Kryetari i LDK-së, Isa Mustafa nuk ka kaluar mirë në fshatin Korishë të Prizrenit. Ai është bojkotuar nga degët dhe mbi 20 nëndegë të tjera të LDK-së në Prizren.

Mustafa bashkë me kryetarin e LDK-së në Prizren, Eqrem Kryeziun në fshatin Korishë kanë marrë pjesë në cermonin e kalimit të anëtarëve të LDD-së në LDK. Numri i pjesëmarrësve në këtë cermoni ka qenë tepër i vogël. Përveç, përfaqësuesve të Degës së Prizrenit dhe nëndegëve të Rajonit të Korishës nuk ka marrë pjesë asnjë përfaqësues tjetër i këtij subjekti politik.

Kryetari i nëndegës së LDK-së në Korishë, Agim Muçaj pranon se numri i pjesëmarrësve në këtë takim nuk ka qenë i madh.” Nuk ka qenë fushatë zgjedhore. Ka qenë takim me rastin e kalimit të LDD-së në LDK”, tha Muçaj për “PrizrenPress”.Ai tregon se në këtë takim kanë qenë të ftuar vetëm nëndegët e LDK-së të Rajonit të Korishës.

Kryetari i Degës së LDK-së në Zhur, Shukri Vezaj konfirmon se nuk kanë qenë të ftuar nga Dega e LDK-së në Prizren, që të marrin pjesë në këtë takim në Korishë. “ Nuk kemi qenë të ftuar, prandaj cka kemi pas me lyp në atë takim kur nuk kemi pasur ftesë”, tha Vezaj.

Burimet e “PrizrenPress-it” bëjnë të ditur se bojkotimi i kryetarit Isa Mustafës nga nëndegët e LDK-së në Prizren, është bërë për shkak pakënaqësisë që është krijuar për përzgjedhjen e kandidatit për kryetar të Prizrenit.

Mbi 20 nëndegë të LDK-së në Prizren, nëpërmjet një kërkese javën e kaluar kanë kërkuar nga Isa Mustafa, që të përzgjidhet me marrëveshje kandidati për kryetar të Prizrenit. Ata propozojnë që të mbahet një Kuvend, i cili do të nxjerrë një kandidat të pakontestueshëm nga askush. “Kërkojmë edhe nga Kryesia e LDK-së në Prizren, që emërimi i kandidatit për kryetar të Prizrenit, të dalë me marrëveshje gjithëpërfshirëse duke dëgjuar edhe zëri i të gjitha nëndegëve”, thuhet në kërkesën e nëndegëve të LDK-së në Prizren, dërguar kryetarit të tyre Isa Mustafa.

Lidhja Demokratike e Kosovës (LDK) Dega në Zhur, ndërkaq ka propozuar Nijazi Ademajn për kandidat për kryetar të Prizrenit. Emri i Ademajt është dërguar edhe në Kryesi të LDK-së në Prishtinë.

Dega e LDK-së në Prizren dhe ajo në Zhur, nuk kanë arritur të gjejnë gjuhën e përbashkët në përzgjedhjen e kandidatit për kryetar të Prizrenit.

Në mungesë të gjetjes së një kandidati të përbashkët, veç e veç, i kanë dërguar propozimet e tyre në Prishtinë për kryetar të Prizrenit.

Kryetari i LDK-së, Isa Mustafa ndërkaq, nuk ka pranuar të përgjigjet për pakënaqësin që është krijuar për përzgjedhjen e kandidatit për kryetar të Prizrenit. I pyetur për krijimin e kësaj pakënaqësie, Mustafa nuk ka pranuar të përgjigjet.” Sot nuk kemi ardhur për këtë punë”, ka thënë Mustafa.

Kryetari i LDK-së në Zhur, Shukri Vezaj tha ndërkaq, se shpreson që Isa Mustafa, do të marrë seriozisht kërkesën e 22 nëndegëve të LDK-së në Prizren. “Deri më tash nuk kemi marrë përgjigje dhe as nuk jemi takuar me Isa Mustafën për këtë punë”, tha Vezaj./PrizrenPress.com/

Deputeti i Lidhjes Demokratike të Kosovës (LDK), Haki Demolli ka thënë për Telegrafin se partia e tij në parim e përkrah miratimin e Ligjit për amnistinë, por kanë kërkuar që të plotësohen tri amendamente apo tri kushte, njërin prej të cilave tanimë e ka aprovuar Qeveria. Ky ikushtu ishte që neni tre, i cili ka paraparë që një numër i madh veprave penale të kategorisë të krimeve ordinere, të hiqet në tërësi nga ligji.

