Prokuroria Themelore në Prizren, Departamenti i Përgjithshëm, ka nxjerrë aktvendim për fillimin e hetimeve kundër të pandehurit, R.K. me dyshimin se ka penguar personin zyrtar në kryerjen e detyrës zyrtare.
I pandehuri R.K. dyshohet se më datë 01 tetor 2015 dhe 12 tetor 2015, ka penguar personin zyrtar në kryerjen e detyrave zyrtare.
Derisa gjyqtari, Agron Hoxha, ishte duke mbajtur seancën në çështjen juridike rikthim në gjendjen e mëparshme, i pandehuri e kanos me fjalët: “Nëse ju dëshironi që të vdisni si gjyqtar dhe si palë, atëherë edhe unë do të vdes dhe do të mbroj pronën time”, ku gjyqtarit më tej ia pamundëson mbajtjen e seancës gjyqësore.
I pandehuri me këto veprime ka kryer vepër penale pengim i personit zyrtar në kryerjen e detyrave zyrtare nga neni 409 paragrafi 5 lidhur me paragrafin 1 të KP-së.
Po ashtu, më datë 12 tetor 2015, i pandehuri R.K., seriozisht ka kanosur me fjalë të dëmtuarin N.P., palë në procedurë, më qëllim të frikësimit ose të shkaktimit të ankthit. Gjatë seancës përmbaruese në vendin e ngjarjes, e kanos me fjalët: “unë po të them mos hyj në pronën time, po nëse hyn, unë kam me të ngre zhag”. Me këto veprime i pandehuri R.K., ka kryer veprën penale kanosje nga neni 185 paragrafi 1 të KP-së. Prokuroria e Prizrenit ka bërë kërkesë në Gjykatën Themelore të Prizrenit, për caktimin e paraburgimit.