Drejtori i Policisë në Prizren, Nexhmi Krasniqi, nuk është kthyer në vendin e tij të punës. Ai është dërguar me punë në Gjakovë.
“Më kanë dërguar në Gjakovë”, tregon Krasniqi për PrizrenPress.
Krasniqi pasi ishte suspenduar nga Inspektorati Policor i Kosovës, javën e kaluar nënshkroi vendimin për kthimin e tij në pozitën e njëjtë të punës.
Ndërkaq, vendimi është ndryshuar pasi që Krasniqi ka dalë në vendin e punës.
“Unë kam nënshkruar dhe jam kthyer në pozitën e njëjtë që e kam pasur para suspendimit, mirëpo pas orarit të punës ka ardhur një vendim tjetër dhe jam transferuar në Gjakovë”, tregon ai.
Inspektorati Policor i Kosovës (IPK) në shtatorin e vitit të kaluar i kishte rekomanduar Policisë së Kosovës suspendimin e drejtorit të Drejtorisë Rajonale të Policisë së Prizrenit, Nexhmi Krasniqit, së bashku me Besim Rexhepin, udhëheqës në sektorin e hetimeve të vrasjeve, nën dyshimin se nga informacionet që posedonte IPK kishte ankesa nga qytetarët ndaj tyre.
Rexhepi ishte kthyer në punë rreth dy muaj më parë, ndërsa javën e kaluar kthimin në punë e nënshkroi edhe drejtori Krasniqi. /PrizrenPress.com/