Deputeti i Vetëvendosjes, Rexhep Selimi ka reaguar ndaj dokumentit të publikuar nga ish Ministri i Mbrojtjes në Qeverinë e Kosovës në Ekzil Halil Bicaj, sipas të cilit ekzisonte marrëveshje në mes të Ministrisë së Mbrojtes dhe Shtabit të Përgjithshëm të UÇK’së.Ai thotë se për këtë dolument, nuk kishte dijeni askush nga Shtabi i Përgjithshëm i UÇK’së.

Selimi në një postim në faqen e tij në Facebook, ka thënë se ajo marrëveshje asnjëherë nuk i është kumtuar Shtabit të Përgjithshëm të UÇK’së.

“E pashë një dokument interesant të publikuar në media nga ish Ministri i mbrojtjes i Qeverisë së Kosovës në ekzil. E pashë të publikuar edhe një draft/strukturë të një draft/Shtabi të Përgjithshëm të UÇK-së si rezultat i një farë marrëveshje për të cilën, së paku unë që e gjej edhe emrin tim aty, nuk di asgjë. Është hera e parë që e shoh këtë lloj dokumenti e po ashtu edhe hera e parë që më bëhet me dije se dikush në emrin tonë (të SHP të UÇK dhe luftëtarëve të saj) e paska negociuar dhe nënshkruar këtë marrëveshje.

Mbi të gjitha ajo draft/marrëveshje nuk është hartuar në asnjë mbledhje të Shtabit të Përgjithshëm e njëkohësisht edhe nuk është vendim i Shtabit të Përgjithshëm të UÇK-së.

E them këtë sepse dua të bëj me dije se edhe pse e gjeta emrin tim në atë marrëveshje, unë nuk e kam ditur, që do të thotë njëkohësisht se unë nuk kam bërë asnjë veprim të tillë ose të ngjashëm, prapa shpinës së ushtarëve dhe bashkëluftëtarëve të mi.

Të guxosh ta bësh një gjë të tillë në emër të luftëtarëve dhe pa dijeninë e tyre e aq më tepër të vendosësh nënshkrime e vulë për diçka që nuk ke mandat, do të thotë të jesh një far trimi. Por, normalisht se vetëm një far trimi e jo edhe aq trim sa edhe t’ua komunikosh të njëjtën luftëtarëve dhe komandantëve të njësive në teren.

Ne kishim nevoje, ashtu siç kemi nevojë gjithmonë për unitet të shqiptarëve në rrugën drejt aspiratave tona, por jo edhe për ata që në letër nënshkruajnë një unitet të tillë dhe në realitet shkaktuan ndarje.

Unë nuk thashë se ishte e mire apo e keqe ajo draft/marrëveshje, nuk thashë që ishte e drejtë apo e padrejtë por, po them se është e padrejtë fshehja e saj për kaq vite.

Së paku ata (nënshkruesit) qenkan pas marrë vesh për diçka. E, për çka qenkan marrë vesh, le ta thonë protagonistët.

Shumë vendime, procese apo veprime të caktuara, sikur kjo marrëveshje, e kanë koston e vet, nganjëherë kosto politike e nganjëherë edhe financiare.

A thua sa ka kushtuar kjo marrëveshje, së paku financiarisht?

Ani edhe në fund thuhej “Prishtinë, 02. 11. 1998”!”, shkruan ai në Facebook.

Lëvizja Vetëvendosje në Prizren, kërcënimin e këshilltarit të BD-së nga kryetari i Prizrenit, Ramadan Muja, e ka vlerësuar si një metodë që përdoret vetëm në Rusinë e Putinit

“Sot gjatë seancës së Kuvendit Komunal, Ramadan Muja kërcënoi publikisht një këshilltar të opozitës duke i thënë se “do t’ia tregoj qejfin”. Të gjitha këto nuk ndodhën në Rusinë e Putinit, por në Prizrenin “Evropian” të Hashim Thaçit dhe Ramadan Mujës”, vlerëson VV në Prizren.

