Analisti Ardian Arifaj mendon se prezenca e shtuar e pakicave në Kuvendin e Kosovës nuk i pengon proceset politike në vend dhe thotë se këtë gjë nuk duhet parë si rrezik. Ai pohon se Kosova ende ka nevojë për masa afirmative për komunitetet jo-shumicë.

Deputetët e pakicave, gjatë një takimi të zhvilluar ditë më parë me Ambasadorët e shteteve të BE’së, kanë prezantuar platformën e tyre, në mënyrë që të sigurohet një mbështetje nga përfaqësuesit politikë të shumicës, për propozimin e ndryshimeve kushtetuese, që do t’i siguronte komunitetit jo-shumicë edhe dy mandate për ulëset e rezervuara në Kuvend.

Ministri i Punës dhe i Mirëqenies Sociale, Nenad Rasic, ndërkohë, ka deklaruar se kanë marrë përkrahjen e shumicës së partive politike në Kuvend për vazhdimin e mandatit për ulëset e rezervuara, me përjashtim të Lëvizjes Vetëvendosje.

Me futjen në skenën politike kosovare të subjektit politikë “Lista Serbe”, që ka mbështetjen e Qeverisë së Serbisë, pritet që numri i deputetëve të komunitetit serbë në Kuvendin e Kosovës të rritet pas zgjedhjeve të përgjithshme.

Analisti Ardian Arifaj, në një prononcim për lajmi.net, ka deklaruar se prezenca e shtuar e deputetëve të komunitetit serb në Kuvend nuk paraqet ndonjë rrezik për proceset politike.

“Nuk duhet të shikohet si rrezik. Ne po gabojmë, çdo gjë që lidhet me komunitetet tjera joshqiptare, po e shohim si kërcënim për komunitetin shqiptar. Ne jemi ata që jemi shumicë, nuk jemi pakicë. Të tjerët frikësohen prej nesh. Ne nuk duhet të frikësohemi prej të tjerëve”.

Ai thotë se rritja e deputetëve nga partitë e udhëhequra nga pjesëtarë të komuniteteve pakicë nuk mund të pengojë asgjë.

“Nuk paraqesin problem. As nëse hyjnë në koalicion. Askund nuk shkruan në ligj që të lidhësh me dikë koalicion”.

“Po ashtu, nuk mundet kurrë opozita me qenë aq e rrezikshme. Nuk ka opozitë të rrezikshme, pa marrë parasysh se kush e përbën atë opozitë”.

Arifaj, madje, mendon se komuniteti shqiptar duhet të bëjë më shumë që t’i bindë komunitetet jo-shumicë se kanë një trajtim të barabartë.

“Kosova ende ka nevojë për masa afirmative për komunitetet jo-shumicë, sepse shoqëria shumicë ende nuk i ka bindur komunitetet e tjera që trajtohen njësoj, barabartë, dhe që nuk kanë më nevojë për masa afirmative”.

“Kjo gjë vlen edhe për institucionet.”

“Normalisht, duhet të ketë garanci shtesë nga komuniteti shumicë, dhe njëra prej tyre është kjo masa afirmative, që mundëson edhe dy mandate në këtë rast për e ulëse të rezervuara”.

Në rrugë Rashkë – Leposaviq sonte është normalizuar trafiku në afërsi të vendkalimit Jarinë, pasi që ndërmarrësit e pakënaqur nga veriu i Kosovës u shpërndanë, njoftojnë medie të Beogradit.

Ata në mesditë e kishin bllokuar trafikun për kamionë meqë nuk pajtoheshin me fillimin e pagimit të taksës doganore. Si pasojë u krijua një kolonë e gjatë e kamionëve me mallra në të dy anët e kufirit.

Trafiku u normalizua pas orë 18.

Policia e Kosovës, EULEX dhe KFOR nuk kishin ndërhyrë kundër ndërmarrësve.

Nuk njoftohet nëse ka vazhduar edhe gjatë mbrëmjes pagesa e taksës doganore në këtë pikë kufitare.

Lajmi për gjetjen e mbetjeve mortore në Rudnicë të Rashkës nuk i ka entuziazmuar shumë banorët e Krushës së Vogël. Fshati, në të cilin ishin vrarë 113 persona, ende nuk di për fatin e 86 banorëve, të cilët ende rezultojnë të pagjetur.

