Mediat ruse kanë përgëzuar një pilot të vrarë në Siri si një hero, duke thënë se ai kishte shpërthyer një granatë për të mos u kapur nga xhihadistët që kishin rrëzuar avionin e tij.
Fjalët e fundit të Roman Filipov ishin: “Kjo është për djemtë”.
Piloti raportoi në radio se ishte goditur nga një raketë, përpara se të hidhej nga aeroplani.
Aeroplani i tij Suhoi-25 u rrëzua mbi provincën Idlib të mbizotëruar nga rebelët. Ai u hodh me katapultë, por ra në një zonë të kontrolluar nga rebelët.
TV Zvezda, e cila kontrollohet nga ministria e mbrojtjes e Rusisë, tha se piloti u nderua pas vdekjes me medaljen e Heroit të Rusisë, e njohur edhe si Ylli i Artë.
BBC nuk ka qenë në gjendje të verifikojë në mënyrë të pavarur se si u morën këto informacione.
Grupi i monitorimit me bazë në Mbretërinë e Bashkuar, Observatori Sirian për të Drejtat e Njeriut më herët tha se luftëtarët kishin kapur pilotin dhe më vonë e kishin vrarë atë.