Drejtori i Administratës në Prizren, Osman Hajdari tha se ndërtimi i bustit të Skënderbeut , si dhe shtatores së Adem Jasharit në Prizren janë projekte serioze dhe se nuk duhet të ketë nxitim në këtë drejtim.
Sipas tij, projekti i bustit mund të realizohet më shpejt, ndërsa shtatorja kërkon përgatitje më të madhe.
“Nëse vendosim me i ba, duhet me i ba mirë e jo shkel e shko”, tha Osmani.
“Prandaj, nuk bën të ngutemi . E realizojmë , por mirë”, tha ai.
Këshilltarët e Kuvendit të Komunës së Prizrenit të premten me shumicë votash kanë miratuar vendimin për ngritjen e bustit të Skënderbeut, si dhe shtatores së Adem Jasharit në Prizren.
Sipas tyre, vendosja e bustit dhe shtatores të këtyre figurave të historisë kombëtare e nderon qytetin e vjetër, shkruan sot Koha Ditore.
Ndërkohë kërkesa e anëtarëve të caktuar që këto projekte të jetësohen në afatin sa më të shpejtë kohor ka hasur në përgjigjen e zyrtarëve të Ekzekutivit se nuk duhet punuar me nxitim, ashtu që busti dhe shtatorja të punohen në mënyrën e duhur dhe të vendosen në lokacione adekuate.
Diskutimi rreth mundësisë për ngritjen e bustit të Skënderbeut dhe shtatores së Adem Jasharit është shtuar në rend të ditës për seancën e KK-së pas kërkesave të parashtruara në mbledhjen e fundit të KPF-së.