Presidentja e shtetit, Atifete Jahjaga, është autoriteti që do të kërkojë nga Bashkimi Evropian themelimin e një gjykate të veçantë për të gjykuar personat përgjegjës për krimet më serioze që pretendohet se jenë kryer përgjatë viteve 1998 – 2000 nga Ushtria Çlirimtare e Kosovës, e që janë të evidentuara në raportin e senatorit Dick Marty. Do ta bëjë këtë, pa pasur qëndrimin paraprak të Kuvendit.

Gjykata do të themelohet me të njëjtat instrumente që do t’i sigurojnë mandat shtesë misionit evropian për sundimin e ligjit në Kosovë, EULEX. Do të bëhet nëpërmjet këmbimit të letrave ndërmjet presidentes Jahjaga dhe shefes së Politikës së Jashtme të BE-së, baroneshës Catherine Ashton. Draftet janë finalizuar tashmë.

Të hënën në mëngjes, përfaqësuesi special i BE-së në Kosovë, Samuel Zbogar, i ka vënë në dijeni përfaqësuesit e institucioneve të Kosovës dhe ata të subjekteve politike me përmbajtjen e letrave. Pas shkëmbimit, ato do të votohen në Kuvend, në formë ligji për ratifikim të marrëveshjes ndërkombëtare. Që votimi të dalë i suksesshëm, kërkon votat e dy të tretave të deputetëve./Koha ditore/

Muaji prill shpallur si muaj i pastrimit, po vazhdon që nga data 1 prill, duke u pastruar disa nga fshatrat e Komunës së Malishevës, ku po largohen deponitë e mëdha të mbeturinave. Gjatë ditës së djeshme aksioni, i pastrimit ka vazhduar në fshatin Drenoc, ku janë larguar disa nga këto deponi, brenda dhe jashtë fshatit.

Për këtë qëllim, edhe kryetari i Malishevës, Ragip Begaj, ka inspektuar gjatë pasdites së djeshme, aksionin e largimit të mbeturinave në këtë vendbanim, duke u shprehur i kënaqur me punën dhe duke kërkuar që edhe banorët e fshatrave ti përgjigjen këtij aksioni dhe bashkërisht të pastrohet i tërë ambienti.

Muaji prill, është shpallur muaj i pastrimit të ambientit në Malishevë, ndërsa kryetari Begaj, në çdo takim me banorët e fshatrave të Komunës së Malishevës, dhe në të gjitha mundësitë tjera të paraqitjes publike, ka bërë thirrje për pastrimin dhe ruajtjen e ambientit./PrizrenPress.com/

Ftesën e kryeministrit Hashim Thaçi drejtuar studentëve të Universitetit Publik “Ukshin Hoti” në Prizren, që ta ndihmojnë për të fituar zgjedhjet dhe për ta ndërtuar Kosovën evropiane, partitë opozitare, LDK dhe VV, e kanë cilësuar si demagogji të kreut të ekzekutivit të vendit dhe liderit të PDK-së.

Erzen Vraniqi nga Lëvizja Vetëvendosje, tha për Telegrafin se shefit të ekzekutivit të Kosovës universitetet i shërbejnë vetëm për fushatë.

Sipas tij, Thaçi ka hapur universitete publike për fushatë dhe tani po i shfrytëzon prapë ato për të fituar vota.

“Mirëpo se sa në të vërtetë i ka ndihmuar arsimit të lartë në përgjithësi, kjo shihet nga buxheti i ndarë, degradimi i UP-së dhe hapja e universiteteve të reja pa kurrfarë kriteri”, ka thënë Vraniqi.

Këshilli i Ekspertëve i Lidhjes Demokratike të Kosovës ka reaguar ndaj fushatës që po bën kryeministri i Kosovës dhe lideri i PDK-së, Hashim Thaçi, duke e akuzuar atë se po përpiqet të korruptojë qytetarët e të gjitha kategorive.

Ndërsa, Avdullah Hoti nga LDK, tha për Telegrafin se, kërkimi i ndihmës nga ana e studentëve për t’i fituar zgjedhjet, janë treguesi më i mirë se kryeministri Thaçi është duke e ndjerë aromën e humbjes.

Sipas Hotit, studentët duan arsim cilësor dhe mundësi për punësim pas diplomimit, të cilat kjo qeveri në ikje nuk i ka adresuar fare.

“Mbi 21 mijë të rinj dhe të reja kanë emigruar vetëm gjatë vitit 2013 në vendet e BE-së. Pas shtatë vitesh qeverisje, nuk ka asnjë të arritur që do të mbetet. Nga qershori i tutje, ‘nuk do të ketë nevojë që të rinjtë të paraqiten si francez me letra vetëm për tu regjistruar në UP’, siç ishte rasti me një zyrtarë të lartë të PDK-së”, ka thënë Hoti.

Ndryshe, Kryeministri i Kosovës, Hashim Thaçi të hënën ka mbajtur një ligjëratë para studentëve të Universitetit Publik të Prizrenit, të cilëve u ka rikonfirmuar vendimin e tij për përgjysmimin e pagesës prej 50 për qind të semestrave, konvikteve dhe mensës për të gjithë studentët e universiteteve publike.

Ai i ka ftuar studentet që ta ndihmojnë atë për të fituar edhe betejën e tretë, atë siç tha të Kosovës evropiane dhe zhvillimit ekonomik.

