Në prag të Ditës Ndërkombëtare të Vullnetarizmit, të rinjtë e Malishevës, përmes një konference dhe prezantimit të një pyetësori, e kanë shënuar këtë datë, ku u tha se vullnetarizmi, është një vlerë e madhe e shoqërisë, që ndikon edhe në zhvillimin e përgjithshëm të një vendi. Në këtë takim, mori pjesë edhe Kryetari i Malishevës, Ragip Begaj, zyrtari i lartë për demokratizimin në misionin e OSBE-së në Kosovë, George Katcharava, drejtori i departamentit të rinisë në MKRS, z. Xhevat Bajrami, drejtoresha për Kulturë, Rini dhe Sport, znj.Blerta Krasniqi, përfaqësues të shoqërisë civile në Malishevë dhe të rinj nga organizatat rinore në Malishevë.
Në fjalën e rastit, kryetari i Malishevës, Ragip Begaj, tha se “vullnetarizmi është shprehi tek ne, pasi edhe në të kaluarën, ne si popull e kemi dëshmuar këtë” dhe më pas, ai e mori si shembull, ndërtimin e shkollave.
“Duke parë rëndësinë e shkollimit dhe duke parë që ish sistemi, nuk investonte në ndërtimin e shkollave, atëherë ne vet i kemi ndërtuar ato”, tha Begaj. “Promovimin e vullnetarizmit, më së miri mund ta bëni ju të rinjtë, ndërsa puna vullnetare, e ndihmon njerëzimin në përgjithësi”, tha kryetari Begaj.
Ndërsa, zyrtari lartë për demokratizimin në OSBE, z.Katcharava, vullnetarizmin e quajti “vlerë për njerëzimin”. Duke folur për rininë, me theks të veçantë rininë e Malishevës, zyrtari i OSBE-së, tha se “duke u bazuar në raportet e ndryshme dhe në punën që bëhet, Malisheva e ka rininë më të mirë në rajon”.
Drejtori i departamenti të rinisë në MKRS, z.Xhevat Bajrami, në fjalën rastit, pasi i uroi të gjithë vullnetarët e rinj, foli për përkushtimin e kësaj ministrie në fuqizimin e vullnetarizmit dhe të vullnetarëve. “Ne do të punojmë dhe do të jemi kontributdhënës për njohjen zyrtare të punës vullnetare”, tha Bajrami.
“Rreth gjashtëdhjetë për qind të popullatës së Malishevës, e përbëjnë të rinjtë dhe kjo neve na obligon që të punojmë më shumë”, tha drejtoresha e Drejtorisë për Kulturë, Rini dhe Sport në Malishevë, znj.Blerta Krasniqi, e cila më pas foli për angazhimet komunës në ndërtimin e infrastrukturës për rini, duke përfshi rregulloret, objektet dhe të tjera. Drejtoresha Krasniqi, duke i inkurajuar të rinjtë për punën vullnetarët, tha se “mbështetja e Komunës, nuk do të mungoj”.
Më pas, është bërë edhe prezantimi i një pyetësori, ku janë përfshi 500 të rinj të Malishevës, ku përmes pyetjeve janë nxjerrë edhe opinionet e të rinjve për aktivitetet, rregulloret, problemet dhe nevojat që kanë të rinjtë e Komunës së Malishevës.
Pas prezantimit, është zhvilluar edhe një debat rreth këtij hulumtimi, ku janë përgëzuar vullnetarët e Qendrës së Rinisë, për këtë hulumtim të bërë.