Kryeshefi Ekzekutiv i Inspektoratit Policor të Kosovës, Fitim Shishani, me vendim ka suspenduar me pagesë dy hetues të Inspektoratit Policor të Kosovës (IPK) pasi që veprimet e tyre kanë rënë ndesh me udhëzimet administrative që rregullojnë disiplinën në Inspektoratin Policor të Kosovës, transmeton RTK.
”Vendimi për suspendim bazohet në nenin 22 paragrafi 2 pika 2.2. të Udhëzimit Administrativ Nr. 13/MPB-2011, për përcaktimin e shkeljeve, masave disiplinore dhe procedurës disiplinore ndaj punonjësve të IPK-së.
Inspektorati Policor i Kosovës si agjenci ekzekutive mbikëqyrëse për Policinë e Kosovës, i garanton qytetarët e Republikës së Kosovës se në vazhdimësi do të përmirësojë dhe fuqizojë mekanizmin e vet-kontrollit brenda organizatës.
Inspektorati Policor i Kosovës është i vetëdijshëm që për të realizuar misionin ligjor, punonjësit e IPK-së duhet të karakterizohen nga integriteti dhe profesionalizmi”, thuhet në njoftim.