“Kjo kërkesë është bërë për shkak se është vlerësuar që ky moment i miratimit të Ligjit për Amnisti nuk duhet të shfrytëzohet si moment ku do të falen personat të cilët në forma të ndryshme kanë bërë keqpërdorime dhe kanë cenuar liritë të drejtat e qytetarëve në përgjithësi”, tha Demolli për Telegrafin.

Demolli shprehet se kërkesa e dytë e LDK-së ka qenë, që amnistia mos t’i përfshijë ata persona të cilët në emër të detyrës zyrtare kanë shfrytëzuar pozitën e tyre, duke e dëmtuar sipas tij, ekonominë e Kosovës.

“Dihet fare mirë se disa individë të afërt me qeveritë e mëparshme, por edhe me qeverinë aktuale, brenda një kohe të shkurtër janë bërë milionerë. Këtyre personave nuk duhet t’iu amnistohet vepra dhe as pasuria e tyre. Në vitin e kaluar e kemi pasur kërkesën e Komisionit Evropian (KE), që të nxirret ligji për konfiskimin e pasurisë së paligjshme, në rast së këta individë do të amnistohen tash, kjo do të ishte një anomali ose njëfarë kolizioni që do ta lente ligjin pa objekt”, ka deklaruar ai për Telegrafin.

Sipas deputetit të LDK – së, kërkesa e tretë e partisë së tij, ka qenë që në mënyrë decidive të theksohet se ata të cilët kanë kryer vrasje nuk do të falen, duke shtuar se është krijuar një perceptim i tillë nga analizat të cilat i kanë dhënë ekspertët dhe shoqëria civile, në lidhje me këtë gjë.

“Ne kemi insistuar që në ligj të figuron një amendament apo të ekzistojë një amendament, ku decidivisht theksohet se nuk do te falet asnjë vepër penale kundër jetës dhe trupit, që nënkupton se ne kemi dashur t’i sigurojmë qytetarët e Kosovës, që ne si parti nuk do ta përkrahim amnisitimin e veprave penale të vrasjeve”, ka sqaruar ai.

Demolli ka theksuar se në LDK janë të vetëdijshëm se veprat e karakterit politik, të cilat janë kundër rendit kushtetues dhe kundër shtetit, sipas tij, duhet të jenë pjesë e amnistisë. Ai ka shtuar se mungesa e sovranitetit të Kosovës, rendit dhe ligjit në veri të vendit, përgjatë kësaj periudhe 14 vjeçare, e ka krijuar mundësinë që persona të caktuar të bëjnë shkelje të ligjit.

Partitë politike në Prizren ende nuk kanë arritur të gjejnë emrat e kandidatëve, që do të konkurrojnë për kryetar të Komunës . Edhe pse Presidentja, Atifeta Jahjaga ka shpallur 3 nëntorin si datë që do të mbahen zgjedhjet lokale,  asnjëra prej partive më të mëdha politike nuk po munden ta gjejnë së paku një emër të përveçëm, që do t’ia sigurojë bindshëm fitoren.

Partia më e madhe (PDK), që aktualisht qeverisë në Prizren, edhe përkundër përpjekjeve nuk ka arrit që të reformohet. Zgjedhjet e brendshme në këtë subjekt politik tashmë janë shndërruar në ‘telenovelë’. Dega e PDK-së në këtë qytet nuk ka arritur deri më sot të zgjedh as kryetarin e ri. Emri i vetëm që është lakuar nga kys subjekt politik që do të garon në zgjedhjet e lokale, ka qenë vetëm  i Edita Tahirit.

Zëvendëskryeministrja Tahiri, ndërkaq e ka mohuar se do të garojë për kryetare të Prizrenit.”Unë nuk pranojë pozita lokale”, ka thënë Tahiri.  PDK-ja në Prizren nuk ka nxjerrë asnjë emër tjetër që do të garonte në zgjedhjet e nëntorit. Përfaqësuesit e këtij subjekti politik, thonë se emrimi i kandidatit për kryetar të Prizrenit, është në dorën e liderit të tyre Hashim Thaçi.

