Për shkak të mungesës së numrave partitë opozitare nuk do të mund të thirrin seancë të jashtëzakonshme në Kuvendin e Kosovës.
Këtë e ka dëshmuar edhe iniciative e grupit parlamentar e AAK-së për të debatuar për çështjen e migrimit ilegal, e cila i ka mbledhur gjithsejtë 35 nënshkrime.Përderisa për një seancë të jashtëzakonshme kërkohen dyzet vota (nënshkrime), partitë opozitare i kanë tridhjetë e tri sosh.
Monitoruesi i punës së Kuvendit nga KDI-ja, Driton Selmanaj, ka thënë për “Epokën e re”, se mungesa e numrave do t’i krijojë telashe opozitës për ta luajtur rolin e saj gjatë kësaj legjislature.
“Në Kosovë kemi një opozitë të dobët sa iu përket numrave dhe roli i sa mund të jetë më shumë pikëpyetje në monitorimin ose në mbikëqyrjen e Qeverisë së Kosovës. Për demokracinë ky nuk është lajm i mirë sepse opozita konstruktive është ajo e cila realisht tregon për nivelin e demokracisë në një vend. Meqë dy partitë më të mëdha e qeverisin vendin, pra kanë shumicë absolute, do ta lënë në hije bllokun e partive opozitare. Kjo është e dëmshme për demokracinë”, ka thënë Selmanaj.