“Grupi i anëtarëve të Lëvizjes VETËVENDOSJE! në Kuvendin Komunal të Prizrenit, ka braktisur seancën e sotme të Kuvendit Komunal të Prizrenit pasi që as sot nuk është përfshirë si pikë e rendit të ditës kërkesa e opozitës në për debat mbi gjendjen e krijuar pas dënimit të Kryetarit të Komunës, Ramadan Muja”.

“Ndalimi i debatit edhe pas 28 ditëve të shpalljes së vendimit të gjykatës është treguesi më i mirë për natyrën antidemokratike dhe kriminale të pushtetit. Dhjetëra qytetarë të cilët protestuan paqësisht para objektit të komunës u rrahën, u gjykuan, u dënuan. Ata që i shpëtuan brutalitetit policor u kërcënuan dhe shantazhuan nga strukturat parapolitike, kurse në institucionet e pushtetit lokal opozitës tash e disa javë po i pamundësohet kërkesa legjitime për debat”.

“Duke shprehur brengën për gjendjen e mjerueshme që ky pushtet e ka katandisur Prizrenin, edhe njëherë kërkojmë dorëheqjen e menjëhershme të Ramadan Mujës dhe shpalljen e zgjedhjeve të jashtëzakonshme në Komunën e Prizrenit.Largimi i kësaj strukture qeverisëse nga pushteti tashmë është çështje urgjente”. /PrizrenPress.com/

Diplomatët perëndimorë vazhdojnë të japin sqarime rreth themelimit të Gjykatës Speciale për Kosovën, ndërsa insistojnë se kjo gjë nuk po bëhet për të rishkruar historinë se kush ishte viktimë gjatë luftës.

Në Kuvendin e Kosovës, ndërkaq, është rikujtuar Qeveria për ngritjen e një padie kundër Serbisë për krimet e kryera ndaj civilëve. Politikanët serbë thonë se kjo temë është e pakëndshme për t’u diskutuar, por puna do të kryhet.

Çkado që të ndodhë me hetimet që po i bën ekipi i kryeprokurorit të Task Forcës Speciale, Clint Williamson, pas hulumtimit trevjeçar të akuzave që ka bërë ish-senatori zviceran Dick Marty, për trafikim të organeve nga individë brenda Ushtrisë Çlirimtare të Kosovës, krijimi i Gjykatës Speciale u paraprin padive eventuale që mund të ngritë ky trup hetues.

Pa dashur që të paragjykojë se mund të ketë apo jo padi nga këto hetime, Përfaqësuesi i Posaçëm i Bashkimit Evropian për Kosovën, Samuel Zbogar, mendon se opinioni publik nuk duhet të ketë dyshim në këtë ndërmarrje, meqë thotë se ky mekanizëm nuk do të “rishkruajë historinë e luftës”.

Ditë më parë, ambasadorja e Shteteve të Bashkuara në Prishtinë, Tracey Ann Jacobson, bëri thirrje që kjo Gjykatë Speciale të themelohet përmes Kuvendit, përndryshe do të duhet intervenimi i Këshillit të Sigurimit të Kombeve të Bashkuara.

Ndërkaq, në një intervistë dhënë të mërkurën gazetës “Koha Ditore”, kryeministri i Kosovës, Hashim Thaçi, ka bërë të ditur se Prishtina do ta çojë para këtë thirrje të SHBA-së dhe BE-së dhe të themelojë një gjykatë e cila do të merret me pretendimet e ngritura nga ekipi i Williamsonit, e që hetoi dyshimet e ngritura nga Dick Marty.

“Trajtimi jonjerëzor i njerëzve dhe trafikimi i paligjshëm i organeve njerëzore në Kosovë”, është raporti i cili ka vënë në lëvizje gjithë këtë debat, 15 vjet pas luftës.

“E vërteta përtej çdo dyshimi!”, e titulloi të enjten zëri i Brukselit në Prishtinë, Samuel Zbogar, një editorial përmes së cilit shpjegon pozicionin e Bashkimit Evropian karshi Gjykatës Speciale për Kosovën.

