Ministri i Punëve të Brendshme, Bajram Rexhepi priti në takim drejtorin e përgjithshëm të Zyrës së Emigracionit në Belgjikë, Freddy Roosemont dhe këshilltaren e kësaj zyre, Katy Verzelen. Në këtë takim u diskutua për rritjen e numrit të qytetarëve të Republikës së Kosovës, që paraqiten si azilkërkues në shtetin e Belgjikës.

Me këtë rast, u tha se bashkëpunimi në mes të dyja vendeve në çështjen e kthimit, në bazë të Marrëveshjes për ri-pranim është duke funksionuar në mënyrë të duhur. Megjithatë, ministri Rexhepi theksoi se është shqetësim real rritja e numrit të azilkërkuesve në Belgjikë.

”Është shqetësues numri i madh i atyre që janë të manipuluar qoftë nga krimi i organizuar ose nga agjencitë turistike. Çdonjëri që kërkon azil, e merr refuzimin dhe kthehet”, tha ministri Rexhepi, transmeton RTK.

Gjatë këtij takimi, të dyja palët u pajtuan që bashkërisht të kërkohen format për zvogëlimin e numrit të azilkërkuesve për në Belgjikë dhe të punohet në promovimin e migrimit legal-qarkor.

Drejtori i përgjithshëm të Zyrës së Emigracionit në Belgjikë, Freddy Roosemont, tha se Republika e Kosovës është në listën e vendeve të sigurta dhe me një procedurë shumë të përshpejtuar, brenda 15 ditësh, pothuajse të gjithë kërkuesit kthehen në vendet e tyre.

“Qeveria e Republikës së Kosovës dhe ajo e Belgjikës po punojnë në zvogëlimin e numrit të personave që vijnë në Belgjikë me një shpresë që nuk është reale”, tha Roosemont.

Të dyja palët u pajtuan në nevojën e informimit të opinionit mbi gjendjen reale të azilkërkuesve. Ministri Rexhepi shprehu falënderimin për mediat në punën e tyre në këtë drejtim. Në këtë takim u tha se për në shtetin e Belgjikës mund të udhëtohet vetëm duke gjetur format e migrimit legal.

Lëvizja Vetëvendosje! në Prizren, vlerësoi se hapja e konkursit nga Drejtoria për Arsim në Prizren për drejtorë të shkollave, në prag të zgjedhjeve lokale, paraqet abuzim të pushtetit nga PDK-ja.

Kryetari i VV-së në Prizren, Arbër Rexhaj tha se veprimi i tillë në prag të zgjedhjeve lokale hyn në funksion të shpërdorimit të sektorëve të Kuvendit Komunal, me qëllim të riciklimit të militantëve partiakë në pozita të drejtorëve.

“Meqë me vendim të KQZ-së drejtorëve të shkollave iu është përcaktuar detyra e menaxherit të qendrave votuese në kohë zgjedhjesh, zgjedhja dhe rizgjedhja e personelit partiak po bëhet më qëllim të kapjes së këtyre pozitave nëpërmjet vendimeve administrative komunale. Të emëruar si drejtorë të shkollave në komunën e Prizrenit tradicionalisht kanë qenë pjesëtarë të strukturave partiake të PDK-së”, tha Rexhaj.

Drejtoritë komunale,sipas tij, tashmë nuk janë komunale. “Ato janë shenduar plotësisht në komisione partiake të PDK-së, përmes të cilave po bëhet mirëmbajtja e pushtetit të saj. Pushteti tashmë nuk është i qytetarëve. Ai është tëhuajsuar në dobi të interesave klanore dhe meskine të njerëzve që nuk ngopen dot. Andaj vetëm një vullnet i përbashkët gjithëqytetar mund ta çrrënjosë përfundimisht këtë qeverisje të padrejtë, soji i të cilës nuk është hasur që nga koha e aparteidit të paraluftës”, tha Rexhaj.

Sipas tij, shumë persona që ushtrojnë funksionin e drejtorëve të shkollave, nuk janë vetëm anëtarë të thjeshtë, por persona me funksione të larta partiake. /PrizrenPress.com/

• Ismet Buduri, drejtor i shkollës “Xhevat Berisha”, delegat i Këshillit të Përgjithshëm PDK-së
• Simir Krasniqi, drejtor i shkollës “Luciano Matroni”, delegat i Këshillit te Përgjithshëm të PDK-së
• Haki Gajraku, drejtor i shkollës “Abdyl Frasheri”, delegat i Këshillit te Degës te PDK-së
• Besim Hajdari, drejtor i shkollës “Besim Nrecaj”, delegat i Këshillit të Degës, si dhe kryetar i PDK-se nëndegën e Malësisë në Prizren
• Merita Mazrreku, drejt. e shkollës “Luigj Gurakuqi”, delegate e Degës së PDK-se në Prizren
• Hilmi Rexhaj, drejtor i shkollës “Haziz Tolaj”, delegat i këshillit të PDK-se në Prizren
• Hazer Shala, drejtor i shkollës “Idriz Seferi”, delegat i këshillit te PDK-së në Prizren
• Nue Qollaku, drejtor i shkollës “Zef Lush Marku”, delegat i këshillit te PDK-së në Prizren
• Shaip Buduri, drejtor i shkollës “Gjon Buzuku”, anëtarë i kryesisë , si dhe delegat në Këshillin e Përgjithshëm të PDK-së

Kosova po ballafaqohet për herë të dytë brenda 24 vitesh me problemin masiv të largimit të të rinjve nga Kosova. Derisa nga viti 1989 e deri në vitin 1999 migrimi ishte pasojë e aparatit represiv të pushtetit të huaj në Kosovë, sot largimi nga Kosova është produkt i pushtetit, si pasojë e politikës së dështuar ekonomike.
Kështu u tha në konferencën për media të Vetëvendosjes.

