Glauk Konjufca ka thënë se veprimet e Lëvizjes Vetëvendosje! ditën kur është ratifikuar marrëveshja me Serbinë nuk e kanë dëmtuar imazhin e Kosovës. Sipas tij, veprimet e kësaj lëvizje janë të pallogaritshme në krahasim me dëmin që i është bërë Kosovës me këtë marrëveshje.
Konjufca ka shprehur keqardhje për çështjen e ambasadores amerikane dhe për çdo diplomatë të huaj nëse kanë pasur vështirësi atë ditë për të hyrë në Kuvend.

Konjufca ka thënë se këto vështirësi nuk janë krijuar për diplomatët, por për deputetët e koalicionit qeverisës dhe të gjithë ata që janë deklaruar se do ta votojnë marrëveshjen.

Ai ka thënë se i kanë kërkuar falje ambasadores Tracey Ann Jacobson. “Kërkimfalja ka qenë në emër të Lëvizjes Vetëvendosje! Nuk di çfarë të bëj më shumë përpos kërkimfaljes”, ka thënë Konjufca në intervistën për “Epokën e re”.

Kritikat e vendorëve dhe ndërkombëtarëve lidhur me veprimet e fundit të Vetëvendosje!-s, Konjufca i ka vlerësuar tendencë për ta zhvendosur vëmendjen karshi përmbajtjes së marrëveshjes Kosovë – Serbi.

Në këtë kontekst, Konjufca ka thënë se Lëvizja Vetëvendosje! nuk e ka dëmtuar imazhin e Kosovës. “Veprimet e Vetëvendosje!-s nuk e kanë dëmtuar imazhin e Kosovës. Imazhi i Kosovës është dëmtuar nga kjo marrëveshje e keqe dhe përkrahësit e saj”, ka thënë Konjufca, duke shtuar se Vetëvendosje! do ta kundërshtojë Projektligjin për amnistinë dhe çdo projektligj tjetër që është derivat i marrëveshjes së 19 prillit.

Ekzekutivi i Rahovecit është vetëlavdëruar për punën që ka bërë në realizimin e projekteve. Kryetari Smajl Latifi dhe drejtorët e tij, kanë vlerësuar pozitivisht të arrituart e tyre. Ata kanë raportuar edhe për punët që janë aktualisht duke u realizuar dhe për sfidat me të cilat po ballafaqohen.

Drejtori i Drejtorisë për Inspektorat Shemsi Ibrahimi, tregoi se një shtëpi banimi në rrugën “Gëzim Hamza-Piktori”, paraqet pengesë për lëvizjen e lirë të automjeteve.Ai kërkoi që pjesa e nxjerrë në pronën publike të largohet.

“Mirëpo, për shkak të mungesës së mjeteve financiare për të riaftësuar shtëpinë e banimit, pronari i shtëpisë ka kërkuar mbështetje materiale nga ne. Nëse arrijmë të sigurojmë materialin e nevojshëm ndërtimor për përshtatjen e shtëpisë, atëherë ky problem i kahershëm mund të zgjidhet. Ibrahimi po ashtu foli edhe rreth kërkesave të qytetarëve për vendosjen e pengesave në rrugë, me qëllim të rritjes së sigurisë së njerëzve në disa zona urbane”,tha Ibrahimi.

Drejtoreshë e Arsimit Besa Hoxha-Beqiri,në këtë mbledhje ka paraqitur problemin që kanë shtatë shkolla me kulme.“Gjendja nuk është aspak e mirë në këto shkolla”, tha ajo.

Sipas saj, shqetësimi më i mëdha për DKA-në është mungesa e hapësirës shkollore në shkollën e mesme “Xhelal Hajda-Toni”.“Nëse nuk është e gatshme shkolla e mesme teknike deri në shtator, atëherë do të ketë vështirësi të mëdha në këtë drejtim”, theksoi Hoxha-Beqiri. Ajo po ashtu kërkoi që të gjendet një zgjidhje për pagesën e dy pagave të mësimdhënësve që pensionohen.
Drejtori për Ekonomi dhe Zhvillim, Musa Cena, informoi se projekti përkujtimor “Maja e Shkodranit” ka ngecur dhe “nëse kompania fituese nuk arrin të përfundojë në afat punën, atëherë do të jemi të detyruar të kërkojmë ndërprerjen e kontratës”. Ai tregoi se nga kompania disa herë është kërkuar që punimet të fillojnë. “Por si duket kompania ka vështirësi serioze financiare, prandaj nuk është shprehur e gatshme të fillojë punimet”.

