Qendra e Studentëve e Universitetit të Prishtinës ‘Hasan Prishtina’ pritet të bëhet edhe me një konvikt të ri. Drejtues të Qendrës bëjnë të ditur për Radio Kosovën se, me ndërtimin e konviktit të ri do të rriten kapacitetet edhe për 400 shtretër. Kërkesa për ndërtimin e konviktit të ri është bërë para një muaji dhe pritet leja nga Komuna e Prishtinës për fillimin e ndërtimit.

Qendra e Studentëve të Universitetit të Prishtinës ka kërkesa të mëdha nga studentët për të banuar në konvikte, madje janë sa dyfishi i kapaciteteve që aktualisht i ka qendra. Për këtë arsye kjo qendër ka bërë kërkesë që të ndërtohet edhe një konvikt i ri. Drejtori i kësaj qendre, Fatmir Sfishta, tha për Radio Kosovën se, projekti është miratuar nga Ministria e Arsimit dhe vetëm janë duke pritur dhënien e lejes nga Drejtoria e Urbanizmit e Komunës së Prishtinës.

“Kemi filluar procedurat administrative. E kemi bërë kërkesën në Drejtorinë për Urbanizëm dhe po presim përgjigjen për leje, në mënyrë që me Ministrinë të fillojnë procedurat për ndërtimin e konviktit”, tha Sfishta.

Ai bëri të ditur se konvikti i ri – që është në plan të ndërtohet, parashihet të ketë rreth 400 shtretër. Kërkesa për dhënien e lejes së ndërtimit është bërë para një muaji. Ndërkohë, sa i përket procedurave të dhënies së lejes për fillimin e ndërtimit të konviktit, zyrtarë të Komunës së Prishtinës nuk u përgjigjën për këtë çështje. Megjithatë, studentët shprehen të kënaqur me kushtet aktuale në konvikte, duke theksuar se ka kërkesa të ndryshme.

“Jam në vitin e tretë të studimeve dhe jam banore në konvikt. Ka kërkesa të ndryshme”, tha një studente konviktore.
Në bazë të kërkesave të studentëve, drejtori i Qendrës Studentore, theksoi se gjatë këtij viti është paraparë që të ndërrohet inventari në tri konvikte.

“Kemi menduar dhe kemi planifikuar që gjatë këtij viti të ndërrohet inventari pothuajse komplet në tri konvikte të meshkujve 1, 2 dhe 4, që është shumë e nevojshme. Gjithashtu mendojmë se duhet të intervenohet edhe në nyjat sanitare në banjat e konviktit 5, i cili ka kapacitetin më të madh”, shtoi Sfishta.

Ndërkohë, pritet që shumë shpejt të përurohet edhe amfiteatri në Qendrën Studentore, i cili është vonuar deri tani, për arsye buxhetore. Ky amfiteatër do t’u shërbejë studentëve për aktivitete të ndryshme kulturore e sportive, i cili ka 590 vende.

Në odën e Demollëve në “Kodrën e Trimave” po planifikohej të sfidohej regjimi serb. Shumica e të pranishmëve kishin dyshime. Jo edhe mjekët Gani Demolli dhe Bashkim Islami. Gjithçka kishte nisur vetëm me një laps të thjeshtë dhe një letër të bardhë.

Demolli dhe Islami po hidhnin në letër planin se si do të dukej ambulanca e parë që do të hapej në kuadër të shoqatës humanitare bamirëse, “Nënë Tereza”. Ishte marsi i vitit 1992. Serbia e Slobodan Milosheviqit ia kishte suprimuar më 1989 Kosovës autonominë, pas të cilit vendim kishte nisur në vitet në vazhdim edhe dëbimi i të gjithë shqiptarëve nga vendet e punës nëpër të gjitha institucionet shtetërore.

Aktivistët e shoqatës “Nëna Terezë” tashmë po shpërndanin ndihma gjithandej Kosovës. Por Demollit dhe Islamit ua hante mendja se mund ta realizonin një mision edhe më të madh. Këtë ua kërkonte edhe Betimi i Hipokratit. Shokët e pandashëm, në letër tashmë kishin hedhur vijëzat e para të objektit të ambulancës. /Koha Ditore/

Pantomima e quajtur “Mongol me valixhe” ishte shfaqja që bëri hapjen zyrtare të festivalit “Fraknofon” mbrëmjen e së enjtes në ambientet e teatrit “Kombëtar”. Shfaqje kjo e realizuar nga artisti bullgar Guerassim Dichliev e cila zgjati më shumë se një orë, rrëmbeu të pranishmit në sallë përmes kombinimit të duarve dhe trupit të tij në mënyra të ndryshme.