Gani Zylfiu, nga shoqata e të pagjeturve, ka pak shpresë që dikush nga Krusha të gjendet në Rashkë, por i vjen mirë që, të paktën, familje të shumta do të përfundojnë pritjen e stërzgjatur. Për masakrën në Krushë të Vogël, të ndodhur në ditët e fundit të marsit të vitit 1999, EULEX-i kishte hapur hetimet vitin e kaluar, ndërsa banorët janë në pritje të rezultateve. Për gjetjet e mbetjeve në komunën e Rashkës, e para lajmin e kishte marrë gruaja-simbol i kërkesës së vazhdueshme për të zbardhur fatin e të pagjeturve të luftës, Nysrete Kumnova, transmeton KTV.

Ajo e ka vlerësuar si një lajm të rëndësishëm, që mund t’i hapë rrugë ndriçimit të fatit edhe të personave të tjerë, derisa shton se qeveria, në asnjë rast nuk ka bërë presion të mjaftueshëm te autoritetet serbe për këtë gjë. Kosova, nga lufta e fundit, ka edhe mbi 1700 persona të pagjetur, ndërsa në Rudnicë të Rashkës, besohet se mund të merret vesh për 250 deri në 400 viktima.

Kryetari i LDK-së në Prizren, Eqrem Kryeziu, ka mbledhur Kryesinë, për të analizuar humbjen e zgjedhjeve të fundit në këtë qytet.Ai bashkë me anëtarët e Kryesisë, kanë vlerësuar se LDK-ja i ka humbur zgjedhjet për shkak të garës së pabarabartë, që ka zhvilluar me PDK-në.  “Gara për kryetar të Komunës së Prizrenit ishte një garë e kandidatit të LDK-së me Qeverinë e Republikës së Kosovës, milionave të saj si dhe koalicioni i rivalit me të gjitha komunitetet që në Komunën e Prizrenit i kanë rreth 11 mijë vota, që në start”. Kryeziu ka falënderuar votuesit dhe aktivistët për angazhimin që kanë treguar gjatë zgjedhjeve.

Shumica e anëtarëve të Kryesisë ishin të pajtimit që gara zgjedhore ka qenë e pabarabartë.

Në këtë mbledhje është paraqitur edhe një kronologji e të gjitha aktiviteteve.
Kryesia e LDK-së në Prizren, po ashtu u pajtua në parim që të ketë një strukturim të strukturave të LDK-së nëpër nëndegët, ku gjatë këtij procesi ka çaluar aktiviteti.

“Dega e LDK-së vlerëson se dinamika e aktivitetit duhet të vazhdojë me intensitet të shtuar si në kryesinë e degës, ashtu edhe në kryesitë e nëndegëve për mobilizim të përbashkët në përgatitjet për zgjedhjet nacionale, që do të mbahen vitin e ardhshëm”/PrizrenPress.com/

Projektligji për Sigurime Shëndetësore, parasheh themelimin e Fondit për Sigurime Shëndetësore, i cili vlerësohet si një prej shtyllave të ardhshme të sistemit shëndetësor të vendit.

Sipas projektligjit Agjensioni i Financimit Shëndetësor është agjencion ekzekutiv nën autoritetin e Ministrisë së Shëndetësisë, para-ardhës i Fondit publik të Kosovës për sigurime shëndetësore, që në emër të shtetit realizon të drejtat, obligimet, përgjegjësitë, dhe autorizimet përkitazi me kontraktimin dhe blerjen e shërbimeve të kujdesit shëndetësor nga institucionet shëndetësore në të gjitha format e pronësisë, si edhe grumbullimin e të gjitha mjeteve financiare të Fondit për këtë qëllim, deri në themelimin e Fondit me këtë Ligj.

Ministri i Shëndetësisë, Ferid Agani, paralajmëron se ky agjencion do të fuqizohet gjatë vitit 2014 me kuadro, me rregullativën e domosdoshme ligjore dhe me aktet normative të nevojshme për funksionimin të agjencionit.

“Do ta trajnojmë kuadrin së bashku me Bankën Botërore e cila e ka nda një fond prej 25.6 milion dollarëve për mbështetjen e Fondit për Sigurime shëndetësore në Kosovë, dhe të reformës së përgjithshme të shëndetësisë kosovare. Po ashtu, Qeveria Zvicerane ka ndarë 8 milion franga për këtë reformë, edhe për themelimin e këtij fondi, po ashtu edhe Qeveria e Luksenburgut 6 milion euro për katër vitet e fundit për sistemin e informimit shëndetësorë”, thotë ministri Agani, transmeton Kosovapress.