Drejtori i Drejtorisë për Administratë të Përgjithshme Samir Mustafa,ndërkaq informoi Latifin se nga sot nis të operojë kompania e higjienës.“Ne duhet të konsultohemi me Drejtorinë e Financave për heqjen e punëtorëve të mirëmbajtjes nga lista e pagave”.

Kryetari Smajl Latifi, kërkoi angazhim më të madh të drejtorëve për përmbylljen me sukses të disa projekteve, siç janë; “Maja e Shkodranit” , Lumi “Rimnik” , parku në Palluzhë, si dhe në të gjitha projektet të tjera kapitale. “Tenderët që ende nuk janë shpallur, duhet të publikohen sa më parë të jetë e mundur, sepse nuk mund të lejojmë që të hyjmë në sezonin e vjeshtës me projekte të papërfunduara, pasi që mund të dëmtohet cilësia e punimeve. Krahas kësaj duhet të forcohet sistemi i mbikëqyrjes, sepse nga kjo varet i tërë suksesi i projekteve”, tha Latifi.

Ai kërkoi përkushtim edhe për përgatitjen e buxhetit 2014-2016. “Pushimet e verës mund të kenë ndikimin e vet në këtë drejtim. Ne duhet të bëjmë përgatitjen e materialeve për diskutim publik, e më pas edhe në Kuvend. Kësaj çështjeje i ndihmon shumë edhe procesi i debateve me qytetarë që ne po e zhvillojmë tani e sa kohë. Ndërsa, sektori i higjienës dhe i sigurimit duhet të planifikohet në shpenzimet buxhetore për periudhën në vazhdim”, tha Latifi./PrizrenPress.com/

Si sot, 23 vjet më parë, në Prishtinë si një bombë shpërtheu Deklarata Kushtetuese e Kosovës, e njohur ndërkohë si Deklarata Kushteteuese e 2 Korrikut, e cila do t’i paraprij Kushtetutës së Kaçanikut, që do të shpallte pavarësinë e vendit, e cila do të realizohej kati dy dekada më vonë.

Kosova e trazuar më 2 korrik kishte drejtuar sytë nga Prishtina, Kuvendi e delegatët shqiptarë, siç quheshin atëherë deputetët, me shpresën se do të mund ta shpëtonte nga turri gllabërues i Beogradit, që kishte vënë në shënjestër gjithë ç’ishte arritur me dekada. Aspiratat serbe ishin tashmë të hapëta, dhe ato nuk ishin të drejtuara vetëm ndaj Kosovës. Sllovenia e Kroacia ishin më të guximshme në kundërshtimet e tyre ndaj këtyre synimeve të Beogradit, por rezistenca nuk mungoi as në Kosovë. T’i kujtojmë protestat masive më 1988 e 1989, grevën e urisë së minatorëve, Apelin 214 të intelektualëve dhe dhjetëra grupe të rinjsh, që për këto arsye vuanin burgjeve anekënd Jugosllavisë së atëhershme.

Tashmë ishin formuar edhe parti politike shqiptare, alternative të partive deri atëherë me atribute e programe socialiste e tash me programe kombëtare, ishin formuar edhe organizata joqeveritare. Akademia e Shkencave dhe e Arteve të Kosovës ishte zgjuar dhe po bënte punën si është më mirë në hapjen e horizonte politike. Akademiku. tash i ndjerë, Gazmend Zajmi hartoi një dokument gjashtë pikësh, që do ta pagëzojë Deklarata Kushtetuese, me të cilën bënte shtratin juridik historik të pavarësisë së Kosovës. Delegatët, të cilëve u ishin mbyllur dyert e Kuvendit për aktivitete, nëpër shtëpitë e tyre e analizuan Deklaratën dhe më 2 korrik të vitit 1990, kur forcat e policisë i penguan të futeshin brenda, u ndalën para hyrjes dhe në mënyrë lapidare lexuan tekstin, që do të shqetësonte Beogradin e do të gëzonte shqiptarët. Mbahen në mend skenat para portave të Kuvendit, kur 111 delegatë jo serbë të Kuvendit të Kosovës, të drejtuar nga Bujar Gjurgjiala, përshëndetën me duartrokitje tekstin e Deklaratës, që e lexoi delegati Muharrem Shabani.

