Analistë dhe politikanë thonë se janë krijuar kushte të mjaftueshme për zgjedhje të reja. Kurse ndryshim të skenës politike, sipas tyre, mund të ketë nëse ofrohet një strukturë krejtësisht e paprovuar
Qysh prej shpalljes së Pavarësisë, në vitin 2008, pritjet e qytetarëve ishin të mëdha, e të mëdha ishin edhe dështimet, keqpërdorimet dhe skandalet.
Lidershipi i vendit pati mjaftueshëm kohë për të dëshmuar veten. Ata i patën 16 vjet, nëse marrim kohën prej kur Kosova u vendos nën protektoratin e Organizatës së Kombeve të Bashkuara (OKB) dhe gati se 8 vjet të plota që prej shpalljes së Pavarësisë dhe fillimit të krijimit të institucioneve nën logon e re të Republikës së Kosovës. Shikuar në vija të trasha, fillimi i vitit 2015 u shënua me ikje masive të qytetarëve nga vendi dhe mbaroi me një Parlament jofunksional dhe me tensione të mëdha në mes të koalicionit qeverisës (PDK-LDK) dhe opozitës (VV, AAK dhe NISMA).
Politologu Albinot Maloku për Kosova Sot thotë që janë krijuar kushte të mjaftueshme për zgjedhje të reja.
“Nisur nga rrethanat dhe situatat e krijuara prej pas zgjedhjeve të fundit parlamentare në Kosovë, e sidomos bllokadës së parë nga VLAN-i, për më shumë se gjashtë muaj, e pastaj edhe kriza e fundit pas zgjedhjes së Isa Mustafës kryeministër, shteti i Kosovës ka krijuar predispozita të mjaftueshme për zgjedhje të reja. Zgjedhjet e reja nuk janë oferta më e mirë, por opsioni i vetëm, tek i cili mund të shpresohet për normalizim të mirëfilltë të jetës institucionale, shtetërore e politike në vend. Ndryshim të skenës politike mund të ketë nëse krijohen opsione të reja politike, me garnitura krejtësisht të paprovuara’’, tha Maloku. /Kosova Sot