Zyrtarët e Komunës së Prizrenit, Nexhmedin Musliu dhe Refki Musbeg, të cilët akuzoheshin për keqpërdorim të pozitës zyrtare, të hënën, janë shpallur të pafajshëm nga Gjykata Themelore në Prizren.
Sipas aktgjykimi të shpallur nga kryetarja e trupit gjykues, Ajser Skenderi, nuk është arritur të provohet se të njejtit e kanë kryer veprën penale me të cilën ngarkoheshin.
Nexhmedin Musliu akuzohej se në cilësinë e Inspektorit Komunal për ndërtim, pasi ka dalë në vendngjarje, nuk ka ndaluar rrënimin e objektit të trashëgimisë kulturore “Hani i Mullafazlive”, por vetëm ka urdhëruar që të hiqen mbetjet nga rrënimi i tij.
Ndërsa, Refki Musbegu akuzohej se duke qenë bashkëpunëtor profesional në Drejtorinë e Urbanizmit të Komunës së Prizrenit, nuk i është përgjigjur kërkesë për leje-rrënim të objektit “Hani i Mullafazlive” të parashtruar nga familja Mullafazliu, me ç’rast, pronari i ri ka vepruar duke rrëzuar objektin në fjalë./betimiperdrejtesi/