Tre nxënës të shkollës fillore “ Dy dëshmorët” në Piranë të Prizrenit, javën e kaluar, e lëshuan Kosovën.
Ata, u përshëndetën me shokët e klasës, me lot në sy.
Nxënësit braktisën shokët, shkollën dhe vendin e tyre, për t’iu bashkuar prindërve në mërgim.
Numri i kosovarëve që duan ta braktisin atdheun, po rritet dita-ditë.
Afro 300 qytetarë të Prizrenit, ndërkaq vitin e kaluar hoqën dorë nga shtetësia e Kosovës.
Drejtori i Administratës në Prizren, Osman Hajdari tha se numri i aplikuarve për të hequr dorë nga shtetësia, gjatë vitit të kaluar, ka qenë shqetësuese.
“Gjatë vitit 2018-të, kanë kërkuar të heqin dorë nga shtetësia e Kosovës 294 persona”, tregon Hajdari, për “PrizrenPress”.
Sipas tij, trendi i heqjes dorë nga shtetësia, krahasuar me vitin 2017-të, ka qenë i njëjtë në vitin 2018-të.
Ndërkaq, qytetarët konsiderojnë se një nga arsyet e lirimit të qytetarëve nga nënshtetësia e Kosovës dhe marrja e shtetësisë së një shteti tjetër, përveç tjerash, është edhe ngecja që ka shënuar vendi në zhvillimin e gjithmbarshme, në veçanti atë ekonomik.
“Gjendja e rëndë ekonomike dhe paperspektiva në Kosovë është një arsye më shumë” , thotë Besim Berisha nga Prizreni.
Sipas tij, numri i qytetarëve të Kosovës që jetojnë në vende të ndryshme të botës, e të cilët do të heqin dorë nga nënshtetësia e vendit të tyre, mund të rritet në të ardhmen, për shkak se mundësitë që iu ofrojnë shtet ku ata jetojnë, janë shumë më të mëdha sesa çfarë iu ofron Kosova./PrizrenPress.com/