Ata të cilët e shijonin çdo detaj të performancës së artistit ishin fëmijët të cilët gjatë tërë kohës artisti bullgar i mbajti të buzëqeshur.

I lindur në Svilengrad të Bullgarisë , Guerassim Dichliev tha për “Zërin” se shfaqja ka të bëjë me një njeri i cili braktisë shtëpinë e tij dhe emigron për në Paris në qytetin e dritave. Ai gjatë reformimit të fjalëve të pantomimës ka folur në disa gjuhë internacionale si në: shqip, anglisht, serbisht, bullgarisht, frëngjisht, gjermanisht etj.

“Vetë fakti që unë flas shumë gjuhë si frëngjisht, italisht, spanjollisht, anglisht etj nuk e kam pasur edhe aq të vështirë mësimin e fjalëve në gjuhën shqipe sepse i kam gjetur disa fjalë që janë të përshtatshme edhe me gjuhët tjera si: këpucë, çorape, e shumë të tjera”, ka thënë Dichliev duke treguar më pas se fjala në gjuhën shqipe që i ka lënë përshtypje ka qenë fjala “rrugë”.

Para fillimit të shfaqjes të pranishmit i kanë përshëndetur me një fjalë rasti edhe Ambasadorja franceze në Kosovë, Maryse Daviet, Ambasadorja e Zvicrrës, Krystyna Marty Lang, Ambasadori i Belgjikës në Kosovë, Padcal Gregorie dhe ai i Luksemburgut Leon Delvaux.

“Për mua është një kënaqësi e madhe t’ju mirëpres në rrugëtimin tonë nëntë ditësh në programin e Frankofonisë që mbahet në Kosovë për të katërtin vit me radhë. Siç e dini, shteti i Zvicrës është i karakterizuar përveç tjerash nga një diversitet shumë gjuhësor që është e përbërë nga katër gjuhë kombëtare. Më tepër se një burim kompleksiteti ose një pengesë për komunikim, populli zviceran e sheh këtë llojllojshmëri të gjuhëve si një pasuri e madhe në trashëgimin kulturore të vendit të tyre”, ka thënë ambasadorja zvicerane në Kosovë, Marty Lang,

Pas përfundimit të shfaqjes Ambasadorja Franceze në Kosovë, Maryse Daviet ka thënë se gjatë kësaj jave në programin e Frankofonisë mund të ndiqni shumë aktivitete të organizuara nga Ambasada e Francës, Zvicrrës dhe Zyra diplomatike e BE-së, duke shtuar më pas se shfaqja nuk ka qenë politike.

“Shfaqja ishte progresive jo politike. Si Franca ashtu edhe Kosova kanë historitë e tyre dhe është mirë që t’i shfaqin ato”, është shprehur Daviet.

Për hir të miqësisë dhe bashkëpunimit të mirë që kanë të dyja shtetet ajo e Francës dhe Kosovës mes vete i pranishëm në hapjen zyrtare të Javës së Frankofonisë, ishte edhe Ministri i Punëve të Jashtme, Enver Hoxhaj.

“Shfaqja ke jashtëzakonisht e mirë dhe flet për fuqinë që ka gjuha e trupit jo vetëm gjuha e cila pasqyrohet përmes fjalëve dhe mendoj që ke një prezantim i cili ngërthen në veten e saj shpresat që i ka dikush prej Ballkanit jo vetëm në fushën e artit por dikush që synon që të krijojë një ardhmëri të tij diku në perëndim”, ka thënë Hoxhaj, duke theksuar më pas se Java e Frankofonisë nuk e mbulon vetëm Francën por edhe shumë vende të tjera Frankofone të cilat e përdorin gjuhën frënge dhe se përmes një jave të tillë qytetarët e Kosovës njihen me këtë kulturë dhe me këtë forcohen lidhjet mes popujve tanë.

Pantomima “Monolog me valixhe”, e bullgarit Dichliev, do të shfaqet të premten në ora 17:00, në Shtëpinë e Kulturës “Xhemajl Berisha”, në Prizren, kurse nga ora 20:00, në Teatrin “Oda”, në Prishtinë, në një koncert të muzikë jazz do të performojnë pianisti i njohur Bojan Z së bashku me Julien Lourau në saksofon.