Kishte edhe vëzhgues ndërkombëtarë, të cilët i kishte ftuar Këshilli për Mbrojtjen e të Drejtave të Njeriut. Të gjithë që kanë parë regjistrimet televizive të TV Prishtinës atëherë mbajnë në mend Eva Brendlin e verbër me qenin e saj, e shoqëruar nga milicët, duke e larguar nga vendi ku po zhvillohej historia.

Tri ditë më vonë Beogradi me veprime kundërkushteteuese do të merrte institucionet e pushtetit në Kosovë, do të ndalte “Rilindjen” dhe Radio-Televizionin e Prishtinës. Disa nga delegatët do të ndiqeshin penalisht.

Historia pastaj do të shënojë dëbimin e shqiptarëve nga puna dhe rezistencën e tyre fillimisht paqësore, e pastaj me armë, për t’u kurorëzuar me luftën, ndërhyrjen e forcave ndërkombëtare dhe shpalljen e pavarësisë definitive më 17 Shkurt të vitit 2008./Koha/

Pavarësisht dëshmive për djegie të trupave të shqiptarëve në shkritoret të ndryshme në Serbi, gjatë luftës në Kosovë, Komisioni qeveritar për të pagjeturit në Kosovë nuk ka kërkuar mbajtjen e një takimi me Komisionin e Serbisë për të biseduar në lidhje me këtë çështje.

Mungesa e një iniciative të tillë, nga përfaqësuesit e Kosovës, arsyetohet me hetimet që janë duke u bërë në lidhje me vërtetësinë e dëshmive të dhëna për djegien e trupave në Serbi.

Mirëpo, burime te gazetës Tribuna bëjnë të ditur se hezitimi i anëtarëve të këtij komisioni për të thirrur komision është bërë për shkak të presioneve që mos të ndërmerret një veprim i tillë, për shkak të frikës se mund të ndikojë në dialogun që po zhvillohet në Bruksel në mes të Kosovës dhe Serbisë në nivel kryeministrash.

Kosovarët kanë nisur sezonin e dasmave që kryesisht zgjat përgjatë muajve korrik e gusht. Me ardhjen e mërgimtarëve shtohen edhe ahengjet familjare.

Bashkë me vallet, kërcet edhe pushka, plumbat e të cilave, shpesh plagosin edhe dasmorë. Vitin e kaluar Policia e Kosovës ka regjistruar numër të madh konfiskimesh të armëve të përdorura në këto ahengje, pavarësisht fushatave vetëdijesuese. Sipas të dhënave zyrtare, edhe këtë vit situata nuk pritet të jetë më ndryshe,shkruan Tribuna.

Vetëm të dielën, më 30 qershor, në rajonin e Prishtinës janë konfiskuar shtatë armë të llojeve të ndryshme, duke filluar me AK-47 e përfunduar me pistoleta të kalibrave më të vegjël

Ministri i Jashtëm suedez, Carl Bildt sot viziton Kosovën, ku pritet të takohet me krerët më të lartë shtetëror.

Vizita e tij ndodh pasi Bashkimi Evropian ka marrë vendim për hapjen e negociatave për Marrëveshjen e Stabilizim Asociimit me Kosovën.

Bildt dje ka vizituar Serbinë ku ka thënë se hapja e negociatave për anëtarësimin e Serbisë në Bashkimin Evropian nuk nënkupton se problemet do të zgjidhen vetë, por ky proces hap një varg mundësish të rëndësishme për Serbinë.