Fillimi i vitit të ri shkollor në Gjonaj,fshatin më të madh të Hasit të Prizrenit, nuk është mirëpritur nga një pjesë e banorëve të këtij lokaliteti.
Përfaqësuesi i fshatit, Haziz Hodaj, i cili është edhe zyrtar i lartë i degës së LDK-së në Prizren,thotë se shqetësues është fakti për banorët e këtij fshati përfshirë edhe nxënësit vonesa e projektit në rregullimin e objektit shkollor, gurthemeli i të cilit është vënë para tre vitesh.
Ai thotë se në vend se objekti të ishte i gatshëm që të vihet në dispozicion të rreth 1 mijë nxënësve, ai po dëmtohet nga njerëz të papërgjegjshëm sepse është lënë pasdore. Ai me këtë rast akuzon pushtetin lokal për papërgjegjësi ndaj qytetarëve e posaçërisht fëmijeve të këtij lokaliteti.
Në anën tjetër, drejtori komunal për arsim në Prizren, Nexhat Çoçaj,thotë se ishte Haziz Hodaj që kësaj çështje po i jep ngjyrime politike, pasi që sipas tij zyrtari i LDK-së ishte personi që për 7 muaj e pengoi fillimin e realizimit të këtij projekti, ndërsa më vonë për shkak të disa procedurave ligjore nuk është përfunduar i tërë projekti, theksoi ai.
Drejtori Çoçaj, tha në fund se projekti i shumëpërfolur në Gjonaj pritet të përfundojë gjatë muajit në vijim, e më pas do të bëhet inventarizimi i tij dhe do të jetë i gatshëm për ti shërbyer nxënësve të këtij lokaliteti. Përderisa të jetë i gatshëm ky objekt, nxënësit e këtij lokaliteti edhe për një kohë mësimet do t’i ndjekin në objektet e vjetra në kushte tej të vështira.
Ky rast nuk është i vetmi në komunën e Prizrenit. Ndërtimi i shkollës së mesme të mjekësisë ka filluar para 5 vitesh dhe punimet e tërësishme në këtë objekt, sipas deklaratave të zyrtarë komunal të arsimit pritet të përfundojnë në fund të vitit./TV Prizreni/