Bllokimi i Kuvendit lë vetëm një alternativë
Kur nuk funksionon Legjislativi, trokasin votimet e parakohshme
“Më e rëndësishmja në këtë kohë është të pajtohen qytetarët ndërmjet veti, të organizohen dhe ta përmbysin këtë garniturë të papërgjegjshme mafioze. Kjo nuk ka të bëjë me luftë politike për pushtet, por me obligim demokratik për ndëshkimin e tiranisë, që t’i hapë rrugë demokracisë dhe zhvillimit të ekonomisë së tregut”, tha analisti Isa Mulaj për “Kosova Sot”
Qëndrimi i palëkundur i frontit opozitar në Kuvendin e Kosovës, për të mos lejuar mbajtjen e asnjë seance të rregullt, me përjashtim të dy-tri seancave të veçanta dhe ceremoniale, sipas analistëve politikë do të imponojë patjetër marrjen e vendimit për ndërprerjen e mandatit të këtij koalicioni qeverisës dhe dërgimin e vendit në zgjedhje të reja parlamentare. Nevoja e një vendimi të tillë bëhet edhe më emergjente kur dihet fakti se tanimë edhe plani legjislativ i Qeverisë po mbetet vetëm një letër e pavlerë, për shkak të bllokimit të Kuvendit, madje me mundësi reale të rrezikimit të pamundësisë së miratimit edhe të Ligjit të buxhetit për vitin që vjen.
Analisti politik Ali Hertica thotë se politika, e cila po zbatohet në Kuvend dhe jashtë tij nga ana e opozitës, me bllokimin e institucioneve, pretendon që gjithsesi ta çojë Kosovën në zgjedhje të parakohshme. Sipas tij, ky qëllim do të mbërrihet duke e bllokuar në çdo mënyrë Parlamentin, që mos të zhvillohen seanca normale të një shteti demokratik, duke përdorë çdo mënyrë që Parlamenti të mos funksionojë fare dhe detyrimisht vendi të shkojë në zgjedhje…/kosova sot/