As LDK-ja nuk ka arritur të përcaktohet për  kandidatin për kryetar të Prizrenit. Dega e LDK-së në këtë qytet ka propozuar dy emra për kryetar, atë të Eqrem Kryeziut dhe Hanifi Muharremit. Nijazi Ademaj, ndërkaq është propozuar  nga  Dega e LDK-së në Zhurë.  Mbi 20 nëndegë të këtij subjekti politik, kanë kërkuar nga lideri i tyre Isa Mustafa,  që kandidati për kryetar të Prizrenit të bëhet me marrëveshje. Këto nëndegë kanë paralajmëruar se do të bojkotojnë zgjedhjet nëse kërkesa e tyre nuk merret parasysh nga Mustafa. Sipas tyre nuk duhet të riciklohen njerëzit që i kanë humbur zgjedhjet përballë kryetarit aktual të Prizrenit, Ramadan Muja.

Emrin e kandidatit për kryetar të Prizrenit, nuk ka arritur të nxjerrë as  AAK-ja,LDD-ja  dhe  Lëvizja  Vetëvendosje!

Bashkimi Demokratik, është i vetmi subjekt politik që deri më tash ka nxjerrë emrin  për kryetar të Prizrenit. Këshilli Drejtues i BD-së,  unanimisht ka  marrë vendim që  Zafir Berisha të kandidojë për kryetar të Prizrenit. Berisha ka thënë do të dalë fitues i këtyre zgjedhjeve.  “ BD-ja do t’i fitoj bindshëm këto zgjedhje”, ka thënë  Berisha./PrizrenPress.com/

Kosova ka gjasë të riorganizojë strukturën e Gjykatës së Apelit për të përmbushur implementimin marrëveshjes me Serbinë. Pas refuzimit të kërkesës së serbëve për të pasur gjykatë të shkallës së dytë në Veri, burime të Express thonë, se po diskutohet mundësia që të themelohen degë të asaj gjykate në tërë Kosovën për të ndarë të kënaqura të dyja palët në dialog. Por, ministri i Drejtësisë Hajredin Kuçi thotë se në veri do të ketë vetëm divizion. Derisa në KGJK dhe Gjykatë të Apelit preferojnë të mos flasin fare për këtë çështje.

Normalizimi i raporteve me Serbinë ka gjasë të obligojë Kosovën edhe për riorganizim të sistemit të drejtësisë në Kosovë.

Pas lajmit se Serbia po kërkon Gjykatë të Apelit në pjesën veriore të banuar me shumicë serbe, burime të Express bëjnë të ditur se në bisedimet mes grupeve punuese për implementimin e marrëveshjes së prillit të arritur mes Kryeministrave në Bruksel, është diskutuar për themelimin e degëve të Gjykatës së Apelit nëpër qendrat e mëdha në Kosovë. Një zgjidhje e tillë, sipas një zyrtari të lartë ndërkombëtarë të përfshirë në bisedime, po shihet se e kënaqshme për të dyja palët në dialog sa i përket çështjes së gjykatave në veri.

“Themelimi i degëve të Apelit në qendrat më të mëdha në Kosovë do të krijonte kushte të favorshme për të hapur edhe degën në Veri, që është kërkesë e serbëve dhe një prej kushteve të tyre për të zbatuar marrëveshjen në tërësi”, ka thënë ky zyrtarë në kushte anonimiteti për Express. Praktikisht, legjislacioni kosovar mundëson krijimi e degëve të Gjykatave nëpër Kosovë.

Sipas Ligjit mbi gjykatat në Kosovë, respektivisht pikës 2 të nenit 8 degët themelohen brenda territorit të një Gjykate Themelore. Përderisa vetë përkufizimi “degë”, sipas ligjit nënkupton ndarjen gjeografike të një Gjykate Themelore.

Gjykata e Apelit ndërkaq, sipas nenit 17 të po të njëjtit ligj është gjykatë e shkallës së dytë, dhe me juridiksion territorial në gjithë Kosovën. “Selia e Gjykatës së Apelit është në Prishtinë”, thuhet në këtë nen.

Express ka tentuar të marrë përgjigje lidhur me këtë mundësi të riorganizimit të gjykatave nga Kryetari i këshillit gjyqësor të Kosovës, Enver Peci, i cili është edhe pjese e grupeve punuese teknike në Bruksel sa i përket çështjeve të drejtësisë.

Mirëpo, i pyetur nëse është e vërtete që pala kosovare ka pranuar të themelohen degët e Apelit, Peci ka refuzuar të flas, pavarësisht se nuk ka mohuar se një gjë e tillë është diskutuar.

