Kandidati i Partisë Konservatore të Kosovës për kryetar të Prizrenit, Beni Kizolli, në kuadër të aktiviteteve të shumta partiake dhe vizitave jashtë vendit është takuar me Drejtorin për Riciklimin e Mbeturinave, Zeki Terioglu, që funksionon në kuadër të Ministrisë së Ambientit dhe Mjedisit të Republikës së Turqisë në Ankara. Kizolli është informuar nga dora e parë për proceset e riciklimit të mbeturinave në Turqi, për rezultatet e arritura dhe rëndësinë dhe ndikimin e kësaj fushe në ekonominë e një vendi dhe në sigurimin e ambientit të pastër.
“Pasi që partia Konservatore e Kosovës është e përkushtuar në rregullimin e kësaj çështjeje kronike dhe të administrimit më të mirë të mbeturinave në vend, njohuritë e përfituara nga kjo vizitë do të zbatohen edhe në vendin tonë. Menaxhimi i suksesshëm i mbledhjes dhe riciklimit të mbeturinave është po ashtu një biznes profitabil që do të ndikojë pozitivisht në ekonominë e Prizrenit dhe në punësimin e qytetarëve tanë” tha Kizolli.
Në vazhdën e aktiviteteve Kizolli është takuar edhe me Adem Dogan nga kompania për deponimin dhe paketimin e mbeturinave ALSTA ne Ankara, ku si lëndë e parë përdoret letra, plastika dhe xhami.
Partia Konservatore e Kosovës dhe Beni Kizolli kanë shqyrtuar mundësitë e nënshkrimit të një marrëveshje me komunën e Keçiorenit të Turqisë për organizimin, mbledhjen, përpunimin dhe paketimin e mbeturinave.
Një takim i suksesshëm është mbajtur edhe ndërmjet Beni Kizolli dhe Z. Mursel Turbay, Drejtor i Sindikatës së nëpunësve komunal Ben-Bir-Sen, ku janë diskutuar çështjet për mbrojtjen e të drejtave të nëpunësve komunal. /PrizrenPress.com /