Në janar të vitit 2011, ish-senatori zviceran Dick Marty e paraqiti atë dokument para Këshillit të Evropës dhe i njëjti u miratua me shumicë votash, kurse prej atëherë Clint Williamson me ekipin e tij është vënë në kërkim të përgjigjeve, të cilat, sipas ambasadores amerikane Tracey Ann Jacobson, pritet të paraqiten deri në qershor.

“Propozimi për një gjykatë speciale është mënyra më e shpejtë për Kosovën që të lëvizë tutje përtej raportit të Martyt. Kjo në fund të fundit mund të përmirësojë reputacionin e Kosovës”, ka shkruar Samuel Zbogar.

Ai nuk dëshiron të besojë se në Kosovë, mund të ketë njerëz që besojnë se ka krime kundër “njerëzve tanë” ose “njerëzve të atyre””.

“Krimi është krim dhe të gjithë duhet të përndiqen. Përmes lejimit të hetimit të viktimave të ‘palës tjetër’, ne nuk përulim në asnjë mënyrë viktimat ‘tona’. Në të kundërtën, ne mund të ndërtojmë një shpresë dhe pritje më të fuqishme se fati i të gjitha viktimave duhet të qartësohet, personat e zhdukur duhet të gjenden dhe plagët duhet të shërohen”, ka thënë Zbogar.

Edhe 1,712 persona llogariten të pagjetur në Kosovë, që nga përfundimi i luftës në vitin 1999. Shumica e të pagjeturve janë shqiptarë.

Në anën tjetër, komuniteti serb e sheh pa rezerva krijimin e Gjykatës Speciale.

Anëtari i Kryesisë së Kuvendit të Kosovës, Petar Miletic, ka vlerësuar madje se ky Tribunal do të qartësojë shumëçka.

“Unë, personalisht do ta mbështes themelimin e një gjykate të tillë në Kuvend, marrë parasysh se shumë raste të ndjeshme kanë mbetur të pazgjidhura. Unë këtë nuk e shoh si diçka që e dëmton Kosovën, dhe as nuk është kundër shqiptarëve. Por, ka rëndësi prej dy këndeve – i pari, që të vendoset drejtësia, dhe e dyta do të shërbejë si mësim për atë që në të ardhmen mendojnë të kryejnë krime të tilla”, është shprehur Miletic.

Në pjesën e parë të seancës së të enjtes në Kuvendin e Kosovës, tema e themelimit të Gjykatës Speciale nga Parlamenti, nuk u përmend fare. I vetmi që i ka përmendur krimet e luftës, ishte deputeti i Vetëvendosjes, Afrim Hoti, dhe për to i ka parashtruar edhe pyetje zëvendëskryeministrit Hajredin Kuçi.

Hoti i ka kujtuar Kuçit se më 27 janar të vitit 2011, kryetari i Hanit të Elezit ka kërkuar nga Qeveria për të iniciuar padi kundër Serbisë për krimet e kryera nga trupat e saj ushtarake dhe paraushtarake, ndaj popullatës civile gjatë luftës në Kosovë.

“Më intereson të informohem, se a jeni duke përgatitur dokumentacion me dëshmitë dhe fakte për krimet e Serbisë në Kosovë, që deri më sot nuk ka asnjë rezultat, lidhur me këtë”, ka thënë deputeti Hoti.

Ndërkaq, deputeti i Partisë së Pavarur Liberale, Petar Miletic, ka vlerësuar se themelimi i Gjykatës Speciale do të jetë gjë e pakëndshme, por beson se deputetët do ta çojnë këtë çështje deri në fund.

“Kolegët, me të cilët unë kam biseduar, kryesisht nuk janë të entuziazmuar me një vendim të tillë. Madje, disa prej tyre edhe janë të zemëruar. Mirëpo, më duket se te ta ka një gatishmëri dhe ndjenjë përgjegjësie. Andaj, unë besoj se kjo çështje do të kalojë në Kuvendin e Kosovës”, ka thënë Miletic. /REL/

Ushtruesi i detyrës së Komandantit të Operacioneve Civile të BE-së, Gilles Janvier, i shoqëruar nga Shefi i Misionit EULEX, Bernd Borchardt, dhe nga Këshilltari i lartë i policisë për Planifikim dhe Administrimin e Kapaciteteve Civile, Bernd Thran, u takua sot në mëngjes me Zëvendëskryeministrin dhe Ministrin e Drejtësisë të Kosovës, Hajredin Kuçi.

