Kryesia e LDK-së në Prizren, do të mblidhet sot për të diskutuar dhe vendosur për bashkëqeverisjen me Vetëvendosjen.
“ Të hënën do të mblidhet Kryesia dhe do të dalim me vendimin përfundimtar”, ka konfirmuar për RTV Besa, kryetari i LDK-së në Prizren, Haxhi Avdyli.
Ai, dje ka thënë për RTK-në se me VV-në kanë mbetur të diskutohen edhe disa detaje për qeverinë e ardhshme të Prizrenit.
“Jemi për një qeverisje konstruktive”, ka thënë Avdyli për RTK-në.
Ndonëse në parim është biseduar më krerët e Vetëvendosjes, sipas tij, ende nuk kanë detaje se si do të duket qeverisja e ardhshme .
Kryetari i Vetëvendosjes në Prizren, Artan Abrashi, ka thënë për RTK-në se marrëveshjet me partnerët e koalicionit janë drejt përfundimit.
Sipas tij, LDK-ja do të ketë tri drejtori dhe nënkryetarin, Nisma do t`i ketë tri drejtori dhe partitë minoritare mund të kenë nga një drejtori,”.
Ndërkaq, burimet e “PrizrenPress”-it bëjnë të ditur se VV dhe LDK, pritet që marrëveshjen e bashkëqeverisjes ta nënshkruajnë javën e ardhshme./ PrizrenPress.com/