetër, dhe të ftosh në një festival të vlerës shqiptare një këngëtarë kur akoma janë plagët e hapura dhe të zhdukurit nga lufta e fundit nuk dihet se ku janë, besoj se kjo nuk do koment.

KultPlus: Po nuk është se edhe në Kosovë nuk ka bashkëpunime kulturore edhe me artistë nga Serbia, a të kanë penguar këto bashkëpunime edhe më herët?

Hysni Klinaku: I kam kushtet e mija, për mua çdo bashkëpunim me serbet nuk ka asnjë vlerë pa u bërë kërkimfalja nga ana e tyre. Ata vazhdojnë të na shohin si njerëz të dorës së dytë apo të tretë. Së paku në mënyrë deklarative të thuhet se u vjen keq për atë çfarë ka ndodhë ndaj popullatës së Kosovës, po ata po vazhdojnë të mos shprehin keqardhje. Bashkëpunimet që bëhen sot nëpër institucione në nivel ndërkombëtarë, janë krejt të një fryme tjetër. Mirëpo jo edhe ti bëhet ftesë një këngëtarë serb në një festival ku i këndohet atdheut, ku i këndohet këngës shqipe.

Hysni Klinaku: Dhe për fund, ka edhe artistë të tjerë kosovarë që janë pjesë e festivalit “Kënga ime”, a do të duhej të tërhiqeshin edhe ata nga gara?

KultPlus: Kjo është një ndjenjë dhe vendim i imi. Mirëpo, sipas informatave të mija, edhe dy tre këngëtarë të tjerë e kanë anuluar pjesëmarrjen, por nuk i kam parë të deklaruar.

Visar Peja ka marr vendim që të mos jetë pjesë e festivalit “Kënga ime”, në Shqipëri, si pasojë e pjesëmarrjes së Zdravko Colic. Ai e ka konfirmuar këtë vendim për KultPlus, dhe, sipas tij, organizatorët e këtij festivali treguan se nuk kanë lidhje me përjetimet e popullit të Kosovës
Njësoj sikurse Hysni Klinakun, edhe Visar Pejën, këngëtarin kosovar e ka irrituar pjesëmarrja e Zdravko Colicit në festivalin e këngës shqipe “Kënga ime”.

Si pasojë e kësaj, Visar Peja ka marr vendim që të tërhiqet nga kjo garë muzikore. Ai e ka konfirmuar për KultPlus se nuk do të jetë pjesë e festivalit “Kënga ime”.

“Sigurisht që nuk do të jem pjesë e këtij festivali. Atë çfarë bënë definitivisht treguan që nuk kanë lidhje me përjetimet tona. Kur në Rashkë të Serbisë akoma po nxirren eshtrat e shqiptarëve, ata ftojnë një këngëtar serb të jetë pjesë e këtij festivali. Po le të ju mbetet në përgjegjësi dhe fytyrë të tyre”, ka thënë Peja.
Peja më pas është shprehur se akoma nuk e kupton pse do të duhej të ftohej një këngëtar serb në një festival të muzikës ku prezantohen vlerat e muzikës shqiptare, dhe, sipas tij, nëse veç e donë aq shumë, atëherë le ta organizojnë një koncert në stadium, por jo në nivel institucionesh. /KultPlus.com

Nxënësit shqiptarë dhe ata të Kosovës pritet që shumë shpejt të mësojnë me kurrikula të njëjta. Grupet e punës me specialistë të përbashkët po punojnë për unifikimin e programeve të kurrikulës.

Ministrja e Arsimit Lindita Nikolla, gjatë një takimi me homologun e saj në Kosovë, Ramë Buja, tha se Shqipëria do ta kthejë sistemin parauniveristar si në Kosovë, pra 5+3+2.

“Referenca të strukturës së sistemit, kemi njehsuar nivelet arsimore të sistemit tonë me atë kosovar dhe kemi kaluar nga viti shkollor, si njësia bazë e kohës mësimore, te shkalla e kurrikulës, që zgjeron me më shumë se 1 vit kohën e nevojshme për nxënësit, që të arrijnë rezultatet e të nxënit të përcaktuara për secilën shkallë”, u shpreh ministrja Lindita Nikolla.

“Ekipet tona të përbashkëta kanë bërë punë të mrekullueshme, që kjo kurrikul të mos jetë vetëm në 10 mijë e pak km katrorë, por të zgjerohet në më shumë të tilla, me qëllimin e vetëm: të arrihet një nivel më i lartë i arsimit në nivel nacional”, deklaroi ministri i Arsimit në Kosovë, Ramë Buja.

