Deputeti i LDK-së Anton Çuni, ka deklaruar se ka pasur shkelje në rastin e depërtimit të gjashtë shtetasve turq nga Kosova, që ndodhi pothuajse një vit më parë.
Sipas tij këto janë gjetjet e komisionit hetimor, i cili u formuar për të hetuar këtë rast, mirëpo ai ka theksuar se puna e këtij komisioni ende nuk ka përfunduar.
“Pas disamuajsh kemi ardhur deri tek disa përfundimet se ka pasur shkelje ligjore. Nuk kemi arritur si komision të përfundojmë punën e kemi kërkuar afat shtesë që nuk është marre parasysh nuk ju është paraqite deputetëve”.
“Ka pasur tejkalim të kompetencave, të autorizimeve dhe ka pasur ndërhyrje të autoriteteve. Posaçërisht AKI-ja është keqpërdorë për të kryer një veprim antiligjor dhe antikushtetues”.
Çuni në Sytë 7 në Klan Kosova diskutoi edhe për Gjykatën Speciale, me ç’rast tha se nuk ka pranuar kurfar ftesë nga kjo gjykatë.
Ai gjithashtu foli edhe për situatën politike të krijuar së fundmi dhe rolin LDK-së.
“Është çështje numrave. Dihet forca e LDK-së me numrin e deputetëve që i ka në parlament. Ne momentin që i kemi numrat nuk do të hezitojmë ta ndërmarrim hapin për rrëzimin e qeverisë”, njofton Klan Kosova.