Kryetari i Komunës së Suharekës, Sali Asllanaj, ka pritur të mërkurën në zyren e tij, komandantin e trupave paqeruajtëse të Brigadës shumëkombëshe Jug të KFOR-it, dhe komandant i KFOR-it turk në Kosovë, kolonelin Mustafa Tavazar.
Koloneli Tavazar në këtë takim me kryetarin e Komunës së Suharekës ishte i shoqëruar edhe nga përfaqësues të LMT-së austriake në Suharekë.
Gjatë këtij takimi kryetari Asllanaj e ka njoftuar kolonelin Tavazar me situatën politike dhe të sigurisë në Komunën e Suharekës si dhe kanë biseduar edhe për bashkëpunimin e mirë që e ka Komuna e Suharekës me KFOR-in, përkatësisht me CIMIC-un dhe me LMT-në që veprojnë në Suharekë.
Gjatë kësaj bisede që më shumë ishte miqësore se sa zyrtare janë shkëmbyer edhe disa dhurata modeste si shenjë respekti për vizitën e bërë.
Kryetari Asllanaj dhe koloneli Tavazar janë dakorduar që bashkëpunimi mes ushtarëve të KFOR-it dhe Komunës së Suharekës të vazhdojë edhe më tutje, thuhet në njoftimin e zyrës për informim të Komunës së Suharekës