Orkestra frymore e FSK-së dhe orkestra frymore e Gardës Kombëtare të shtetit Ajovës të SHBA-ve, sot pritet të mbajnë një paradë dhe koncert parakalues.

Parada e orkestrave fillon nga sheshi “Zahir Pajaziti” deri tek sheshi “Nënë Tereza”, duke filluar nga ora 18:00, dhe në të pritet të ekzekutohen pika artistike muzikore, të autorëve të ndryshëm.

Trupa frymore e gardës kombëtare të Ajovës është për vizitë në Kosovë me qëllim të zhvillimit të bashkëpunimin me Trupën Frymore të FSK-së.

Me këtë rast, FSK ka ftuar të gjithë qytetarët që janë dashamirë të muzikës ushtarake dhe parakalimeve të tilla muzikore, që të marrin pjesë në këtë shfaqje artistike të veçantë./Kosovapress/

Në të gjitha shkollat e mesme në vend, nesër do të hapet konkursi për pranimin e nxënësve të rinj, kur edhe do të bëhen publike rezultatet e testit të arritshmërisë për nxënësit që kanë përfunduar klasën e nëntë. Ndërkohë, në Komunën e Prishtinës, janë gjimnazet ato që kanë kërkesa të shumta nga nxënësit. Për këtë qëllim udhëheqësit e arsimit të kësaj komune i kanë dhënë rëndësi përfshirjes së nxënësve në shkollat profesionale.

Komuna e Prishtinës ka bërë të gjitha përgatitjet për regjistrimin e nxënësve në shkollat e mesme për vitin shkollor 2013/2014. Drejtori i Drejtorisë së Arsimit në Komunën e Prishtinës, Halim Halimi, tha për Radio Kosovën, se në shkollat e kryeqytetit ka vend për të gjithë nxënësit,trasmeton rtk.

“Duke e marrë parasysh se në testin e arritshmërisë në komunën tonë janë 3 mijë e 500 nxënës dhe këtë numër e kam krahasuar me numrin e nxënësve që do të regjistrohen në shkolla të mesme. Pra, do të këtë vend për secilin nxënës që e kryen klasën e nëntë në shkollat e mesme të Prishtinës”, theksoi ai.

Halimi theksoi se këtë vit do t’i kushtohet rëndësi e veçantë përfshirjes së nxënësve në shkollat profesionale. Atë e çuditë fakti që nxënësit vrapojnë të regjistrohen në gjimnaze e jo në shkolla profesionale, ku pastaj mund të gjejnë punë më lehtë pas përfundimit të shkollimit.

“Ne e kemi një dukuri që zakonisht nxënësit orientohen në gjimnazin “Sami Frashëri”. Këtë vit nuk do ta rrisim numrin e nxënësve nëpër klasa, në mënyrë që nxënësit të orientohen në shkolla profesionale ose shkollën e mesme bujqësore, të cilën tani e kemi emërtuar si Shkolla e Mesme e Agrobiznesit dhe Teknologjisë. Kështu që, vetë emri do të jetë më joshës për nxënësit. Në këtë drejtim edhe lëndët kanë ndryshuar. Nëse nga kjo shkollë nxënësit do të dalin mirë profesionalisht, atëherë do të gjejnë punë në bujqësi”, tha Halimi.

Drejtori i drejtorisë së arsimit në Komunën e Prishtinës, Halimi, tha se orientimi i nxënësve nëpër shkolla do të bëhet në bazë të pikëve që ata arrijnë në testin e arritshmërisë, duke theksuar se çdo nxënës që ka kryer klasën e nëntë do të përfshihet në arsimin e mesëm.

Lëvizja Vetëvendosje, pas daljes nga grupi të deputetes Alma Lama, nuk është forca e tretë parlamentare në Kosovë.

Ky vend tash i takon Aleancës për Ardhmërinë e Kosovës.

