Berat Batiu, shkrimtar nga Prizreni, tregon se meqë në afërsi e ka shtëpinë, shumë shpesh ka marrë ujë te ky krua i Beledijes.“Thuhet se është krua me ujë të mirë, sepse ai ujë thonë se vjen nga ‘Bjeshkët e Pashës’”, thotë ai
Prizreni, përveç tjerash, shquhet edhe për krojet e shumta. Ato i japin freski qytetit. Ata u shërbejnë qytetarëve dhe vizitorëve të shumtë për të shuar etjen gjatë verës. Por, për krojet e shumta të Prizrenit ka edhe shumë histori dhe gojëdhëna të ndryshme. Ato na i rrëfen edhe Bedri Çejku, i cili thotë se i mban mend qysh kur ishte fëmijë. Ai shprehet se ndër krojet më të mira në qytet është kroi i Beledijes, që sipas tij është i dobishëm edhe për shëndet. “Një ndër krojet më me famë në qytet është edhe Kroi i Beledijes”, tregon Çejku.
Ndërsa, shkrimtari Berat Batiu tregon se meqë e ka shtëpinë në afërsi të kroit, furnizohet nga ky ujë që është më i freskët se kudo tjetër. Ai thotë se edhe më të parët i kanë rrëfyer për “mrekullinë” e këtij uji. “Atëherë thuhej se është krua me ujë të mirë, sepse thonë se kishte ujin nga ‘Bjeshkët e Pashës’”, thotë Batiu. Ai shpjegon se emrin e ka marrë nga vetë objekti i Kuvendit Komunal të Prizrenit, që u ndërtua gjatë periudhës osmane, në shekullin XIX. “Kroi është ndërtuar në oborrin e Beledijes, siç quhet në gjuhën turke Kuvendi, gjatë shek. XIX. Kroi gjendej ndërmjet objektit të ,,Beledijes” dhe Xhamisë së Mustafë Pashës”, thotë Batiu, duke shtuar se në këtë vend kroi e kreu funksionin e vet primar që nga koha e ndërtimit e deri në vitin 1960.
Regjimi komunist nuk kurseu asgjë
Por, si shumë pasuri të tjera, edhe kroi do të pësojë fatin e njëjtë gjatë regjimit komunist. Kështu, asokohe lagjja pësoi ndryshime të papara. Xhamia e Mustafa Pashës u rrënua më 1952, kurse në anën e djathtë të lumit u asfaltua aksi rrugor nga ,,Tabakhana” e deri në ,,Marash”. Kroi që ndodhej në aks të rrugës, si rrjedhojë e ndërtimit të aksit rrugor, më 1963 u dislokua në “Sheshin e Dëshmoreve”, i cili gjendet në pjesën qendrore të qytetit, ndërmjet urës e Xhamisë së Arastës dhe Lidhjes Shqiptare të Prizrenit. Batiu shpjegon se kroi është i ndërtuar nga gurët gëlqerorë të latuar. Gjatë përpunimit, blloqeve të gurëve u është dhënë forma e katrorëve, me madhësi të ndryshme. Në pjesën e sipërme, në të katër anët e tij, ngrihen harqe, e mbi to është vendosur një gur gjysmësferik./kosova sot/