Të paktën 15 policë mbetët të plagosur gjatë ditës së hënë në Baltimore të Shteteve të Bashkuara, në protestat e dhunshme, të cilat shpërthyen pas ceremonisë së varrimit të 25 vjeçarit me ngjyrë, Freddie Gray, i cili ndërroi jetë nga plagët në kurriz që i kishte pësuar në rrethana të paqarta gjatë kohës që ishte në paraburgim gjatë këtij muaji.
Me qindra të rinj dolën në rrugë të hënën duke u përleshur me forcat e policisë. Ata hodhën gurë, tulla dhe shishe mbi policinë e cila u përgjigj me gaz lotsjellës në përpjekje për të shpërndarë protestuesit.
Trazirat nisën pranë zonës ku u varros 25-vjeçari dhe me shpejtësi u përhapën nëpër pjesë të ndryshme të Baltimores. Këto janë demonstratat më të dhunshme në Shtetet e Bashkuara që prej ngjarjeve në Ferguson, Misuri, vitin e kaluar.
Guvernatori i Mariland, Larry Hogan, shpalli gjendjen e jashtëzakonshme, ndërsa u aktivizua edhe Garda Kombëtare. Në anën tjetër zjarrfikësit u përpoqën për të shuar zjarret e vënë nga protestuesit.
Një zyrtarë i policisë bëri të ditur se me dhjetëra protestues janë arrestuar, ndërsa konfirmoi se 15 oficerë të policisë janë plagosur, nga të cilët dy janë më rëndë.
Pamjet e transmetuara nga mediat ndërkombëtare tregojnë një ndërtesë të madhe e përfshirë nga flakët, ndërsa zjarri i është vënë edhe disa makinave të forcave të policisë.
Policia ka thënë se në protestë janë përfshirë shumë të rinj dhe i ka bërë thirrje prindërve t’i kthejnë fëmijët e tyre në shtëpi. / Top Channel /