Brenda muajit Maj, grupet e punës priten të dalin me disa piketa të përbashkëta në punën e kryer për unifikimin e programeve mësimore mes dy vendeve. / Top Channel

Ka disa javë që në Televizionin Klan në Shqipëri ka nisur të transmetohet “Kënga ime”, një festival ky i muzikës tradicionale shqiptare dhe asaj qytetare. Ky festival, çdo të shtunë, bën bashkë emra të njohur, të dëshmuar tashmë në muzikën shqiptare, mirëpo duke mos i anashkaluar as këngëtarët e rinj, të cilët interpretojnë këngët, që cilësohen perla të muzikës shqipe.

E të shtunën që lamë pas, aty ndodhi diçka që mbase askujt nuk i kishte shkuar ndërmend. Producentët e këtij festivali kishin menduar të bënin një surprizë, duke sjellë në skenë një këngëtar nga Serbia, si mysafir special të mbrëmjes.

Ishte këngëtari Zdravko Çoliq ai që interpretoi në një skenë ku promovohet muzika e mirëfilltë shqipe. E kështu, aty u promovua edhe muzika serbe. Çoliq për publikun shqiptar solli këngë premierë.

E euforia e publikut shqiptar nuk mungoi. Çoliq u mirëprit në skenë me duartrokitje e brohoritje të shumta, gjersa gjatë performancës së tij, i gjithë publiku ishte në këmbë.

Një mikpritje të hatashme i bënë edhe nikoqirët e festivalit, e sidomos prezantuesja, e cila ishte shumë e emocionuar, pasi kishte pranë Çoliqin.

Prania e Zdravkos në “Kënga ime” zgjoi reagime dhe debate të shumta te shqiptarët e Kosovës, e sidomos nëpër rrjete sociale. Ishin të menjëhershëm statuset e shumta, ku shfaqeshin pakënaqësi nga më të ndryshmet, pasi cilësohej si joadekuat vendi ku ishte ftuar të performonte ky këngëtar.

Një gjë të tillë nuk e kanë pritur mirë as këngëtarët nga Kosova, të cilët janë pjesë e këtij festivali. Ata ndihen të ofenduar, të zhgënjyer dhe jo të respektuar. Për këtë tashmë disa nga ta kanë konfirmuar mospjesëmarrjen në festivalin “Kënga ime”

Ramadan Krasniqi – Dani, Hysni Klinaku, Yllka Kuqi kanë bërë të ditur për “Express” të KTV-së se nuk do të jenë pjesë të këtij festivali.

Hila: Shumë familje nga Kosova kanë kërkuar të bëjnë fotografi me Zdravko Çoliqin

“Express” ka kontaktuar, nëpërmjet telefonit, njërin nga producentët e festivalit “Kënga ime”, Adrian Hilën.

Duke qenë shumë i shkurtë në përgjigje, fillimisht Hila u shpreh: “Muzika nuk njeh kombësi, prania e Zdravkos te ‘Kënga ime’ nuk paraqet problem për ne. E debatet nëpër rrjete sociale nuk mund t’i ndalim, sepse edhe ne jemi bërë pjesë e këtyre zhvillimeve globale”.

E pyetjes se për çfarë arsye e kanë ftuar një këngëtar serb në një festival, i cili në thelb ka promovimin e muzikës shqipe, Hila kishte këtë përgjigje: “Shumë familje nga Kosova kanë kërkuar të vijnë në spektakël dhe po ashtu të bëjnë fotografi me Zdravko Çoliqin”.

Ndërkaq, lidhur me reagimet e këngëtarëve kosovarë dhe bojkotin e tyre që po i bëjnë festivalit, Adrian Hila i ka quajtur të gjitha të pavlefshme, përderisa, siç u shpreh, nuk e kontaktojnë stafin organizativ. “Ky është problem i këngëtarëve, bisedat e tilla janë të pavlefshme”, përfundoi Hila.

Reagimet nuk kanë munguar as nga këngëtarët, të cilët megjithëse nuk janë pjesë e festivalit “Kënga ime”, pjesëmarrja e Çoliqit i ka penguar.

Mentor Haziri, në ‘Facebook”, ka shkruar: “A thu a kish mujt me këndu ndonjë këngëtar nga Shqipëria në Beograd në ndonjë shoë, së pari nuk do të kishte ndodh, së dyti e kishin gjujt me karrika dhe se treti…Tv klan, marre”.

E për Genc Salihun, ka gjëra më të rëndësishme për t’u diskutuar sesa Zdravko Çoliq.

“Të dashtun, nuk po i ka hije askujt me qenë kaq histerik për Zdravko Colicin në Tiranë. Besoj se ka zhvillime shumë ma substanciale për me u komentu”, është shprehur Genci në “Faceook”.