Detyrat e fondit, sipas projektligjit do të jenë zbatimi i politikave për përmirësimin e gjendjes shëndetësore dhe mbrojtjes nga rreziku financiar i popullatës, të përcaktuara nga Ministria e Shëndetësisë; të sigurojë zbatimin e të drejtave të siguruarve në pajtim me ligjin; të organizojë administratë profesionale që siguron zbatimin efikas dhe efektiv të të drejtave dhe obligimeve nga sigurimi shëndetësor i obligueshëm; të propozojë për miratim në Bordin Mbikëqyrës: premiumet, bashkë-pagesat, bashkë-sigurimin, pagesat shtesë, dhe mjetet e tjera financiare për sigurimin shëndetësor të obligueshëm; të sigurojë grumbullimin efikas dhe transparent të mjeteve financiare për sigurimin shëndetësor të obligueshëm, në pajtim me këtë Ligj; të përcaktojë kushtet e kontratës me institucionet shëndetësore për shërbimet e kujdesit shëndetësor themelor përfshirë standardet e cilësisë që duhet të përmbushen; të negocioj ë dhe kontrakton shërbimet e kujdesit shëndetësor themelor, përfshirë kushtet për ofrimin dhe kompensimin e shërbimeve cilësore shëndetësore që qojnë në produktivitet të shtuar dhe performancë më të lartë;

Procesit të formimit të Fondit për Sigurime Shëndetësore do t’i ndihmojë edhe Banka Botërore më afërsisht 20 milion euro, përmes së cilës shefi i BB në Prishtinë, Jan Peter Olters, vlerëson se do të ndihmojë në zbatimin e ligjit në këtë fushë.

“Ne po diskutojmë me ministrinë për disa hapa për të përmirësuar situatën në sektorin e shëndetësisë. Kemi parashikuar një ndihmë afërsisht 20 milion euro në këtë fushë. Në këtë moment plani është që do të prezantojmë projektin në bord në maj të vitit 2014”, deklaron ai.

Kurse, Ibrahim Rexhepi, ekonomist, vlerëson se Fondi për Sigurime Shëndetësore është i domosdoshëm, dhe se çështja e krijimi të këtij fondi është i vonuar, përkundër implikimeve buxhetore që mund të ketë.

“Së pari iu mundëson njerëzve të kenë një tretman mjekësor me kosto shumë më të lirë por edhe përmes fondit për sigurime mund të insistohet për një rregull një rend më të madh në sektorin e mjekësisë. Atëherë domosdoshmërisht të gjitha institucionet shëndetësore qoftë të sektorit privat, qoftë të sektorit publik duhet të jenë të licencuara, duhet të jenë të evidentuara nëse donë që të përfitojnë nga ky fond”, shprehet Rexhepi.

Detyra tjera që parashihen me këtë projektligj për fondin janë mbështetja e institucioneve shëndetësore në ngritjen e kapaciteteve administrative të domosdoshme për zbatimin e kontratave; Zbatimi kompensimin efektiv dhe me kohë të shërbimeve të kujdesit themelor shëndetësor të ofruara nga institucionet e kujdesit shëndetësor, bazuar në kontrata; Shqyrtimi dhe propozimi për Bordin Mbikëqyrës, çmimoren e shërbimeve të kujdesit shëndetësor themelor; Mbikëqyrja e zbatimit e të gjitha kontratave të lidhura nga Fondi dhe raporton përkitazi me to; Organizimi dhe zbatimi i sistemit të informimit për sigurime të obligueshme shëndetësore në kuadër të sistemit unik të informimit shëndetësor; Kërkimi dhe shfrytëzimi i vlerësimit profesional të punës së institucioneve shëndetësore nga institucionet e autorizuara; Rregullimi i çështjeve tjera përkitazi me sigurimin shëndetësor në pajtim me aktet ligjore në fuqi; Kërkon auditim të jashtëm financiar të institucioneve shëndetësore që janë në marrëdhënie kontraktuale me Fondin.

Aktualisht në Kosovë sigurimi shëndetësor mundësohet vetëm përmes kompanive private të sigurimeve, dhe në uebsajtin zyrtarë të Agjensionit për Regjistrimit e Biznese në Kosovë, figurojnë 39 biznese që aktivitet kryesor kanë sigurimin e jetesës./KP/