Autoritetet komunale të Suharekës, të mërkurën, kanë reaguar lidhur me dëmtimin e shtyllave, përkatësisht ndriçimit publik në vendin e quajtur “Shtigjet e ecjes”.
Zyrtarët e Policisë së Kosovës kanë konfirmuar se do të zhvillojnë hetime lidhur me dëmtimin e pronës në këtë hapësirë, paralelisht me shtimin e patrullimeve në orët e natës. Bazuar në informatat fillestare të Policisë, këto shtylla mund të jenë dëmtuar nga të rinj të caktuar që frekuentojnë “Shtigjet e ecjes”, shkruan sot Koha Ditore.
Kryetari i Komunës së Suharekës, Bali Muharremaj, ka vlerësuar se “ndriçimi është dëmtuar rëndë në disa shtylla tek ‘Shtigjet e ecjes’ në Suharekë”.
“Persona të pandërgjegjshëm po e dëmtojnë qëllimisht pronën publike, dhe hapësirat të cilat i shfrytëzojnë qytetarët për shëndetin e tyre”, ka theksuar Muharremaj në rrjetet sociale. Për këtë arsye ka kërkuar që organet përkatëse të veprojnë në ruajtjen e pasurisë publike.