“Jam në Bruksel në bisedime. Jo, jo për këto tjetër kush le të fol jo unë. Unë jam pjesë e ekipit por negociator është tjetër kush ata le të flasin për këto”, ishte përgjigja e vetme e Enver Peci.

Pjesë e Grupit punues është edhe vetë kryetari i Gjykatës së Apelit, Salih Mekaj. Zyra e informimit të Apelit ka refuzuar të jap më tepër detaje rreth kësaj çështje për Express.

Në një përgjigje me shkrim drejtuar për Express nga zyrtari për informim, Arbër Jashari thuhet vetëm se opsioni do të njoftohet me kohë për cilëndo marrëveshje të arritur në Bruksel për çështje të gjyqësorit në rrugë zyrtare.

“Gjykata e Apelit momentalisht nuk ka degë në asnjë qytet të Kosovës dhe veprimtarinë e saj e ushtron nëpërmes departamenteve të veta të cilat funksionojnë në objektin e kësaj gjykate në Prishtinë. Sa i përket çështjeve tjera që ngritin për momentin nuk mund të japim asnjë përgjigje ngase siç edhe jeni në dijeni grupi punuese kosovar( pjesë e së cilit është edhe kryetari i Gjykatës, Salih Mekaj) është duke biseduar ëndë për to më palën serbe në Bruksel. Besoj që sapo të arrihet një marrëveshje opinioni kosovar do të njoftohet më kohë, në rrugë zyrtare”, ishte përgjigja e Jasharit.

Më i prerë në përgjigjen e tij ka qenë ndërkaq Ministri i Drejtësisë Hajredin Kuçi. Ai i tha Express se çështja e Gjykatës së Apelit do të rregullohet sipas marrëveshjes së arritur në prill mes Kryeministrit Hashim Thaçi dhe atij serb, Ivica Daçiq. “Ajo punë është e kryer me marrëveshje tani vetëm implementimi është”, ka thënë Kuçi.
Marrëveshja e prillit ndërkaq, parashihet që autoritetet gjyqësore në Veri të jenë të integruara dhe të operojnë brenda kornizës ligjore të Kosovës.

Sipas pikës 10 të marrëveshjes, Gjykata e Apelit në Prishtinë do të krijojë një panel, shumica e gjykatësve të të cilit do të jenë serbë të Kosovës, për t’u marrë me të gjitha komunat me shumicë serbe në Kosovë.

“Një sektor i kësaj Gjykate të Apelit, i përbërë nga stafi administrativ dhe gjyqësor, do të qëndrojë përherë në veri të Mitrovicës (Gjykata e Qarkut në Mitrovicë). Shumica e secilit panel të sektorit të mësipërm do të përbëhet nga gjykatës serbë të Kosovës. Vendqëndrimi i gjykatësve respektivë do të varet nga natyra e rasteve në të cilat janë të përfshirë”, thuhet në pikën 11 të marrëveshjes.

Sipas Ministrit Kuçi ajo çfarë është paraparë me marrëveshje nuk mund të rinegociohet andaj në Veri nuk do të ketë degë por vetëm divizion të Apelit.

“Nuk rinegociohet marrëveshja.Do të ketë divizionashtu si është në marrëveshje”, tha Kuçi.

Divizioni i një Gjykate ndërkaq sipas Ligjit mbi Gjykata paraqet njëkomponentë të Departamentit të Përgjithshëm të një gjykate, e themeluar me qëllim të caktimit të lëndëve sipas natyrës së tyre me në mënyrë që të rritet efikasiteti i gjykatës.

Në bazë të po të njëjtit Ligj përbërja e Gjykatës së Apelit pasqyron shumëllojshmërinë etnike të Republikës së Kosovës dhe parimet ndërkombëtare të barazisë gjinore.

“Në përputhje me dispozitat relevante të Propozimit Gjithëpërfshirës për Zgjidhjen e Statusit të Kosovës dhe Kushtetutës së Republikës së Kosovës si dhe për të siguruar pjesëmarrjen e komunitetit në gjyqësor, 15 për qind e numrit të tërësishëm së ulëseve në Gjykatën e Apelit, por në asnjë rast më pak se dhjetë ulëse, janë të garantuara për gjyqtarët nga radha e komuniteteve që nuk janë shumicë në Kosovë”, thuhet në pikën 3 të nenit 17.