“Sot në Kosovë jetojnë rreth 141 000 qytetarë me ndihma sociale, me nga 49 cent, ndërsa një pjesë e tyre me 34 cent në ditë. Radhitja e Kosovës në listën e 9 vendeve me mizerien më të madhe në botë dhe papunësia në lartësinë prej 45 % flasin për një gjendje alarmante para së cilës, përveç Qeverisë së Kosovës, nuk mund t’i mbyll sytë askush. Dhe kjo nuk është e habitshme pasi që kjo qeveri mandatin për ndërtimin e shtetit ia ka deleguar ambasadave në Prishtinë, ndërsa mandatin për përkujdesje sociale po e deponon tek taksapaguesit evropianë”, tha Faton Topalli nga Vetëvendosje.

Kosova është vendi me numrin më të madh të të rinjve, në rajon edhe në Evropë. Mosha mesatare e meshkujve në Kosovë është 23.3 vjet, ndërsa e femrave, 23.4 vjet. Sipas VV-së, nëntëdhjetë për qind e të rinjve në Kosovë janë të papunë, ndërsa armata e të papunëve rritet çdo ditë.

“Varfëria që ka përfshirë rreth 63% të popullsisë në Kosovë, mungesa e vendeve të reja të punës dhe arsimi i dobët janë shkaktarët kryesorë të migrimit masiv të të rinjve nga Kosova. Të ballafaquar me problemin e mbijetesës, varfërisë, mungesës së vendeve të punës, hapësirës të ngushta të banimit, arsimit të dobët dhe jo adekuat, ata kanë mbetur thjeshtë pa asnjë perspektivë në vendin e tyre”, tha ai.

Sipas tij, kryeministri i Kosovës po përpiqet që problemin e migrimit masiv të të rinjve ta zgjedh me masa policore. “Si duket kjo është e vetja metodë që ai dhe stafi i tij e njohin për të reaguar ndaj problemeve”, tha ai.

Ndërkaq, Dardan Sejdiu tha se duke pas parasysh tregun e punës në shumicën e vendeve të Bashkësisë Evropiane, dënimet e larta ndaj ndërmarrjeve ekonomike nëse ato punësojnë punonjës ilegalë dhe mungesën e bazës ligjore për tu vendosur legalisht në këto vende, del që çfarëdo përpjekje për të migruar përfundon me shpenzime të larta, borxhe, mund dhe zhgënjim.

“Emigracioni, ikja masive, e qytetarëve të Republikës së Kosovës e cili po shihet dhe shpërfaqet tani më qartazi është pasojë e një politike të dështuar, tash më 15 vjeçare. Për 15 vite çdo qeverisje ka dështuar të ndërtojë një vend i cili krijon mundësi, vende pune, mirëqenie dhe prosperitet. Përkundrazi për këto 15 vite, secila qeveri, e posaçërisht shpejtësia me të cilën qeverisjet e fundit kanë degraduar dhe shkartuar potencialin zhvillimor të Kosovës kanë krijuar ndjenjën e pafuqisë dhe po vazhdojnë luftën e tyre për të humbur shpresën qytetarët për një jetë të mirë dhe normale në Kosovë”, tha ndër të tjera Sejdiu.

Shefit të grupit të këshilltarëve të LDK-së në Kuvedin e komunës së Prizrenit, Haziz Hodaj, i cili në LDK dhe në organin më te lartë komunal është përfaqësues nga fshati Gjonaj, i kanë dalë “telashe” për shkak të pjesëmarrës së tij në pritjen që banorët e Hasit, pra edhe të fshatit Gjonaj ia bënë fundjavën që shkoi kryeminstrit të Kosovës, Hashim Thaçit, kur me disa bashkëpunëtorë të tij erdhi në këtë zonë për t’iu uruar hasjanëve dy komunat e reja, një në Rogovë dhe tjetra në Gjonaj.

Bashkëpartiakë të Hodajt kanë thënë se ai nuk ka qenë dashtë të merrte pjesë në një ceremoni dhe pritje aq solemne për kryetarin e PDK-së,për fatin se kjo vizitë kishte qëllime fushate, kurse në një të përditshme, përmes një shkrimi, Hodajt i është bë edhe pyetja “Je me ne, apo me arushën ?” Që ti jep arsyet dhe sqarimet e tija pse edhe ai, si kuadër i LDK-së ishte në këtë pritje ku edhe e morri fjalën, Hodaj ka botuar në faqen e tij të Facebook-ut tërë tekstin e fjalës së tij në këtë takim me kryeministrin Thaçi, kurse në interesimin e “Zërit” që ta sqaroi pjesëmarrjen dhe fjalimin e tij në këtë takim, Hodaj të martën ka theksuar se Hashim Thaçin në Gjonaj e ka pritë si kryeministër të Kosovës, e asesi si kryetar të një partie politike.