Partia e Albin Kurtit, pas zgjedhjeve të fundit, kishte hyrë në Parlamentin e Kosovës me 14 deputetë. Dy prej tyre, Agim Kuleta e Aurora Bakalli, pas problemeve që partia e tyre, Lëvizja për Bashkim kishte me Lëvizjen Vetëvendosje, dolën në kampin e deputetëve “pa grup”. Kurse tash pas ikjes së Alma Lames, Vetëvendosje ka ngelur me vëtëm 11 deputetë.

Ndërkohë, Grupi Parlamentar i AAK’së ka qenë mjaftë stabil në këtë mandat. Ata aktualisht kanë 12 deputetë.

Kjo ka shtyrë drejtuesit e AAK’së që të mendojnë t’i dërgojnë një kërkesë Sekretarit të Kuvendit për ridizajnimin e ulëseve.

“AAK kërkon që grupi i saj parlamentar të dalë në rreshtin e parë, aty ku aktualisht është Lëvizja Vetëvendosje”, ka thënë një burim i Express brenda Kuvendit të Kosovës.

Por, sipas tij, kjo kërkesë vështirë se do të realizohet, pasi që renditja e deputetëve bëhet në fillim të legjislaturës dhe pavarësisht ndryshimeve në grupet parlamentare, ulëset e partive nuk ndryshojnë.

Grupi i Vetëvendosjes

Visar Ymeri, Glauk Konjufca, Albana Fetoshi, Albulena Haxhiu, Albin Kurti, Afrim Kasolli, Liburn Aliu, Rexhep Selimi, Florin Krasniqi, Afrim Hoti, Albana Gashi.

Me ftesë të presidentes Atifete Jahjaga, sot për vizitë në Kosovë vjen guvernatori i shtetit të Iowa-s të SHBA-së, Terry Branstad.

Me këtë rast Presidentja Jahjaga dhe guvernatori Branstad do nënshkruajnë Marrëveshjen e Partneritetit.uverantori i Iowa-s do të pritet edhe nga kryeministri Thaçi.

Marrëveshja ushtarake, e nënshkruar para disa ditësh në mes Ministrit të Ministrisë së Forcës së Sigurisë së Kosovës, Agim Çeku dhe ministrit të Mbrojtjes së Shqipërisë, Arben Imami, sipas ekspertëve serbë të sigurisë, “është një hap drejt krijimit të Shqipërisë së Madhe dhe një rrezik potencial për rajonin”.
Sipas Radomir Milasinovicit, dekan i Fakultetit të Sigurisë në Universitetin e Beogradit, kjo marrëveshje mes Kosovës dhe Shqipërisë është vetëm një fazë drejt “realizimit të projektit perëndimor të Shqipërisë së Madhe”.

Ekspertët serbë të sigurisë vlerësojnë se paraqitja e përbashkët e forcave të armatosura të Kosovës dhe Shqipërisë do të mund të lëkund rajonin.

Një nga argumentet për këtë ata përmendin edhe gjendjen numerike të ushtrive të dy vendeve, e cila sipas tyre mund të arrijë në 20 mijë ushtarë të armatosur.

Siç shkruan gazeta serbe “Vecernje Novosti”, Ligji për Forcën e Sigurisë së Kosvës ka kufizuar numrin e pjesëtarëve të ushtrisë së Kosovës në 2.500 ushtarë aktivë dhe 800 rezervistë.

Ndërsa vlerësimet për forcën e ushtrisë së Shqipërisë janë të ndryshme, por më së shpeshti përmendet numri prej 13 mijë ushtarëve.

“Marrëveshja është një punë e imtë që po zbatojnë mentorët e shqiptarëve, SHBA dhe Gjermania, me qëllim të futjes së Turqisë në Ballkan”, thotë Milasinovic.
“Ushtritë e bashkuara të Shqipërisë dhe Kosovës janë një forcë që meriton respekt. Serbia, duke mos braktisur parimin e mbrojtjes së sovranitetit, duhet të jetë e vetëdijshme se në anën tjetër të kufirit ka përballë fqinjët armiqësorë.

Gjendjen e sigurisë, pas nënshkrimit të marrëveshjes Kosovë –Shqipëri, e vlerëson shqetësuese edhe gjenerali serb në pension, Radovan Radinovic.