Kryeparlamentari i Kosovës, Jakup Krasniqi, ka reaguar ndaj deklaratës së Arbër Vllahiut, këshilltar i lartë i presidentes Jahjaga, i cili ka thënë se Presidentja ka folur për Gjykatën Speciale pas bashkërendimit me institucionet e tjera, duke pyetur se me kë është konsultuar presidentja.

“Nëse është kështu si po thotë, këshilltari i Presidentes dhe unë po dua të besoj që kështu është, atëherë dikush është duke i mashtruar si ndërkombëtaret ashtu edhe opinionin publik vendor, pasi ne dy takime që kemi pasur me ndërkombëtaret, zyrtaret e lartë të Qeverisë kanë thënë se ‘për rastin e Gjykatës Speciale po dëgjojnë për herë të parë’. Atëherë me cilin institucion vendor është konsultuar Presidentja?”, ka pyetur Krasniqi përmes një postimin në Facebook.

“E theksoj, unë nuk kam kërkuar siç u tha në TV KK, që Presidentja të jetë kundër Gjykatës Speciale, por që të bisedoi me faktorin politik vendor dhe të marrin një vendim të përbashkët, pa e cekur se cili do të ishte ai vendim. Vendimi gjithsesi që duhet të jetë në favor të shtetit tonë, Republikës se Kosovës. Nuk kam kërkuar as më shumë e as më pak”, ka thënë Krasniqi.

Ndërsa lidhur me themelimin e Tribualit, Krasniqi ka thënë se “Deri më tani, nuk kam pasur mundësi ta formësoj qëndrimin, për shkak të mungesës se informacionit dhe kjo nuk është hera e parë që po e them. Në politikë me gjysmë informata e aq më pak me mashtrime akrobatike të servuara nga zyrtaret qeveritarë mund të formohet qëndrimi politik i vlefshëm për vendin”.

Reagimi i kryeparlamentarit vjen pas deklaratës së këshilltarit të lartë të presidentes, Arbër Vllahiu, i cili duke komentuar një deklaratë të presidentes Jahjaga, ka thënë se “Deklarimi është bërë pas bashkërendimit të çështjeve me institucionet e tjera”.

“Qeveria e Kosovës i ka diskutuar në tërësi çështjet rreth Gjykatës, ndërkohë që Zyra e Presidentes është mbajtur në dijeni për këtë çështje. Presidentja e Kosovës, siguron bashkërendimin institucional, në përputhje me Kushtetutën dhe ligjet e Kosovës dhe gjithsesi në raste të këtilla edhe vazhdimësinë e veprimeve në raport me bashkësinë ndërkombëtare, marrë parasysh se letrat e mëhershme për misionin e BE-së janë dërguar nga Presidenti”, ka thënë Vllahiu.

Sipas Xhavit Halitit, refuzimi i votës nga deputetët në Kuvend pro amendamenteve që LDK-ja parashtroi gjatë miratimit të Ligjit për veteranët e luftës, ka qenë i duhur. Ai mohon FARK-un dhe thotë se Ibrahim Rugova s’ishte për formim të ushtrisë.

Deputeti dhe nënkryetari i Kuvendit të Kosovës, Xhavit Haliti ka thënë se dëshira e hedhur poshtë e Lidhjes Demokratike të Kosovës nga deputetët në Kuvend që, në Ligjin për veteranët e UÇK-së të futeshin edhe ata të FARK-ut, ka qenë e duhur.

Haliti në “Zona B” në KlanKosova ka thënë se nuk ka fakte për ekzistencën e FARK-ut, por bëhet fjalë për përpjekje të disave për të hyrë në UÇK.

“Unë mendoj që ata që kanë kontribuar që një ushtar t’i përmbushë nevojat të veta, ata janë kontribuues. Kuvendi ka bërë shumë mirë që s’i ka miratuar ato amendamente”, tha Haliti, citon lajmi.net

“Ne s’kemi asnjë fakt që ka pasur FARK, ka pasur përpjekje. Unë jam protagonisti i bisedave edhe me Bujarin (Bukoshin) që nga 95-ta edhe me Rugovën që nga 91-shi”.

“Këta po thonë që jemi ushtarë të Ibrahim Rugovës, mirëpo Ibrahim Rugova nuk ka qenë i interesuar të ketë ushtrinë e vet. Nuk është mirë që të themi se ai ka qenë komandant. Sikur vetë ai ta kishte thënë se ka qenë komandant dhe ta ketë krijuar FARK- un, atëherë po”.

“Ibrahim Rugova sa ka qenë gjallë nuk e ka pranuar një gjë të tillë. Si strukturë ata kanë dashur të futen në UÇK. Planet tona nuk kanë qenë refuzuese. Ideja e themelimit të këtij FARK-u ka qenë ide e Ahmet Krasniqit”.

Por, pjesë e personave që do ta gëzojnë miratimin e këtij ligji është edhe vetë Haliti. Ai, duke shpjeguar arsyet personale të aplikimit, thotë se nuk ka aplikuar për pagë, por për një të ardhme të tij më ndryshe.

“Unë kam qenë udhëheqës i UÇK-së. S’kam konkurruar për pagë. Unë e kam një pagë në parlament dhe s’kam nevojë për pagën atje, por nesër njeriu mund të bëhet invalid, të sëmuret, të mos jetë deputet dhe të ketë nevojë të blejë ilaçe”, është shprehur Haliti .

“Është një satisfaksion për secilin që e ka një mburojë të shtetit”.