Komisioni Qendror i Zgjedhjeve në mbledhjen e radhës, diskutoi lidhur me përgatitjet që duhet të bëhen për zgjedhjet e ardhshme parlamentare. Anëtarët e KQZ-së e panë të nevojshme se duhet filluar me disa përgatitje për këto zgjedhje.

Në pikën tjetër të rendit të ditës, KQZ u pajtua parimisht për të punuar në drejtim të hartimit të një strategjie për vitet e ardhshme, si dhe miratoi zëvendësimin e tetë (8) anëtarëve të Kuvendeve Komunale të cilët vijnë nga radhët e subjekteve të ndryshme politike.

Në vazhdim të mbledhjes, KQZ miratoi Raportin e Shpenzimeve për Zgjedhjet Lokale të vitit 2013.

Po ashtu, KQZ miratoi rekomandimin e Zyrës për Regjistrim dhe Certifikim të Partive Politike për shfuqizimin e pezullimit të një partie politike si dhe rekomandimin për gjobitjen e shtatë (7) subjekteve politike jo-parlamentare të cilat nuk kanë dorëzuar në afat ligjor raportin e shpnezimeve të fushatës për Zgjedhjet Lokale 2013, thuhet në njoftimin e KQZ-së.

OVL e UÇK-së mirëpret miratimin e Ligjit për Veteranët e Luftës. Kreu i kësaj organizate thotë se miratimi i ligjit do të thotë njohje e luftës çlirimtare. Ai deklaron se në Kosovë nuk ka më shumë se 20 mijë veteranë që kanë luftuar, ndërsa kritikon procesin e verifikimit të tyre. Për OVL-në formimi i çfarëdo gjykate jashtë juridiksionit të shtetit është i jashtëligjshëm

Muharrem Xhemajli, kryetar i Organizatës së Veteranëve të UÇK-së, deklaron se verifikimi i pjesëtarëve të kësaj ushtrie është duke ndodhur, por jo sipas dinamikës së paraparë. Sidoqoftë, ai ka thënë se do të kërkojë në emër të organizatës edhe nga ministri i FSK-së, Agim Çeku, i cili është edhe kryetar i komisionit verifikues, që ky proces të përshpejtohet.

Xhemajli në intervistë për gazetën Tribuna rithekson qëndrimin e OVL të UÇK-së se ata janë kundër krijimit të çfarëdo Tribunali i cili do të binte ndesh me sistemin juridik të Kosovës

Ish Ministri i Financave, Haki Shatri ka ironizuar për vendimin e Kryeministrit Hashim Thaçi që të rrisë pagat për 25 përqind.

Në një deklarim për “Zëri”, Shatri e ka quajtur Thaçin “Sulltan”, që bën ç’të dojë me “paratë e shtetit”.

“Meqë e kemi “Sulltan” dhe nuk mund të bëjë çka të dojë me para të shtetit, unë e përgëzoj kryeministrin Thaçi për këto rritje edhe pse  mendojë se është dashtë t’i rritë më shumë se kaq”.

“Meqë e kemi zhvilluar ekonomikë, hequr varfërinë, buxhetin e kemi kaq të madh pse mos me rrit paga. Bile është dashtë të i rrisë për 500 euro”, Haki Shatri, raporton “Zëri”.

Edhe Shefi i grupit parlamentar të Vetëvendosjes, Visar Ymeri, thotë se Kryeministri Thaçi nuk ka kohë që t’ja shpjegojë opinionit implikimet buxhetore që ka kjo rritje.

“Kryeministri Thaçi është tepër i zënën me faqen e tij në “Facebook” dhe nuk ka kohë t’i shpjegojë opinionit publik ndikimin në Buxhetin e Kosovës”.

Ndërkaq, zyrtarë të Ministrisë së Financave kanë deklaruar për “Zëri”, se paratë për rritjen e pagave do të sigurohen nga buxheti. Ata kanë thënë se lista përfundimtare e përfituesve të këtij vendimi nuk është bërë ende.

“Mjetet financiare për mbulimin e rritjes së pagave do të sigurohen nga buxheti i vendit për vitin 2014”.

“Aktualisht është dyke u punuar në regjistrin definitiv për përfituesit të rrritjes së pagave pas vendimit që nga kjo rritje të mos përfitojnë zyrtarët e lartë publik. Si të kryhet ky vlerësim do t’ju informojnë”, kanë thënë zyrtarë ngë Ministria e Financave për “Zëri”.

Grupi i qytetarëve aktivë “Për Prizrenin”, të enjten, ka paralajmëruar ushtrimin e një padie në Prokurorinë Themelore kundër kryetarit të Komunës, Ramadan Muja, për shkak të vendimit të tij për vetëpezullim të postit, që sipas këtyre aktivistëve paraqet shkelje të Ligjit për vetëqeverisjen lokale, shkruan sot “Koha Ditore”.