“Kosova pothuaj se nuk ka fare kufi jugor, kurse bashkimi i territoreve ku jetojnë shqiptarët është qëllimi të cilin politikanët në Tiranë dhe Prishtinë pothuaj nuk e fshehin fare. Në këtë kontekst duhet parë edhe këtë marrëveshje.

Edhe pse Marrëveshja e Brukselit garanton se në veri të Kosovës nuk do të mund të vendosen forcat e armatosura të Kosovës, sipas Radinovicit është shqetësues qëndrimi indiferent i Serbisë. Sipas tij, Serbia do të duhej qoftë edhe verbalisht t’i kundërvihet akteve të tilla.

Ish kryeshefi i Gjeneral shtabit të Ushtrisë së Jugosllavisë, Branko Kërga thotë se marrëveshja mes Prishtinës dhe Tiranës për Kosovën me shumë ka një domethënie propagandistike, “sepse me këtë synon të tregojë se Kosova mund të bëjë edhe marrëveshje të kësaj natyre”.
“Megjithatë nuk duhet harruar se paraqitja e përbashkët ushtarake e Kosovës dhe Shqipërisë në aspektin ushtarak për Serbinë paraqet kërcënim serioz për sigurinë”, ka thënë ai.

Pas një tubimi të paralajmëruar nga qytetarët në mediet sociale dhe pas diskutimeve për projektligjin e ri të propozuar nga Qeveria e Kosovës qytetarët shqyrtuan projektligjin për amnistinë.Në tubim u tha që ky projektligj nuk dallon aspak nga ai i kaluari i cili ra më datën 4 korrik 2013 pasi 21 deputetë e votuan kundër, thuhet në një komunikatë të lëshuar nga “Tubimi i qytetarëve”.

Neni 3 i cili po pretendohet që është hequr nga projektligji i ri në fakt është shkrirë në një nen, bashkë me nenin 5 të ligjit që nuk u miratua dhe kësisoj u krijua një nen 3 i ri. Projektligji i cili po propozohet nga Qeveria e Kosovës është po aq i dëmshëm sa ai i kaluari. I vetmi ndryshim ka të bëjë me veprat penale në të cilat janë humbur jetë ose ka pasur lëndime njerëzore, ndërkaq nenet që lidhen me politikanët e Kosovës dhe korrupsionin e tyre janë inkorporuar sërish në projektligjin e ri,trasmeton Orainfo.

Sipas një komunikate, pas shterrimit të diskutimeve me qytetarë në tubimin e sotëm demokratik, në mes të sheshit, i cili nuk u ndal as nga tentimi i Policisë së Kosovës u vendos:

1. që tubimet të vazhdojnë edhe netëve në vazhdim për t’i njohur qytetarët e Republikës me situatën e re në mënyrë që ditën kur do të mbahet seanca e Kuvendit të Kosovës për ta miratuar këtë projektligj, pjesëmarrja në protestë kundër miratimit të projektligjit në fjalw të jetë masive.

2. që nga nata e sotme, 6 korrik 2013, ora 21:00, qytetarët ftohen të mblidhen në sheshin para Kuvendit të Republikës së Kosovës për të qëndruar aty deri në ditën e votimit të projektligjit në Kuvend.

Nga ky tubim, u është kërkuar deputetëve që kanë votuar kundër të vazhdojnë të votojnë kundër, atyre deputetëve të cilët nuk kanë votuar apo që kanë abstenuar të votojnë kundër, ndërkaq ata që kanë votuar për, të mendojnë mirë dhe të votojnë sipas interesave të qytetarëve të Republikës së Kosovës, pra gjithashtu të votojnë kundër.

Ftohen qytetarët, që të fillojnë të mblidhen në sheshin para Kuvendit për të qëndruar aty deri në ditën e votimit. Ata të cilët kanë obligime të solidarizohen duke qëndruar nga disa orë në ditë sipas mundësive, ndërsa të tjerët që kanë mundësi, të ofrojnë ndihmë logjistike, e cila do t’ua lehtësonte protestuesve qëndrimin natën dhe ditëve të nxehta.