Janvier tha që institucionet e Kosovës kanë arritur përparim dhe se ky realitet i ri është pranuar nga Bashkimi Evropian.

“Misioni po hyn në një periudhë të re të marrëdhënieve ndërmjet BE-së dhe Kosovës, që po shndërrohet në një proces të tranzicionit prej EULEX-it tek institucionet e Kosovës. Misioni është i vetëdijshëm që ende ka sfida, në veçanti në fushën e gjyqësorit, por Misioni do të mbetet në Kosovë për ta mbështetur dhe forcuar raportin e punës me institucionet e Kosovës për t’u ballafaquar me këto sfida”, thuhet në komunikatën e EULEX-it.

“Kur i dështoi mundësia Bukoshit me shti nën kontroll UÇK” në me anë të parave, unë jap para, ju luftoni dhe unë vijë e bëhem çlirimtar, atëherë u kthyen dhe u kapën me Tahir Zemajn oficerin e KOS të Serbisë, dhe u munduan të formojnë njëfarë FARK-u”, i cili dihet se si përfundojë. Erdhën me luftu ikën dhe i lënë 600 e kusur të plagosur në fushëbetejë dhe i lanë më mijëra armë nëpër fusha”,tha veprimtari Demaçi.

Adem Demaçi e ka konfirmuar se ekziston Marrëveshja e Oslos e arritur me Ahmet Krasniqin për ta ndihmuar luftën e Ushtrisë Çlirimtare të Kosovës. Por, Demaçi ka thënë se s’ka pasur kurrfarë marrëveshje për FARK-un.

“Mbledhja e Oslos ekziston. Mbledhja e Oslos është mbajtur me qëllim për ta ndihmuar UÇK-në dhe Qeveria e Bukoshit me dhanë parë dhe bashkërisht me ndihmue kryengritja e cila është zhvilluar në Kosovë nën udhëheqjen e UÇK-së”, ka thënë Demaçi, raporton RTK.

Krahu politik i Ibrahim Rugovës i përfaqësuar nga Bujar Bukoshi dhe zyrtarë të tjerë të LDK-së kanë insistuar se Marrëveshja e Oslos ishte bërë për t’i vënë UÇK-në nën komandën e Forcave të Armatosura të Kosovës. Ndërsa, krahu i luftës, të cilin e kishte përfaqësuar Adem Demaçi japin një version tjetër se në Oslo ishin marrë vesh për ta ndihmuar luftën e UÇK-së dhe se aty s’ishte diskutuar për FARK-un.

Megjithëkëtë, para katër ditësh, Xhavit Haliti, në Kuvendin e Kosovës ka thënë se s’ka ekzistuar asnjëherë marrëveshje e Oslos dhe se s’ka pasur kurrfarë FARK-u në luftë. Pas kësaj deklarate, Anton Quni i LDK-së tha se ka ekzistuar edhe Marrëveshja e Oslos, edhe FARK-u i udhëhequr nga Ahmet Krasniqi, i cili ishte vrarë në shtator të vitit 1998 në Tiranë.

Quni tha se për Oslon duhet të flasë Adem Demaçi, i cili thotë se s’ka asgjë të shkruar nga ajo marrëveshje përveç asaj që janë pajtuar për ta ndihmuar UÇK-në.

“Kur kemi biseduar ne fjala ka qenë vetëm për me ndihmue UÇK-në…. S’ka ekzistuar hiq FARK-u”, ka thënë Demaçi.

“Krejt këto konstruksione që po i bëjnë për FARK-un janë dëshira që atyre që kanë rrasë paratë e Bukoshit dhe kanë tredhur miza në perëndim. Janë vonuar. Ndoshta kanë mendime të mira ata, por janë vonuar”.

Sipas Demaçit, Bujar Bukoshi pasi ka dështuar për ta kontrolluar UÇK-në bashkë me disa të tjerë kanë tentuar të themelojnë FARK-un.