“Unë jam përfaqësuesi i fshatit Gjonaj, jam ai që kam kërkuar komunë edhe njëherë, ndërsa ai është kryemnistër i vendit. Në këtë relacion kanë qenë të gjitha kontaktet. Ju e keni edhe fjalen time të botuar për këtë rast në facebook. Natyrisht që ai ka ardhur me e përuru komunën e re në Gjonaj dhe kam qenë i obliguar që ta falënderoj për refleksionin pozitiv që e ka pas ndaj kërkesës sonë. Kjo ka qenë e tëra”, ka thënë Hodaj duke shtuar se edhe ai ka kërkuar themelimin e komunës në Gjonaj,por siç thitë ai, pa i shkel ligjet përkatëse, pa e shkel Kushtetuten.

Kuvendari i LDK-së në KK-në e Prizrenit, Haziz Hodaj, ka pohuar se njëherë ka qenë në shënjestër të PDK-së në lokalitetin e Hasit, kurse pastaj kanë pasuar edhe goditjet nga ithtarët e LDK-së. “Të gjtha këto unë i marr të natyrshme,sepse edhe unë unë jam njeri publik dhe shpresoj se e kam krijuar një imunitet edhe ndaj këtyre goditjeve që nuk janë të rralla dhe nuk janë pa një qëllim”, ka thënë për “Zërin” Hodaj, i cili në pyetjen tonë se mos për këtë çështje kishte ndonjë vërejtje edhe nga qendra e LDK-së, ka theksuar se deri më tash, pos disa fjalëve të thëna shkarazi, për këtë rast askush nuk i ka thënë asgjë.

Një koleg i tij partiak, me të cilin Hodaj vazhdimisht ulet afër nëpër seancat e KK-së, Xhavit Ukaj, përmend Fcebook ia ka tërhequr vërejtjen menjëherë për pritjen që ia ka bë Thaçit në Gjonaj. “Pritja nga ana juaj e tepërt, sikur të ishte një kryeministër i LDK-së”, ka shkruar Ukaj duke rikujtuar se kryeministri i Kosoves ka qenë edhe fshatin Piranë dy herë për korrje, por asnjëherë nuk i është bërë një pritje e tillë për shkak se ai edhe fushatën e korrjeve e ka përdor për fushatë zgjedhore dhe nuk do ta presim edhe poqëse Piranes ia jep edhe Republikën e jo se jo komunën, e cila po iu ipet vetëm për hir të fushatës zgjedhore”, i ka shkuar Uka kilegut të tij, Haziz Hodajt.

Një ditë pas nënshkrimit të binjakëzimit, Lilburni dhe Suhareka, kanë filluar aktivitetet për jetësimin e synimeve të përbashkëta në lëminë e arsimit dhe kultures në mes të këtyre dy qyteteve.

Delegacioni nga Suhareka në përbërje kryetari i Komunës, Blerim Kuçi, Fadil Elshani, drejtor i Gjimnazit “Jeta e re”, Pal Baftiaj, përfaqësues i Caritasit, Bedri Berisha, profesor i Gjuhës Angleze dhe Berat Gegaj, drejtor i OJQ Kosovo Parneters, fillimisht u takua me drejtues të shkollës së mesme “Providence Academy”në Lilburn.

Në këtë takim ata kanë diskutuar për fillimin e bashkëpunimit për regjistrimin e nxënësve të Suharekës, për një muaj studim dhe për mbështetjen e programit nga të gjitha palët e përfshira: Komuna e Suharekës, Qyteti i Lilburn-it, OJQ “Kosovo Partners” dhe komuniteti i Grace-it.

Kryetari Kuçi dhe kryetari Crist, kanë zhvilluar një takim shumë të frytshëm me presidentin e “Kolegjit Gëinnet” dr. Anthony Pinter, ku me këtë rast kryetarëve i’u konfirmua regjistrimi i dy nxënësve të Suharekës për vijimin e studimeve të plota në këtë kolegj me kushte lehtësuese dhe shumë të favorshme.

Nxënësit të cilët do të vijojnë këto studime janë: Joni Elshani dhe Flurim Aliu. Poashtu, Dr. Pinter dhe dy kryetaret diskutuan rreth mundësive të bashkëpunimit në të ardhmen në fushën kulturore/arsimore në mes Gjimnazin “Jeta e re” dhe “Kolegjit Gëinnet”, përmes programeve një mujore dhe një vjeçare të shkëmbimit të studenteve në mes të dy institucioneve tona shkollore. Në ndërkohë kryetari Kuçi e ftoi dr. Anthony Pinter dhe përfaqësuesit të “Kolegjit Gëinnet” për të vizituar komunën e Suharekës./PrizrenPress.com./