Ata kanë vlerësuar se Muja ka bërë shkeljen e radhës edhe me emërimin e ushtruesit të detyrës së kryetarit të Komunës.

“Padinë ndaj kryetarit të Komunës së Prizrenit, Ramadan Muja, e paraqesim në Prokurori për shkak se ai në kundërshtim me dispozitat e LVL-së, pasi që është shpallur fajtor nga Gjykata Themelore në Prizren, duke vepruar në cilësinë e kryetarit të Komunës, pasi ka pezulluar veten nga pozita e kryetarit, pa asnjë bazë ligjore, ka emëruar si u.d. të kryetarit të Komunës kryesuesin e KK-së, Kujtim Gashi”, ka thënë aktivisti Kastriot Jahaj.

Sipas tij, kjo është edhe një dëshmi se kryetari Muja nuk meriton të qëndrojë në këtë post, pasi që edhe pas dënimit nga gjyqësori ka vazhduar me shkelje ligjore.

Ministria e Administrimit dhe Pushtetit Lokal ende nuk e ka pranuar vendimin e kryetarit Muja për “vetëpezullim”.

Gjykatë Speciale. Ky do të jetë emri që do të mbajë mekanizmi që do t’i gjykojë ish-pjesëtarët e UÇK-së që do të mund të akuzohen si rezultat i një hetimi trevjeçar për dyshimet e ngritura në raportin e eurodeputetit Dick Marty. Shtetet kontribuuese të EULEX-it gjatë gjithë kësaj jave po diskutojnë për modalitetet që do të ketë mekanizmi gjykues, e që sipas të gjitha gjasave, nuk do të quhet Tribunal.

Heqja e këtij emri është arritur si rezultat i mbështetjes së disa shteteve të fuqishme që druajnë se krijimi i Tribunalit në formën çfarë është paraqitur me anë të një draft-statuti të hartuar nga ekspertët evropianë, do ta dëmtonte rëndë imazhin e Kosovës. Gjykata Speciale ka vazhduar të jetë temë e debatit gjatë kësaj jave, ndërkaq që ditët në vazhdim pritet të vendoset nëse emrit do t`i shtohet edhe adresa e EULEX-it.

Megjithatë, sipas një zyrtari evropian të akredituar në Kosovë, gjasat më të mëdha janë që Gjykata Speciale të mos ketë kurrfarë shtese tjetër. Një zgjidhje e tillë, sipas të njëjtit zyrtar, është kreative dhe do t’u mundësonte të gjitha palëve të interesuara që ta bëjnë interpretimin që u përshtatet, qoftë si Gjykatë Speciale e Kosovës, e BE-së, apo e EULEX-it../tribuna/

Aleanca për Ardhmërinë e Kosovës (AAK) dhe Lidhja Demokratike e Dardanisë (LDD), favorizojnë një koalicion me LDK-në për të udhëhequr me vendin.

Liderët e këtyre dy partive janë takuar sërish sot për t`u dakorduar që në zgjedhjet e ardhshme parlamentare të vazhdojnë me koalicion të përbashkët, duke e ftuar në këtë mënyrë edhe partinë tjetër në opozitë – LDK-në. Në këtë takim, lideri i AAK-së, Ramush Haradinaj tha se vendi do të duhej të shkonte në zgjedhje të parakohshme me qeveri të rrëzuar, transmeton RTK.

Formula e vitit 2004 e qeverisjes ndërmjet AAK-së dhe LDK-së do të ishte koalicioni i duhur për zgjidhjen e problemeve të qytetarëve, me të cilat, siç thuhet, po përballet Kosova. Ky konstatim doli pas takimit që zhvilloi lideri i AAK-së, Ramush Haradinaj, me Nexhat Dacin. Të dy kryetarët e partive politike thanë se pas zgjedhjeve nacionale do të ishte i mirëseardhur koalicioni AAK-LDK-LDD, ku sipas kësaj formule, Lidhjes Demokratike të Kosovës do t`i takonte posti presidentit, Ramush Haradinaj do të ishte kryeministër dhe Nexhat Daci kryetar i Kuvendit të Kosovës.

Kreu i AAK-së, Ramush Haradinaj, përsëri theksoi se në zgjedhje nacionale duhet të shkojnë me qeverinë e rrezuar, pasi sipas tij, kjo qeveri i ka shkaktuar probleme të mëdha vendit.

Të dy liderët thanë se bashkëpunimin që kanë pasur në nivel lokal si subjekte politike do ta vazhdojnë edhe pas zgjedhjeve nacionale që pritet të mbahen këtë verë.